Sociedá Un estudiu Eclesial esixe la solución del conflictu llingüísticu by asturnet 3 de payares, 2006 El documentu “Materiales de reflexón en torno a la reforma del Estatutu” fechu pol departamentu de Sociolóxía, Estadística ya Informática del Arzobispáu d’Uviéu afita la voluntá de la Ilesia asturiana p’algamar “un verdaderu avance nel autogobiernu y l’afirmación d’Asturies”. El documentu desarrolláu por José Ramón Álvarez, director del Departamentu de Socioloxía, Estadística ya Informática del Arzobispáu; y José Manuel Padilla, profesor de Soicioloxía y Doctrina Social de la Ilesia; expresa la posición de la Ilesia sobre la reforma estatutaria asturiana. La cuestión llingüística ye ún de los temes trataos nel documentu, afitando la conveniencia de la resolución de la cuestión llingüística, “continuamente aparcada polos partíos mayoritarios -PSOE y PP- y dexada al socaire de presuntos intelectuales veníos de Dios sabe onde”. Pa los autores la situación legal de la llingua asturiana ha ser resuelta na próxima reforma del Estatutu “tando en xuegu un elementu fundamental de la identidá de nueso” y qu’amás “cuenta con más sofitu social que la televisión autonómica”. Nel documentu crítícase la “covandoguización” del sentimientu d’asturianidá, falando d’esti como una “pose d’escaparate”. Pa los autores el problema asturianu “ye anguaño sentise y afirmase no que se ye, un pueblu con identidá propia, y qu’ha superar actitues superficiales”. Nesti sentimientu’l documentu de la Diocesis nun elude incluyir a Asturies ente les naciones del Estáu, sicasí matizando que n’Asturies l’independentismu nun ye relevante” y que nin los partíos nacionalistes proponen desvincular Asturies del Estáu español. Un de los puntos de los “Materiales de reflexón en torno a la reforma del Estatutu” ye la solidariedá, nello fálase d’una Asturies solidaria, pero que tamién necesita de la solidariedá de los demás, per ensin renunciar a la so identidá o reduciéndola -la identidá- a denominaciones como Principáu, Premios Príncipe. El textu aborda’l debate estatutariu dende’l debate sobre’l tipu d’Estáu que necesita Asturies, l’ampliación de niveles competenciales o la financiación autonómica. Pa ello piden un debate abiertu y nel que se pueda criticar, y proponer alternatives, al modelu d’Estáu actual “¿Nun tenemos por qué dar por supuestu que l’actual modelu ye’l meyor y nun almite cambeos? ¿por qué s’evita la posibilidá d’un Estáu federal o confederal?”. Pa los autores del textu “la unidá del Estáu español nun ye dalgo a sacralizar o confundir col bien moral” -en clara referencia a los documentos de la conferencia episcopal española sobre la cuestión- “nin ye aceptable absolutizar los deseos de cualaquier otra nación”, nesti apartáu faese una referencia a Croacia, país dixebráu de l’antigua Yugoslavia col sofitu esplícitu de la Ciudá del Vaticanu, “escaeciéndose del principiu de solidariedá”. Pa finar José Ramón Álvarez y José Manuel Padilla faen referencia a que “cuando acabe’l procesu nun mos alcontremos con Estáu diferente al d’anguaño, un Estáu plurinacional de corte confederal”. Sicasí los autores aclaren que “los modelos d’Estáu tampoco son inmutables”. 3 de payares, 2006 0 FacebookTwitterPinterestEmail
