Comunicación

Una radiotelevisión exemplar na técnica y nos conteníos, qu’espeye la realidá “territorial” d’Asturies. Esi ye’l modelu de tv autonómica pol qu’apuesta el comunicólogu Juan Cueto, qu’esta tarde foi elixíu presidente’l Conseyu de Comunicación del nuevu ente públicu y estrenóse nel cargu col pronósticu de que la radiotelevisión asturiana dinamizará la industria’l Principáu.

Lliteralmente, Cueto afirmó na so primer comparecencia como presidente’l conseyu consultivu de la tv autonómica que l’ente de comunicación qu’agora ñaz ye “una gran ocasión p’Asturies”, ente otres razones, porque una televisión ye anguaño un importante factor d’industrialización y la comunicación ye una materia prima fundamental nesta dómina.

Ensin afondar nel modelu de televisión pol qu’apuesta yá en calidá de presidente’l Conseyu de Comunicación de la tv pública, yá qu’esti muérganu quedó constituyíu güei y entá nun entró en definiciones precises, Cueto sorrayó que’l nuevu ente ha siguir el principiu básicu de ser un espeyu de la pluralidá d’Asturies, “y non sólo la cultural”.

En menos de seis selmanes

Colos dos órganos de xestión y administración de la radiotelevisión autonómica yá constituyíos -el conseyu d’alministración, con potestá pa tomar decisiones vinculantes, y el conseyu consultivu que güei cellebró la so primer xuntanza-, a la tv pública asturiana yá sólo-y falta tener un director xeneral formalmente nomáu pa echar andar la so maquinaria.

Sedrá José Ramón Pérez Ornia. El Conseyu de Comunicación dio-y el preste esta tarde al so nomamientu y agora falta únicamente l’informe positivu’l conseyu d’alministración de la tv pa que’l Conseyu de Gobiernu designe oficialmente a Pérez Ornia al frente de l’autonómica, un trámite que según la conseyera de Cultura y Comunicación Social, Ana Rosa Migoya, nun se prollongará más de seis selmanes.

A falta de dos representantes de los propios trabayadores del ente públicu, el conseyu consultivu de la radiotelevisión autonómica quedó constituyíu por trece miembros: José Manuel Rivas, pol Conseyu Escolar del Principáu; Daniel Vega, poles asociaciones de consumidores; Ignacio Villaverde, en representación de la Universidá; Javier Galán y Juan Cepeda, pola patronal; Hugo Morán, Ignacio Fernández, José Sierra y Andrés Núñez, representando a los ayuntamientos; y Severino Fernández, María Alonso, Vicente Bernaldo de Quirós y Juan Cueto, como vocales designaos pol Principáu.

Archivu. El Gobiernu ratifica que Pérez Ornia sedrá’l director de la radiotelevisión autonómica

Periodistes de toa España citaránse en Xixón pa falar y escribir sobro’l so oficiu. La ciudá acoyerá ente’l 24 y el 26 de xunu de 2005 la IV Convención de Periodistes d’España, un alcuentru entamáu poles organizaciones corporatives de los profesionales de la información qu’abordará les condiciones llaborales y la nueva regulación llegal de la profesión.

Esti segundu puntu tendrá una presencia destacada nes tres xornaes d’alderique periodísticu n’Asturies, yá que según les previsiones espresaes polos organizadores del cónclave les feches del congresu coincidirán col desendolcu nes Cortes del Estatutu’l Periodista Profesional, un testu normativu llargamente xestáu que pretende regular el llabor de los informadores.

L’alcuentru ocuparáse amás de forma singular del papel del periodismu na sociedá d’anguaño y del precarizáu réxime llaboral nel que trabayen los profesionales de los medios, que n’Asturies nun cuenten con un sindicatu específicu nin con Colexu Profesional propiu, sinón con una xenérica Asociación de la Prensa.

Xunta Cataluña, Madrid, Andalucía, Baleares, La Rioja y Canarias, la vecina Galicia ye la comunidá que más recientemente orixinó un sindicatu de periodistes, órganu cuyu congresu constituyente ta fixáu pal prósimu mes de febreru y nel que yá figuren más d’un cientu de profesionales de los medios de comunicación gallegos en calidá de preafiliaos.

La IV Convención de Periodistes d’España aportará a Xixón depués de pasar, n’años anteriores, por Cádiz, Valladolid y Tarragona, y ta promovida pol Foru d’Organizaciones de Periodistes (FOP), qu’a la so vegada integren les agrupaciones de periodistes d’UXT y CCOO, los Colexos Profesionales de Periodistes de Cataluña y Galicia, la federación d’Asociaciones de la Prensa y la Federación de Sindicatos de Periodistes.

