La colonia asturiana de Bruseles arrepresó emocionada la música y la poesía de la tierra

Los versos de cuatro poetes y los sones del grupu folk Tarañu llevaron al corazón de los emigrantes de Bruseles la emoción poles palabres de la tierra en dos actuaciones celebraes esti viernes 21 y el sábadu 22 na capital belga. L’Edificiu Asturies, propiedá del Principáu, y la Sala Au Ryad del Midi, fueron los escenarios onde los asturianos de la diáspora se realcontraron cola so identidá más íntima al través de la música y la poesía na nuestra llingua.

Tarañu y los poetes Pablo Texón, Esther Prieto, Inaciu Galán y Pablo Antón Marín Estrada acudíen a Bruseles como parte del programa “Voces d’un país nel mundu ” col que l’Axencia Asturiana d’Emigración quier llevar a les colonies d’emigrantes una amuesa de la nuestra cultura. La cita foi el viernes nel salón d’actos del Edificiu Asturies y consistió nun emotivu actu nel que s’alternaron les pieces musicales de Tarañu colos poemes propios o d’otros autores que lleeíen los autores presentes. Munchos d’esos poemes de Prieto, Texón, Galán y Marín Estrada falaben de realidaes que nun-yos abultaben ayenes a los emigrantes qu’asistieron al actu: versos del desrraigañu, la señaldá, l’esmolecimientu por una tierra “que cai y un mundu que muerre” -en palabres d’un de los poetes- y na que toos, los que viven nella y los que tan llueñe, siguen teniendo sueños puestos, la emoción que vibra en remembrala.

Na tarde-nueche del sábadu 22 celebróse la segunda parte del programa consitente nuna amuesa de música folk

na que participaron amás de Tarañu, el grupu astur-catalán Risca l’Alba, la Contrabanda, formáu por músicos asturianos y gallegos de Bruseles, y una bandina de gaites del Centru Gallegu. Nel festival taba previsto que tamién intervinieren los poetes participantes en “Voces d’un país nel mundu”, pero razones d’axuste de programa d’última hora impidiéronlo.

A lo llargo d’esta selmana y hasta’l domingu van siguir les actividaes del Centru Asturianu, cola incorporación a les mesmes del grupu Deua Dubra y los músicos Xosé Nel Espósito y Naciu de La Colla que van actuar el fin de selmana énte la colonia asturiana en Bruseles.