Sociedá La Pita de la Xunta nel escañu los acusaos by asturnet 3 de payares, 2006 Esti vienres día 3 de payares nel Xulgáu de la Pola (Siero) fízose’l xuiciu a los 6 militantes de la Xunta pola Defensa de la Llingua denunciaos tres la inauguración del Centru de Salú de Llugones. Na vista xudicial los militantes de la Xunta pola Defensa de la Llingua Asturiana contestaron a les preguntes utilizando l’asturianu, ensin qu’hubiere nengún problema por ello. Entamó’l xuiciu cola declaración del denunciante, miembru de les fuerces de seguridá del Estáu y qu’identificara a los activistes llingüísticos, qu’afirmara que “na inauguración del Centru de Salú de Llugones apaecieron 6 mozos, ún d’ellos con un disfraz de gallina, interrumpiendo’l discursu”, amás el denunciante citó que l’apaición de los miembros de la Xunta fuere por “sorpresa” y que s'”interrumpiera’l discursu que se taba pronunciando”. Los denunciaos afirmaron que si bien hebo glayíos de conteníu críticu cola xestión política del gobiernu asturianu nunca “nun hebo voluntá de detener l’actu” asina como que nos menos de cinco minutos que tuvieren presentes la so actividá foi vista polos asistentes al actu como lúdica “los neños veníen coles madres a tocar a la Pita” Como testigu de la defensa compareció’l Conceyal de Deportes del Conceyu de Siero corroborando la versión de los denunciaos y negando que nesi intre se tuviere desenvolviendo nenguna actividá dende l’escenariu previstu. Depués de les declaraciones la fiscalía pidió una pena de 20 díes de multa a razón de 6 por día basándose nel Art. 663 del Códigu Penal, l’abogáu del Principáu, presente como acusación particular, sumóse a la propuesta de la fiscalía. Esteban Intialgo, abogáu de los militantes de la Xunta pola Defensa de la Llingua, esixó l’absolución basándose en delles sentencies del Tribunal Supremu qu’afiten que nun se pue considerar qu’hubiere alteración del actu dao qu’esti en nengún momentu fuere deteníu. La sentencia definitiva conoceráse nun plazu de quince díes 3 de payares, 2006 0 FacebookTwitterPinterestEmail
Escéniques El Xardín Botánicu de Xixón acueye una xornada pa fomentar la llectura de prensa y poesía by asturnet 2 de payares, 2006 El Xardín Botánicu acoyerá esti domingu la iniciativa “Leer el paisaxe”, que permitirá a los y les visitantes esperimentar la llectura de la prensa nes instalaciones, col paséu y la estancia nos diferentes paisaxes qu’ufre’l Botánicu, asina como una alborada poética a cargo de delos miembros del grupu Encadenados. Cola entrada’l visitante recibirá de baldre na taquilla del Botánico un exemplar d’un de los tres diarios, en papel, asturianos y el so suplementu. Dende ehí, paséu y llectura van difundise cola posibilidá de tomar de baldre una consumición na cafetería o sentir la nátura dende dalgún de los bancos esparcíos pol mayor múseu al aire llibre d’Asturies. Amás, na cafetería dellos monitores conectaos a internet abrirán el paraxe natural a la información, permitiendo la consulta de bien de diarios. Amás, dellos de los poetes pertencientes al grupu “Encadenaos” fadrán de 12:30 a 13:30, llectures poétiques de les sos creaciones, o resucitarán versos de Gioconda Belli, lleíos por Maypi Solís: (Abandonados, Dándose y Textura de sueño” y de José Hierro, lleíos por Carmen Sánchez: (Caballero de otoño, El momento eterno, y Vida). 2 de payares, 2006 0 FacebookTwitterPinterestEmail
Sociedá El Conseyu Políticu d’Izquierda Xunida decidió los 6 primeros puestos de la Candidatura a la Xunta Xeneral by asturnet 2 de payares, 2006 El coordinador xeneral d’Izquierda Xunida, Jesús Iglesias, encabezará la candidatura a la Xunta Xeneral pola circunscripción central del país.El Conseyu Políticu d’Izquierda Xunida decidió esti llunes la composición de los primeros puestos de la candidatura de la coalición a la circunscripción central. La llista presentada pol sector “oficial” de la coalición inclui a Jesús Iglesias, coordinador xeneral de la coalición; Francisco Javier García Valledor, Conseyeru de xusticia, seguridá pública y relaciones esteriores; Noemí Martín, diputada na Xunta Xeneral y secretaria Xeneal del PCA; Aurelio Martín, diputáu na Xunta Xeneral y vicepresidente de la mesma; Diana Camafeita, diputada na Xunta Xeneral y a Emilia Vázquez, profesora de