Comunicación

Na nueche del xueves 2 de febreru la rede social Twitter faló n’asturianu. El hastag #AsturiesMeteMieu tuvo nel segundu puestu estatal a lo llargo de tola nueche, y en dellos minutos llegó a atopase nel primer puestu, penriba de tolos demás temes trataos na rede social más conocida xunto a Facebook.

Siguimientu del tema #AsturiesMeteMieu

L’únicu periódicu en papel que s’asoleya dafechu n’asturianu, el selmanariu Les Noticies, despídese de los quioscos esta selmana y failo con un númberu nel qu’apaez la primera con un gran titlular “Depués de 15 años, última edición impresa”. El númberu 769 sedrá recordáu como’l caberu d’esti periódicu que sigue agora’l so camín na rede, al traviés de lesnoticies.com

A les amueses de solidaridá y llamentu pol fin del proyectu en papel llegaes yá per parte d’Iniciativa pol Asturianu y la Xunta pola Defensa de la Llingua Asturiana, sumóse agora la de l’Asociación de Profesionales de la Comunicación d’Avilés (APCA), que calificó esti pieslle como’l pieslle a “quince años de periodismu impresu íntegramente n’asturianu y, polo tanto, el pieslle a quince años d’una forma de ver y contar la realidá d’Asturies”.

Un poco d’hestoria

El periódicu espublizó hasta agora 20.000 páxines en papel, con tou tipu d’informaciones, cuntando con “un periódicu onde s’exerció’l periodismu profesional y se normalizó l’asturianu”, según espliquen dende Ámbitu, la empresa editora.

El selmanariu Les Noticies presentóse na Feria Muestres d’Asturies n’agostu de 1996 y salió al mercáu col so primer númberu un 6 de setiembre d’esi mesmu añu. N’aquella presentación en sociedá, l’editor de Les Noticies y primer director del periódicu, Inaciu Iglesias, afitó les llínies maestres del proyectu editorial: “El nuestru compromisu ye colos asturianos, colos nuestros llectores y cola so cultura particular. Esi vínculu éticu vamos a renovalu selmana a selmana hasta consiguir asentar un proyectu a toes lluces necesariu”, esplicaba. Ente los sos directores tuvieron, amás d’Iglesias, Sixto Cortina, Xuan Bello, Ramón Lluís Bande, Henrique Facuriella o Beatriz R. Viado, que se convirtió na primer directora muyer d’un periódicu asturianu.

Dientro de les xornaes dedicaes pola Xunta pola Defensa de la Llingua Asturiana a recordar el quince aniverdariu de la espublización del Llibru Blancu de la Normalización Llingüística, güei, miércoles 1 de febreru, va celebrase una mesa taller titulada ‘Medios de Comunicación na sociedá de la información’, cola participación de los periodistes Naciu Varillas, Ana Vanessa Gutiérrez, Próspero Morán, director d’ASTURNEWS y Cristóbal Ruitiña y la moderación de Rubén Ardura.

L’actu va celebrase nel Salón d’actos del departamentu d’Historia (pisu segundu) nel Campus del Milán, Edificiu Departamental (mariellu) n’Uviéu, de magar les seis de la tarde.

El programa de televisión Sones, dedicáu cada selmana a concursos y gales de música asturiana na TPA, va emitise agora tamién na radio autonómica. Esti domingu pasáu emitióse per primer vegada y dende agora l’espaciu, presentáu por Sonia Fidalgo y Alberto Cienfuegos, va poder sentise nes ondes radiofóniques cada domingu hacia les diez de la nueche.

Al traviés d’una nota espublizada ayeri na páxina web del selmanariu Les Noticies y na edición en papel, esti vienres, l’únicu periódicu en papel qu’esistía anguaño na nuesa llingua diz adiós, pa quedar namás en formatu de diariu dixital. Esto ye lo qu’anunciaba’l so editor, Inaciu Iglesias, nun testu tituláu “Una decisión difícil”, nel que daba anuncia de que’l númberu 769, que va espublizase’l vienres 3 de xineru de 2012, sedrá’l caberu en papel d’esti mediu que lleva funcionando dende mediaos de 1996, con un númberu nos quioscos cada selmana, anque podrá siguir lleéndose na rede. El proyectu editorial yera’l primeru dafechu n’asturianu dende l’apaición en 1901 del selmanariu Ixuxú. La llingua asturiana queda agora otra vegada fuera de les rotatives, nun contestu de crisis nel qu’otros medios de comunicación asturianos tamién carecen problemes graves.

El selmanariu Les Noticies presentóse na Feria Muestres d’Asturies n’agostu de 1996 y salió al mercáu col so primer númberu un 6 de setiembre d’esi mesmu añu. N’aquella presentación en sociedá, l’editor de Les Noticies y primer director del periódicu, Inaciu Iglesias, afitó les llínies maestres del proyectu editorial: “El nuestru compromisu ye colos asturianos, colos nuestros llectores y cola so cultura particular. Esi vínculu éticu vamos a renovalu selmana a selmana hasta consiguir asentar un proyectu a toes lluces necesariu”, esplicaba. Ente los sos directores tuvieron, amás d’Iglesias, Sixto Cortina, Xuan Bello, Ramón Lluís Bande, Henrique Facuriella o Beatriz R. Viado, que se convirtió na primer directora muyer d’un periódicu asturianu.