El diariu ‘La Voz de Asturias’, propiedá’l Grupu Zeta de comunicación -que xestiona ente otres cabeceres ‘El Periódico de Catalunya’- y con edición propia en Xixón, reduz el so personal na delegación d’esa ciudá depués que se-yos comunicare a trabayadores despidíes que’l cese débese a la disolución de la sociedá ‘Comunicación y Medios de Asturias SL’, cuyu capital rexenta al cien por cien el propiu diariu de Zeta n’Asturies.

Asina, y según los datos comunicaos a emplegaes destituyíes -que desendolcaben llabores de redacción y otres xeres con contratos de duración indefinida-, la desapaición de la firma cola que ‘La Voz de Asturias’ comercializaba la so cabecera específica de Xixón determina’l despidu de varies trabayadores. El restu d’operarios que permanecen en plantiella pasarán agora a depender directa y formalmente de ‘La Voz de Asturias’, que s’edita n’Uviéu.

La páxina web del Grupu Zeta inclúi a la entidá ‘Comunicación y Medios de Asturias Sociedad Limitada’ na so división d’empreses comercializadores y ausiliares, como responsable de ‘El Periódico de Gijón’ -edición específica de ‘La Voz de Asturias’ nesa ciudá.

Nos últimos años, esti diariu fizo un apueste pola so presencia en Xixón col llanzamientu d’una delegación allugada na cai Padilla, pero les evoluciones del negociu periodísticu determinaron tresllaos de redactores a Uviéu, ceses y una intermitente sensación d’inseguridá llaboral ente los trabayadores de la publicación.

Un uvieín, fíu adoptivu de Xixón. L’Ayuntamientu d’esta ciudá distinguirá mañana oficialmente nesos términos al periodista y comunicólogu Juan Cueto Alas, ex director de Canal Plus, asesor del canal italianu de pagu ‘Telepiù’ y autor d’una bayurosa obra lliteraria especializada na teoría y la práctica de la comunicación periodística.

Nacíu n’Uviéu en 1942, Juan Cueto ye llicenciáu en Drechu, Ciencies Polítiques y Periodismu. Vinculáu al grupu Prisa, desempeñó nel so senu estremaes xeres, ente elles la dirección de Canal Plus n’España y la crítica de televisión nel diariu ‘El País’. En 1999 foi nomáu director de programes de la división internacional de Canal Plus de Francia.

Autor d’incursiones nel guión y la producción de cine, Cueto publicó una abondosa contribución al estudiu de la comunicación al traviés d’obres como ‘Pasiones catódicas’ (1990) y collechó dellos premios en reconocencia al so llabor, ente los más destacaos l’Antena d’Oru de la Televisión (1986) y el premiu ‘Francisco Cerecedo’, otorgáu al añu siguiente pola Asociación de Periodistes Europeos.

El nome’l comunicólogu uvieín sonó amás na llista de posibles directores xenerales de la radiotelevisión pública asturiana, puestu qu’a la fin ocupará’l profesor y periodista José Ramón Pérez Ornia. Juan Cueto Alas recibió asinamesmo en 2002 la Medalla’l Principáu, que concede’l Gobiernu autonómicu con ocasión del Día d’Asturies, na so másima categoría.

Discursu de Juan Cueto na recepción de la Medalla d’Asturies

Una radiotelevisión autonómica fecha por profesionales asturianos, con un respetu “radical” a ellos y cola llingua asturiana como idioma vehicular. L’escritor y técnicu cultural Adolfo Camilo Díaz, miembru’l conseyu d’alministración del nuevu ente de comunicación, defenderá esi doble plantegamientu, “porque ye lo que dicta la lóxica”, na puesta en marcha de la tv pública, qu’esta selmana nació ‘de fechu’ cola constitución del so másimu órganu decisoriu.

A títulu personal y “dende un criteriu lo más seriu y rigurosu posible”, Camilo Díaz precisó, en declaraciones a Asturnews, qu’apuesta por edificar la radiotelevisión autonómica enriba’l pegollu d’una “base humana asturiana qu’habrá que respetar dende’l primer cámara hasta l’últimu trabayador”. Dicho d’otru mou: “Una televisión que s’apellide asturiana” debería facela un equipu de profesionales asturianos.

Pa discutir esa y otres cuestiones, reveló Camilo Díaz, el conseyu d’alministración del que forma parte y que quedó constituyíu el pasáu miércoles plantégase con franqueza tar “lo menos politizáu posible” y cuenta con una ventaxa de partida: Ye un órganu integráu por persones “abiertes, non dogmátiques”, según l’escritor y técnicu cultural.

