Cine

L’alcuentru colos curtiometraxes asturianos tendrá dos cites a lo llargo del Festival de Cine de Xixón, 25 y 28 de payares. El sábadu 25 de payares proyectaránse “Painting soldiers”, “Gijón City Hestories”, “El plan b”, “El cuadro” y “Peces Pequeños”. La segunda sesión del Día d’Asturies fadráse’l martes 28 de payares cola proyección de “Terapia peculiar”, “Respirar”, “Conjuntos disjuntos”, “24 escaleras”, “Sacrificio”, “El Torreón” y el “Cantar del agua”.
La participación de los curtiometraxes asturianos tará presente tamién na competición del Festival onde “The party is over”, “Recuerdo”, “La Marea”, “La Terapia”, “Vacyo”, La invasión de los hiperpúberes” y “Gertrud” proyectaránse dientro de les sesiones del Festival xixonés

Avance de la programación de la Sección Oficial y les películes que se proyectrán nes gales d’inauguración y clausura de la 44 edición del Festival Internacional de Cine de Xixón. The History Boys ye la película escoyida pa la sesión inaugural, la película ta dirixida por Nicholas Hytner. Esta producción británica ye l’adaptación cinematográfica de la obra teatral d’Alan Bennet que, nel añi 2004, arrasó na taquilla llondinense y algamó seyes premios Tony -los Oscar del teatru- na última edición de 2006
Ambientada nos díes de la llegada al poder de Maragaret Thatcher en 1980, la cinta cuenta les aventures d’un garrapiellu de mozos estudiantes nuna escuela privada del norte d’Inglaterra, y los sos intentos por entrar nes universidaes d’Oxford y Cambridge, de la mano de dos profesores con caracteres bien distintos.

Idlewild na sesión de clausura, de Bryan Barber. Protagonizada por Big Boi y André 3000, del dúu musical Outkast -un de los más especiales y talentosos de la escena del hip-hop americanu- y la dirección de Barber, qu’aveza dirixir los sos video-clips, Idlewild foi una de les sorpreses del añu nos Estaos Xuníos. Con un conteníu visual ablucante, la cinta amiesta’l musical, el cine negro, el drama y la comedia nuna historia ambientada nun club de los años 30.

A Guide to Recognizing All Your Sints una obra de Dito Montiel, qu’algomó por ella’l premiu al Meyor Director nel Festival de Sundance asina como’l Premiu de la Selmana de la Crítica en Venecia. Cuenta cola participación de nomes consagraos como Robert Downey J.r, Chazz Palmintieri o eric Roberts, pa una historia sobre la delincuencia nel Queens niuyorquín. Shortbus de John Cameron-Mitchell, los amantes de la conversación ya’l sexu alcuéntrese nun sitiu onde nun hai espaciu pa pudores nin inhibiciones. Demented, de Laurent Achard foi Leopardo de Plata en Locarno y premiu Jean Vigo al director novel del añu en Francia. I don’t want to sleep alone, supón el regresu a Xixón de Tsa Ming-Liang tres la retropsectiva que’l Festival-y dedicara en 2004.

El director Juan Carlos Rulfo presentará “En el hoyo”, Gran Premiu del Xuráu en Sundance y Meyor Película nel Festival de Cine Independiente de Buenos Aires, nuna historia sobnre los obreros d’una autopista mexicana. Offsiden, del iraní Jafar Panahi, ganó l’Osu de Plata en Berlín, un grupu de muyeres intenta entrar nun partíu de fútbol de la selección d’Irán, pero esi nun ye llugar pa elles. Quiceañera, EEUU, foi premiu del públicu y Especial del xuráu de Sundance, pa cuntar una historia de conflictos raciales, adolescentes llatines embarazaes y cuelbrones a ritmu de reggaeton. “La línea recta” (España) de José María de Orbe, representa un duru retratu xeneracional al través de la mirada d’una moza repartidora de publicidá. “Longing” (“Sehnsuch”) (Alemania) foi revelación del últimu cine alemán, con una infidelidá como detonador del conflictu. “On Fire” (“Ça Brule”) (Francia) cuenta la pasión arrolladora d’una adolescente y un bombero que podría ser el so padre. Quinceañera”Nº 2″ (Nueva Zelanda), Premio del Públicu en Sundance pa esta comedia coral sobre asuntos de familia con una matriarca mui especial. En “Slumming” (Austria) de Michael Glawogger, el director de Workingman’s Death, vuelve con una ficción sobre un ricu ociosu que se entretién gastando bromes a los paries de Viena. “Daratt” (Chad, Francia, Bélxica, Austria) algamó’l Premiu Especial del Xuráu en Venecia, coles consecuencies de la guerra del Desiertu del Chad como telón de fondu. Pa finalizar “Gradually” (“Be Ahestegi”) (Irán) de Maziar Miri, introduznos nos problemes d’un país con un réxime teocráticu que llexisla hasta en materia d’amor Fuera de competición proyectaránse “Suely in the Sky” qu’algamó los principales premios nel Festival de Rio de Janeiro. “Old Joy”, trunfadora nel festival de Rotterdam. Container del avezáu del Festival Lukas Moodysson. In Between Days, premiu de la Crítica en Berlín y Premiu Especial del Xuráu en Sundance.

Day night day night” Premiu “Mirada Joven” na quincena de Realizadores de Cannes y “Resistencia” de Lucinda Torre, que recuerda conflictos llaborales y la llucha de más de diez años de los obreros de Duro Felguera.

