Comunicación

De marzu a xunu d’esti añu va celebrase la primer edición d’un cursu d’especialista nel campu de les redes sociales, qu’otorga’l títulu d’Especialista en Social Media Management espedíu por ESNE Asturies. Amás inclúi práctiques n’empreses ya instituciones asturianes de gran relevancia como parte de la formación.

El profesoráu tará compuestu por profesionales en caúna de les árees, teniendo esti programa formativu vocación práctica, con vistes a una inmediata incorporación al mercáu llaboral, bien como asalariáu o como emprendedor.

El cursu va facese los vienres y sábados del 18 de marzu al 11 de xunu y tienun preciu de 2.250 euros, financiables.

El Cursu d’Especialista en Social Media Management d’ESNE respuende según los sos organizadores “a la necesidá que demanden les empreses a la de buscar perfiles profesionales capaces d’ufiertar soluciones a la Xestión de Comunidaes y Web 2.0”.

El cusu ta empobináu a estudiantes universitarios y profesionales del campu de la comunicación.

Web de la entidá organizadora del cursu

La TPA aprovecha’l premiu que-y da la Xunta pola Denfensa de la Llingua Asturiana al programa Camín de Cantares, presentáu por Xosé Ambás y dirixíu por Ramón Lluís Bande, p’apuntase un tantu. La canal asturiana afima que’l gallardón “premia l’apueste de la televisión autonómica pola promoción del asturianu”. Pa la TPA “la Xunta Pola Defensa de la Llingua Asturiana reconoz a TPA pola so recuperación de la tradición musical de la rexón”.

El programa Camín de Cantares de TPA va recibir esti “Pegollu” de los XXVI Premios Andrés Solar esti sábadu nel Vieyu Institutu de Xixón. Un premiu que la XPDLLA entregó al programa y que TPA quixo estender a tol so llabor nun comunicáu, nel que nin siquiera se respetaba la toponimía oficial.

La nota de prensa llega a modificar la redacción de la nota sacada pola Xunta añadiendo a la TPA ente los reconocíos col premiu: “el trabajo de TPA y de todo el equipo de Camín de Cantares…”, pue lleese nel comunicáu.

Nota de prensa orixinal de TPA

Xuventú Asturianista, organización moza del Partíu Asturianista, anunció al traviés d’un comunicáu la so esixencia a la Corporación Radio Televisión Española de cambiar de nome’l so informativu territorial n’Asturies, que dende va décades recibe’l nome de “Panorama Regional”, por un nome acordies cola realidá “que nun trate d’esconder el nome d’Astuies”. Amás esixen a TPA y TVE qu’ún de los dos faiga’l so informativu n’asturianu, “pues los asturianos, tamos pagando dos equipos d’información pa ufiertar el mesmu productu: un informativu sobro Asturies fechu pola TPA y otru por TVE, y los dos en castellán”.

El cambiu de nome de Panorama Regional respuende a lo que Xuventú Asturianista considera un agraviu, “nes distintes comunidaes autónomes los Informativos de TVE reciben nomes como Noticias de Castilla y León, Informativo de Madrid, Telexornal-Galicia, Informatiu-Baleares…”, mientres que ye n’Asturies l’únicu col “términu anticuáu y que lo que busca ye minusvalorar el calter d’Asturies”.

Dende Xuventú Asturianista que se quier esconder “la nuesa llingua y el nome del nuesu país” y recuerden “qu’anque nel pasáu l’asturianu tuvo espacios nes emisiones del Centru Territorial de TVE n’Asturies, agora nun cunta con nenguna”.

Pa Xuventú “sedría interesante que se diversificara la ufierta respondiendo a la realidá billingüe d’Asturies, emitiendo caún nunu de los dos idiomes” y reclama por tanto’l cambiu de nome del informativu d’Asturies de RTVE y “que ésti, o’l de la TPA, seya emitíu en llingua asturiana”.

El viniente 28 de payares, va ñacer en Cataluña un nuevu mediu escritu ya impresu en papel, el diariu Ara, que se suma a otros como’l célebre Avui. La industria de la información en catalán sigue medrando pesie a la crisis mundial que vive’l sector. Nel proyectu d’Ara participen periodistes como Toni Soler, Xavier Bosch o Antoni Bassas, siendo los redactores, amás, accionistes del periódicu. Ente los oxetivos del mesmu ta ser “més que un diari convencional”, convirtiéndose nun “diari sense fronteres mentals”.

Amás, nos próximos meses va entamar a imprimise una versión en catalán del diariu La Vanguardia, como vien faciéndose dende los noventa col Periódico de Catalunya. A estes iniciatives súmase la del diariu Avui, que va dar un pasu más na so fusión con El Punt.

La llingua catalana ye una de les minorizaes meyor posicionaes, con decenes de cabeceres editaes, dellos canales como TV3, Canal9 o Canal Catalá y centenares d’emisores de calter nacional y llocal.

