Comunicación

Esti sábadu, a les 13 hores, estrénase na TPA la nueva serie documental, “Camín”, continuación natural de “Camín de cantares”. Un programa nel que según el so directro Ramón Lluís Bande vuelven a proponer “un viaxe emocional y respetuosu pela nuestra cultura popular”. La serie propón, nos trece capítulos d’esta temporada, un viaxe per Asturies p’averase a les manifestaciones más guañaes de la cultura popular.

“Camín” amplía los sos conteníos nesta etapa pa recoyer formes de vida tradicionales: oficios, arquitectura popular, tradiciones, bailles, etcétera. La serie va averase tamién a los espectadores asturianos el trabayu de los cunqueiros, goxeros, madreñeros, teitadores y el procesu d’ellaboración del pan d’escanda, ente otres temes, xuntu cola música tradicional, los cantares y distintes manifestaciones de la cultura oral, que son l’alma del programa.

Cada capítulu va cuntar con dellos invitaos que van afondar nos distintos conteníos. Les sos aportaciones “van arriquecer la propuesta de los últimos años, averándonos, col mesmu rigor y respetu, a otres realidaes de la nuesa cultura tradicional que Camín de cantares nun trataba d’una manera directa”, según Ramón Lluís Bande y Xosé Ambás.

Los principales conteníos musicales de la serie van ser les asturianaes, los cantares pa la danza, los romances, los cuentos y un ampliu repertoriu de pandereta, que van contribuyir a realizar una semeya más afecha de les formes de vida que perviven na Asturies rural. Ambás va percorrer el país d’oriente a occidente p’amosar la diversidá y riqueza llingüística del asturianu, como yá yera característico de Camín de cantares.

Camín va visitar nos próximos capítulos los conceyos de Grau, Degaña, Cangas de Narcea, Somiedu, Ayer, L.lena, Tinéu y Valdés, ente otros.

Camín de Cantares estrenar en TPA’l 27 de marzu de 2007. El programa, que siempres cuntó con una gran aceptación popular, consiguió la so máxima cuota’l 9 de febreru de 2008 con un 30,2% de share. Nos últimos cuatro años el programa de TPA cumplió, según la TPA, “el so oxetivu principal de rescatar una parte importante de la cultura tradicional de los asturianos”.

L’especialista informáticu ya inxenieru de Telecomunicaciones Rubén Sánchez Antuña va presentar esti xueves el so caberu llibru “La metamorfosis de la caxa tonta”; un ensayu qu’analiza la hestoria de la televisión y que vieno acabante espublizar na editorial VTP.

L’actu ta organizáu pola Fundación de Cultura de Siero y va ser nel auditoriu de La Pola Siero, el xueves 19 de mayu a les 20:00 hores, cuntando cola participación de Víctor García García, Vicerrector d’Informática de la Universidá d’uviéu.

L’escritor Xuan Bello torna a la radio. Yá nos ochenta tuviere delles esperiencies en dalgunos de los primeros programes emitíos n’asturianu y agora llega a la Radios del Principáu d’Asturies (RPA) col programa “Clave de fondo”, col que quier “dignificar el formatu de la entrevista”. Nos trenta minutos de duración d’esti programa selmanal va falar con un personaxe de la vida cultural o política asturiana.

Nel primer programa, Bello faló con Víctor Manuel Márquez Pailos, prior asturianu del Monesteriu de Silos, al que van siguir, ente otros, Emilio Marcos Vallaure (director del Muséu de Belles Artes d’Asturies), Chema González (restaurador del Uviéu Antiguu, responsable del establecimientu La mar del medio), Xosé Manuel Valdés Costales (escritor y dueñu de la llibrería de llibru vieyo Anticuaria), Juan Luis Rodríguez Vigil (ex presidente d’Asturies), Concha Quintana (poeta llanisca), Kely Méndez (pintora) o Amélia Valcarcel (caderalga de Filosofía Moral y miembru del Conseyu d’Estáu).

L’espaciu emítese tolos domingos n’horariu de 21:30 a 22:00 hores, y pue sentise tamién en directo al traviés de la páxina web de la radiotelevisión asturiana (www.rtpa.es), onde van colgase cada selmana les entrevistes.

