Comunicación

Mañana miércoles 9 de xunetu, a les 17 hores, L’Arribada programa na Carpa del Encuentro, en dientro de la XXVII Semana Negra, la presentación del llibru” L’espeyu onde miranos. Televisiones de proximidá n’Europa Occidental y procesos de recuperación identitaria”, de Damián Barreiro, obra que llogró el VI Premiu Fierro Botas que convoca añalmente l’Ayuntamientu de Gijón / Xixón. Nesti actu tará l’autor del llibru, la representante d’Ediciones Trabe Eshter Prieto y l’escritor Humberto Gonzali.

Damián Barreiro Maceiras (A Estrada, Pontevedra, 1984) ye periodista. Tres de ser redactor demientres años del selmanariu Les Noticies y n’Asturies.com, amás de presentador en dellos programes de TLG, la televisión local de Xixón, collabora nel periódicu Diagonal Asturies, na sección «Escolinos» del diariu La Nueva España y n’otros medios asturianos.

La selmana pasada convocábense les subvenciones a la normalización de la llingua asturiana, qu’esti añu tienen un nueva reglamentu, asoleyáu tamién va poco, y magar s’esperaba un amenorgamientu económicu de les ayudes, la baxa foi d’hasta un 40% nes ayudes dedicaes a la edición musical lo que supón un perimportante axuste pa un mercáu, el de la música, que ya sofre de la perda que supón l’amenorgamientu de conciertos entamáos tanta desde l’ambitu pública como del priváu. Les ayudes pala normalización pasen de los 308.000 euros de la convocatoria de 2013 a 232.513,4 euros na d’esti añu.

Les ayudes a la promoción y normalización del asturianu y gallego-asturiano del 2014 baxen nun 24,5 por cientu con respeuto a les subvenciones del 2013, ensin que se conoza argumentación denguna de les causes y porqués del repartu. La Conseyería d’Educación, Cultura y Deporte calciné otra vuelta les trés linees d’ayuda: producción editorial, discográfica y normalización nos medios de comunicación, dexando otru añu fuera les d’actividaes d’asociaciones y otres entidaes ensin ánimu d’arriquecimientu, les d’empreses privaes y les de promoción d’actividaes cinematográfiques y de vides, que nel pasáu foron bien importantes pa que la sociedá civil recuperare l’usu normal de la llingua asturiana. El recorte nes ayudes ye entá mayor na edición musical, que pasa de tener 40.000 a 24.000 euros de sofitu, lo que supón amenorgar la convocatoria nun 40 por ciento.

La empresa Eroski empezó a utilizar el nuestru idioma na cartelería del supermercáu que tien nel Centru Comercial Caudalia, en Mieres. Por eso, la Xunta pola Defensa de la Llingua Asturiana (XDLA) quier felicitar a esta cooperativa de distribución y animala a que tamién use’l nuestru idioma nos otros centros que tien nel nuestru país. Hai que recordar qu’esta empresa lleva años faciendo un usu respetuosu y igualitariu de tolos idiomes oficiales del Estáu nel etiquetáu de los sos productos o na páxina web de la cooperativa, dalgo qu’ayudó a normalizar les otres llingües nuna xera tan cotidiana como la compra diaria.

La XDLA espera que l’usu que fixo Eroski del asturianu nun quede en dalgo simbólico y aislao y sía’l primer pasu alantre pa que l’asturianu sía una llingua más dientro de les actividaes de la empresa.

Otra manera, l’asociación quier recordar que, precisamente, el supermercáu asítiase en Caudalia, una gran superficie de La Vega Santuyano que vien promoviendo campañes publicitaries nestos dos últimos años onde l’asturianu ye la llingua vehicular de tol material impreso que se reparte ente los clientes, lo que la fixo merecedora del Premiu Andrés Solar 2013. Esta situación choca col nulu usu que se fai del nuestru idioma nel Hospital Nuevu de Mieres, asitiáu al llau del centru comercial y que, a pesar de ser una infraestructura pública, escaez la existencia del nuestru idioma y nin siquiera respeta la toponimia oficial.

