Cine

Esti vienres, 8 de febreru, nel Salón d’Actos del Conseyu de Mocedá de Xixón va proyectase’l curtiometraxe de Beatriz Merés “El abominable que se sentó frente a las nieves que no dejaban de hablar”. L’actu, que va cuntar cola presencia de l’autora, va facese en dos pases, unu a les siete y otru a les ocho la tarde.

“Piquinu” ye un curtiu documental que tien de protagonista a un mozu del Conceyu L.lena, “al que lu acompáñen los sos perros per unu de los meyores paisaxes que tien esti país”, esplica la so directora Sonia Fernández, que conoció a esti rapaz, Aarón, nel colexu onde da clases de dibuxu, en La Pola L.lena, “ellí quedamos ablucaos, el mio collaciu d’Asturianu y yo, al lleer un rellatu que presentó Aarón pa un concursu lliterariu col tema de la montaña como exa principal”, esplica Fernández.

Aquel rellatu yera “El xabalí del Picu la Penasca” que según espliquen dexó-yos dos coses bien clares “l’amor d’Aarón pola montaña y la necesidá d’espresalo cenciella y contundentemente na so llingua materna”.

El resultáu ye esti curtiu cenciellu, nel que la voz n’off d’esti rapaz “piquinu” acompaña a les imáxenes de la so vida diaría nel pueblu de los sos güelos.

Ver el curtiu

Gonzali Producciones presentó en 2010 esti documental, el primeru rodáu en gallego-asturianu. Dirixíu por Illán Gonzali y conducíu por Alberto Álvarez Peña, esti mediumetraxe recuérdanos que n’Asturies había homes y muyeres que teníen el don de ver a los muertos y falar con ellos.”La so figura nun ta escaecida na parte más occidental d’Asturies”, comenten dende la productora. Y asina paez a la vista de los bonos resultaos que ta teniendo, con más de 3.500 persones que yá la vieron na canal de Vimeo.

En Bual ñació Amparo López, más conocida como A bruxa de Brañavara. Amparo entraba en trance pa comunicase colos difuntos y mediar ente éstos y los vivos. La so fama foi bien gande, hasta’l puntu de que la revista Triunfo dedicó-y l’artículu “Una bruxa auténtica en Brañavara”, nel so númberu del 3 de xunu de 1978.

D’ella, y de los sos fechos, trata esti documentu.

Ver documental

Gonzali Producciones tien yá programao pal segundu trimestre de 2013 el primer doblaxe al asturianu d’un filme checu, Inventu Diábolicu (Vynález zkázy), del añu 1958, obra del xeniu de l’animación mundial Karel Zeman (Oströmer, 1910 – Praga, 1989), onde cobra vida’l mundu creativu de Xuliu Verne. La película baraxa conceptos ya idegues apaecíos en delles noveles del autor francés, masque sigui la llinia argumental d’“Ante la bandera”, novela espublizada en 1896 ya ilustrada por Léon Benett, un dibuxante amigu de Verne que bien de veces facía los sos dibuxos baxo la supervisión del escritor.

Karel Zeman taba, cuando se punxo a treslladar al cine l’universu vernianu, influenciáu pola fuerte tradición marionetista de Checoslovaquia y pol so apegu a la obra de George Méliès. Asina, per aciu del trucaxe, la sobreimpresión y el collage, y con un sentíu dafechamente lúdicu y artesanal, dió-yos movimientu a los grabaos creando una suxestiva dómina del vapor enllena de prodixos mecánicos imposibles, somarinos y estremaos globos aerostáticos. Poro, esta cinta ye visualmente portentosa.

El director usó la técnica del esgrafiáu en tolos elementos d’esti trabayu cinematográficu (decoraos, traxes, ambientación…) consiguiendo un acabáu en pantalla perasemeyáu al d’una plancha d’aceru grabao. El filme combina a actores reales con marionetes y animación, y tamién decoraos planos con perspectiva distorsionao. Los personaxes allugólos nel planu como marionetes pa nun romper l’armonía del conxuntu. Esa síntesis, entamada en blanco y negro, da una mestura homoxéneo ente tolos elementos que tien un resultáu impactante.

La hestoria xira alredor de Thomas Roch, inventor francés que fai un esplosivu devastador. A Roch secuéstralu’l conde Artigas, y tres d’un llargu viaxe en barcu y submarín, llévenlu a una base secreta que s’afaya nuna islla volcánica metanes l’océanu. Ellí, con engañu, llogra convencer al profesor pa que trabaye col envís de facer un arma que-y permita gobernar el mundu. Pero Simon Hart, el so asistente, tamién reteníu na islla, fará tolo posible pa torgar los planes del conde. Cola ayuda de Jana, una moza náufraga, manda un mensaxe d’alvertencia dientro d’una botella aventada al mar, pero’l conde yá terminara la creación d’un enorme cañón potenciáu pol inventu de Roch.

