Cine

Hasta’l 31 de mayu pueden mandase curtiumetraxes pa participar nel VI Festival Nacional de Curtiumetraxes “Ribedeva En Curtiu”, (REC) entamáu pol Conceyu de Ribedeva y que se celebra los 17, 18 y 19 d’agostu.

Pal concursu establezse un premiu de 2500 euros, pal Meyor Curtiumetraxe 2010, y otru de 600 pa la Meyor Interpretación. Amás, va esistir un premiu especial de 500 euros pal Meyor Curtiu de Director Asturianu Menor de 35 años.

Ente los premios del festival ta tamién l’otorgáu pol públicu, ensuin cuantía económica, y una categoría de Meyor Curtiumetraxe d’Animación con una dotación de 800 euros. Amás, esti añu establezse’l premiu ‘REC-BCN Centru Asturianu de Barcelona’ al meyor curtiumetraxe documental que va recibir un galardón alusivu al mesmu; y va otorgase l’Urogallo de Plata del Centru Asturianu de Madrid al meyor curtiu rodáu íntegramente n’Asturies.

Páxina del festival

El martes 4 de mayu a les 20 hores, l’Asociación Feminista d’Asturies AFA organiza la proyección d’un curtiu, realizáu por Melania Fernández, sobre la so hestoria. El llugar escoyíu ye’l Club de Prensa de La Nueva España n’Uviéu, cola intervención de Charo Hernández Catalán, escritora y vicepresidenta d’AFA, Cármen Suárez, hestoriadora y miembru d’AFA y Melania Fernández, realizadora.

Asturianos en Bruseles estrena en pantalla grande’l curtiumetraxe últimu de Santos Hevia “La vida de María de Magdalá”, presentáu per vez primera en Bruseles con motivu de la clausura del IV Festival de Cutios Asturianos d’ASBRU. La entrada ye gratuita y amás, darréu de la proyección, va poder falase col autor. La cita ye güei, vienres 23 d’abril, a les ocho la tarde. Nel Studio l’Equipe, asitiáu na avenida L. Mommaerts 6, de Bruseles (Bélxica).

El dibuxante collaborador d’ASTURNEWS, y realizador asturianu Alberto Vázquez García, va estrenar un documental sobre’l viaxe de los antifranquistes asturianos que fueron homenaxeaos en Madrid nel mes de xunu de 2008. La estrena va ser nel Teatru Xovellanos de Xixón, güei, domingu 18 d’abril, y a partir de les seis de la tarde, de baldre y cola collaboración de l’Asociación d’Ex-Presos y Represariados Antifranquistas y la Conceyalía de Memoria Social del Ayuntamientu de Xixón.

El Conceyu d’Avilés convoca la novena edición d’esti Certamen, dirixíu a toles ceadores con obres de ficción en cualesquier idioma del Estáu, sotitulaes si nun tán en castellán o n’asturianu.

Les películes tienen de tar producíes dempués del 1 de xineru del 2009. La duración de la obra nun tien d’entepasar los venti minutos. Cada participante va poder presentar hasta dos obres a lo más, en formatu DVD o VHS, hasta’l 20 d’abril. Les obre han mandase a la Oficina d’Información Xuvenil d’Avilés, nel númberu 23 de La Cámara.

Los premios establecíos son de 2.100 y 1.200 pa los dos primeros puestos, dos premios de 900 y trés de 750 euros, pa los siguientes clasificaos.

Más información nel 985 56 18 82.

Bases completes

Güei, martes 23 de marzu, a les 19:30 hores, el Salón d’Actos del Centru de Cultura Vieyu Institutu de Xixón, va acoeyer la presentación del llibru “La representación de la mujer en el cine español de la Transición (1973-1982)”, d’Amanda Castro, y n’edición de KRK.

Na presentación van tar l’autor y amás, Isabel Carrera, profesora de la Universidá d’Uviéu y integrante del Conseyu de Redacción de la colección Alternativas de KRK Ediciones, y Esther Álvarez López, coordinadora del Máster Xéneru y Diversidá de la Universidá d’Uviéu.

Asturnews ufre a los sos llectores el reportaxe fotográficu más completu de la edición última del Festival de Cine Asturianu, que tuvo llugar n’Uviéu apocayá.

Más de 120 semeyes nes que pueden vese la gala presentada por Pepa Martínez y Xavi Vilareyo, y na que tamién actuó’l célebre tresformista DiCarlo y los Ballets Baidán. L’actor Juan José Otegui recibió’l Premiu d’Honor nel escenariu del Filarmónica, onde anunció la so retirada de los escenarios. El veteranu actor, nacíu n’Uviéu en 1936, ye ún de los actores míticos de la escena teatral y cinematográfica.

Galería d’imáxenes del Festival

Los curtiumetraxes “Vencíu”, de Santos Hevia y “Sin cobertura” d’Iñaki Ibisate resultaron ser les obres ganadores del 6u Festival de Cine Asturianu celebráu nel Teatru Filarmónica d’Uviéu nes categoríes de Meyor Curtiumetraxe n’asturianu y en castellán respectivamente. Como Meyor Película, el premiu foi pa “Cenizas del cielo” del realizador José Antonio Quirós, calificada como “una valiente realización sobre los problemas de contaminación d’una central térmica asturiana.