La seición sindical de la CSI na radiotelevisión pública asturiana viejo acaban d’acusar al PSOE y al PPE nun comunicáu qu’espubliza bel so bloque de preparar una llei pa privatizar la RTPA al mesmu tiempu que señala que ” dende los sos oríxenes los pensadores de la RTPA discurrieron un modelu de radiotelevisión semiprivada, la pequeña parte pública, siempres bien llindada, yera namái la escusa pa que’l financiamientu del proyectu saliera del bolsu de tolos ciudadanos, daqué malo de xustificar d’otra manera. L’eufemismu de que RTPA tendría de contribuyir a impulsar el sector audiovisual asturianu yera la sida pa trespasar fondos públicos directamente a empreses privaes. Asina, empreses como Enfoque Visual, Teletemas, Videoimagen, Ten Con Ten y un llargu etcétera convertíen directamente dineru público en beneficiu priváu ensin entremedias ufiertar nengún serviciu a la sociedá”.

Pa la CSI la nueva llei plantegada nun ameyoraría pa nada la situación, porque nun cumpliría una llexislación qu’esixe la emisión d’al menos los informativos ensin intervención esterna, pero tamién salvaguardar la prestación del serviciu. CSI dix bel so comunicáu que “l’altu grau de privatización que sufre anguaño la RTPA algama árees estructurales completes que deriven na imposibilidá d’emitir nin siquier un informativu ensin la intervención de nengún trabayador subcontratao y precario. Un escenariu qu’estropia gravemente la salú llaboral de RTPA, de los sos trabayadores directos ya indirectos y que perxudica notablemente’l desenvolvimientu del sector audiovisual asturianu”.

Comunicáu de la CSI nel so blogue

Nun duru comunicáu asoleyáu esti día, la XDLA esixe a TPA que la inversión realizada nel 2013 na producción d’esta serie, se destine anguaño pa rodar ficción n’asturianu, dalgo que tovía nun fixo TPA a pesar del éxitu nel restu de cadenes autonómiques, que siempre queden como líderes d’audiencia nos sos respectivos territorios. De la quincena de programes estrenaos nesti 2014, nengún tien como llingua vehicular la llingua propia del país.

Esta selmana diose a conocer que la TVG va rodar una temporada nueva de la serie El Faro, producción qu’anque taba rodada en Galicia y en gallegu contaba cola participación de TPA. Sicasí, depués de les critiques de la Xunta pola Defensa de la Llingua Asturiana (XDLA) y de que la sociedá diera’l llombu a la serie –llegó a un 0,1% d’audiencia en dalgún capítulu-, la canal pública refugó sofitar económicamente la temporada segunda d’El Faro.

Por eso, la XDLA esixe a TPA que la inversión realizada nel 2013 na producción d’esta serie, se destine anguaño pa rodar ficción n’asturianu, dalgo que tovía nun fixo TPA a pesar del éxitu nel restu de cadenes autonómiques, que siempre queden como líderes d’audiencia nos sos respectivos territorios.

La realización de productos asina pola TPA, amás d’ayudar a xenerar datos bonos d’audiencia, repercutiría na economía del nuestru territoriu al ayudar a promover una industria audiovisual autóctona. Sicasí, la cadena tovía nun fixo un apueste poles series de producción propia, pola emisión d’obres de teatru o pol doblaxe al asturianu de ficción ayena, dalgo qu’ayudaría a xenerar puestos de trabayu y al nacimientu d’un texíu audiovisual nel país. Ye de reseñar que de la quincena de programes estrenaos nesti 2014, nengún tien como llingua vehicular l’asturianu, dalgo que muestra l’inclumientu que fai la cadena de la llexislación vixente, qu’establez que TPA tien qu’usar y promover el nuestru idioma.

El consumu televisivu por persona y día en xunu asitiose nel Principáu d’Asturies en 219 minutos, convirtiéndose na comunidá cola cifra más baxa, según los datos de Kantar Media, que dexen a les claree que’l mercáu audiovisual d’Asturies nun incentiva l’audiencia. Nel conxuntu del país el tiempu mediu baxó a 233 minutos, siete minutos menos qu’en mayu y cinco menos que va un añu. Los partíos d’España nel Mundial de Fútbol de Brasil fueron les emisiones más vistes, como yerra d’esperar.

