asturnet

Capercaillie torna a Lorient cada tres años que suelen facese llargos pa los seguidores que tienen equí que son munchos. En 2010, facía 3 años que Capercaillie nun pasaben por Lorient y agora en 2013 vuelve paecer que foi ayeri cuando lo ficieron. La misma fuercia, la mesma calidá, la mesma intensidá y la mesma dedicación, con una plantel d’invitaos enforma interesante como siempre y un públicu que persabe agradecer detalles como los que se-y ufrieron na nueche del xueves en Lorient, depués de que Llan de Cubel ficiera de aperitivu.

Karen Matheson tornó a brillar otra vuelta cola so personalidá perconocida, pero los años nun pasen de baldre, magar la so voz siga como siempre y esta vegada notóse un pocu más qu’hai tres años. Los movimientos y les transiciones son más lentes, ensin dinamismu y l’escenariu faise enforma más grande. Donald Shaw sigue faciendo del curdión una caxa máxica y Charlie McKerron fai col vigulín maravilles

.

Un conciertu de más d’una hora y media, con Llan de Cubelde teloneros, nun pue ser sinon una nueche inolvidable, como la fuere la del xueves nel Espace Marine de Lorient. Una nueche que tendrá de facese esperar más de tres años en Lorient, a nun ser que la producción del grupu amuese novedaes que, pel momentu, nun son a albidrase.

Llan de Cubel ye al Festival Interceltique de Lorient, lo qu’esti ye a la música folk asturiana: un escaparate. Y la so actuación del miércoles nel espace Marine de Lorient dexa bien claru lo que s’albidraba en dambos casos. Verdaderamente llegó’l madurar de la escena folk astur y llegó la mauración de la nuesa presencia cultural nel Arcu Atlánticu.

Asturies yá nun ye un país celta desconocíu del norte d’España que tien llende con Galicia. Ye una entidá cultural y social propia que se reconoz con facilidá nes cais de la villa bretona del departamentu de Morbihan por enforma que siga ensin apaecer n’estudios de interceltismo tradicionales. Ye’l preciu qu’hai que pagar por gobiernos y gobiernos de desconexón cultural col mundu al que de verdá perteneces. Pero eso ye agua pasada. Asturies ye una referencia en Lorient gracies a más de 25 años de trabayu de Lisardo Lombardía, que relluma agora al mandu de la dirección xeneral del propiu Festival, de Hevia, de Tejedor, de Rubén Alba, d’Iñaki Santianes, d’Andrea Joglar, d’Exposito y de tantos y tantes otres, de tantes xeneraciones, que nun tendríamos espaciu pa referir. Pero, percima de toos estos magníficos artistes, siempres ta un nome: Llan de Cubel. Hestoria viva de la presencia asturiana en Lorient.

Y esa presencia viva, amosóse mnagnífica y madura nel escenariu del Espace Marine de Lorient esti miércoles 7 d’agostu, preparando al públicu pa la vuelta de Capercaillie, otru de los mitos del Festival veníos de “tierres altes”. El maduror víase nos primeros minutos al empecipiar el conciertu, tres un introductoriu set instrumental con “La casa Gris”… probablemente’l cantar más maduru y serenu del grupu a lo llargo de tola so hestoria y auténtica declaración d’intenciones de lo que ye y quier ser Asturies, gracies a la fondura del poema de Naciu Llope y tamién la “señaldá” cultural de la composición musical.

Depués el conciertu siguiría repasando’l repertoriu más popular del grupu, perfectamente reconocíu en Lorient, con una execución sele, ensin altibaxos, sensata, madura…

Yá se palpaba nel ambiente que la d’esti 2013 diba ser verdaderamente la Gran Nueche d’Asturies, pero nengún profesional o artista de cuantos componen la delegación asturiana podía imaxinar que’l prestu algamaría les cotes qu’amosábamos entrada la madrugada del martes 6 d’agostu.

Y pa abrir esa nueche máxica de realcuentru cola más pura esencia de lo que Lorient significa pal mundu de la música y la cultura popular asturiana dende la Transición teníamos al meyor introductor posible: Tuenda. Una formación que cunta con dos firmes soportes de lo que foi l’andamiaxe musical del folk n’Asturies: Elías García, miembru fundador del míticu Llan de Cubel, Pepín de Muñalén (Pepín Menéndez) de La Bandina’l Tombu y Xosé Ambás, fundador de Narba y auténticu animador de la escena musical tradicional.