Llingua predominante

Magar que’l conseyu alpenes echó a andar y que les sos primeres xuntances de trabayu centraránse, previsiblemente, n’asuntos técnicos y de nomamientos, la discusión sobro los conteníos de les futures emisiones habrá llegar nos prósimos meses. Nella, Camilo Díaz plantégase abogar por que la llingua asturiana seya “predominante” na tv en tou tipu de programes, siempre acordies cola diversidá cultural d’Asturies y la presencia na sociedá d’otres llingües, como’l castellán.

“L’asturianu habría ser l’elementu audiovisual vehicular, d’información común, en tou tipu d’espacios, dende l’anunciu que s’emite ente programa y programa”, exemplificó Camilo Díaz, siempre espresando criterios estrictamente personales.

El miércoles pasáu, la radiotelevisión autonómica asturiana nació ‘de fechu’ cola constitución del conseyu d’alministración del ente, que se pon en marcha sólo colos nueve representantes de los partíos que gobiernen el Principáu -PSOE ya Izquierda Xunida-Bloque por Asturies- y l’ausencia voluntaria’l PP, que renuncia a nomar a los sos conseyeros al entender que la tv ye un proyectu caru y secundariu. El Conseyu de Gobiernu propuso ayeri al periodista y profesor José Ramón Pérez Ornia como primer director xeneral del ente públicu.

Archivu. El Gobiernu ratifica que Pérez Ornia sedrá’l director de la radiotelevisión autonómica

“Güei abrimos la ventana”. Con estes pallabres abrió ayeri’l ventanu d’una inédita programación audiovisual pública n’Asturies el caderalgu de Periodismu de la Universidá de Málaga Bernado Díaz-Nosty, acabante de ser nomáu presidente’l conseyu d’alministración de la radiotelevisión autonómica. Nosty convidó al PP a entrar nesi muérganu pa evitar que siga “mutiláu” y fizo guiños a la presencia de la diversidá cultural asturiana nel nuevu ente públicu.

Asina, el primer presidente’l conseyu de la tv autonómica nun faló específicamente, na so primer comparecencia pública, de programación en llingua asturiana, pero aludió a la bayura cultural d’Asturies y refirióse a la necesidá perentoria de que la nuesa “imaxe culturalmente rica” tea presente na programación de la tv p’ayudar a modernizar la propia comunidá autónoma.

El conseyu a cuyu frente ta dende ayeri Díaz-Nosty quedó constituyíu, como s’esperaba, sólo colos nueve representantes de los dos partíos que gobiernen el Principáu, PSOE ya Izquierda Xunida-Bloque por Asturies, una situación que’l presidente’l conseyu de la radiotelevisión tildó de “mutilación” y a la que namás-y ve una igua posible: Que’l PP nome a los seis conseyeros que-y correspuenden.

Pérez Ornia, director

Esi actu ye decisivu, apuntó Díaz-Nosty, pa llevar a la práctica l’envís cimeru del conseyu qu’ayeri quedó constituyíu: Garantizar la pluralidá de los conteníos na programación del nuevu ente públicu de comunicación, cuyu director xeneral sedrá a la fin el periodista y profesor José Ramón Pérez Ornia.

El Gobiernu asturianu ratificó’l so nome na xuntanza ordinaria que güei cellebró l’Executivu, una selmana depués qu’Ornia apaeciera nos medios de comunicación como’l principal candidatu a exercer la dirección de la radiotelevisión pública asturiana. Tovía ayeri, la conseyera de Cultura y Comunicación Social, Ana Rosa Migoya, pospusiera por enésima vegada revelar cuálu yera’l nome pol qu’apostaba el Gobiernu.

Fiel al so argumentu de que la tv ye un proyectu caru y prescindible, el PP arrenunció a nomar a los sos conseyeros y tará ausente nel muérganu decisoriu que yá ta constituyíu. Asina, los conseyeros que tan acabantes d’asumir el so cargu son namás nueve, acordies cola llista qu’aprobó el Parlamentu asturianu hai agora venti díes: los ex alcaldes socialistes Jesús Landeira (Valdés) y Manuel Amieva (Llanes), la ex conseyera d’Alministraciones Públiques Angelina Álvarez, l’abogáu Francisco Díaz, la notaria Montserrat Martínez, la economista María Luzdivina Rodríguez; el caderalgu de comunicación Bernardo Díaz Nosty que foi nomás presidente del Conseyu; el profesor de Drechu Constitucional Benito Aláez y l’escritor n’asturianu y técnicu cultural Adolfo Camilo Díaz.

