Mari Luz Pontón: “Los llibros asturianos paez que nun esisten, nun tán nos escaparates nin a la vista nes biblioteques”

María Luz Pontón ye maestra especialista en Filoloxía Francesa ya Inglesa, amás ye Llicenciada en Filosofía y Ciencies de la Educación y esperta n’Informática Educativa pola UNED, y en Filoloxía Asturiana pola Universidá d’Uviéu. Collaboró con delles revistes d’educación al rodiu del so trabayu d’investigación sobre l’alumnáu d’altes capacidaes. Dirixe y presenta na RPA, el programa “Revoltixu nes ondes” y ye autora y directora de les obres que representa’l grupu de teatru “Asturmitomanía”. Anguaño da clases nel Centru d’Educación d’Adultos «El Fontán» (Uviéu) y acaba de sacar al mercáu un llibru infantil, que se suma a llarga riesta d’ellos que lleva espublizaos “Un monstruu ensin corazón”. Falamos con ella d’esti llibru y d’otres cuestiones del so llabor profesional, siempres en defensa de la llingua asturiana.

-“Un monstruu ensin corazón” ye la so última obra, pero nun hai añu nel que nun salga al mercáu con delles obres, ¿d’ónde saca’l tiempu pa la escritura?

-Cuando te presta lo que faes saques el tiempu d’onde seya. La mio familia dizme que cuando me venga visitar la muerte pa llevame al Más Allá yo voi intentar negociar con ella yá que taré ocupada escribiendo, faciendo dalgún cursu o nun sé qué hestories que nun puedo dexar. Y ye que yo pa eso soi un casu, necesitaba que’l día tuviere munches más hores.

La verdá ye que nun m’importa llevantame ceo’l fin de selmana pa poneme a escribir, pa mi escribir ye una lliberación, ye un llabor que necesito facer y col qu’esfruto.

La pallabra escrita echa un gabitu pa comunicanos colos demás y tamién con nosotros mesmos. Dicen dellos médicos qu’allivia de dalguna manera los dolores del cuerpu y zarra les cicatrices del alma, asina que yo debo tar sanísima en cuerpu y alma.

-Cúntenos, ¿qué van atopar los neños que s’averen a conocer a esi monstruu ensin corazón del que fala nel llibru?

-Van atopar a munchos monstruos que tán pa comelos (rises), pa comelos de lo prestosos que son, dende la guaxa hasta la güestia, pasando por Cocu y el Papón. Ye obligao dicir que tamién van atopase con unes ilustraciones que son fantástiques, daveres que nun puen ser más maraviyoses, tan fresques ya diferentes, imáxenes que dan un sofitu escelente al testu y son favoratibles a l’apertura de sentimientos.

Iranisids Fundora, la ilustradora cubana de Un monstruu ensin corazón, mezcla con una gran maestría testures, formes, colores. Nun m’estraña que los rapazos digan que los dibuxos d’esti llibru “molen” una barbaridá. Y ye qu’esta artista conoz perbien l’oficiu. Encántame esa estimulante llibertá creativa, esi aire rompedor. Nun sé cómo foi a plasmar una fueya lo que yo suañaba, debe tener poderes máxicos.
Tamién hai añaes, “Un monstruu ensin corazón” fai un homenaxe a les añaes. Gustábame recuperar les añaes tradicionales enllenes de dulzura y delicadeza que son tesoros de la tradición oral. Amás d’una añada al estilu tradicional, hai una esbilla de poemes enllenos de palabres prestoses: enredador, acuruxada, ferviatos, conxuros, espantavelea, corriverás… munches, munchísimes pallabres coles que los neños y neñes xugarán, echándo-yos un llazu, atrapándoles ensin medrana, domesticándoles, como tamién domesticarán a los monstruos, los personaxes principales d’esti cuentu.

-¿Van pasar dalgo de mieu?

-Nin gota, tolo contrario. Yo escribí esta hestoria intentando iluminar cola palabra’l mundu escuru de les tiniebles. Toos sabemos que tenemos que vivir col mieu, y anque’l mieu ta en toles partes, suel apaecer cuando vamos pa la cama, ¡ta tan escuro! (rises) Pero como hai que vivir col mieu lo meyor ye conocelu bien, y pa conocelu bien, lo meyor ye invitar a los monstruos a casa: ¡déxa-yos un sitiu na cama, nel armariu y hasta nel bañu! (rises). Y cuando tean puercos, esfregalos na bañera. Y cuando tengan fame, doralos nel microondes Y acabóse’l cuentu. Y el mieu.

Como veis, esti llibru tien como oxetivu rise de Don Mieu, que ye ún de los personaxes, el monstruu más maldadosu y tostón de tolos monstruos. Pero yo toi convencida de que don Mieu pue llegar a ser enforma prestosu ya amistosu, anque a él nun quiera reconocelo, porque-y paez que perdería’l so máxicu poder.

A mi gustaríame qu’esti cuentu eche un gabitu a superar los mieos. ¿Cómo? Necesítase l’ayuda d’un mayor -un güelu, una güela, el pá, la ma o la persona que tea al cargu de los más pequeños- daquién que tenga ganes de contar hdstories.

