Portada Entrevista de la selmana Celia González (Muyeres): “Más nos valdría fianos del nuesu propiu esfuerciu que depender tanto de les instituciones”

Celia González (Muyeres): “Más nos valdría fianos del nuesu propiu esfuerciu que depender tanto de les instituciones”

by asturnet

Celia González Baschwitz ye presidenta de l’asociación de Música Tradicional “Muyeres”, qu’apocayá presentó nel Teatru Xovellanos de Xixón, l’espectáculu “Inda suenen”. Falamos con ella d’esti espectáculu del que dicen ye “un viaxe emocional pel llabor de les muyeres” y del grupu Muyeres, míticu yá dientro de la música folk asturiana.

-Apocayá presentaron nel Teatru Xovellanos de Xixón, l’espectáculu “Inda suenen”, ¿qué pueden cuntanos d’esti montaxe que dicen ye “un viaxe emocional pel llabor de les muyeres”?

-Esti espectáculu ye una esperiencia novedosa, ye la hestoria d’una muyer contada al traviés de los cantares y de la narración d’una actriz, asina como imáxenes qu’ilustren lo que se quier dicir. Nosotres, ”Muyeres,” tamos tol tiempu nel escenariu participando con movimientos espresivos, amás de cantando.

-¿Qué tal acoyida tuvo per parte del públicu?

-Del públicu nun hai quexa, entregáu. N’Avilés, l’añu pasáu, a tope, y esti añu nel Teatru Xovellanos menos xente, pero totalmente entregao, foi mui emotivo les dos vegaes.

-Y de les instituciones culturales, ¿hai contrataciones pa esti branu?

-Paez ser que nun hai munches perres, tamos n’ello, de momentu pa la seronda nel conceyu de Mieres y a ver si cae daqué más.

-¿Ven un sofitu institucional suficiente a la etnografía del país?

-Nun me paez, de todes formes fai años que pienso que más nos valdría tener más confianza en nós mesmos y fianos más del nuesu propiu esfuerciu que depender tanto del “manᔠde les instituciones…

-¿Cómo surdió’l grupu nel so momentu?

-El grupu “Muyeres” surdió va cuasi 20 años, en 1992, por iniciativa de Lisardo Lombardía que xuntó a 35 muyeres provenientes de los más prestixosos grupos d’investigación. Grabamos el primer CD doble nos años 1993-1994, dende entós

-¿Qué conclusiones saquen d’estes dos décades de trabayu?

-Lo que Muyeres pretendió y consigió na so primer década, tamos falando del añu 2002, ta mui bien explicao nel DVD realizáu por Jorge Rivero sobre’l trabayu “Pasamentu”. Muyeres quier ser l’eslabón pa que nun se pierda la tradición, xuega un papel perimportante nesi pasu de la tradición del mundu rural al urbanu.

-¿Oxetivos por cumplir nos próximos díez años?

-Siguir na mesma llinia de representar la tradición tal cual ye, si bien, nesti últimu trabayu d'”Inda Suenen” consíguese amás facer un espectáculu integral, munchu más atractivu al públicu xeneral, non solo a lo avezaos a escuchar folclore.

-Tienen cuatro discos nel mercáu, saldrá d’”Inda suenen” otru proyectu de grabación?

-Efectivamente, yá tamos n’otru proyectu nuevu con repertoriu del archivu sonoru de Xosé Ambás, esti nuevu trabayu vuelve a tener la importancia de ser repertoriu prácticamente inéditu.

-¿En qué más proyectos trabaya’l grupu?

-L’añu pasau entamamos a facer cursos de percusión abiertos a la xente en xeneral, esperemos que se puedan siguir faciendo pues ye una forma perguapa d’averar esti saber a tou aquel que tenga interés. Amás, otros proyectos que tan ehí esperando’l so turnu sedríen por exemplu facer un discu de música relixosa cola Misa de Gaita del Oriente, villancicos, romances, etc.

Tamién te podria gustar