Conceyu Abiertu valora como positivos los resultaos electorales nos conceyos

La plataforma política Conceyu Abiertu decidió, nel aconceyamientu que la so Xunta coordinadora nacional cellebró en Noreña esti sábadu 28 de mayu, treslladar a la sociedá asturiana unes primeres valoraciones al rodiu de les eleiciones del pasáu 22 de mayu:

1. Conceyu Abiertu valora de manera positiva la so participación nes eleiciones municipales, yá que polo xeneral cumpliéronse les espectatives esistentes. Ye mui significativu’l casu de Noreña: onde s’algamaron 267 votos (un 8,63%), lo qu’implica una conceyalía, quedando amás cerca d’algamar un segundu conceyal. Otros conceyos que tamién hai que destacar son Villaviciosa con 177 votos (2,02%), Samartín del Rei Aurelio con 189 votos (1,84%), Grau con 71 votos (1,15%), y Siero con 253 votos (0,95%). No que cinca al conceyu de Xixón la táutica de la unidá d’aición tuvo como espresión el CUPX, y si bien ésti tuvo dellos aspeutos positivos como esperiencia unitaria los resultaos algamaos, unos 730 votos (0,48%), son nidiamente insatisfactorios, siendo asina Xixón la gran esceición dientro del balance positivu que se realiza d’estes eleiciones municipales.

2. Al respeutive de los 1529 votos (0,26%) algamaos nes eleiciones autonómiques, éstos son evidentemente probes ya testimoniales, pero dempués de namás cuatro meses d’andadura como coleutivu políticu la realidá ye qu’entraben dientro de lo posible y nun son mui distintos de los resultaos esperaos. Hai que destacar ya agradecer particularmente tamién el sofitu algamáu en dellos conceyos como Noreña con 152 votos (4,97%), Villaviciosa con 77 votos (0,89%), Siero con 163 votos (0,61%) y Samartín del Rei Aurelio con 80 votos (0,78%).

3. L’analís que se fizo nel momentu de la creación de Conceyu Abiertu nel mes de xineru d’esti añu 2011, de que nun ye posible articular una alternativa política con fuercia eleutoral si nun esiste un trabayu socio-políticu constante dende la base a lo llargo de los años quedó ratificáu a la vista de los resultaos d’otres formaciones polítiques como PAS-URAS o BA-UNA, que quedaron asitiaes nunes posiciones bien distantes de los sos oxetivos eleutorales. Ye más qu’evidente qu’un proyeutu políticu a llargu plazu nun pue venir caracterizáu nin por un perfuerte personalismu, nin por un fantasiosu eleutoralismu alloñáu de la realidá, nin pola ausencia de contenios ideolóxicos nidios lo mesmo que d’oxetivos estratéxicos acullá de la presencia nes instituciones.

4. Conceyu Abiertu va siguir afondando nel so proyeutu de reconstruición nacional dende la base, pos considera que nel actual escenariu ye la única estratexa posible, ya dientro de la so táutica d’unidá d’aición continua tando dispuestu a converxer con toa triba d’axentes sociales y políticos colos que se compartan oxetivos mínimos tanto no que cinca al proyeutu nacional como al programa socio-económicu que tien que da-y conteníu pa caminar haza un ameyoramientu material de les condiciones de vida de los/es asturianos/es.