Les amueses de solidaridá y llamentu pol fin del proyectu en papel llegaron yá per parte d’organizaciones como Iniciativa pol Asturianu, que calificó’l pieslle como “una mala noticia pal idioma”, y la Xunta pola Defensa de la Llingua Asturiana que destacaba que los años de Les Noticies “foron tamién años de creación y asentamientu d’un llinguaxe periodísticu modernu y versátil que ta valiendo de referencia nel procesu de normalización del idioma n’ámbitos diversos”.

L’escritor de Paniceiros ta acabante espublizar un blogue nuevu nel que recueye dalgunes amueses de la so obra lliteraria y periodística, n’asturianu y en castellán, el blogue, al que puede accedese al traviés de www.xuanbello.com, lleva por nome “Les isles interiores”.

El pasáu xueves 22 d’avientu, Javier Martínez, de l’Asamblea de RadioQk, tuvo como ponente convidáu na Tertulia Cultural Enrique García Rendueles, en Xixón. Na so charra faló sobre la situación de les radios asturianes dempués lo asocedío nes caberes feches.

La Dirección Xeneral de Telecomunicaciones mandó-yos a les comunidaes de vecinos onde tán instalaes Radio Sele, Radio QK y Radio Kras una carta amenazante pidiendo la identificación de los propietarios de les antenes d’emisión, esplicó Martínez. Énte esta situación les radios asturianes entamen una campaña de protesta y difusión de la problematica basada na defensa de la llibertá d’espresión, la d’asociación y auto-organización pa desendolcar los sos propios proyeutos, la defensa de los medios de comunicación comunitarios como una ferramienta al serviciu de la sociedá civil y la defensa de lo “pro-común”, escontra lo estatal o autonómico.

Nel actu falóse amás de la hestoria de radioQk nos caberos 28 años, y facer un repás a la situación de los movimientos sociales n’Asturies y tamién de dalgunos puntos importantes dientro de la esperiencia organizativa de la emisora carbayona.

Pa Martínez ye necesario “potenciación de les Asamblees como método de xestión”, amás de “crear espacios abiertos onde pueda trabayase en común”.

Pa los responsables de Radio Qk “esti conflictu que acaba d’entamar tien pinta de ser llargu y que nun ye daque aislao, pues vien pasando dende hai tiempu a otres radios de tol Estáu español”. La siguiente problemática albidren “vendrá de la SGAE”.

Esti xueves 22 d’avientu, Javier Martínez (Trobar club) falará en representación de l’Asamblea de RadioQk na Tertulia Cultural Enrique García Rendueles. La so charra va consistir nuna esplicación sobre lo asocedío nestes caberes feches coles radios llibres y comunitaries asturianes, que vienen sufriendo un procesu d’acosu per parte de la Direición Xeneral de Telecomunicaciones, asina comu una aproximación a la hestoria de RadioQkaracha, lo que mos va permitir aldericar de cuestiones como l’autoxestión, la importancia de los medios comunitarios y de la hestoria del movimientu asociativu horizontal nos caberos 30 años n’Asturies.

La tertulia entamará de magar les 20 hores en L’Ayalga, na cai Prendes Pando 11, baxu, en Xixón.

Les emisores llibres Radio Sele y Radio QK piden la solidaridá de los asturianos pa protestar econtra’l directu nuevu de la Inspección Técnica de la Xefatura Provincial de Telecomunicaciones, organismu del Gobiernu d’España qu’ordenó’l pieslle d’estes dos radios. Pa ello ufren un modelu de protesta pa mandar al corréu jpasturias@mityc.es como “refuga a los sos métodos” esti martes 13 d’avientu.

Esti ye’l testu propuestu:

A LA XEFATURA PROVINCIAL DE TELECOMUNICACIONES D’ASTURIES

Viendo les actuaciones entamaes dende la Xefatura Provincial de Telecomunicaciones d’Asturies, contra les emisores de radio Radio Sele y Radio QK, mandando a les Comunidaes de Vecinos n’onde s’alcuentren identificar a los propietarios de les mesmes, quiero amosar que refugo dafechu eses actuaciones y cualesquier otres que signifiquen amenaza pala continuidá de les radios llibres y comunitaries.

La tienda de comerciu xustu L’Arcu la Vieya, d’Uviéu, va acoeyer esti vienres 25 a les 19:00 hores, un actu nel que va falase de la situación de les radios llibres n’Asturies.

Nesta mesa redonda, per un llau van esponer los fechos, la situación llegal y les midíes que les radios en conflictu van tomar, dempués de los ataques escontra Radio Sele y Radio QK.