asturnet

La Oficina de Normalización Llingüística del Ayuntamientu de Xixón vieno acabante de poner en marcha un proyectu de recuperación de la Tradición oral dirixíu a escolares de secundaria que tie por entamu los vieyos relatos que viaxaron de “boca a oreya” ente la xente del llugar. La intención ye convertir a los neños y neñes n’investigadores, que recueyan los relatos que sobre tradición oral cúnten-yos sos mayores.

Nesti proyectu van participar anguaño cuatro centros d’enseñanza secundaria y esti 11 d’avientu apurrieron los materiales didácticos diseñaos pal so desenvolvimientu. Tamién participa l’investigador Xosé Ambás, músicu y conductor del programa Camín de cantares de la RTPA que cuntó les sos esperiencies na recoyida de la tradición oral polos distintos pueblos d’Asturies y ayudó a motivar a mozos y moces participantes.

Según la Convención pa la Salvaguardia del Patrimoniu Cultural Inmaterial (PCI) de la UNESCO, esti patrimoniu vivu ye’l crisol de la nuesa diversidá cultural y el so caltenimientu, una garantía de creatividá permanente.

La Convención de 2003 definió’l PCI más concretamente como los usos, representaciones, espresiones, conocencies y técniques que les comunidaes, los grupos y, en dellos casos, los individuos reconozan como parte integrante del so patrimoniu cultural. Esti PCI tresmitese de xeneración en xeneración; ye recreáu costantemente poles comunidaes y grupos en función de la so redolada, la so interacción cola naturaleza y la so hestoria; infunde a les comunidaes y los grupos un sentimientu d’identidá y de continuidá y promueve el respetu de la diversidá cultural y la creatividá humana.

Tomando como puntu de partida los vieyos relatos que viaxaron de “boca a oreya” ente la xente del llugar, la intención ye convertir a los neños y neñes n’investigadores, que recueyan los relatos que sobre tradición oral cúnten-yos el so mayores, respondiendo al oxetivu de relación intergeneracional pa la tresmisión de conocencies y patrimoniu cultural inmaterial que se ta perdiendo. Qu’escolinos y escolines apriendan a valorar lo tradicional y lo popular como parte de la cultura amás d’una forma de prestigiar la nuesa llingua.

Anguaño van participar 4 centros, IES Matu Jove, IES Padre Feijoó, IES Fregadures y el IES Calderón. Esti xueves fízose amás entrega de los materiales didácticos compuestos por un cuadiernu viaxeru pa l’aula nel que los alumnos van dir recoyendo les hestories y una carpeta na que darréu les dirán clasificando en función de la categoría a la que pertenezan: cuentos, lleendes, cantares, etc.. cola tutorización del profesoráu.

Emilia Vázquez, diputada d’IX d’Asturies responsable d’Educación na Xunta Xeneral, cuestionó’l pactu col PP qu’en materia educativo nel programa 0 a 3 supon consagrar el principiu de llibertá d’elección de los padres, o lo que ye lo mesmo’l “cheque escolar”, una de les señes d’identidá del PP, frente a una planificación pública que vele pola equidá y la afayadiza redistribución de los recursos públicos ente los que más lo precisen.

El sistema de desgravaciones fiscales, a cualquier familia que lleve a los sos fíos a una escuela de 0 a 3, pon n’igualdá los centros públicos colos privaos, alvirtió Vázquez. Lo mesmo va asoceder col sistema de financiamientu del material escolar por idénticu sistema de desgravación que va entrar a valir colos presupuestos pal próximu añu.

“Nun critico al PP por apautar ya intentar sacar alantre’l so modelu educativu, que nun ye’l nuesu, pero nun querdríamos qu’esi modelu introduzase n’Asturies amparáu por un gobiernu socialista”, alvirtió la diputada na presentación na Xunta del Presupuestu d’Educación que xube a 756.437.886.

La diputada d’IX denominó como “cheque escolar” a la deducción que plantega l’executivu asturianu pa pagar escueles de 0 a 3 años yá que supon una quiebra nel modelu que propón IX, que ye que, el dineru público sía pa la escuela pública, cuando la media de cobertoria d’estos centros ye del 15%. Ye ciertu que yá esiste la enseñanza alcordada, aseguró la diputada, pero ésta tien unes obligaciones y controles, que nun va haber nesta nueva modalidá, yá que va significar que partir d’agora van financiase aquellos centros educativos o guarderíes que los padres decidan. Lo mesmo asocede coles nueves ayudes de material escolar. Ye ciertu, dixo qu’hai un aumentu na llínea que se venía desenvolviendo, pero’l modelu que va subvencionar pela vía de les desgravaciones, namá van ser efectivos nes families nes que’l poder adquisitivo dexar, “porque la xente que realmente lo precise nun se va poder dexar mercar lo que sía y esperar a que-y lo deduzan un añu dempués”, sostuvo.

Na vez d’entrugues, la diputada demandó información sobre los oxetivos del contratu programa pa la Universidá d’Uviéu que ta ensin roblar, cuestión que quedó ensin respuesta per parte de la directora d’Universidaes y el so financiamientu que, como tarrez la diputada d’IX, va ser consolidar los presupuestos actuales, que son claramente insuficientes yá nesti momentu.

Vázquez incidió tamién en que’l presupuestu global de la Conseyería d’Educación, Cultura y Deportes baxó. Polo xeneral, esplicó nel apartáu de cultura, el presupuestu intenta ser más bien de caltenimientu “a la desesperada pero bien a la baxa”, ensin poder amenorgar no que fai a les empreses l’aplicación del IVA cultural del 21% impuestu pol Ministeriu de Cultura. Al director de Deportes, la diputada deseyó, con ironía, bona suerte pa poder xestionar los sos trés programes, dos d’ellos a la baxa y un terceru “tremeciendo”.

La diputada tamién esplicó “el so disgustu” pola baxada del programa de defensa del asturianu, anque la Conseyera afirmara que les partíes taben incluyíes de manera tresversal n’otres de la Conseyería , y suxurió que podría emplegar esos 150.000 euros que baxa n’afitar otros programes que tienen que ver col asturianu, por casu en dotar meyor a l’Academia de la Llingua.