El CA de Nueva York negocia col Principáu una nueva sé

El prósimu llunes, el Centru Asturianu de Nueva York va facer, a travies de la so presidenta, María Gelchie, una petición formal al director de l’Axencia Asturiana d’Emigración, Luis Miguel Fernández Romero, pa solicitar l’ayuda del Principáu na financiación d’una nueva se, yá que l’actual nun cubre les sos necesidaes.

El Centru Asturianu de Nueva York ve limitaes les sos posibilidaes y la so capacidá p’atender pa tolos emigrantes asturianos de la ciudá, porque’l local que tienen nun reúne les condiciones necesaries. Anguaño, el colectivu celebra les sos reuniones nuna pequeña oficina, sigún la describe la so propia presidenta, que nun permite entamar toles actividaes que dende’l centru quixeren.

Ente los oxetivos del centru ta’l preparar exposiciones d’arte asturianu y, principalmente, el fomentu del turismu n’Asturies, amás de les clases de baille y gaita que yá tienen puestes en marcha. Pero pa ello, consideran imprescindible la renovación de les sos istalaciones por unes que s’alleguen más a les sos necesidaes.

La idea de la entidá ye mercar un nuevu espaciu en Manhattan, nel centru la ciudá, pero, en casu de que nun se pudiere, valdría nun barriu que tuviere buenes comunicaciones de trasporte públicu.

El prósimu llunes, día 22, María Gelchie va reunise col Director de l’Axencia Asturiana d’Emigración, Luis Miguel Fernández Romero, pa espone-y toles sos necesidaes y solicitar la colaboración del Principáu na financiación d’esti proyectu.

Emigrastur