asturnet

Como cada mes de xunetu dende va yá 25 años, vuelve la Selmana Negra a Xixón cargada d’actividaes culturales y d’ociu, baxo’l lema “Ser cultos pa ser llibres, ser llibres pa ser cultos”. Dende’l día 6 hasta’l 15 de xunetu les actividaes celebránse nos vieyos terrenos de la Naval Xixón, centrada nesta ocasión na hestoria y con delles actividaes que van tener al asturianu como protagonista, una mesa sobre la novela negra n’asturianu y la proyección de películes doblaes al asturianu, amás de les actuacioes d’Alfredo González o Felpeyu.

La hestoria va ser unu de les exes d’esta convocatoria, que va venir de la mano del historiador Rubén Vega y los escritores Armando López Salinas y Jorge Martínez Reverte; y va falase del esiliu de el escritores nel más ampliu sentíu (políticu, económicu y artíscticu) con ceadores de la talla de Raúl Argemí o Marcelo Luján.

El programa empieza cola salida del Tren Negru, de la estación de Chamartín de Madrid a les 8:10 am, llegando a Xixón xusto media hora dempués de l’apertura del espaciu, que va ser a les 17:00 hores. Ellí va tar abierta la feria del llibru, les esposiciones “Ricard Castells: 10 años dempués”, “Asociación Española de Criminoloxía”, “Siria, revolución ensangrecida” y “Apuntes a la cuestión social n’España”, amás del espaciu d’atracciones, terraces, música y mercadín interétnicu.

Anguaño recupérase’l Videocine, ciclu de cine documental na Selmana Negra. Los títulos escoyíos percuerren un ampliu espectru de temes y enfoques: Programa Ciclu de cine documental: D’equí y d’allá.

Va haber asina mesmu, numberoses charres, conferencies y presentaciones de llibros con personalidaes de primera como Ana María Matute, y los conciertos de Darksun (grupu xixonés de power metal sinfónico), Alfredo González, Felpeyu, Dr. Explosion, Flying Padres y en conciertu coca cola cola actuación de The Pinker Tones, el conciertu Mahou con Niños Mutantes, zarrando esti apartáu de música colos xixoneses Pantano, grupu que nos averará a los soníos del blues con pincelaes de rock sureñu.

Porgrama completu d’actividaes de la SN

Héctor Pérez Iglesias (Llanera, 1978) ye’l ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so decimoquinta edición. El primer premiu, dotáu con 700 euros, foi pa la so obra “Puertes abiertes”. El segundu premiu, dotáu con 450 euros, foi pal cuentu “Les faroles pinten della lluz na cai”, de Rubén Suárez Sánchez (Siero, 1983), más conocíu como Rubén d’Areñes, y Quique Faes Díaz (Xixón, 1975), autor habitual na nómina de premiaos d’esti certame, algamó’l tercer premiu, al que se-y apurren 300 euros, con “Eme de maldá”. El xuráu tuvo compuestu nesta edición polos escritores Xulio Vixil Castañón, Pablo Rodríguez Medina y Nacho Fonseca Alonso, amás de pol Alcalde Bimenes, Alejandro Canteli Rozada, y el técnicu responsable de la Estaya de Cultura, Daniel Cueli Canto, que ficieren les funciones de Presidente y Secretariu respeutivamente.

La entrega premios fadráse nel trescursu d’una Xornada Lliteraria qu’hai entamada na Casa Cultura de Santuyano pal próximu vienres, 6 de xunetu, de magar les 19’30 hores. Na mesma, amás d’entregase los trés premios del certame, lleeráse’l cuentu ganador na voz del so autor y presentaráse’l llibru “Poemes del últimu salvaxe”, de Daniel García Granda (La Pola Siero, 1972), poemariu ambientáu nel pueblu de Viñái (Bimenes), onde l’autor tien los sos raigaños. La xornada lliteraria cuntará tamién con unacompañamientu musical, a cargu de Sergio y Lolo Catalán Nava, qu’interpretarán dellos temes del so repertoriu de música tradicional asturiana, y dalguna sorpresuca más.

Un añu más, la Sociedá Popular La Regalina abre’l plazu pa presentar obres al so premiu de poesía, dedicáu a la figura del Padre Galo (1884-1939), clásicu de la lliteratura asturiana. El tiempu pa presentar orixinales fina’l 12 de xunetu. Al concursu pueden presentase poemarios en llingua asturiana, con un mínimu de 275 versos. Los trabayos han mandase a la Sociedá, que ta asitiada nel Casinu de Cadavéu, na cai Curión e/n (Valdés). El premiu ye 1.300 euros y la posibilidá de publicar el poemariu . El premiu pue quedar ermu, conociéndose’l resultáu del xuráu, el 7 d’agostu, aniversariu del ñacimientu del Padre Galo.

Los trabayos entregaránse por quintuplicáu nos llocales sociales de la Sociedá Popular “La Regalina”, o unviaránse per corréu. Dirán ensin firma, con un lema o nomatu. Nun sobre zarráu dirán les señes del autor col mesmu lema o nomatu que tenga’l poemariu.

El Xuráu dará a conocer el ganador nun actu públicu en Cadavéu, el día 7 d’agostu, aniversariu del nacimientu del Padre Galo. Los trabayos non premiaos podrán recoyese nos llocales de la Sociedá Popular “La Regalina” dientro los 30 díes posteriores al fallu.

Nos últimos años ganaron autores como Héctor Pérez Iglesias, Rubén d’Areñes, Carmen Guardado, Berto García o L.luis Fernández, ente otros.

El miércoles 4 de xunetu a les 20 hores la Editorial Pintar Pintar va presentar nel Club de Prensa de La Nueva España, Uviéu, l’álbum ilustráu “Mieu” de Milio del Nido (testu) y Alberto Sastre (ilustraciones). Nel actu va intervenir Milio del Nido (escritor), Fernando Lorenzo Arias (poeta) y Javier González (médicu). La editorial va tar representada por Ángela Sánchez.

Quiciabes seyan los mieos una de les coses que más marquen les velees de los críos perante la neñez; y cada unu tien los mieos que tien, hai de toles clases: al mar, a les altures, a la soledá, a la escuridá… Delles veces pasen los años y, anque yá nun yes un neñu, el mieu sigue ehí, a la gueta, esperándote detrás d’una puerta pesllada o a la revuelta d’un camín ente los árboles, y tienes qu’enfrentate a él pa poder siguir p’alantre, y ye nesi momentu, cuando vas enfrentate, cuando te da’l respigu, y esi respigu, esi, igual ye la cosa más prestosa de tol asuntu. Solo pol respigu merez la pena pasar el mieu.

Nesti álbum ilustráu dos hermanos, xunto cola so madre, treslládense a una casona antigua y misteriosa al pie de un faru, nel que’l padre va empezar a trabayar. Too paecía muui aburrío pero… ¡ZAS! unos ruios y figures estrañes nel faru… faen pasar momentos espeluznantes a los protagonistes.

Más información sobre’l llibru