Portada Documentu Bloque por Asturies denuncia énte’l 112 el tratu a una falante d’asturianu 1

Bloque por Asturies denuncia énte’l 112 el tratu a una falante d’asturianu 1

by asturnet

Tresllada al responsable del 112 la preocupación pol tratu que recibió una muyer, yá mayor, al facer usu del serviciu d´atención a los ciudadanos nel so idioma maternu, l´asturianu. Asturies, 18 de payares de 2009.

AL SEÑOR COORDINADOR DEL 112 D´ASTURIES

CÉSAR ÁLVAREZ AVELLO

Cola mayor consideranza:

Diríxome a usté como responsable del 112 d’Asturies con gran preocupación pol tratu que recibió una muyer, yá mayor, al facer usu del serviciu d´atención a los ciudadanos nel so idioma maternu, l´asturianu.

Los fechos según consta na denuncia recibía asocedieron el xueves pasáu cuando una muyer se punxo en contactu col 112 y al intentar comunicase en llingua asturiana la única respuesta que recibió de la trabayadora que taba na centralita ye ´qu´ella nun la entendía´, una respuesta que se repitió varies veces mientres la usuaria intentaba comunicase por tolos medios n´asturianu.

Esti fechu grave de por sí, vulnera l´Estatutu d´Autonomía, la Llei d´Usu y Promoción del Asturianu y el Pactu de Gobiernu, amás de tolos convenios internacionales y derechos fundamentales de la persona, onde se recueye que ninguna persona pue ser discriminada pol usu de la llingua. Estó tovía ye más grave si asocede nun serviciu como´l 112, onde les persones tienen que tar capacitaes pa entender cualquier tipu d´incidencia, y más nesti casu porque, según la denunciante, la trabayadora a parte de nun facer nengún esfuerzu por entender a una ciudadana a la que-y correspuenden tolos derechos independientemente del idioma qu´use, nin siquiera se-y dio la posibilidá de comunicase con otra trabayadora.que tuviera capacitada p´atendela.

Somos conscientes de la importancia que tien el 112 d´Asturies pa tola población a la hora d´asistir cualquier tipu d´incidencia, y de les circustanices de nerviosismo nes que munches veces se manden d´esti serviciu los usuarios. Paeznos que la seguranza de les persones nun pue depender del caprichu de nengún trabayador a la hora d´intentar entender a un usuariu nun idioma que nun supón mayor problema de compresión.

Sabemos de la so preocupación y sensibilidá y por eso-y pidimos que tome les midíes pa qu´esto nun vuelva asoceder y nun tengamos que llamentar cualquier desgracia por un abandonu inxustificáu. Los servicios públicos páguense colos impuestos de tolos contribuyentes y nun tien razón de ser que teniendo les mesmes obligaciones nun tengan los mesmos derechos.

Ensin más reciba un saludu candial.

Ignacio González Fernández. Responsable Movimientos Sociales del Bloque por Asturies.

Tamién te podria gustar