Andalucía ye la rexón que rexistra mayor tiempu de visionáu diariu (244 minutos), siguida de Cataluña (241), Castiella-La Mancha (237) y Comunidad Valenciana (237); ente qu’Asturies ye la que menos (219 minutos).

El partíu de la fase previa del Mundial de Fútbol ente España y Chile foi la emisión más vista con 13,2 millones d’espectadores (67,6% de cuota de pantalla), siguida de partíu apostáu ente España y Holanda, con 11,2 millones d’españoles (68,5%) y el de Brasil-Croacia, con 8,4 millones d’espectadores (43,5%). Casi la metá del tiempu dedicáu a la tresmisión deportiva en xunu tuvo dedicáu a esti deporte.

El consumu al traviés de TDT (82,8%) baxa trés décimes, el satélite (3,8%) baxa cuatro y el cable (13,3%) xube trés. Cataluña ye la rexón que más consume al traviés de TDT. País Vascu y Asturies les que más lo faen utilizando’l cable, y Canaries el satélite.

Nel Boletín Oficial del Principáu d’Asturies del pasáu día 27 de xunu del 2014 publicáronse tres resoluciones poles que s’aprueben les bases reguladores de la concesión de subvenciones pa la edición de llibros y discos y pa les actividaes de medios de comunicación n’asturianu o gallego-asturianu. Por estes bases van mandase les convocatories de subvención que se fagan dende ágora.

Les bases recueyen delles novedaes al respective de les calterístiques que van tener los proyeutos interesaos en algamar subvenciones pala normalización llingüística, no que cinca a los medios de comunicación.

Ente los cambeos rexistraos alcuéntrense cuestiones como que namái van almitise los gastos de personal si la persona beneficiaria acreíta la so rellación directa col proyectu y la so acreitación va riquir la presentación de la nómina, los documentos correspondientes d’ingresu de cuotes de seguridá social (tC1 y tC2) y l’acreitación del ingresu na axencia tributaria de les cantidaes reteníes al personal col modelu 111. Nel casu de persones físiques daes d’alta nel réxime especial del trabayu autónomu, el trabayu desenvueltu por elles mesmes pa la execución del proyectu va poder acreitase con una declaración responsable na que se concrete’l plan de trabayu onde consten les hores de dedicación y el costu por hora.

Amás nun va poder incluyise como gastu subvencionable l’importe del iva deducible, cuando la persona o entidá beneficiaria tea obligada a facer declaración del impuestu mentáu; polo tanto, la cantidá que va poder imputase como gastu ye la correspondiente a la base imponible de los justificantes.

Bases de les subvenciones musicales pa la promoción de la música n’asturianu y gallego-asturianu.

El diputáu Chesús Yuste rexistra 21 enmiendes l’últimu día de plazu a esti proyectu de llei de reforma de la normativa esistente, ente les que destaquen tamién el pidimientu de supresión de la denominada ‘tasa Google’ y encamienta al Gobiernu al cobru d’impuestos a los xigantes tecnolóxicos pol negociu que realicen n’España. IX, ICV-EUiA, CHA propón nes sos enmiendes a la llei de propiedá intelectual que les prestadores de servicios d’internet y n’internet paguen la compensación por copia privada y non vía Presupuestos Xenerales del Estáu.

El voceru na Comisión de Cultura del Congresu, Chesús Yuste, rexistró güei en nome del Grupu Parlamentariu IX, ICV-EUiA, CHA un total de 21 enmiendes al proyectu de llei de reforma de la Llei de Propiedá Intelectual, ente les que destaca la propuesta de que sían les empreses prestadores de servicios d’internet y de servicios n’internet les que paguen la compensación por copia privada, en llugar de que s’abone al traviés de los Presupuestos Xenerales del Estáu (PXE).

Ente les enmiendes coordinaes por Yuste ta tamién la eliminación del artículu nel que, pa xustificar un amenorgamientu na compensación por copia privada a la que tienen derechu los creadores, declárase illegales tolos supuestos de reproducción o copia pa usu priváu qu’hasta’l momentu yeren llegales, lo que supon un grave perxuiciu pal consumidor.

