Comunicación

Twitter espera recaldar 1.000 millones de dólares col allugamientu de parte de la so capital a la bolsa de Wall Street nuna estimación que podría ser entá mayor si crez la demanda, superando los 10.500 millones de valoración. La compañía rexistró demientres los primeros seis meses del añu ingresos per valor de 253,6 millones de dólares.

L’ingresu de Twitter disparóse un 200% cuando se compara l’exerciciu 2011 y 2012, hasta los 317 millones de dólares. Espérase que llegue hasta los 583 millones mientres anguaño y que s’avere a los 1.000 millones en 2014, para en 2015 algamar a los 1.300 millones.

Na última información unviada al supervisor bursátil, Twitter, qu’escueye’l símbolu TWTR, indica que los sos ingresos crecieron un 107% comparáu colos primeros seis meses de 2012. Esti datu, sicasí, amuesa una moderación na crecedera de la cifra de negociu que puede refundiar dalguna solombra, al pie de los riesgos que señala de cara al futuru. Tamién indica que rexistró perdes de 69,3 millones ente xineru y xunu. L’estrenu podría tener llugar a final d’ochobre o empiezos de payares.

Twitter fala d’una rápida crecedera nel so negociu y ta amenorgando en paralelu les perdes. Pa tou 2012, tuvo unes perdes de 79,4 millones, menos que los 128,3 millones en 2011.

Foro Asturies va presentar dos iniciatives nel Senáu y na Xunta Xeneral pa pidir la retirada de publicidá institucional de los medios de comunicación que na actualidá realicen publicidá de la prostitución. La diputada rexonal, Esther Landa, y el senador Isidro Martínez Oblanca, presentaron esti llunes en rueda de prensa les iniciatives que se van rexistrar de manera inmediata na Xunta Xeneral del Principáu y nel Senáu.

Al respective de la iniciativa rexonal, tratase según esplicó Landa, d’una proposición non de llei na que se pide encamentar al Gobiernu asturianu a ellaborar un proyectu de llei de cambéu de la Llei del Principáu de Comunicación y Publicidá Institucional pa incluyir en dicha norma les previsiones que imposibiliten l’insertamientu de publicidá institucional nos medios con anuncios de prostitución. La midida vien siendo sofitada dende la izquierda a nivel estatal dende va cuantayá, polo que la so aprobación n’Asturies nun tendría de tener dengún problema.

Amás, según destacó Landa, solicítase que demientres s’ellabora y tramita dichu proyectu, dese preferencia na axudicación de contratos de publicidá a los medios qu’adopten midíes efectives p’amenorgar significativamente hasta la so supresión los anuncios de prostitución y cualesquier otru tipu de publicidá qu’incida negativamente na igualdá ente homes y muyeres.

No tocantes a la iniciativa del Senáu, Oblanca esplicó que se pide tamién la ellaboración d’un Proyectu de llei d’una norma llegal, distinta a la Llei xeneral de Publicidá, que tuviera como oxetu esclusivu la prohibición de la publicidá de la prostitución.

El númberu 33 de la revista Asturies de la Fundación Belenos vieno acabante d’asoleyase esti branu con dellos trabayos d’ente los que destaca’l descubrimientu d’un nuevu asentamientu castreñu n’Asturies.

Nel segundu númeru de la revista nesti 2013 “Asturies, memoria encesa d’un país” presenta un trabayu col títulu de “Un nuevu asentamientu castreñu n’Asturies: El Castillón d’Antrialgo, Piloña”, que presenta un importante descubrimientu arqueolóxicu y vien robláu polos etnógrafos Xuan Fernández-Piloñeta, Alberto Álvarez Peña y Daniel Cueli Canto. El trabayu sírve-yos a los autores pa documentar un castru que nun yaba catalogáu hasta esti momentu ya que nun apaecía na Carta Arqueolóxica del conceyu.

Amás d’esti trabayu, el númeru 33 de la revista tamién recueye un trabayu sobre “El felechu” d’Ignacio Abella, l’entituláu “Horros beyuscos: nel cantu’l desaniciu” d’Ástur Paredes y Gausón Fernande, “Delles representaciones de sierpes nos retablos asturianos” d’Alberto Álvarez Peña, un repasu “A vueltes col paxellu asturianu: les monteres” por Gausón Fernande Gutierri y un analís de la lleenda “La muyer xabaz qu’echa les mamielles al costín: una lleenda asturiana y los sos pareyos universales” fechu por Jesús Suárez López. Xunta estos trabayos completa el númberu l’estudiu “Siempre de camín, ente la casa y la cabana” de Xulio Concepción Suárez.