Inventu Diábolicu ta narrada en pasáu, per aciu de les páxines del diariu de Simon Hart,y ye una metáfora sobre l’empléu de la enerxía atómica y sobre cómo l’home utiliza la ciencia pa oxetivos destructivos. La trama alviértenos de los peligros de la tecnoloxía y, la invención que da nome al filme, ta considerada como un anticipu a la bomba atómica.

FICHA TÉCNICA

Títuli orixinal: Vynález zkázy

Idioma: Checu

Xéneru: Aventura. Fantasía. Animación

País: Checoslovaquia

Duración: 83 minutos

Añu: 1958

Director: Karel Zeman

Repartu: Lubor Tokos, Arnost Navrátil, Miroslav Holub, Frantisek Slégr,Václav Kyzlink,Jana Zatloukalová, Frantisek

Cerný, Otto Simánek, Václav Trégl

Productora: Ceskoslovenský Státní Film

Esti vienres entamó la producción del doblaxe al asturianu d’otru clásicu cinematográficu: CHARADA (‘Charade’ nel so títulu orixinal). Trátase d’una película del añu 1963 dirixida por Stanley Donen, y protagonizada por Cary Grant y Audrey Hepburn. Tamién actúen nella los actores Walter Matthau, James Coburn, George Kennedy, Dominique Minot, Ned Glass y Jacques Marin. La banda sonora y música de créditos son de Henry Mancini y los títulos animaos de Maurice Binder.

CHARADA allúgase ente los xéneros thriller y comedia romántica. La canción de la película tuvo nominada al Óscar. Cary Grant y Audrey Hepburn fueron candidatos a los Globos d’Oru como meyor actor y meyor actriz de comedia o musical, respectivamente. El guionista, Peter Stone, recibió en 1964 el Premiu Edgar de los Escritores de Misteriu d’América al meyor guión adaptáu.

SINOPSIS:Regina ye una muyer que vuelve d’unes vacaciones nuna estación d’esquí enfotada en divorciase, pero cuando llega a París resulta que mataren al so maríu. Les sospeches recain en trés homes que tán dispuestos a tou col envís de conseguir una gran fortuna que tendría de tar en manos del asesináu, pero qu’en realidá pertenez al gobiernu de los Estaos Xuníos.

Sonia Fernández, profesora nel IES Benedicto Nieto de La Pola (L.lena) y polifacética artista plástica, estrena‘l so curtiumetraxe docmental entitulaú Piquinu, que tien como protagonista a ún de los sos alumnos, Aarón, un rapaz de 14 años que tolos díes cuerre los montes de Rospaso col so perru Chumbo.

En pallabres de la direutora “esta hestoria ye pequena. Ye un homenaxe que-y fago al mio alumnao por aprendeme día a día a ver el mundu d’una manera distinta, a valorar coses qu’esti mundu actual siempre arrequexa. Coses pequenes que son mui grandes”.

Dempués de percorrer estremaos festivales nacionales y rexonales, había que llevar esti trabayu al so llugar de nacencia y posiblemente al únicu sitiu onde va ser entendíu d’entamu a cabu, por ello la directora enfotóse va tiempu en facer la presentación oficial nel Teatru Vital Aza de la Pola (L.lena), prevista pa esti próximu sábadu 22 d’avientu a les 20:00 hores. L’actu, de baldre pa tola xente que quiera asistir, va tar presentáu por Xosé Ambás y va contar coles intervenciones de Dani Álvarez, Javier Niembro, Luis Argeo, Mapi Quintana, Vanesa Gutiérrez y Xesús Torga.

El proyéutu entamó hai un par d’años cuando Aarón, con una fala asturiana natural, pura y escepcional pa los tiempos que cuerren, se presentó a un concursu de relatu curtiu nel institutu con una historia personal qu’entituló El Xabalí del picu la Penasca, y que socedía nos montes del Parque Natural de las Ubinas. La directora, conociendo al rapaz y la naturalidá cola que falaba de la so afición pol monte, tuvo claro qu’había una historia pa contar con Aarón de protagonista y pa ello enguedeyó nel proyéutu a Dani Álvarez, profesional audiovisual que s’encargó del apartáu téunicu per un llau y de la banda sonora per otru, como músicu y cantante que ye de la banda asturiana Losone; pa finar tamién comprometió pa esti proyéutu a Xesús Torga, profesor de Llingua Asturiana nel mesmu IES de Pola, qu’echó un gabitu na ellaboración del guión.

Nesti alloriáu sieglu XXI l’estrenu d’esti curtiu documental qu’espeya la cotidianidá d’un mozu nun viaxe interior que sube dende Rospaso al cordal de las Ubinas, quier ufiertar otru puntu de vista sobre la mocedá rural que s’estrema enforma de lo que reflexen anguaño nos medios de comunicación y quiciaves seya un mou de vida más xeneral de lo que nos paez na Asturies d’esti tiempu.

