El Conceyu Abiertu organiza una visita al conxuntu Etnográficu de Sietes y a la Ruta de Los Molinos del Profundu

La salida pa esta escusión va ser el día 11 de mayu a les 9 la mañana de la Cai Xovellanos, frente al Hotel Regente y tien un preciu de 12 euros. La fcha tope p’apuntase ye’l xueves 8 de mayu y pue facese per corréu lletrónicu o nel númberu 985 203 122 de llunes a vienres (18:00 a 21:00h).

La población de Sietes, cuenta con unos 60 habitantes y ta a una distancia de 14,9 kilómetros de la capital del conceyu: Villaviciosa, formando parte de la parroquia de Vallés. La recuperación d’esti conxuntu etnográficu, foi el suañu de l’etnólogu maliayu (yá fallecíu) Rafa Balbín, ún de los mayores espertos nel estudiu de horros y paneres. Él, xunto con otres persones propuso la iniciativa a l’Ayuntamientu y llucharon pola so execución, porque como dicía Balbín, «los hórros, les paneres y los molinos son un patrimoniu cultural y turísticu por esplotar en Villaviciosa».

Pa Balbín, la obra de Sietes yera un primer pasu hacia «la revalorización de tola riqueza etnográfica de la zona rural maliaya», na que, según los sos propios estudios, tán contabilizaos 1814 horros y 572 paneres.

El Profundu naz na llende del conceyu de Villaviciosa colos de Piloña y Cabranes. El so recorríu aprosimáu ye de 14 km y cuerre na so mayor parte per fondes vallines tapaes con gran bayura de vexetación autóctona: carbayos, llameres, umeros, castañares y ente la fauna destaquen los xabalinos, raposos, corzos y llondros, y truches pa con ello.

En 9 de los sos 14 km de recorríu, sucédense hasta un total de ventidós molinos, que notru tiempu xurtieron de farina a les parroquies de Breceña, Coru, Llugás, Fuentes y Amandi.

La ruta sale del barriu de Busláz na parroquia de San Pedro de Breceña, hasta llegar a Valbúcar na parroquia de Amandi.