La Xunta pola Defensa de la Llingua Asturiana (XDLA) quier mostrar la so preocupación pola participación de la televisión pública asturiana (TPA) na producción de la serie El Faro, realizada mayormente con medios gallegos y que se ta rodando en castellanu y gallegu na comunidá vecina. La TPA participa na producción d’esta serie, rodada en Galicia con profesionales del país vecín, polo que ta renunciando a los sos principios de defensa del sector audiovisual y la cultura d’Asturies.

Pa la organización, que TPA financie un productu asina incumple los sos principios de defensa del texíu audiovisual asturiano y de promoción del idioma propiu. La XDLA señala qu’ún de los oxetivos básicos de cualquier televisión autonómica ye preservar la identidá de la comunidá a la que se dirixen y énte la que respuenden, polo que nun tien xacíu nengún financiar una serie que nun respuende a los principios de defensa y promoción de la llingua y de la identidá cultural d’Asturies.

La XDLA recuerda que les cadenes autonómiques tán apostando nos últimos años pola producción de series de ficción que, depués de los deportes, dan les audiencies mayores a estes emisores. El so éxitu vien marcáu pola identificación del públicu na pantalla al traviés d’elementos qu’ayuden a la construcción de la identidá cultural, amás de responder a un propósitu doble: l’interés económicu de poner los pegollos d’un sector audiovisual, per un llau, y ameyorar la imaxe de la televisión como símbolu de madurez, per otru. Por eso, la participación de TPA nesta serie, con una ambientación que refuga les referencies a una idiosincrasia concreta, respuende a la política cultural de la FSA, caracterizada pol complexu d’inferioridá y l’odiu a lo propio.

A too ello, hai qu’amestar que’l rodaxe d’El Faro recibió les critiques de la Coordinadora de Profesionais do Audiovisual Galego por precarizar el sector con salarios inferiores al conveniu, una crítica que recibió l’apoyu de 23 entidaes asemeyaes del Estáu español. La XDLA recuerda que TPA tovía nun fixo un apueste poles series de producción propia y pol doblaxe al asturianu de ficción ayena, dalgo qu’ayudaría a xenerar puestos de trabayu y al nacimientu d’un texíu audiovisual nel país. Sicasí, TPA paga’l rodaxe d’una telenovela en castellanu producida n’otra comunidá y que nun van dar trabayu a nengún asturianu. Hai que recordar les necesidaes y carencies coles que s’alcuentra’l sector audiovisual n’Asturies, amás de la escasez de formatos n’asturianu dientro de la programación de la canal pública –el porcentaxe d’emisión na nuestra llingua nun llega nin al 5% a pesar de les audiencies altes-.

Pa l’asociación cultural, con iniciatives asina, la dirección de TPA ta contribuyendo a que la cadena dexe de tener sentíu, renunciando a fomentar l’idioma y el sector audiovisual d’Asturies, porque nin TVE nin Tele 5 tán obligaes pola llei a producir series n’asturianu, dalgo que TPA sí que tendría que facer. Hai que recordar qu’hasta la so integración en RTPA, la Productora de Programes del Principáu (PRODA) realizó unes cuatro hores de ficción en llingua asturiana, ente elles mediumetraxes de 30 minutos de duración como Paisaxes con figura, Carreteres inciertes o L’aire de les castañes. Tampoco nun se pue dexar de reseñar l’exitu de la web-serie Chatarrona, que, producida por Publicaciones Ámbitu, tuvo 20.000 visites nuna selmana. La emisión de productos asina en TPA, amás d’ayudar a xenerar datos bonos d’audiencia, repercutiría na economía del nuestru territoriu al ayudar a promover una industria audiovisual autóctona. Apostar por otra cosa ye malgastar el presupuestu d’una canal que pagamos tolos asturianos, que ye l’audiencia a la que TPA tien que responder y atender.

Nota de prensa de la XDLA

Twentieth Television, la unidá de la 21st Century Fox, proponse vender los capítulos yá estrenaos de la comedia animada de la cadena Fox ‘Los Simpsons’ y llograr hasta mil millones de dólares (754 millones d’euros) pa saniar el so balance.

La productora entamo la venta de la serie protagonizada por Bart y Homer a les emisores de televisión en 1998. El nuevu acuerdu permitiría emitir reposiciones de la serie tanto a eses cadenes televisives como a les canales de cable.

‘Los Simpson’ ye una serie que ta entamando yá la so temporada númberu 25, teniendo emitíos hasta esti momentu un total de 530 episodios.

