Modelu de carta pa unviar a la Radio Televisión del Principáu d’Asturies

El patrimoniu llingüísticu asturianu cuerre un peligru claru de desaparición. Asina lo vienen demostrando toles investigaciones sociolóxiques, que falen de la rotura dafechu de la cadena de tresmisión de la llingua asturiana a les xeneraciones más nueves. La gravedá d’esti fechu, denunciáu tamién por organismos internacionales como la Unesco, fai necesario tomar midíes polítiques y llegales urxentes pa mirar de tornar la situación.

Los medios de comunicación, y sobre manera la televisión, son vehículos poderosos d’uniformización llingüística, pero -como se ta comprobando en bien de televisiones autonómiques- tamién son una vía fundamental de recuperación llingüística polo qu’ayuden a promocionar y dar prestixu a llingües minorizaes que muncha xente tovía asocia a prexuicios y sentimientos de vergüenza. La Radio Televisión del Principáu d’Asturies (RTPA), que tien ente los sos fines precisamente la promoción del asturianu, nun pue mirar pa otru llau mientres ve cómo se sume’l patrimoniu llingüísticu d’Asturies. Los escasísimos minutos que dedica a la programación n’asturianu yá demostraron de sobra l’interés de la xente polos programes fechos na llingua propia: ehí tán los índices medios d’audiencia superiores a los de la programación en castellanu. Pero tienen que se dar pasos más allá d’esa presencia testimonial. Y non namás col aumentu de la programación n’asturianu sinón tamién enanchando la temática, el públicu potencial y l’horariu nel que s’emite.

Nesa programación n’asturianu bien ta l’atención que se-y da al públicu adulto n’espacios dedicaos a la cultura asturiana y a la tradición porque too ello ye fundamental pa valorar lo propio y aprender a aprecialo, pero ye menester dedica-y un esfuerzu especial tamién al públicu infantil. Son los más pequeños los que tienen que garrar el testigu de la llingua asturiana y, nunes condiciones sociales de minorización y desprestixu tan fuertes, tamos viendo cómo la desaparición del nuestru idioma ye cuasi absoluta. La ufierta televisiva tan amplísima de dibuxos animaos y programes de tou tipu en castellanu tien que tener na RTPA una contrapartida con programación propia n’asturianu o doblada a esta llingua. Namás d’esa manera los neños y neñes van poder ver y sentir na televisión la llingua de casa. Si nun lo fai la televisión pública asturiana, ¿quién lo va facer?

Namás se pueden contrarrestar los prexuicios llingüísticos enseñando a la xente que la llingua de casa tamién pue valir p’ámbitos a los qu’hasta agora nun entró o lo fixo de manera insuficiente. Si non, la RTPA taría faciendo entender que l’asturianu namás se pue usar pa falar de cuestiones culturales. Polo tanto, ye tamién fundamental que se faigan n’asturianu programes informativos, retresmisiones deportives o programes d’entretenimientu, y que tamién empiece a apaecer en series de ficción, bien con producción propia o bien col doblaxe.

Otra manera, na programación en castellanu de la RTPA ye indispensable tanto’l conocimientu de la realidá llingüística asturiana como l’usu sistemáticu de la toponimia oficial, aspectos que, depués de tres años de funcionamientu, de momentu tovía son deficientes. La televisión pública asturiana ta llamada a tener un papel fundamental na promoción del patrimoniu llingüísticu asturianu y esto nun se pue facer con un tratamientu marxinal, testimonial o parcial d’esa realidá sinón planificando pal idioma propiu un espaciu cada vez más ampliu tanto n’hores como en temática y, siempre, col mayor de los procuros pa qu’esi modelu d’asturianu sía correctu, cuidáu y ellaboráu por profesionales con solvencia llingüística contrastada.

Estes son les direcciones:

wxunta@gmail.com

rtpa@rtpa.princast.es

MCASTRILLO@rtpa.es (director de Recursos Humanos)

AVIRGILI@rtpa.es (director de Rellaciones Corporatives)

PEREZORNIA@rtpa.es (director xeneral)

MJADARO@rtpa.es (directora comercial)

JUANG@rtpa.princast.es (director d’Antena y Conteníos)

COMUNICACION@rtpa.princast.es (dirección de Comunicación)

FPUENTE@rtpa.es (directora de Comunicación)

JCCUESTA@rtpa.es (director d’Informativos)