Espero que los más pequeñinos que s’averen a esta hdstoria se decaten de que los monstruos son menos terribles de lo que paecen. Por esti motivu, hai que lleer “Un monstruu ensin corazón”, un llibru nel que la güestia, el papón, la guaxa, el cocu, paséense gayoleros peles sos fueyes con un aspectu mui diferente, tán remocicaos, nun sé si los llectores van reconocelos… De lo que toi segura ye de que los monstruos d’esta hestoria tán naguando por pasar un ratín colos más pequeños de la casa, bono, tamién nagüen por tar colos grandes, porque saben qu’entovía’l so corazón y la so mirada ye asemeyada a la de los neños.

Y tolos seres máxicos d'”Un monstruu ensin corazón” van emplegar la pallabra, la música y el vaivén de les melodíes pa llevanos a un mundu máxicu nel que vivirán una… Lo que vos dicía, necesítase lleer el llibru pa entender lo que toi cuntando.

-Falemos agora del so llabor periódísticu al frente del programa “Revoltixu nes ondes”, ¿ta contenta col resultáu dempués de tantu tiempu n’antena?

-Sí, muncho, pa min tar al frente d’un programa como “Revoltixu nes ondes” ye un auténticu suañu. Encantábame la tele, pero la radio, amás de ser una esperiencia apasionante y maraviyosa, ye dalgo cuasi incontable. Hai una rellación mui fonda yá especial colos oyentes. Reconozo que soi una privilexada. Llevó ya abondo tiempu nos medios de comunicación y cada día depriendo coses nueves que m’ayuden a descubrir la maxa d’un mediu tan estraordinariu. Ye cierto qu’hai que preparar con procuru los programes, pero si lo faes con ilusión y ganes, los oyentes nótenlo, hai un venceyu misteriosu que trespasa les ondes. Ello ye que necesítase conectar cola xente que t’escucha, y polos comentarios que me lleguen, paez que lo toi llogrando, asina que siéntome enforma satisfecha.

-Pesie a que ye más conocida como periodista y escritora, la so vocación ye la enseñanza, dende va tiempu na enseñanza p’adultos, ¿cómo ta la presencia de la llingua asturiana nestos niveles?

-En cuantes la enseñanza d’asturianu en ESPA, ye dicir en Secundaria nos centros de persones adultes, ye una asignatura mui nueva, escomenzóse con ella va poco, ye voluntario y pasín a pasín los estudiantes van escoyéndola, pero nun ye fácil introducila, munchos estudiantes tán enllenos de prexuicios y tien unes competidores mui fuertes: la espresión oral ya escrita en castellán. L’asturianu, como cuasi siempre, xuega en desventaxa y nótase.

Lo que ye una pena ye qu’acaben con talleres y cursos que funcionaben de maraviya. Ello ye que nel Fontán d’Uviéu había un taller de Llingua y Cultura Asturiana que prestaba enforma a los estudiantes, yeren munchos los matriculaos, de toles edaes y condiciones, con ganes de deprender asturianu y de conocer más fondamente la nuesa cultura, pero llamentablemente esti añu pesllóse; dicen que ye la falta de perres, nun lo sé, a min paezme que nun hai suficiente voluntá y ganes. En fin, espero que’l cursu que vien s’ufierten cursos d’esti tipu per tolos Centros de Persones Adultes d’Asturies.

-En xeneral, nes clases d’asturianu, ¿camienta que s’amuesa a los alumnos la rica lliteratura qu’hai na nuesa llingua?

-Yo sé que los enseñantes tienen procuru nello, anque a veces l’esmolecimientu por acabar el programa fai que s’escaezan temes tan importantes como la lliteratura. Los neños, dende que son bien pequeñinos, présta-yos a esgaya la lliteratura (cuentos, poemes, cantares, lleendes, narraciones, teatru). El casu ye qu’a veces ye’l propiu docente coles meyores intenciones el qu’alloña al neñu d’esa pasión poles obres que yeren parte del so entornu familiar y social.

Paezme que la escuela necesita deprender que la lliteratura ye dalgo más qu’un mediu pa deprender la llingua y la cultura, la lliteratura xenérase sentimientos y entretién una barbaridá. Por esti motivu, nun podemos escaecenos de la maxa de la lliteratura, los neños tendríen que maraviyase siempre colos cuentos, poemes y el teatru.

Si los maestros saben que tou fechu artísticu lleva un sentimientu afectivu, emotivu y lúdicu qu’hai que cultivar, nun s’entiende cómo hai tantos neños qu’a midida que medren menos esfruten del placer de la llectura. Pero la escuela y los maestros nun son los únicos responsables, de dalguna manera toos somos responsables. Amás, son tantos los neños enganchaos a Internet, a la play, nun se decaten de qu’un llibru siempres ta cuando lu necesites, en cualesquier llugar, en cualesquier ocasión, enxamás queda ensin batería o ensin piles o corriente. Los llibros esperen pacientes que daquién los abra, que daquién s’adriente nes sos fantástiques palabres, palabres que lu llevaran a mundos máxicos, y non tan máxicos, mundos qu’ayudaran a comprender la complexa realidá.