El Grupu Parlamentariu de La Izquierda Plural pretende coles sos enmiendes “consagrar na llei’l derechu del autor a xuntase a una entidá de xestión de derechos d’autor o a autoxestionase, tener llibertá pa decidir sobre qué derechos quier llicenciar la so obra, según pa utilizar llicencies llibres y otres alternatives al copyright tradicional”, esplica’l diputáu. Otra de les enmiendes matiza la irrenunciabilidá del derechu pa los autores y los artistes intérpretes o ejecutantes: ‘sacantes voluntariamente optase por facilitar l’accesu a la cultura llibre, tratándose d’obres d’usu llibre y gratuitu, o espresamente autorícese’l so usu pa fines educativos o d’investigación’.

Chesus Yuste detalla tamién que los cambeos propuestos pol so grupu planteguen “la supresión de la denominada ‘tasa Google’ o ‘canon AEDE’ que tendríen de pagar los agregadores de noticies”. Al so xuiciu, resulta dudoso que reproducir titulares de noticies periodístiques, yá disponibles n’otres páxines web, col correspondiente enllaz a la web orixinal, pueda considerase contrariu a los derechos d’autor, tal como dictaminó la recién sentencia Svensson del Tribunal de Xusticia de la UE nel casu C466/12. Asemeyáu pagu podría terminar repercutiendo en plataformes de participación comuñal n’Internet como Twitter, Facebook o Ximiélgame, onde s’espublicen y comparten titulares de prensa col enllaz correspondiente y supondría una alteración de la cultura P2P, que ye fundamental na sociedá de la conocencia.

“Independientemente de que pueda resultar bien popular pa la imaxe del Gobiernu cobrar derechos d’autor a Google News o Yahoo News, multinacionales qu’apenes paguen impuestos a la Facienda española, el Gobiernu tendría de centrase n’esixir a les empreses prestadores de servicios d’internet y de servicios n’internet el pagu de la compensación equitativa por copia privada, en llugar de que recaya sobre tolos contribuyentes vía Presupuestos Xenerales del Estáu. Amás, tien de reforzase ensin batura a duldes el cobru d’impuestos a los xigantes tecnolóxicos pol negociu que realicen n’España”, señala Yuste en relación a una de les últimes temes que-y correspuenden coordinar como diputáu antes de dexar definitivamente l’escañu esti mes de xunetu.

Tocantes a les tarifes -que’l proyectu de llei rebaxaba inxustificadamente hasta dexales nun 70%- les enmiendes presentaes dexenles nun 90% y recupérase el sistema de pagos a cuenta demientres el periodu transitoriu d’adaptación al nuevu sistema de fixación de tarifes. Per otra parte, establécense unes tarifes más afayadices pa les alministraciones públiques competentes en promoción de la cultura y equipamientos culturales.

Ente’l restu d’enmiendes rexistraes propónse reformar la composición de les dos sales de la Comisión de Propiedá Intelectual, buscando la pluralidá de la Sala Primera destinada al arbitraxe (incluyendo representantes d’entidaes de xestión y de consumidores) y garantizando la independencia de la Sala Segunda, encargada d’escorrer la piratería (esixendo que los sos miembros sían caderalgos d’Universidá: de Derechu Civil, Inxeniería Telemática, Derechu Procesal y Comunicación Audiovisual).

La vocera de FORO Bimenes, Ainara García Martín, apuntó esta mañana que’l próximu 5 de xunetu, como cada añu, Bimenes va celebrar la XVIII edición de la “yá enraigonada fiesta de la Oficialidá de la Llingua Asturiana que conmemora aquel hestóricu 5 de xunetu de 1997, cuando’l Plenu del Conceyu de Bimenes, convirtiose nel primeru d’Asturies en declarar la oficialidá de la llingua y de nuevu anguaño, como yá asocedió n’ediciones anteriores, la Fiesta pola Oficialidá de la llingua, nun va cuntar con nengún tipu de sofitu per parte de la Conseyería de Cultura, como yá asocediera col Concursu de Cuentos pola Oficialidá del Asturianu”.