El profesor y periodista Pérez Ornia, ex director de Telemadrid, perfílase como director de la tv autonómica

Dientro de menos d’un mes. El 18 de xineru de 2005 ye la fecha escoyida pal llanzamientu’l nuevu diariu gratuitu de Recoletos “Qué!”, un periódicu qu’apuesta pola difusión masiva y que tendrá cabecera propia n’Uviéu y Xixón, baxo la dirección del periodista asturianu Juan Carlos Villar.

El diariu naz col envís de convertise nel periódicu d’información xeneral de mayor difusión d’España, dexando de lláu al canal de ventes. Pa ello, y editáu pol grupu de comunicación Recoletos -que xestiona, ente otres cabeceres, Marca, Expansión y Diario Médico-, cuenta col sofitu que-y darán n’Asturies una tirada diaria de 40.000 exemplares, una estensión d’ente 24 y 48 páxines y una apuesta pola cultura, l’ociu, el consumu y el mediu ambiente.

El nuevu mediu de comunicación, qu’alterará el mercáu tradicional de la prensa asturiana de papel al ufrir por primer vegada nel Principáu información diaria gratuita de gran difusión, editará les dos cabeceres asturianes dende una redacción única, allugada na cai Campoamor d’Uviéu, na que redactores, fotógrafos y comerciales trabayen dende finales d’ochobre coordinaos por Villar.

Un equipu d’once profesionales trabaya yá na preparación d’ediciones de prebes del diariu n’Asturies baxo la coordinación de Villar, periodista conocíu pola so trayectoría nel diariu’l grupu Zeta ‘La Voz de Asturias’, periódicu nel que llegare a ser director, y el so calter d’espertu n’información económica.

El grupu Recoletos desembarca n’Uviéu y Xixón con un nuevu diariu gratuitu

La radiotelevisión autonómica asturiana naz güei ‘de fechu’. Depués de dos décades d’alderique y d’un llargu procesu alministrativu que llegó al Tribunal Constitucional, los nueve directivos qu’integrarán el másimu muérganu decisoriu del nuevu ente, el conseyu d’alministración, asumen los sos cargos y ponen en marcha la maquinaria de la tv, qu’empezará a emitir a mediaos de 2005.

El conseyu que rexirá l’ente públicu de comunicación tendrá, ensin sorpreses d’última hora, sólo representantes de los partíos que gobiernen el Principáu en coalición, PSOE ya Izquierda Xunida-Bloque por Asturies. Fiel al so argumentu de que la tv ye un proyectu caru y prescindible, el PP arrenunció a nomar a los sos conseyeros y tará ausente nel muérganu decisoriu que güei queda constituyíu.

Asina, los conseyeros que güei asumen el so cargu son namás nueve, acordies cola llista qu’aprobó el Parlamentu asturianu hai agora venti díes: los ex alcaldes socialistes Jesús Landeira (Valdés) y Manuel Amieva (Llanes), la ex conseyera d’Alministraciones Públiques Angelina Álvarez, l’abogáu Francisco Díaz, la notaria Montserrat Martínez, la economista María Luzdivina Rodríguez; el caderalgu de comunicación Bernardo Díaz Nosty; el profesor de Drechu Constitucional Benito Aláez y l’escritor n’asturianu y técnicu cultural Adolfo Camilo Díaz.

Dos décades de camín

La idea de contar con una televisión autonómica propia lleva más de dos décades presente, con ciclos socesivos de mayor o menor interés, na sociedá asturiana. Somorguiáu na falta de concreción y consensu políticu, el proyectu permaneció nuna situación d’ostracismu nos años ochenta, dexando a Asturies al marxe del intensu ciclu de creación de les primeres televisiones autonómiques de titularidá pública (Euskal Telebista, 1982; TV3 de Catalunya, 1983; Televisión de Galicia, 1985; Canal Sur, Canal 9 y Telemadrid, 1989) y faciéndola asistir, amás, al surdimientu de segundos canales (ETB-2, 1986; Canal 33, 1989).

Depués que la reforma del Estatutu d’Autonomía recoyera, en 1999, la potestá d’Asturies pa regular, crear y mantener la so propia televisión, radio y prensa, engarradielles internes na Federación Socialista Asturiana (FSA) impidieron que’l proyectu saliere alantre nel primer mandatu de Vicente Álvarez Areces, qu’esi mesmu añu algamó la presidencia’l Principáu.

