El dominiu européu “.eu” ye’l tercer más popular d’Europa y el sétimu del mundu

Tres un añu de xera, el dominiu europeu d’internet “.eu” ye un de los que más lluego ta creciendo. Rexistráronse más de 2,5 millones de nomes de dominiu durante esti añu, con una xuba del 17% nos rexistros nos últimos cinco meses, lo que situa al dominiu “.eu” como’l tercer dominiu de primer nivel más popular d’Europa y el setimu de tol mundu.

La Comisaria europea responsable de Sociedá de la Información y Medios de Comunicación, Viviane Reding considera que’l dominiu “.eu” ta consolidáu nel ciberespaciu europeu dempues d’un añu de funcionamientu. “trátase d’una señal positiva del atractivu del comerciu ellectrónicu na UE. Felicito a EURid, el rexistru independiente ensin ánimu de lucru responsable del dominiu “.eu”, por haber xestionao con exitu l’altísima demanda de la industria y del públicu y por ayudar a esparder la identidá europea”, declaró la Comisaria.

Ciudadanos y empreses de caún de los 27 estaos miembros pidieron durante esti últimu añu un nome de dominiu “.eu” anque los países que más subieron la so demanda fueron Alemania (31%), el Reinu Xuníu (17%) y los Países Baxos (12%).

Amás l’exitu del dominiu “.eu” ocasionó un aumentu significativu de la demanda de nomes de dominiu nacionales na mayoría de los Estaos Miembros. Ye’l casu del dominiu de los Paises Baxos (“.nl”), qu’esperimentó una xuba del 10% nos rexistros durante l’últimu añu, o de los dominios nacionales d’Alemania y Reinu Xuníu (“.de” y “.uk”) cuyu crecimientu subió al 5% pal mesmu periodu.

El dominu “.eu” entamó a operar por primer vez el 7 d’avientu de 2005 y taba enpobináu en principio a les empreses titulares de derechos previos, pero dende principios d’abril de 2006, el rexistru ta abiertu a tolos residentes na Unión Europea y a les organizaciones con una sede oficial na UE . Amás dende’l 1 de xineru de 2007, los residentes y les empreses de los dos nuevos Estaos miembros, Rumanía y Bulgaria, tamien pueden rexistrar un nome de dominiu “.eu”.

La xestión central de los nomes de dominiu de primer nivel “.eu” ye responsabilidá de EURid, una organización independiente ensin ánimu de lucru afincada en Belxica. EURid entamo la so xera como una sociedá entre los operadores de los rexistros territoriales de los dominios de primer nivel de Belxica (.be), Italia (.it) y Suecia (.se). Más tarde, los operadores de los rexistros de los dominios de primer nivel d’Eslovenia (.si) y República Checa (.cz) amestaronse a EURid como miembros.

Comisión Europea – Sociedá de la Información y Medios de Comunicación