El llargometraxe de Quirós llevó temién los premios al Meyor Guión, dirección y actores que recayeron en sos protagonistas, Celso Bugallo y Clara Segura. El premiu d’Honor del festival, Juan José Otegui repasó nel escenariu del Filarmónica la so trayectoria nel mundu del cine entregando los premios principales del festival nuna gala presentada por Pepa Martínez na que tamién actuó el tresformista DiCarlo y los Ballets Baidán, que pesllaron les trés xornaes de festival.

Esti llunes presentábase en Xixón el programa del Festival de Cine Asturianu, que dirixe Xaviel Vilareyo y que nesta ocasión se celebra nel Teatru Filarmónica d’Uviéu, ente’l 23 y el 24 de febreru. Nel actu presentóse la obra “Historia del cine asturianu”, escrita pol director del Festival, cuntando cola presencia del editor, Marcos Abel Fernández, d’Espublizastur.

Güei martes va facese nel cosu uviedín la gala de proyecciones de los curtiumetraxes finalistes, a partir de les seis y de dellos documentales, de magar les nueve la nueche.

Los ganadores van recibir los premios mañana, nun gala de pieslle que va tener llugar nel mesmu teatru y a partir de les seis de la tarde, cuntando con un homenaxe al actor asturianu Juan José Otegui.

La entrada a les proyecciones ye de baldre.

El sestu Festival de Cine Asturianu va entamar esti llunes 22 en Xixón cola presentación de los nominaos a los Premios a partir de les siete la tarde nel Salón d’Actos de la Biblioteca Xovellanos. El martes y el miércoles siguientes sedrá’l Teatru Filharmónica d’Uviéu el sitiu afalladizu qu’allugará les proyecciones y la Gala de Pieslle cola entrega de Premios y l’homenaxe al actor ovetense Juan José Otegui, gala na qu’actuará el Ballet Baidán y el gran artista DiCarlo, nuna ceremonia d’entrega de Premios a la que tán convidaos tolos amantes del cine asturianu y onde habrá tamién otres sorpreses.

L’actor Juan José Otegui recibirá’l Premiu d’Honor nel escenariu del Filharmónica nel 6u Festival de Cine Asturianu el próximu 24 de febreru durante la Gala de Pieslle del Festival, onde anunciará la so retirada de los escenarios. El veteranu actor, nacíu n’Uviéu en 1936, ye ún de los actores míticos de la escena teatral y cinematográfica n’Hespaña. Entamó nel Teatru Universitariu d’Uviéu debutando en 1968 nun curtiumetraxe de José Luis García Sánchez tituláu Pólipos nes trompes. Dende entós la so filmografía ye mui llarga: Del amor y otres soledaes, Asesinatu nel comité central, Tiempu de silenciu, El vuelu de la palomba, Belle epoque, La bicicleta y tamién nes recientes producciones de Pedro Almodóvar como Tacones llonxanos, La flor del mio secretu y Too sobre mio madre. Nesti añu de 2010, Juan José Otegui anuncia la so retirada de los escenarios, llueu d’una llarguísima y destacada carrera como actor.

El Festival de Cine Asturianu entamará’l llunes 22 cola presentación en Xixón de los nominaos a los Premios del Festival que tendrá llugar nel Salón d’Actos de la Biblioteca Xovellanos a partir de les 7 la tarde. A les 7,30 proyectaráse una de les mítiques películes mudes del cine asturianu, Mieres del Camín (Juan Díaz Quesada, 1927). Y a les 8 la tarde tendrá llugar la presentación del llibru Historia del Cine Asturianu, de Xaviel Vilareyo, nel mesmu llugar onde se proyectó cine per primer vez en Xixón nel añu 1896, nel llugar onde antaño s’allugó’l vieyu Teatru Xovellanos, que güei ocupa la Biblioteca Pública de la ciudá. Los nominaos nesti 6u Festival como meyores curtiumetraxes són nes categoríes de competición: Almes perdíes (Julio de la Fuente, 2008), Carla (Kiko y Javier Prada, 2008), El plan B (José Bors, 2006), Estación de carretera (Kiko y Javier Prada, 2009), Fémina domus (Jaime Fernández, 2009), Sin cobertura (Iñaki Ibisate, 2009), La vocación (Xavi Vilareyo, 2009), Puntu (Eva Gallego, 2009), Vencíu (Santos Hevia, 2009). Como Meyores Documentales tán nominaos los trabayos: Baxar la música (Martín-Parra-Otero, 2009), Conceyu de Valdés un llugar apasionante (Hi-video, 2008), Pablo Maojo (Rai García, 2009) y Tom Zé astronauta libertado (Ígor Iglesias, 2009). Los miembros del xuráu daránse a conocer na Gala de Pieslle del día 24 de febreru. El 6u Festival de Cine Asturianu va tener llugar del 22 al 24 de febreru del añu 2010 nel marcu del Teatru Filharmónica d’Uviéu onde tendrán llugar les Gales de Presentación el 23 de febreru y la Gala de Pieslle del día 24 cola entrega de Premios del Festival, les dos a partir de les 6 de la tarde. L’asistencia a tolos actos del Festival de Cine Asturianu ye gratuíta.El Festival de Cine Asturianu concederá premios en diverses categoríes ente elles al Meyor Curtiumetraxe n’Asturianu y en Castellanu y a la Meyor Película. El festival remembrará’l centenariu de la película Día de fiesta en Candás, de Julio Peinado y el centenariu del Cinema Versalles, el primeru construyíu en Xixón esclusivamente pal cine.