la Universidá d’Uviéu y militante de Lliberación, que sustituye a Paloma Uría como representante de Lliberación nes candidatures d’Izquierda Xunida. A la votación de les candidatures el denomináu “sector críticu” d’Izquierda Xunida presentó una llista alternativa compuesta por miembros de la coalición de la antigua dirección de la organización en L.lena -y qu’acababa de ser sustituida por una xestora-. Esta llista algamó 25 votos favorables mientres que la mayoritaria algamaría 67, amás d’ocho votos en blancu y un votu nulu. En base a esti resultáu representantes del sector críticu reclamaron dos puestos ente los 6 primeros puestos de salida de la candidatura; la dirección d’IU consideró que la llista nun se diba “votar a cachos y que poro quedaría como taba”. Pela so parte’l Bloque por Asturies, partíu políticu que concurriere a les elecciones de 2004 en coalición con Izquierda Xunida, anunció’l restablecimientu de les negociaciones con Izquierda Xunida de cara a la reedición del pactu electoral de 2004. 2 de payares, 2006 0 FacebookTwitterPinterestEmail
Sociedá IAS anuncia les conversaciones con Andecha y Los Verdes by asturnet 31 d'ochobre, 2006 La Dirección Nacional d’Izquierda Asturiana fizo públicu un comunicáu nel que se comunica la esistencia de conversaciones, pa presentar una candidatura a les elecciones de 2007, ente Andecha Astur, Los Verdes y Izquierda Asturiana. Según la Dirección Nacional d’IAS “les fuerces coinciden en que ye interesante y necesario iguar un alcuerdu políticu que supere los escenarios de cites electorales anteriores”. L’oxetivu d’estes negociaciones sedríen “ufiertar a la sociedá un proyectu d’izquierda, verde y asturianista”. Pa esti oxetivu los tres partíos tienen un entamu d’alcuerdu nel que los sos principales puntos, per un llau pautar un programa electoral basáu nes aportaciones de los tres partíos “con un claru calter d’izquierdes, verde y d’identidá nacional”; per otru, presentase a les elecciones del 2007 baxo un nome común y con un candidatu consensuáu poles trés fuerces politiques. Sicasí la Dirección Nacional d’Izquierda Asturiana fizo un llamáu a la “responsabilidá y a la madurez política” de les otres partes de la negociación. Esti llamáu de la Dirección Nacional d’IAS vendría a dar un puntu d’atención a los comentarios sobre les posibles negociaciones ente Los Verdes y Izquierda Xunida. Estes conversaciones supondríen, pa IAS, “allargar la llaceriosa situación d’anguaño”. Poro IAs afala “a facer posible una alternativa realmente seria, ambiciosa, verde y asturiana” Noticies venceyaes: La Xunta Executiva d’Andecha Astur confirma negociaciones con Izquierda Asturiana Andecha mantién contactos electorales cola Mesa por la Unidad de Los Verdes Más información 31 d'ochobre, 2006 0 FacebookTwitterPinterestEmail
Sociedá L’Academia de la Llingua Asturiana va presentar un estudiu sobre la fala o gallego-asturianu by asturnet 31 d'ochobre, 2006 L’Academia de la Llingua Asturiana va presentar, esti xueves 2 de payares a les 12 nel Hotel Principado d’Uviéu, l’Informe sobre la fala o gallego-asturianu. Una perspectiva hestórica, social y llingüística. L’Academia presenta esti informe “darréu de los intentos de dello sectores del galleguismu políticu y cultural pa interferir na política llingüística del Principáu d’Asturies”. L’Academia afita nesti informe la so posición llingüística, social y cultural sobre la fastera más occidental, “aclarando dellos tópicos y falsedaes”. Piésllase’l documentu con unes conclusiones y propuestes que quieren ser de “referencia pa la política cultural n’Asturies”. La presentación va tar a cargu de la Presidenta de l’Academia de la Llingua Asturiana, Ana Mª Cano, y del responsable de la Secretaría Llingüística del Navia-Eo, el tamién académicu Xosé Antón González Riaño. 31 d'ochobre, 2006 0 FacebookTwitterPinterestEmail