Páxina del nuevu diariu en catalán

Uviéu Televisión estrena esti xueves a les nueve y media la nueche un programa nuevu n’asturianu, “El noticieru”, un espaciu de 45 minutos que’l so presentador, Xosé Lluis Remis califica como “amiestu ente magacín ya informativu” y nel que va haber tiempu pal resume de noticies, les entrevistes, informativa lliteraria, axenda, el tiempu y otres estayes.

El programa, que pue vese na canal llocal uvieína, emítese pela TDT y Telecable y entama con un espaciu de cinco minutos dedicáu a los más pequeños, con dibuxos animaos n’asturianu, fechos pol equipu del programa. Darréu una entrevista, que pal primer programa tien como convidáu al escritor Xuan Bello, un reportaxe d’actualidá, espaciu pa los les novedaes lliteraries, l’axenda y el tiempu de la fin de selmana.

Un nuevu espaciu pal asturianu que se suma a los esistentes en televisiones como Canal10 o la TPA, ente otros.

La Universidá d’Uviéu, en collaboración con FENA Business School y con “Inxeniu” Internet Media, organiza la conferencia “Redes 2.0” que va tener llugar el xueves 28 d’ochobre a les 12.00 hores nel Aula Magna de la Facultá de Derechu, nel Campus d’El Cristu, d’Uviéu.

L’actu va Cuntar cola presencia como ponente de Javier Prieto, Director d’Estratexa ya Innovación d'”Inxeniu” Internet Media, recibiendo los asistentes diploma acreditativu.

La periodista, ex directora de Les Noticies, va tar esti miércoles 20 d’ochobre a les 18:30 h. na Casona del Bravial de Blimea cola conferencia titulada “¿Ú tán les muyeres? Ausencies y presencies femenines nos medios de comunicación”. Na charra va comentar el tratu que se-yos da a les muyeres nos diferentes medios de comunicación.

L’actu, organizáu pola Oficina de Normalización Llingüística de SRA, va presentalu la conceyala de cultura del Ayuntamientu de Samartín del Rei Aurelio, Gema Suárez Torre.

El Conseyu de la Mocedá de Xixón (CMX) entama un ciclu d’alderiques y unos talleres teórico-prácticos alredor de les “Redes sociales, ferramientes pa les Asociaciones Xuveniles”. Los alderiques van ser los díes 19, 20, 25 y 26 d’ochobre nel Centru Municipal d’El Coto, a les 5 la tarde.

El taller va facese ente’l 8 y l’11 de payares, n’horariu de 4 a 8 la tarde. La inscripción ye gratuita y única: inclúi tanto’l taller como los alderiques.

Porgrama completu d’actividaes

La Unión Xeneral de Trabayadores d’Asturies (UXT) celebra esti xueves 14, en La Llabora del Xixón, un foru embaxo’l títulu “Les industries culturales n’Asturies: fortalecimientu, cohexón y vertebración pa la creación d’empléu”. L’actu van inauguralu Mercedes Álvarez, Conseyera de Cultura y Turismu d’Asturies; Paz Férnadez Felgueroso, Alcaldesa de Xixón y Justo Rodríguez Braga, Secretariu Xeneral d’UXT Asturies. Amás, a les 10 de la mañana, les Juventudes Musicales van ufrir una actuación.

A les 11 va celebrase una mesa redonda alredor de “La Industria Cultural n’España”. Tornando dempués d’una posa a les 12, con “Situación de los sectores qu’integren les Industries Culturales Asturianes”, por Jorge Fernández León, Vice Conseyeru de Promoción Cultural y Política Llingüística. La xinta va basase nuna preba de productos asturianos.

A les trés y media la tarde, una mesa redonda va tratar los “Retos, propuestes ya internalización de la Empresa Cultural Asturiana”, con Fermín de Con Longo, de FES-UXT Asturies; José Luís García-Bericua, presidente de l’AEPA; José Antonio Rodríguez-Bron, presidente de l’Asociación de la Prensa d’Uviéu; Iván Fernández Lobo, Director de la Feria Internacional del Videoxuegu GAMELAB; Carmen Caballero, presidenta de la Fundación Cultural Asturias; y Miguel Álvarez Areces, presidente de l’Asociación INCUNA.

A les seis va clausurase, faciendo una hora más tarde una visita guiada al edificiu de La Llaboral Ciudá de la Cultura.

Esti sábadu pasáu entamó la octava temporada de Camín de Cantares, espaciu conducíu por Xosé Ambás na TPA, que dedicó’l primer programa a Isabel de Mieldes (nel partíu de Sierra del conceyu de Cangas del Narcea). La temporada presente, que s’echa los sábados pela mañana, va llevar a los televidentes asturianos a conocer patrimoniu llingüísticu y cultural común de Lleón, Zamora y Miranda del Douru, en Portugal.

Seis programes van tar distribuyíos pela xeografía asturiana, trés van desplazase hasta Lleón, ún a Zamora, dos hasta Miranda del Douru (Portugal) y otru hasta Peñaparda (Salamanca).