Ente les novedaes bibliográfiques de l’Academia de la Llingua Asturiana anunciaes pa 2011 pola so presidenta, Ana Cano, van tar nos meses vinientes dos de los sos proyectos de Cartafueyos Normativos y cartafueyos del Centru de Terminoloxía d’Asturies (TERMAST), el “Léxicu de los medios de comunicación: Prensa, Radio y TV”, iguáu y preparáu yá pa la imprenta, que l’ALLA espera poder ufrir bien llueu como númberu 7 de Cartafueyos Normativos, y que sigue al dedicáu a “Nomes de los países del mundu y de les sos capitales y xentilicios”, asoleyáu en 2010.

Según anunció Cano esti nuevu cartafueyu xébrase en dos estayes. La primera refierse propiamente al léxicu de la prensa, de la radio y de la TV, abarcando apartaos como la tipoloxía de la prensa escrita, la organización y funcionamientu del periódicu, la so estructura interna ya esterna, el léxicu xeneral del periódicu; la tipoloxía de les emisores y de la programación radiofónica, la organización y funcionamientu de la radio, el léxicu xeneral de la radio; la tipoloxía de les canales y de la programación de TV, la organización y funcionamientu de la TV o’l léxicu xeneral de la TV. Na segunda estaya úfrense les propuestes d’espresión y llocución nos medios de comunicación.

Amás, dientro del proyectu Termast, centru encargáu de la coordinación xeneral de les xeres terminolóxiques venceyaes a la llingua asturiana, a lo llargo d’esti añu amestáronse la Terminoloxía Física y la Terminoloxía Postal (a les estayes yá esistentes sobro Terminoloxía Médica, Terminoloxía Matemática, Terminoloxía Xurídica y Alministrativa y Términos básicos d’Economía y Empresa) y bien llueu podremos axuntar otres dos más, la Terminoloxía del Ámbitu Educativu y los Términos Básicos de la Música, que yá tán a puntu apaecer.

La presidenta fizo un brinde “a tolos especialistes en terminoloxía d’un campu específicu del saber pa que collaboren con nós y mos faigan llegar les sos propuestes”, col compromisu pela parte de l’ALLA, de “llueu de la necesaria pero rápida revisión, inxertales en TERMAST y poneles a disposición de los usuarios na rede”. Cano recordó que “serán los propios usuarios los qu’aconseyen col so usu o refugu’l que pasen o non a inxerise na normativa académica”.

Esti sábadu, 7 de mayu, a les 14:00 hores la Radio del Principáu d’Asturies (RPA) emite’l programa «Mánfer de la Llera, una ponte al Surdimientu», una emisión especial del programa Nomes d’Asturies na que se va percorrer, de forma novelada, la vida del autor al qu’esti añu se-y dedica la Selmana de les Lletres Asturianes.

El programa lleva nesta ocasión un guión d’Inaciu Galán, participando na grabación los actores Silvino Torre, Roberto Corte, Eva Vallines, Sabel Tuñón y Chechu García, director del programa, que lleva más de doscientos capítulos emitíos.

La programación de la TPA da anuncia de la emisión, a la una la mañana, na nueche del vienres pal sábadu, de la gala organizada pola Academia de la Llingua Asturiana con motivu de la so Xunta Estraordinaria añal. Nesti actu la insituticón noma a los sos nuevos académicos, y nesta ocasión, fai un homenaxe a la figura del ex ciclista Chechu Rubiera.

La emisión va poder siguise en llinia al traviés de la páxina web de la RTPA.

El xuráu del VII Certame Periodísticu “Moscones en Xixón” decidió otorgar el gallardón d’esta edición al trabayu “Grau, el mercadón de la cultura”, un reportaxe espublizáu pol diariu ASTURNEWS nel añu 2010 y del que ye autor Inaciu Galán y González. Esti domingu 1 de mayu va producise na villa de Grau la entrega, cola participación del Orfeón de Grau y la Banda de Gaites Villa de Mieres.

A les 12:30 de la mañana va entamar l’actu d’entrega cola actuación del Orfeón de Grau, pallabres del premiáu, del presidente de Moscones en Xixón, don Alfredo González Huerta, y del Alcalde de Grau, don Antonio Rey González. Finalizáu l’actu, el galardonáu y el restu d’asistentes sedrán recibíos pola Banda de Gaites Villa de Mieres, sirviéndose darréu un pinchéu a los asistentes a la entrega d’esti gallardón periodísticu dotáu con 1.200 euros.