-¿Qué podría facese p’allegar meyor los llibros n’asturianu al públicu infantil?

-Sobre too visualización. Los llibros asturianos paez que nun esisten, paecen llibros pantasmes, nun tán nos escaparates nin les estanteríes más amañoses, tampoco tán a la vista nes biblioteques asturianes. Ye una llástima, una lliteratura tan bona, con hestories tan prestoses, de tanta calidá, y nun miramos pa ella. Nesto tamién toos somos culpables: políticos, enseñantes, editores, llibreros, llectores… Ta claro que necesitamos camudar esta situación, pero pa ello primero necesitamos conocer y valorar lo nuestro, y eso nun ye un llabor cenciello, los asturianos somos mui daos a avergoñanos y minusvalorar la nuestra propia cultura. Tenemos que camudar de mentalidá y aportar soluciones creatives pa que la lliteratura n’asturianu entre nes cases.

Tenemos lo importante, bona lliteratura infantil y xuvenil n’asturianu, eso ye un fechu que naide lu pon en dulda, pero como dicía enantes, nun hai visualización de les obres nin muncho menos promoción. El casu ye que los llectores nun la conocen, nun llega, ta atapecía nos requexos de les llibreríes, los llibreros nun apuesten por ella, nun la enseñen, ye un círculu viciosu, esponen lo mas conocíu; los llibros que vienen de fuera y que tienen munchu ésitu porque gasten munches perres en publicidá. Nun ye xusto, tamos falando de cultura, tamos falando d’Asturies, tamos falando de cultura asturiana.

Na escuela tenía que promocionase la lliteratura n’asturianu escrita por autores asturianos, pero a veces namás qu’entren los escritores que promocionen les grandes editoriales. Hai que señalar el trabayu que nesi sen ta faciendo la editorial Pintar-Pintar, la editorial que me dio la oportunidá d’asoleyar el llibru de “Un monstruu ensin corazón”, una editorial qu’amás d’editar llibros con una calidá estraordinaria, tien ganao dellos premios a nivel nacional, ta potenciando y favoreciendo que los escritores asturianos entren nes aules, que vivan xunto los escolinos y escolines fantástiques histories, que xueguen coles palabres. Llamentablemente la so xera nun ta siendo cenciella, zapica con munches torgues, delles escueles y docentes nun quieren abri-yos les sos puertes, otres camienten qu’hai otres xeres más importantes que facer. Y ye que como dicía enantes, los asturianos nun miramos pa lo nuestro, somos mui grandonos pa delles coses, pero un desastre p’apostar y defender lo nuestru. Ye una verdadera pena.

Per otru llau, si queremos que tantos los llibreros como los editores apuesten pola lliteratura n’asturianu dende les edaes más tempranes, tenemos que llograr qu’haya más llectores de lliteratura asturiana, ye una meta qu’había que proponese tanto dende les diverses instituciones asturianes como a nivel individual.

-La última vegada que falamos, cuntónos que preparaba un proyectu de programes pa neños al traviés d’internet, ¿hubo dalgún avance?

-Ye sabío qu’a min me presta enforma la mitoloxía asturiana, por esti motivu escribí munchos llibros sobre esti tema y tengo un teatru, Asturmitomanía, nel que la Guaxa, la Xana, el Trasgu y el Diañu Burllón son protagonistes de les sos obres. Pero hai muncha xente que camienta como yo, asina que falé cola productora Hi-video y decidimos facer dellos capitulinos. Tenemos una páxina web www.asturmitomaniatv.com qu’anque dellos apartaos tean en construcción, ente ellos la páxina del mio teatru Asturmitomanía, yá tien otros terminaos, hai que ver el trailler nel qu’Alicia, una neña que-y presta enforma lleer, descubre por casualidá a los seres mitolóxicos, viviendo con ellos fantástiques aventures.

El nuestru suañu ye que toa esa ayalga mitolóxica, bien de veces tan poco valorada ya emplegada, seya la base d’hestories reales, d’Asturies ya universales, con trames rompedores, prestoses, actuales, qu’obliguen a pensar y que llevanten una ponte qu’aíde a los neños y a les neñes d’agora a dir del mundu visible al invisible, deprendiendo les lleiciones de dambos mundos.

Pero nun ye un llabor fácil, necesítase muncho esfuerciu, trabayu y perres, y a pesar que nos atopamos con munches torgues, ye sabío que nun tamos nel meyor momentu, como tamos convencíos de que ye un proyectu con una gran calidá que va prestar muncho a los neños y a tola xente en xeneral, tamos dedicaos en cuerpu y alma y esperamos que na seronda escomience a andar.

-¿En qué otros proyectos trabaya nesti momentu?

-Finar un rellatu xuvenil d’una esbilla de cuentos, dalgunos escribilos va tiempu y toi reescribiéndolos. Tamién toi dando-y vueltes a un cuentín pa neños más pequeñinos. Y hai dalgunos proyectos más qu’espero que salgan pa delantre en pocu tiempu, por ganes y trabayu nun van quedar, contar hestories ye lo mío.