Nel mes de marzu Xune Elipe avanzó nuna entrevista n’Asturnews el próximu estrenu d’un programa nuevu na TPA. Mañana, martes 2 de xunetu, a les 23:15 hores, la canal de televisión autonómica TPA va estrenar El Club Musical, de periodicidá selmanal, dedicáu a la escena sonora asturiana y presentáu por esti músicu yá veteranu. La so productora Goxe Producciones ye la encargada de llevar alantre esti proyectu, cuntando nel equipu con Javier Lueje (realizador), Pablo Quiroga o Guillermu Fernández (cámares), Rubén Álvarez (soníu), Tamara Rosa (rexidora), Víctor Vivar (illuminación) o Jorge Cambareli (sintonía), ente otros.

El Club Musical ye un espaciu que quier ser reflexu de la diversidá, dinamismu y calidá del panorama musical asturianu, mostrando a los grupos y intérpretes nel so hábitat natural: les actuaciones en directo. El so oxetivu últimu ye apoyar a los creadores musicales locales dende una perspectiva xeneral, ye dicir, ensin llendes en cuantes a los estilos o tendencies, dando entrada a les propuestes más variaes: rock, folk, jazz, pop, canción d’autor, hip hop… tean éstes cantaes n’asturianu, castellanu, inglés o cualquier otru idioma. Como complementu inclúise tamién una entrevista pa conocer meyor cada banda o artista y saber de les sos influencies, trayectoria, proyectos o grabaciones. El programa empieza en toles entregues con un reportaxe curtiu sobre’l protagonista de cada nueche pa, darréu, dir alternando actuación en directo con entrevista, amás de facer tamién recomendaciones bibliográfiques (cómics, ensayos, etc) sobre l’estilu musical que practique la banda o intérprete convidáu.

La primer temporada tien trece capítulos, que van desenvolvese na Sala Club del Centru Niemeyer, la Fundación de Música Moderna d’Avilés y el Teatru El Llar, de Corvera. Per esos escenarios van pasar nomes veteranos y mui conocíos o intérpretes nuevos que tán despuntando, ufiertando una visión amplia de la música que se ta faciendo anguaño n’Asturies. Concretamente estos primeros episodios van tar dedicaos a: Blues & Decker, Lorena Álvarez y su Banda Municipal, Crudo, El Patio de tu Casa, Alexandra in Grey, Toli Morilla, Skama la Rede, Dr. Explosion, Pauline en la Playa, Patrulla Dixie, La Bandina, Misiva y Felpeyu.

La llingua vehicular d’El Club Musical va ser l’asturiana, tanto nos reportaxes, como nes entrevistes o créitos, independientemente de que los músicos protagonistes canten o s’espresen en castellanu. Nesti sen, búscase la normalidá y naturalidá en cuantes al aspectu llingüísticu, rellacionando de pasu al nuestru idioma con un tema «modernu» y «contemporáneu» como pue ser la música más actual. Otra manera, un porcentaxe curiosu de los protagonistes d’esta primer temporada empleguen l’asturianu nes sos composiciones.

Ésta va ser la primer incursión nel terrén audiovisual del director y presentador del programa, Xune Elipe, depués d’años de trabayar na edición discográfica, bibliográfica o radiofónica, con proyectos como Discos L’Aguañaz, Anuariu de la Música Asturiana o Rockmería, amás de la so faceta como miembru del grupu Dixebra.

La emisora, única dafechu n’asturianu, pide auxiliu económicu a los oyentes. La emisora, a la que’l gobiernu de Vicente Álvarez Areces-y quito la llicencia comercial algamada nel tiempu de Marqués, malvive como radio llibre y requier d’unos 3.000 euros pa poder siguir alantre cola so actividá. Pa ello faen una campaña d’afiliación al traviés de redes sociales.

Esti llibru, asoleyáu por Trabe Ediciones, representa’l primer averamientu académicu a la hestoria de la televisión n’Asturies dende la llegada de la señal de TVE a mediaos del sieglu XX hasta’l nacimientu del serviciu audiovisual autonómicu nel XXI. L’autor, que contestualiza l’análisis esplicando lo qu’asocedía en cada momentu hestóricu nel ámbitu español y européu, repara con detalle nos años ochenta, noventa y 2000.

Cristóbal Ruitiña (Cangas del Narcea, 1977), doctor en comunicación pola Universidá d’Uviéu y llicenciáu en Periodismu pola UAB ye profesor de la Facultá de Ciencies de la Comunicación de la Universidá Camilo José Cela de Madrid y redactor por oposición de RTPA.