Páxina del documental

Os Reises. Una tradición viva, ye’l títulu del documental que va proyectase mañana xueves, a les 20 hores, na Sala d’Arte del Centru Sociocultural de Les Vegues, en Corvera.

Fechu pola Asociación Cultural Tíu Vitán de Tormaleo (Ibias), el documental recueye testimoniu gráficu d’una de les poques mazcaraes d’iviernu que se caltienen n’Asturies, en xunto con Os Reises d’El Valledor, aguilandu de Xedré, Sidros de Valdesoto, ente más otres.

Nel documental analízase y esplícase la recuperación d’esta tradición pola xente mozo de la montaña del conceyu d’Ibias; amás de recoyer imáxenes del desarrollu de la mazcarada na primer fin de selmana de xineru, vemos cómo esti actu fai parte tamién de les señes d’identidá asturianes venceyaes cola cultura popular.

La entrada pa ver esti documental, qu’hasta’l momentu nun se proyectara en Corvera, ye abierta y gratuita.

Un usuariu de YouTube llamáu “Rebalbu” ufre dende va unos meses delles películes sotitulaes n’asturianu na so canal. Títulos como “Moscú Contrataca”, un documental sovieticu sobre la resistencia rusa a los nazis qu’algamó una nominación al Oscar, “La batalla d’Arxel”, obra maestra de Gillo Pontecorvo; “Estáu de sitiu”, película de Costa Gavras sobre la rellación de los EEXX coles dictadures, les tortures, los paramilitares en Sudamérica; el documental “Antifa” y otros conteníos como “Z”, “L’honor perdíu” o la torna d’un cantar dedicáu a los revolucionarios d’ochobre de 1934.

Esti miercoles día 28 de payares a les 19:30 hores, nel Centru Social La Semiente de L’Entregu, va poder vese, de la mano del so autor, Alverto Vazquez García, el documental “34-45. Diez asturianos nel exiliu francés”. Al traviés de los testimonios de diez asturianos el documental percuerre los repitíos esilios en suelu francés, teniendo como puntu de partida la derrota de la Revolución de 1934, pasando pela cayida d’Asturies en 1937 y la de Cataluña de 1939. A partir de 1939 asísetese al pasu d’estos homes y muyeres, apátrides según Franco y Hitler, pelos campos de concentración franceses, los campos d’esterminiu alemanes, la so importante participación en La Resistencia, la División Leclerc o’l maquis francés hasta la victoria final sobre los nazis. Dempués vendríen les invasiones pirenáiques al envís de forciar a les potencies aliaes a cumplir la so promesa d’espulsar a Franco y l’operación Boleru-Paprika contra l’activismu antifraquista en Francia.

Según espliquen los autores del documental “Nun acepten el términu “Guerra Civil Española” sinón el términu “Guerra Antifascista Mundial” y toos ellos, octoxenarios y nonaxenarios “consideraos héroes poles instituciones franceses, nun volverán ser españoles mientres se-yos obligue a xurar fidelidá a un rei…”.

Un garapiellu de catorce mozos y moces, con edaes ente los diecisiete y los venticinco años y que vienen amás d’Asturies, dende Madrid, Sevilla, Salamanca o Cataluña, forma esti añu’l xuráu Mozu del Festival Internacional de Cine de Xixón. Tradición heredada del orixe infantil y xuvenil del Festival, el Xuráu Mozu ye l’encargáu de dar el Premiu “CaxAstur” del Xuráu Mozu al meyor Llargumetraxe, dotáu con 12.000 euros y el Premiu “CaxAstur” del Xuráu Mozu al meyor Curtiumetraxe, dotáu con 3.000 euros, escoyíos d’ente los títulos presentaos nes respeutives Seiciones Oficiales.

Les persones que formen el Xuráu Mozu d’esta 50 edición son:

1. RUBÉN DE CASTRO TERRADILLOS – Xixón

2. LUCÍA ARANAZ SÁNCHEZ – Uviéu

3. ESTHER ALONSO LADA – Uviéu

4. GONZALO FERNÁNDEZ NAVES – Avilés

5. PABLO GARCÍA CONDE – Salamanca

6. VICTOR PALACIOS LÓPEZ – Llangréu

7. ELISABET FORTUNY SABATER- Sant Quirze del Vallès/ Barcelona

8. MARGARITA LÓPEZ MORALES – Sevilla

9. SERGIO MARTÍNEZ DEL BARRIO – Xixón

10. MERITXELL CIVIL MARTÍNEZ – Molins de Rei/ Barcelona

11. HÉCTOR MENÉNDEZ MENÉNDEZ – Xixón

12. SUSANA FERNÁNDEZ SERRÁN – Xixón

13. PATRICIA RAMÍREZ DEL RÍO – Madrid

14. ANAYA EITA RODRÍGUEZ DÍEZ – Xixón