Sociedá Presentáronse 30 alegaciones a la propuesta toponímica de Siero by asturnet 30 d'ochobre, 2006 Les alegaciones a la propuesta de la Xunta de Toponimia sobre’l nomenclator del conceyu de Siero afecten principalemte a les propuestes de Carbaín, Mucó y La Peña’l Gatu, asina como la de “Valbona” pa la parroquia de Bobes. Depués d’acabar el periodu d’alegaciones, en payares entamaráse cola revisión del espediente p’analizar les alegaciones individualmente. L’ayuntamientu de Siero cuenta con poder aprobar la propuesta enantes d’acabar l’añu. El topónimu más cuestionáu foi’l de Carbaín. La Xunta de Toponimia suxería que la parroquia de Santa Marta de Carbayín pasare a denominase Santa Marta sólo. Asina como la propuesta pa que la forma Carbaín s’emplegara nel nomenclator pal llugar de Carbayín Altu, que s’alcuentra na parroquia de Santiago d’Areñes. La denominación del pueblu de Muncó, que na propuesta de la Xunta de Toponimia ye Mucó, ye tamién otra de les más discutíes. La denominación de la parroquia de Bobes, pa la que la Xunta de Toponimia propuso la denominación de Valbona faese tamién revesosa dao que lo mesmo Bobes que Valbona son dos nucleos de la mesma parroquia. Sobre la propuesta de la denominación de la urbanización de La Fresneda, según la propuesta La Peña’l Gatu, les alegaciones céntrense en pedir la doble denominación pal aria. L’ayuntamientu de Siero difundirá la restitución de la toponimia asturiana mediante la publicación d’un cartafueyu, nel que s’incluirá’l nomenclator oficial del conceyu asturianu con un mayor númberu de topónimos. En payares, la Conceyalía de cultura volverá aconceyar cola Xunta Asesora de Toponimia cola fin de revisar les alegaciones asina como convocar a les persones alegantes pa que puedan aportar les sos argumentaciones. La conceyalía de cultura tien previsto que les futures urbanizaciones y nuevos llugares y pueblos del conceyu, que ye un de los que más medra poblacionalmente del país, adopten la toponimia asturiana pa la so denominación. Noticies relacionaes 30 d'ochobre, 2006 0 FacebookTwitterPinterestEmail
Sociedá L’Arribada 2006 continúa nel Xovellanos by asturnet 26 d'ochobre, 2006 Depués de cuatro díes d’intensa actividá, la coleición de Cuentos del Concursu de la Tertulia de El Garrapiellu abrió’l xueves los actos de l’Arribada 2006 nuna xornada na que’l cine foi tamién protagonista de la man de Ramón Lluis Bande. La Sala de Conferencies del Antiguu Institutu de xixón acueye güei la quinta xornada de l’Arribada 2006, cola presentación de les últimes obres de la coleición de narrativa asturiana de la editorial Ámbitu, que contará cola presencia de Ramón Lluis Bande, Henrique Facuriella, Vanessa Gutiérrez, Miguel Rojo y Pablo Texón. A les 18 hores, preséntase Historia breve d’Asturies, de Pilar Sánchez Vicente, cola presencia de l’autora y de Xosé María Vega Blanco. A les 19 hores, dientru del marcu Nuevos rumbos de la lliteratura asturiana: la mar lleerá Xuan Xosé Sánchez Vicente la so ponencia Mar, costes y homes na lliteratura asturiana; y a les 20 hores, desenrollaráse la Mesa redonda sobre esti tema formada por Ignaciu Llope, Xandru Martino, Xurde Morán y Xuan Xosé Sánchez Vicente. 26 d'ochobre, 2006 0 FacebookTwitterPinterestEmail