Hai selmanes, la Xunta pola Defensa de la Llingua Asturiana (XDLA) presentaba l’Informe sobre l’usu del asturianu en RTPA 2013, onde se facía repás a la presencia del idioma y la cultura del país nos medios públicos y s’ufríen propuestes de meyora. Ente los temes trataos, la XDLA recordaba la presencia mediática tan escasa de la Selmana de les Lletres Asturianes na programación de la canal y la radio públiques. Asina, la organización señalaba que nel 2012 nun se retresmitió la Xunta Estraordinaria de l’Academia de la Llingua Asturiana per TPA y que la presencia mediática de la Selmana de les Lletres Asturianes nos informativos foi cuasi nula. Una vegada más, l’asociación denuncia que la situación d’anguaño foi la mesma, con exemplos como la cobertura dada a un concursu de corte de xamón na Feria d’Abril, mientres la canal escaecía’l Día del Llibru y del Discu n’asturianu.

Asina, l’informativu de la televisión pública nun consideró noticiables la salida a la cai de dellos llibros nel nuestru idioma que les editoriales del país publicaron coincidiendo cola fecha, mentes que dalgunos actos entamaos pol mesmu Gobiernu d’Asturies nin siquier foron noticia na emisora pública, dalgo que pa la Xunta “contradiz los postulaos colos que naz cualquier mediu de comunicación públicu y que pon en dulda la supuesta visibilidá que quier da-y l’Alministración al nuestru idioma, que nun lu promociona nos sos propios medios de comunicación”.

Ye de reseñar que nel TPA Noticias del mediudía del 3 de mayu nun hubo nenguna noticia que recordara a l’audiencia que yera’l Día de les Lletres Asturianes o que’l mesmu Gobiernu entamaba’l Día del Llibru y el Discu n’Asturianu. Sicasí, sí foi noticia un concursu de corte de xamón na Feria d’Abril de Piloña. L’anécdota muestra l’apegu a la cultura y al idioma que tienen los directores d’informativos y programadores de RTPA.

Otra manera, nel Informe sobre l’usu del asturianu, la XDLA recomendó a los responsables de RTPA que contemplaren la emisión per TPA d’actos como la celebración d’una gala dedicada a la música y la poesía n’asturianu, que se celebró nel auditoriu del Centru Niemeyer, o del I Certame de Teatru Escolar en Llingua Asturiana/Gallego-asturianu. Hai que felicitar a la cadena pola emisión de la gala del Niemeyer, el sábadu pela nueche. Sicasí, quedaron fuera otros actos que sí s’emitieron otros años, como l’actu institucional de la Xunta Xeneral o la Xunta Estraordinaria de l’Academia de la Llingua Asturiana. Amás, la RPA tampoco nun fixo nenguna emisión especial, anque tien una programación baxo mínimos, y tampoco nun decidió realizar nengún actu simbólicu, como podía ser programar namás música n’asturianu.

Per otru llau, hai selmanes, la XDLA recordaba que l’Ente Públicu pela primer vez contaba nel so archivu con entrevistes, tanto en radio como en televisión, a l’autora homenaxada na edición d’anguaño -la escritora valdesana Nené Losada Rico-, polo que podría utilizales pa realizar un programa especial sobre la so vida y obra. Asina, poníase d’exemplu a Galicia y la TVG, qu’esti 17 de mayu, Día das Letras Galegas, va retresmitir en directo l’actu de la Real Academia Galega y va programar un documental sobre la vida y obra del autor homenaxáu, Roberto Vidal Bolaño. Amás, la web de la CRTVG abrió una sección onde los usuarios puen acceder al material audiovisual del que dispón l’archivu de CRTVG sobre l’autor homenaxáu. Amás, la Radio Galega lleva selmanes emitiendo una programación especial pa conmemorar el 150 aniversariu de la publicación de Cantares Gallegos, de Rosalía de Castro. Too esto contrasta cola RTPA, que nun dedicó nin una pieza en TPA Noticias a informar sobre quién yera Nené Losada.

Dende’l pasáu 3 de mayu, Día de les Lletres Asturianes, la páxina web de N’Ast, www.n-ast.org, presenta nuevu formatu. “Esta yera una vieya aspiración de l’asociación cultural, la de disponer d’una web con más conteníos y un diseñu más modernu”, espliquen dende la organización, qu’espera qu’esta nueva web “sirva como preséu pa meyorar los calces de contautu ya información colos sos socios y simpatizantes y enanchar la so presencia na sociedá asturiana”.

Páxina web nueva de N’ast