Moscones en Xixón, con motivu del actu d’entrega y de la festividá de la Primer Flor, pon, de baldre, un autobús a disposición de los socios y públicu en xeneral. La salida sedrá dende Xixón, a disposición de los socios y públicu en xeneral. Saldrá de la Ilesia de Fátima, en La Calzada, a les diez de la mañana, y con paraes na Plaza de L’Habana, Xardinos de la Reina (Hotel Don Manuel) y na cai Menéndez Pelayo (parada l’autobús urbanu). El regresu fadráse a les ocho la tarde. Reserves y más información nos teléfonos 984 294 917 y 606 004 917.

Anque’l certame ta abiertu a obres en castellán y n’asturianu, esta ye la primer vegada que’l premiu va pa un trabayu redactáu n’asturianu nos siete años de vida del certame. Amás, ASTURNEWS ye’l primer mediu dixital que recibe esti gallardón, hasta agora otorgáu a trabayos espublizaos en La Nueva España y otros medios asoleyaos en papel, por periodistes como Luis Arias Argüelles-Meres, Lorena Valdés o César García Santiago.

Nel artículu premiáu Galán repasa les estremaes iniciatives y actividaes culturales que se desenrrollen en Grau “una montonera d’iniciatives culturales que trescienden del ámbitu moscón pa convertise nun focu d’emisión de cultura pa toa Asturies y pal restu del mundu”, en pallabres del propiu autor.

El programa de la televisión pública gallega, Bem falado! dedicó apocayá dos programes a dar a conocer la llingua asturiana n’Asturies y en Lleón, como “llingua vecina” del gallegu que ye. Amás, otru capítulu dedícose a la modalidá llingüística del Eo-Navia. Bem falado! ye un microespaciu de cuatro minutos diarios dedicaos a la llingua gallega, dirixíu y presentáu pol académicu Xesús Ferro Ruibal, y qu’afala y financia la Secretaría Xeneral de Política Llingüística de Galicia.

Capítulu sobre l’asturianu n’Asturies:

Capítulu sobre l’asturianu en Lleón:

Capítulu sobre l’Eo-Navia:

Un cientu de semeyes participen na esposición «Miraes 2010» que puede vese na Casa de Cultura de Grau hasta’l próximu día 7 d’abril. Esta amuesa recueye’l trabayu de 40 fotógrafos de l’Asociación Profesional de Fotoperiodistes Asturianos (APFA). Les imaxes son un repás visual a la realidá y actualidá asturiana mientres l’añu 2010 y fueron espublizaes nel so día en distintos medios del país, anque tamién hai dalguna semeya inédita.

L’amuesa inclúi tamién la fotografía ganadora del V Concursu Apfa-Miraes memorial «Ramón González», obra del fotógrafu avilesín Eloy Alonso.

El progrma “Nós”, que la TPA ufre cada sábadu a les 12:00 hores y qu’entamara hai poco la so cuarta temporada, dedícase esti sábadu día 19 de Marzu a percorrer la nueva sede de l’Academia de la Llingua Asturiana n’Uviéu, al traviés de les palabres de los trabayadores de la institución qu’amuesen les instalaciones de la mesma y los llabores que se desendolquen nelles.

La TPA estrenó`l sábadu 5 de Marzu, a les 12:00 hores la cuarta temporada del programa “Nós” que s’empobina dende’l so aniciu a percorrer l’actividá cultural, llingüística, social ya investigadora alrodiu de la llingua asturiana. El primer programa empobinose a conocer la trayectoria d’un de los investigadores mozos más activos de la nuesa historia contemporánea, Rafael Rodríguez Valdés, direutor de la Revista d’Historia Contemporánea Erada. Y el segundu programa, al sábadu siguiente dedicose a los exámenes de gallego-asturiano que se facíen per primera vegada en Tapia con gran participación de xente interesao n’algamar un certificáu de conocencia básica de la fala.

Nós, espaciu dirixíu y presentáu pol periodista y profesor universitariu Próspero Morán, emítese tamién pol satélite Hispasat pal restu d’España, Europa y América y por Internet para tol mundiu al traviés de la web de la RTPA, y esti añu grábase per primera vegada depués de cuatro años nun formatu HD o d’Alta Definición.