La capacidá comunicativa de Ambás, xunío al rigor musical de Elías y Pepín, componen una ufierta fácilmente digerible pa cualquier tipu de públicu tratáu na música popular, inda cuando namái sía dende una perspectiva sentimental. Y como yá fixeren nel montaxe “La voz de la tierra” col que se abría la participación asturiana nel Gran Teatru de Lorient el sábadu, supieron conectar al momentu col públicu y faer una propuesta sele y participativo allegando al so repertoriu más trabayáu. Una pequena ayuda del grupu Xeitu danciando alredor del escenariu ponía la guinda a lo que nun yera sinón un estraordinariu aperitivu de la Gran Nueche de l’Asturianía en Lorient.

Hevia: 25 años dempués

Sí. Tuvieron que pasar 25 año pero mereció, y enforma, la pena. Porque l’espectáculu qu’ufiertaron na Gran Nueche d’Asturies tantu Hevia Tríu como la Banda de Gaites Llariegu asitiara a años lluz de los seles intentos d’hai un cuartu de sieglu, cuando Asturies entamó a ufiertar propuestes na escena internacional del folk al traviés del festival intercélticu de Lorient, con más desnudez que vestimienta de gala como la que s’amosó esti llunes en Lorient.

Na Gran Nueche de Asturies, nel Espace Marine de Lorient, Hevia Tríu y Llariegu dieron una bona amuesa de la evolución incesante que tuvo la música tradicional asturiana y la so adaptabilidá y maridaxe con tou tipu de ritmos y cultures, de les tradicionales con raigañu más céltiques a les populares con ritmos más simples y comerciales.

Hevia Tríu empecipió col so soníu sólidu l’actuación, pero bien ceo dió nicios de que la nueche diba ser perespecial. El tríu que componen José Ángel, la so hermana María José y la pianista Dina Majada fai una propuesta bien equilibrada, perfectamente afecha al planteamientu del conciertu na carpa principal de Lorient: casi dos mil persones sentaes y sollertes, en llugar d’un espaciu abiertu pa baillar como suel n’ocasiones plantegase esti tipu de conciertos. L’apaición na escena de propuestes de Edith Piaf, ritmos brasileños, compases bretones y solos de tambor tradicional asturianu, envolubráu por María José en vestimientes bretones y escoceses pa mayor espectacularidá yá abarruntaben la escepcionalidá del conciertu.

Pero lo meyor llegó cuando Hevia, que celebraba los 76 años del so padre col “cumpleaños feliz” a la gaita, demostraba que con ella pue facese tolo qu’un bon gaiteru se proponga: hasta tresformala vía electrónica nun acordión diatónicu pa interpretar “Vueltes” o nel summum de la maestría que yá-y conocemos convertir la gaita nuna guitarra ya interpretar en casi imposible “Asturies” de Isaac Albéniz. Una execución d’esti “Asturies” de Albeniz nerviosa nel empiezu, arriesgada al minutu d’empecipiase y perfecta nel ecuador de la interpretación, que punxo al públicu en pié nun sentíu y emocionante tributu al qu’Hevia namái pudo responder cola humildá y l’alma que lu caractericen… Y un rellumu tenue nos güeyos que nos fixo recordar les palabres de fai 25 años de José Angel. Que nos fixo recordar qu’en Lorient un asturianu siéntese más asturianu si cabo qu’en cualesquier otru llugar del mundu, Asturies incluyida.

Y Llariegu pa faenos saltar pel aire

Y si la emoción nun fuera abonda con Hevia Tríu, l’espectáculu de la Banda Llariegu que yá tuvo una primer esposición en La Llaboral de Xixón, atopó nel Espace Marine el so llugar aparente pa consiguir una nueche memorable. La Banda consiguió sacar lo meyor de Kepa Junquera na primer parte del so espectáculu o de Héctor Braga nel ecuador del mesmu y xubió adulces de tonu cuando empezó a proponer viaxes a otros ritmos y a otros maridaxes instrumentales alloñaos del acordión y la música tradicional. El so popular poutpurri d’ésitos musicales de les últimes décades con “Gloria” como exa central y la so adaptación al estilu de les Big Band americanes col aprovechamientu máximu d’una potente sección de metal nun anduvo lloñe de la perfección. Como tampoco lo fizo la percusión, con una batería inmensa realzando cada minutu de la última parte del conciertu. Conciertu con bises esixíos más que pidíos por un públicu exultante que dificilmente va escaecer que Asturies superó con matrícula la so presencia nel añu de la crisis.