Delfo Valdés: “La Semiente ñaz d’un piñu de xente con ganes de facer coses”

Delfo Valdés ye conocíu pol llabor musical al frente del grupu La Tarrancha. Agora ta “implicáu” na creación del llocal social “La Semiente”, en L’Entregu. Un llugar dedicáu al espardimientu de la cultura y que lleva un par de meses en marcha. Falamos con él del presente y el futuru d’esti proyectu cultural alternativu.

-Anunciaron el ñacimientu de “La semiente” como “dalgo acaba de ñacer en La Cuenca”, ¿qué ye La semiente y con qué oxetivos ñaz?

-La Semiente, quier ser éso, la grana de dalgo nuevo, algo que faigamos ente toos y que vaya medrando, que vaya espoxigando, dando’l so frutu y dempues dir esparciendo mas semiente. Osea, somos un piñu de xente con ganes de facer coses, partiendo de cero, dir tirando p’alantre poco a poco, amosando que les coses puen ser d’otra forma, que se puen facer d’otra forma, ver como eses coses van calando na manera de ver les coses per parte del restu la sociedá y que xenerando esa nueva actitú de la xente desencadene n’otres acciones asemeyaes. Basicamente eso ye lo que queremos, acabar cola pasividá social, col conformismu, col desencatu, cola insolidaridá cola apatía, cola galbana colectiva… pero too ello faciendo, trabayando, apurriendo, proponiendo, criticando lluchando, costuyendo…

Con eses intenciones taba claro que nun podiemos facer una asociación cultural al usu, non. Una cosa importante yera tener un llugar, un centru nel que trabayar too esto, onde poder dar charres, facer talleres, presentar llibros, facer poesía, pasar cine, aconceyanos, aldericar… contuberniar (rises). Y que esi centro nun dependiera de nengún organismu que nos ficiera tar cómodos y ser una barriga agradecida. Por ello ye, que ñacimos cola idea de ser un centru autoxestionáu nel que poder trabayar ensin torgues y nel que cualquier colectivu que lo necesite tamién pueda reunise o trabayar puntualmente.

-¿Quién ta detrás d’esti proyectu?

-Somos un grupu bastante eteroxeniu. Hai xente que yá nos conocíemos, otros que non, xente que vien de tar en distintos movimientos sociales, culturales, xuveniles… otros que pel momentu ye la primera vez que participen nun colectivu. Somos xente d’edaes estremaes, dende estudiantes, a paraos, trabayadores, mineros retiraos, dende xente mui mozo hasta xente con fios yá mozos. Lo que nos xunce son les ganes por facer coses y tirar p’alantre, y que yá tábemos fartucos d’“arreglar el mundo nos chigres”.

-¿Ñaz La Semiente porque les instituciones públiques nun respuende a determinaes demandes de la sociedá?

-Buffff, eso pue ser una d’ente les tantes cuestiones poles que ñaz La Semiente. Pero aparte de que les istituciones nun respuende les determinaes demandes de la sociedá, eses mesmes instituciones fomenten tolo contrario. Dende’l sitema educativu , (que ye lo primero que mamamos per parte d’élles) nun se fomenta la crítica, nin la capacidá d’analís, nin s’estimula la creatividá, nin la solaridá, nin el comprendimentu. Ye un meru tramite que nos prepara pa ser les oveyines (o borregos) que’l mesmu sistema quier que seyamos segun vamos medrando, que seyamos uniformes, que seyamos miembros del pensamientu únicu, que consumanmos, que nun nos paremos a anlizar, sinón que tragemos tolo qu’esi gran entramáu nos da masticao y que nós, namás tragemos con too ensin retrucar. Entós les instituciones nun solo nun respuenden les demandes de la sociedá, sinón qu’intenten dirixir y controlar les propies demandes de la sociedá, nel sector empresarial eso llámase marketing… estatexa de mercáu…

-El vienres 29 celebraron la inauguración, ¿qué tal acoyida tuvo?

-De les que dexen bon tastu. Mui bona, la verdá ye qu’a la xente-y prestó enforma. Trátabase d’una proyección na cai de semeyes antigües y nueves de L’Entregu, ambientaes con musica d’un productor de la cuenca. La xente que taba ellí yera de toles edaes y prestó-yos a toos por igual. D’ehí p’acá ficimos delles actividaes mas, como foi la organización de la Ix Folixa del 1 de Mayu xunto col FUSOA, qu’esti añu fízose en Ciañu y tamien foi un ésitu, dempués tuvimos la Timba Poetika, que tamién y tolos miércoles tamos col cine forum qu’esti mes ta dedicáu a la rellación del cine y la música. Tamos trabayando yá nes actividaes que nos quedén esti mes y lo que va ser el mes de xunu, que tamién va venir completín, asina que tai al tantu.

-El centru, dicís, ñaz, pa tar atentos a lo llocal y a lo global…

-Sí, queremos ser participes de les coses que nos pasen, y de lo que pasa nel nuestru entornu inmediatu. Queremos influyir nes opiniones y la forma de ver les coses y d’actuar de la xente cola que vivimos. Pero queremos facelo con una visión non solamente llocal, sinón global. El vieyu dichu de piensa globalmente actua localmente (rises). Pero aparte, non solo queremos tratar asuntos cercanos, sinón que vemos necesario dar a conocer otres realidaes sociales y culturales que tán a miles de quilómetros de nós, ye necesario concocer tolo que pasa nel planeta.

-Una de les primeres actividaes foi una esposición de semeyes na que yera l’antigua estación de RENFE, ¿tienen pensao repetila n’otros llugares?

-Si, dende’l principiu la nuesa idea yera dir faciéndola en distintos pueblos de la cuenca El Nalón. Que’l centru social tea en L’Entregu nun quier decir que nos vaigamos centrar namás ellí, esperamos que’l nuesu marcu d’actuación seya tola cuenca.

-Y nel ciclu de cine-forum, ¿qué películes pueden vese?

-La persona que programa los ciclos fizo una riestra de propuestes pa que la xente fuese añadiendo, pero dempues l’orden de les películes y la película en cuestión de cada ciclu y cada dia ye una sorpresa. Asina naide cuenta’l final d’antemano (rises) y tamién aseguramos que la xente respuenda y nun falte a la cita tolos miércoles.

-¿Qué otros proyectos tán ferviéndose yá en La Semiente?

-Bono, hai delles charres pendientes enantes de llegar al branu, una sobre Mayu del 68, otra sobre’l Plan Boloña, la presentación de la revista feminista La Madeja, una charra sobre la llei d’estranxeria, collaboramos cola 1er Xuntanza Malabar que va facese en L’Entregu el 21 de Mayu, pola Cia de Circu El Ñeru Los Coríos, tamos a ver si facemos una foguera de San Xuan de forma popular y vecinal pa too L’Entregu… a ver si hai manera de programar un conciertu del cantauror Canteli… tamos mirando de facer unos talleres creativos y de pintura… bono pa dir arrancando nun ta mal. Dempués a ver cómo enfocamos el branu y de cara a la seronda vamos dir metiéndonos en fariña, hai munches coses yá a la vista.