Cine

Según informa Europa Press, les sales de cine norteamericanes van acoyer dende esti vienres 28 d’avientu la proyección del esitu de Juan Antonio Bayona protagonizáu por Belen Rueda, “El Orfanato”. La ópera prima de Bayona, rodada casique na so totalidá n’Asturies y con guión del asturianu Sergio Sánchez, ta algamando perbones crítices tanto nel públicu como na prensa especializada y ye’l n el film más taquilleru del año 2007 con una recaudación de casi 24 millones de euros y 4.170.000 espectadores.

“El Orfanato”, opta a 14 premios Goya, ente ellos al de mejor película, mejor dirección nobel y mejor interpretación femenina protagonista. Amás d’eso ta nominada a los Oscar na sección de película de fala y tan acabante de vendese los derechos pa facer un “remake” n’EEUU y pa la so distribución en más de 40 países.

Acabante de finar el programa de concursos CREACIÓN de curtiometraxes d’animación que organiza l Serviciu de Mocedá de la Mancomunidá de la Comarca de la Sidra, ya se conocen los ganadores. Jorge Dayas por “La dama en el umbral” y Juan Galiñanes por “El bufón y la infanta” son los dos traballos que’l xuráu del certame consideró con mayor nivel d’un concursu al que se presentaron 26 películes.

Amás d’estes dos ganadores, el xuráu esbilló otros ocho curtios que van ser proyectaos, xunto colos premiaos, n’espacios culturales fuera y dientro de la Comarca de la Sidra. Estos curtios son: “Les fleurs du mal” de Jose Herrero Caba y Aurora Solano Perez; “Una sencilla historia” de Gerardo de la Fuente; “El viaje de Said” de Coke Riobóo; “Violeta la pescadora del mar negro” de Marc Riba y Anna Solanas; “Tadeo Jones y el sótano maldito” d’Enrique Gato; “El ataque de los kriters asesinos” de San Ortí; “Mister Miedo” de Damián Figaredo y “Manolo marca registrada” de Cesar Esteban Rodríguez.

El guión de “El Orfanato”, obra del asturianu Sergio Sánchez opta al premiu al meyor guón del cine español na edición de los premios Goya d’esti añu. La película dirixida n’asturies por Juan Ignacio Bayona, un esitu de taquilla y crítica, tamien ta seleccionada ente les finalistes a la meyor película más de cuntar con 12 nominaciones más. La cinta acapara xunto con “13 rosas” d’Emilio Martínez Lázaro la mayoría de candidatures con 14 caúna, según dio a conocer la Directora de l’Academia de Cine, Ángeles González Sinde.

“AsturianUS”, película documental que cunta la hestoria de la emigración asturiana n’Estaos Xunidos a los cimeru del sieglu XX va emitise esti llunes 17 d’avientu na Televisión del Principáu d’Asturies (22:00 hores). La cinta ye obra del director asturianu Luis Argeo y afonda nel viexe que entamaron dellos asturianos, sobre manera del conceyu de Castrillón, buscando una meyor vida al abellugu de les fabriques de zinc americanes y como nestos pueblos caltiense la influencia asturiana. Esta película ya formo del Festival de Cine de Xixón d’esti añu y del certame de documentales Documenta, cellebráu en Madrid.

El Salón d’actos del Centru Municipal Integráu de El Coto, en Xixón agospia güei la proyección de la película “Al servicio de las damas”, del director Gregory La Cava. El pase, organizáu pola Fundación Municipal de Cultura, Educación y Universidad Popular de Xixón dientru del ciclu cinematográficu sobre la comedia, va escomenzar a les 19:30 hores y la entrada al mesmu va ser de baldre y llibre hasta enllenar la sala.

“Al servicio de las damas”, estrenada en 1936, ye una sátira perinxeniosa de l’alta sociedá americana, a mediu camin ente’l cine ya’l teatru clásicu de variedaes. Cunta coles interpretaciónes de William Powell, Carole Lombard, Gail Patrick, Alice Brandy, Eugene Palette.

El Conseyu de la Mocedá del Principáu d´Asturies, el Festival Internacional de Cine de Xixón y la Ciudá Tecnolóxica Valnalón, col patrocinio de Telecable, entamen otra edición del concursu de mozos y moces productores cinematográfiques ´Nun mos cuentes películes, ¡¡failes!!´.

El proyeutu pretende fomentar la capacidá d´iniciativa, la creatividá, el trabayu n´equipu y l´espiritu emprendedor ente la mocedá asturiana. Siguiendo les directrices de la Unión Europea escoyóse´l cine como representante d´una industria creativa na que los y les xóvenes puen facer la transición de participar como consumidores a tresformase en profesionales del sector.

La modalidá escoyida ye´l documental. Los y les participantes deberán presentar proyeutos baxo´l prisma de la realidá de los xóvenes y el so entornu. Los proyeutos ganadores tendrán como premiu la realización d´un documental. La edá pa participar ye de 16 a 26 años El plazu de presentación de los proyeutos acaba´l 31 de mayu de 2008. Fiches d’inscripción, bases y otres pistes na web del Conseyu de la Mocedá del Principáu.

Bases completes del concursu

El Fórum de la FNAC, nel Centru Comercial Parque Principado de Siero, continua cola so politica d’esibición de películes en versión orixinal subtitulada col pase de “Todos somos uno (One)” del director Ward Powers, a partir de les 19:00 hores cola entrada a la sala de baldre y llibre hasta completar l’aforu.

One ye la hestoria d’un padre de familia americanu que decide entemar a rodar la so propia película sobre les 20 coses más trascendentes de la vida. Merca una videocámara dixital y xunto cola muyer y dos collacios entamen un viaxe pa conocer les rempuestes nes boques de los líderes espirituales, autores, maestros e iconos más representativos de la so epoca.

Mientres la TPA sigue arrequexando l’asturianu en cerca del 1% de la programación selmanal, partículares siguen faciendo trabayos que, con pocos medios, amuesen lo fácil que diba ser pal Ente de Comunicación del Principáu d’Asturies doblar películes y series pa emitilos pela canal autonómica. Nesta ocasión son cachinos de películes clásiques como Pulp Fiction o Lo que’l vientu llevó. Momentos inolvidables del cine qu’agora pueden vese n’asturianu, gracies al trabayu desinteresáu de dos dobladores asturianos.