Sociedá Aplázase’l xuiciu en Siero escontra la “Pita” by asturnet 26 d'ochobre, 2006 La Xunta pola Defensa de la Llingua Asturiana concentró a les 13,30 hores delantre los Xulgaos de La Pola (Siero) a un centenar de presones que se manifestaren pola llibertá d’espresión. Seis miembros de la Xunta pola Defensa de la Llingua Asturiana diben ser xulgaos esti vienres en La Pola (Siero) depués de ser denunciaos por una concentración fecha’l 14 de xunu por mor de la inauguración d’un centru de salú en Llugones, al qu’asistía el presidente d’Asturies, pero la vista tuvo d’aplazase hasta’l vienres que vien por defeutos de forma nes citaciones, dao qu’un de los encausaos nun recibiere nin la citación pa esta vista nin pa la del 25 de setiembre. La concentración convocóse dientro de la campaña de la organización de defensa de los derechos llingüísticos pa denunciar la situación “d’acosu y de falta de llibertaes que sofren los y les falantes d’asturianu”. Depués de la concentración los activistes de la Xunta fueron identificaos y reteníos demientres dos hores pa depués ser denunciaos y recibir la citación xudicial. La Xunta considera qu’estes actuaciones son “intolerables”. “Los derechos de llibertá d’espresión y de crítica política son fundamentales en cualaquier democracia”. La Xunta camienta que’l gobiernu asturianu “ha correxir la so política de marxinación llingüística” y nun “criminalizar la vindicación” 26 d'ochobre, 2006 0 FacebookTwitterPinterestEmail
Sociedá L’alumnáu de Bachiller va cuntar, per primera vegada, con llibros de testu n’asturianu by asturnet 25 d'ochobre, 2006 L’alumnáu de Bachiller qu’estudie llingua asturiana dispondrá per primera vegada de llibros de testu. Los manuales “Pulsu 1” y “Falaquefala” editáronse por VTP Ediciones pal primer cursu de Bachiller y Trabe pal segundu cursu. Los testos asoleyaos pol director xeneral de Promoción Cultural y Política llingüística, Carlos Madrea, que destacó que la edición de los llibros pa Bachiller supón “un pasu más pa la normalización social de la llingua”. El responsable de Política llingüística esplicó que la educación ye fundamental pa “el desarrollu de la llingua”. Recordando que dende 1984 l’asturianu estúdiase nos centros públicos con material proporcionáu polos profesores y la introdución de los nuevos llibros permiten “abrir les posibilidaes de la llingua”. El coordinador de llingua asturiana de la Conseyería d’Educación, Fernando Padilla, comentó que “Pulsu 1” ta escritu por Paz Fonticiella, Concha Prieto y xosé Miguel Suárez. Los autores del llibru “Falaquefala” son Marta Mori, Pilar Fernández y María Prieto. Padilla señaló que los dos testos tán compuestos por 15 unidaes didáctiques ente les que se trata la ortografía y la gramática de la llingua, la lliteratura asturiana, o temes sobre l’estáu actual del país. Asina mesmo, aseguró que la edición de los llibros ye “beneficiosa pa la normalización” y pa los alumnos y profesores. Tamién destacó que cada añu “medren los escolinos qu’estudien asturianu” mesmo en primaria que’n secundaria. Anguaño, según Padilla, na enseñanza pública son 16000 alumnos de primaria los qu’estudien asturianu y 4400 de secundaria, lo que supón un 56% y un 14,5% respectivamente. Esta diferencia ente’l primer y el segundu ciclu esplícase, según indicó, nel fechu de l’asignatura en primaria ye alternativa y en secundaria optativa, lo que significa que “s’escueye ente esa o otra”. Ramón d’Andrés, Xefe de la Oficina de Política Llingüística de la Conseyería de Cultura, destacó que la edición d’estos llibros ye posible gracies a les subvenciones de la Conseyería que ensti casu fue “d’un total de 20000 euros, cola condición de que la tirada mínima fuere de 1000 exemplares”. Ramón d’Andrés señaló que la xuntura de les dos Conseyeríes, ye la “que fai posible que les subvenciones ayuden al desarrollu de la llingua”, y comentó qu’amás de la edición de los llibros, “collaboraron na Campaña de Matriculación d’alumnos” y con “estudiu sobre l’usu de la llingua na Campaña de Matriculación d’Alumnos” y con “un estudiu sobre l’usu del asturianu en tolos llibros de testu”. 25 d'ochobre, 2006 0 FacebookTwitterPinterestEmail