La Conceyalía de Bientar Social del Ayuntamientu de Mieres entama mañana una proyección del Ciclu Cine na Enseñanza. La película que se va proyectar ye la francesa “Camping a la ferme”. Los pases fadránse nel siguiente horariu 9 y 11,30 empobináu a los más nuevos y a les 18,30 hores pal públicu en xeneral. Les proyecciones fadránse nel Centru Cultural de Caxastur.
Camping a la Ferme, de Jean Pierre Sinapi, cuenta la hestoria de seyes mozos parisinos, qu’escoltaos pol so educador, que se treslladen a un pueblu del campu francés. Ellí han facer servicios a la comunidá, nesti tiempu dirán conociéndose asina mesmos. La entrada ye llibre.

El Festival Internacional de Cine de Xixón presentará la so 44 edición, que se va facer dende’l 23 de payares, catorce llargumetraxes a concursu y otros siete fuera de concursu, amás la sección oficial de curtios cuntará con doce obres.
La inauguración nel Teatru Xovellanos de Xixón fadráse cola producción británica “The History Boys”, dirixía por Nicholas Hytner, la película ye una adaptación de la obra de teatru d’Alann Bennet que tres permanecer nes tables teatrales de Londres demientres meses, recoyó seis premios Tony’s en Nueva York.
Trátase de la hestoria d’un grupu d’estudiantes qu¡apura’l branu preparando’l so ingresu na universidá. La Clausura del festival cuntará cola proyección del film americanu “Idlewild”, de Bryan Barber que debuta na dirección cinematográfica depués de facer videoclips musicales.

Abrióse’l plazu pa inscribise na tercer edición del Festival de Cine Asturianu, que se fadrá n’abril. Esti añu la convocatoria tien el propósitu de remembrar el 102 aniversariu del cine asturianu.
El concursu certame presenta dos categoríes: Películes n’asturianu y películes asturianes en cualesquier otru idioma. Llargumetraxes y curtiometraxes de ficción y documental en cualesquier formatu son aceptaos pa participar, pudiendo los sos autores presentar más d’una obra. Un xuráu de distinguíes figures dará a conocer el palmarés na Ceremonia de clausura.
Pa contautar colos organizadores pue facese univando un corréu lletrónicu a esta dirección festivalcineastur@wanadoo.es

Güei, miércoles 8 de payares, a les 20,00 hores nel Centru Cultural Caxastur de la Muralla Romana de Xixón, proyectaránse los curtos premiaos na última edición del Certame Internacional de Curtiometraxes “Art Nalón”. Art Nalón ye un Certame de curtios cinematográficos empobináu a xente de menos de 36 años. Amás de los de los curtios premiaos n’Art Nalón entamará una esposición itinerante sobre’l cine n’Asturies, y la so evolución.
El Certame Art Nalón concedió tres premios, amás d’un premiu especial del públicu:

• “Sintonía” de José María Goenaga
• “Avatar” de Lluis Quilez
• “Tadeo Jones” d’Enrique Gato
• “Fotos de familia” de Paula Orviz

El Perro mongol foi candidata al Oscar a la meyor película de fala non inglesa representando a Mongolia, ente los premios algamaos destaca la mención especial del premiu Signis del Festival de Cine de Donosti.
Les relaciones ente los perros y los seres humanos son la base d’esta película na que dende d’esa tema se sigue’l perespecial vínculu esistente en Mongolia sobre l’eternu ciclu de la reencarnación.
N’Uviéu Nömadak Tx ye’l deséu de dos músicos de facer de la txalaparta, instrumentu tradicional vascu, un llugar d’alcuentru ente dos persones. Esi deséu ye’l que lleva a los protagonistes a viaxar a bien de sitios pel tou’l planeta.

El Centru d’Interpretación del Cine del Casinu d’Asturies inaugura güei, dende les 8 la tarde, le exposición nomada “Frankestein nel cine”. L’escritor, Juan José Plans, encargaráse de facer una llectura dramatizada d’esti personaxe de cine de terror.

El teatru Xovellanos acoyó la presentación del cursu d’Estensión Universitaria y ciclu de cine Universo Media. El cursu, organzáu pola Universidá y el Festival de Cine de Xixón, cuenta cola participación de conferernciantes de prestixu, y cola proyección de delles películes venceyaes a los temes a tratar.
Nesta vegada Universo Media va reflexonar sobre les mutaciones esperimentaes na nuesa forma de ver y facer cine, embaxo’l títulu “Pantalles depredadores”.

El nuevu ciclu de cine de la Caxa desenvolveráse dende’l martes 24 d’ochobre al miércoles 22 de payares. Nelli proyectránse 8 películes que nun s’amuesen nos circuitos comerciales y que recibieron importantes premios y distinciones.
Les proyecciones fadránse nos Centros Culturales de Caxastur d’Uviéu, Xixón, Mieres y Llangréu. Les películes “Stestí- Dalgo asemeyao a la realidá” y “Mi mejor enemigo” son les encargaes d’abrir esti ciclu de cine qu’apuesta polos conteníos alternativos a los de la distribución comercial.
“Stestí” ye una coproducción checo-xermana qu’algamó, ente otros premios, la Concha d’Oru del Festival de Cine de Donostia. Desenvuelve una historia na que dos vieyos conocíos entamen una vida meyor na que los sos caracteres van alcontrándose.
“Mi mejor enemigo” ye una coproducción d’Arxentina-Chile y España na que se cuenten los díes previos al enfrentamientu armáu ente Chile y Arxentina de 1978. La tensión de la espera del combate ye la causa del entamu d’amistaes ente supuestos enemigos, que transiten na raya del deber y el querer.