En marzu de 2003, aprobóse a la fin la Llei de Medios de Comunicación Social, que’l PSOE modificó poco depués pa poder salvar el bloquéu que’l PP exercía a la creación de la tv: Un cambiu llegal ‘ad hoc’ -recurríu pol Gobiernu d’Aznar énte’l Constitucional y consagráu al aportar Zapatero a La Moncloa- permitió constituyir el conseyu d’alministración con a lo menos sólo ocho miembros en representación de polo menos dos grupos parlamentarios. N’otres pallabres, el cambiu llegal fizo posible que’l conseyu eche a andar sólo colos representantes actuales de PSOE ya IX-Bloque.

Archivu. El Gobiernu apuesta pola presencia del asturianu nos programes infantiles de la tv autonómica

La Organización para la Seguridad y la Cooperación en Europa (OSCE) ta acabante de presentar en Viena el “Llibro de cocina de la llibertá de prensa n’Internet”, onde s’alcuentren les “recetes” que se atalanten como pernecesaries pa que los internautes puean facer usu de la independencia na Rede. Esti documentu pue descargase de baldre dende la páxina web de la OSCE.

L’encargáu de garantizar la llibertá d’espresión na OSCE, el poeta Miklos Haraszti, presentó el llibru esclariando que tien de ser una guía pa lluchar escontra los contenidos que perxudiquen a los valores de convivencia o los que fain incitación al odiu, pero ensin violar la llibertá d’espresión.

“Hai intentos de controlar, condicionar y recortar dafechu los estremaos tipos de medios de comunicación n’Internet”, aseguró Haraszti.

“Les actividaes reguladores puen llevar al desaniciu de la llibertad d’espresión, independientemente de qu’esa censura fuese deliberada o venga como consecuencia de la ignorancia”, afirmó’l responsable de la libertad de prensa de la OSCE, una organización qu’axunta a 55 países.

Esti llibro recueye les conclusiones a les qu’aportaron los expertos axuntaos nuna conferencia internacional n’Amsterdam n’Agostu de 2004.

El “Llibru de cocina de la llibertá de prensa n’Internet” pue descargase dende equí.

El periodista y profesor na Universidá Complutense de Madrid José Ramón Pérez Ornia, director xeneral de la cadena pública Telemadrid ente 1991 y 1994 y ex trabayador del diariu El País, perfílase como’l másimu responsable de la futura radiotelevisión autonómica asturiana. Según publica na so edición de güei el periódicu La Nueva España, citando fontes de l’Alministración autonómica, Pérez Ornia sedrá director del nuevu ente de comunicación.

De confirmase oficialmente l’apueste del Gobiernu asturianu -que ye quien debe proponer el nome’l director de la tv- por Pérez Ornia, quedará resueltu un enigma cuidáu con procuru durante selmanes pol Executivu autonómicu, yá que pesie a conocese yá la composición del conseyu d’alministración del ente y a la inminente puesta en marcha de la tv, el Gobiernu refugara hasta agora asoleyar el nome’l director xeneral de la radiotelevisión pública.

La designación de José Ramón Pérez Ornia vendría a compensar la falta de profesionales del periodismu nel conseyu d’alministración -sacante’l caderalgu Bernardo Días-Nosty-, pues na figura’l periodista orixinariu de Siero axúntense teoría y práctica de la comunicación: Amás d’acumular una llarga esperiencia llaboral en medios de comunicación, Pérez Ornia imparte clases de Programación de radio y televisión nel departamentu de Comunicación Audiovisual y Publicidá I de la Facultá de Ciencies de la Información de la Complutense.

El Parlamentu autonómicu dio-y el preste el pasáu 2 d’avientu a la llista d’integrantes del conseyu d’alministración de la radiotelevisión pública, nel que tomarán parte los ex alcaldes socialistes Jesús Landeira (Valdés) y Manuel Amieva (Llanes), la ex conseyera d’Alministraciones Públiques Angelina Álvarez, l’abogáu Francisco Díaz, la notaria Montserrat Martínez, la economista María Luzdivina Rodríguez; el caderalgu de comunicación Bernardo Díaz Nosty; el profesor de Drechu Constitucional Benito Aláez y l’escritor n’asturianu y técnicu cultural Adolfo Camilo Díaz.

Tal como venía manteniendo, el PP declinó tar presente nel conseyu por considerar que la tv autonómica ye un proyectu caru y non prioritariu, polo que’l másimu muérganu decisoriu de la radiotelevisión tará sólo compuestu polos nueve miembros designaos polos tres partíos nel Gobiernu: PSOE ya Izquierda XUnida-Bloque por Asturies.