La directora xeneral de Mocedá defende l’informe Lorences

La directora xeneral de Mocedá del gobiernu asturianu, Carmen Barrera, defendió esta mañana nuna comparecencia na Xunta Xeneral “el rigor y la seriedá” del informe sobro empleabilidá de titulaos universitarios elaboráu pol caderalgu Joaquín Lorences. Barrera argumentó que la situación de los llicenciaos asturianos nun ye mui distinta de la que viven los mozos y moces d’otres comunidaes. La responable de mocedá caltuvo un encesu debate col diputáu del grupu popular Diego Comins qu’aporfió en pregunta-y, con datos d’otros informes na mano, si’l gobiernu autonómicu “sigue sosteniendo que se trata too d’una llienda urbana”. Diana Camafeita d’IX-BA apeló a nun frivolizar con términos como’l de ‘llienda urbana’ en consideranza “a los munchos mozos y moces obligaos a buscar trabayu fuera d’Asturies”.

La directora xeneral de Mocedá defendió les polítiques entamaes pol gobiernu del Principáu pa consiguir la inserción llaboral de los mozos y moces qu’inda nun fueron quien acceder al mercáu de trabayu y anunció la elaboración d’un tercer plan de xuventú per parte l’executivu pa dir favoreciendo esa inserción de la xente mozo desempleao.

El diputáu popular Diego Comins retrucó a la representante del gobiernu asturianu con datos qu’al so xuiciu “desmienten l’optimismu del que fai gala el gobiernu del señor Areces”. Pela so parte, nel turnu d’intervenciones, la diputada d’Izquierda Xunida-Bloque por Asturies, Diana Camafeita, refirióse a la situación “grave” que carecen munchos mozos y moces asturianos, y encamentó a los populares a “quitase de la foto fixa” pa sumase a la busca de soluciones.