La famosa llibrería Lello, de Porto, celebra so 110º aniversariu

La Llibrería Lello, alcontrada na ciudá portuguesa de Porto y considerada una de les más belles de too el mundu, celebró  la selmana pasada so 110 aniversariu con distintes actividaes pa conmemorar la efemérides.

L’establecimientu, famosu por apaecer en delles escenes de les películes de “Harry Potter”, ye unu de los exemplos más destacaos del neogóticu portugués, abrió les sos puertes en 1906 y representa güei un puntu turísticu más de la ciudá portuguesa.

El ministru de Cultura lusu, Joao Soraes, participó nos actos entamaos polos dueños de la llibrería, que tamién regalaron a los primeros veceros 110 exemplares de la obra “A Llárima”, de Abílio Guerra Junqueiro, un importante poeta portugués de finales del sieglu XIX y principios del XX.

Nes sos instalaciones van actuaron cuatro saxofonistas de la Banda Sinfónica Portuguesa, y agasayose a los presentes con distintos dulces típicos de la ciudá.La entrada a la llibrería foi gratuita mientres la xornada, al contrariu de lo qu’asocede de normal, yá que nun día normal tien un costu de tres euros, anque esta cantidá ye descontada en casu de mercar.

La decisión de cobrar por aportar al sitiu foi tomada hai solo seis meses por cuenta de la masiva arribación de turistes, coles mires de caltener la tranquilidá del local. Desque se cobra entrada, les vientes triplicáronse magar l’amenorgamientu de visitantes, según informaron los dueños del establecimientu en declaraciones a medios locales.

La hestoria de la llibrería remontase a finales del sieglu XIX, cuando José Lello cumplió’l so suañu y empezó nel negociu editorial. Al pie de el so hermanu António, en 1894 mercó la Llibrería Chardron -propiedá d’un editor francés- y decidió encargar la so remodelación al arquiteutu Francisco Xavier Esteves, responsable del diseñu d’un local que güei cunta con reconocencia internacional.