García Martín afirma que “la negativa de la conseyería a sofitar una romería pionera que reivindica la llingua como pieza clave de la nuesa identidá como país y pilastra del nuesu patrimoniu cultural, ye una amuesa más del olvidu y marxinación total a que se ven sometíes la nuesa cultura y tradiciones per parte del gobiernu socialista del Principáu d’Asturies”.

Un “Gobiernu socialista”, recuerda, “que nel so programa electoral recoyía la protección y promoción de la llingua asturiana como patrimoniu colectivu, y qu’incumplen costantemente como lo faen cola Llei d’Usu y protección del asturianu, nun garantizando la enseñanza del bable en tolos niveles y graos nin esixendo’l so cumplimientu na RTPA, que como preséu al serviciu de la sociedá asturiana que ye, tendría d’emplegar y fomentar l’usu de la nuesa llingua y nun lo faen”.

Señala la vocera que “el conceyu yerbatu va cuntar cola so Fiesta de la Oficilidá gracies una vegada más al bon númberu de colectivos y asociaciones del conceyu comprometíes coles nueses tradiciones y raigaños” y conclúi señalando que “dende FORU recordamos a esi gobiernu socialista que niega’l sofitu a la celebración, que lo que pretende promocionase cola mesma ye la llingua y non la escelente gastronomía del conceyu, polo que los convidamos a ser consecuentes coles sos decisiones y tampoco unvien esi día a nengún de los sos diputaos a comer a cargu del erariu públicu, como yá fixeren na pasada edición”.

Depués de la polémica artificial entamada por un diariu uviedín cola escolarización de l’asignatura de Llingua Asturiana, la televisión pública da ales a los que quieren volver trenta años atrás sigún la Xunta pola Defensa de la Llingua Asturiana (XDLA) qu’esti día viejo acaban d’asoleyar un duru comunicáu bel que dix que “Ente’l Partíu Popular d’Asturies y un periódicu d’Uviéu entamaron va unos díes una polémica falsa pa semar un conflictu artificial na nuestra sociedá por cuenta del encaxe de la Llingua Asturiana na LOMCE como asignatura optativa. Nun-yos dio más la vertebración del país nin el futuru de la nuestra cultura: namás busquen los sos propios intereses”.

Asina lo ve la organización cívica de defensa del asturiana y por si esto fora poco, “aparez la TPA, la televisión pública de tolos asturianos, dando ales a esta polémica y falando de “imposición” y de “derechu a escoyer”, garrando’l discursu de los grupúsculos ultres y persones que tán en contra d’un futuru pal idioma de tolos asturianos”.

Ye más, sigún la Xunta, “TPA llegó a da-y más preferencia al portavoz d’esi supuestu colectivu de families afectaes qu’a la mesma Academia de la Llingua Asturiana, institución pública encargada de velar pol idioma. Hai que recordar qu’hasta’l momentu la cadena nunca informó de les denuncies que surden tolos años al empiezu del cursu polos problemes de delles families que nun puen matricular a los sos fíos n’asturianu”. Ye de reseñar pala Xunta qu’ente los oxetivos que se recueyen na Llei que permitió la creación de RTPA tán la promoción de la cultura y la educación, «con especial protección del bable, mediante la promoción del so usu y espardimientu nos medios de comunicación social». Amás, el Conseyu d’Alministración de RTPA aprobó unos principios rectores que falen del respetu y l’apoyu al usu y conocimientu del idioma «conforme a la llexislación vixente». Poco respetu, espardimientu y usu-y da la TPA al nuestru idioma si se pon al llau de los que quieren acabar con él, d’esos que de xuru que tamién pensarán qu’Asturies nun tien derechu a promocionar la so llingua, a autogobernase y, mesmamente, a tener una televisión propia.

Anguaño cúmplense tres décades dende que’l nuestru idioma entró nes escueles, un fechu que supunxo un símbolu de la recuperación de les llibertaes y del derechu de los asturianos al so autogobiernu. El procesu foi un éxitu, como muestra que cada añu más de 20.000 escolinos estudien el so idioma nos centros educativos del país. Too ello a pesar de l’actitú desdexada de les alministraciones autonómiques, que nun fixeron un res p’acabar cola precariedá que sufre l’asignatura en cuantes a reconocimientu del so estatus como especialidá como puen ser les matemátiques, l’inglés o’l castellanu.