asturnet

El Sindicatu d’Estudiantes d’Asturies vieno de denunciar qu’esta mañana, a les puertes del IES Nº 5 d’Avilés, una pareya de la policía nacional identificó y amenació con llevase deteníu a un padre y collaborador del Sindicatu d’Estudiantes d’Asturies, cuando se topaba distribuyendo a dellos afiliaos de la nuesa organización la documentación necesaria pa realizar el Referéndum pola Escuela Pública, enmarcáu dientro del procesu de protestes convocaes pola Plataforma Estatal en Defensa de la Escuela Pública.

Cuando esti collaborador del SEA atopábase falando con dellos estudiantes, un coche patrulla averose al llugar y pido-y les papeletes de votu sobre’l referéndum y el restu de materiales sobre la consulta y les movilizaciones previstes, pa darréu desplicar quien yera y lo que taba faciendo.

Sigún denuncia’l Sindicatu d’Estudiantes, magar eso, unu de los axentes dio en identificalu, unviando los sos datos a la centralita y reteniéndolu xuntu al coche mentanto. Darréu, “al amosar el nuesu compañeru la so disconformidá cola actuación policial y pidir el numbero de placa al axente, esti reaccionó de forma chulesca y apavoriante, amenaciándolu primeru con llevalu deteníu a la comisaría” y depués con pone-y una multa que según les sos propies palabres “a lo menos va ser de 300 €, depende de lo que ponga yo equí”.

Magar finalmente la situación nun foi a mayores, dende’l Sindicatu d’Estudiantes “enforma nos tenemos qu’esti incidente nun sía casual, sinón que, a menos d’un mes de la fuelga xeneral educativa, dende la Delegación de Gobiernu diérense ordes pa controlar y hostigar a los nuesos activistes, a los nuesos padres y profesores nuna nueva vuelta de tuerca, col propósitu de siguir tarazando los nuesos derechos democráticos, daqué que , poques gracies, non nos va a estremar del oxetivu de lluchar pola Escuela Pública”.

Dende’l Sindicatu d’Estudiantes consideren esti incidente, “cuandoquier, como un claru casu d’abusu d’autoridá, y nesi sentíu queremos denuncialo públicamente, al empar que faemos un llamamientu a tola comunidá educativa a doblar la llucha contra los ataques a la Educación Pública, secundando masivamente les movilizaciones convocaes pal mes d’ochobre, especialmente les fuelgues d’estudiantes del 22 y 23, y la fuelga xeneral de padres, profesores y estudiantes del 24 d’ochobre”.

Una fuelga inédita qu’entró esti llunes na so segunda selmana tien bloquiáu l’empiezu del cursu escolar en Baleares y les clases nun s’imparten con normalidá na mayor parte de los 300 centros públicos, magar que les aules abrieron el pasáu día 13 de setiembre. La comunidá educativa protesta contra’l modelu trillingüe impuestu pol Gobiernu de José Ramón Bauzá (PP) que resta pesu horariu al catalán en favor del inglés. El sofitu social a los profesores ye tan incontestable que ya se llograren xuntar más de 100.000 euros pa sofitar la fuelga y collaboraciones solidaries como la del pintor Miquel Barceló qu’apurrió un grabáu pa la so vienta en puya, nun actu cómpliz cola causa de los güelguistes.

El paru representa un episodiu ensin precedentes pola resistencia de los docentes (magar la sangría nes sos nómines, de cásique 600 euro) y, tamién por esa complicidá ciudadana, anque hai tamién sectores disonantes, movimientos críticos de families pola duración del conflictu. N’Eivissa y Formentera el Gobiernu reconoz un impactu del 27% ente’l profesoráu ente que los sindicatos alzar al 90%. En Mallorca, l’Alministración fala del 9,5% y los güelguistes del 55%. En Menorca la protesta baxó la so intensidá. El paru nun tien visos de solución inmediata anque’l Gobiernu llamó a los sindicatos a una mesa de negociación colos mesmos puntos d’otres cites, pero nun plantega, primeramente, un diálogu concretu pa encarar el fin de la fuelga.

Los padres nun van unviar a los sos fíos el vienres a la escuela y el domingu preparase una movilización ciudadana en Palma, Mahón, Eivissa y Formentera; esti martes ante’l Parlamentu los güelguistes quieren espresar, de nuevu, el so refugu al refrendo de normes llingüístiques y educatives aprobaes por decretu.

El PP actuó por sorpresa nesti conflictu, xustamente en víspores del entamu del cursu pa tornar una sentencia adversa de los tribunales. El Tribunal Superior de Baleares paralizara cautelarmente la implantación del decretu de trillingüismu por defectos de forma a la espera de pronunciase sobre’l fondu del asuntu.

El grupu parlamentariu d’IX na Xunta Xeneral va llevar esta selmana al plenu trés asuntos de plena actualidá: la solución al problema de l’axudicación de places de los interinos que se quedaron fora de les llistes de la Conseyería d’Educación, el pidimientu d’esplicaciones sobre la denominada “Axenda contra la Esclusión social” -qu’IX solo conoz polos periódicos y nun tenemos nenguna información per parte del Gobiernu asturianu- y una Proposición Non de Llei pa que’l Gobiernu Central tenga que consultar coles comunidaes autónomes cualquier cambéu de la planta xudicial n’Asturies y tamién cola participación de la sociedá civil, teniendo en cuenta les especiales característiques xeográfiques y demográfiques d’Asturies. “Nun queremos enteranos pol BOE de posible retayos que son los qu’embaraxa’l PP”, dixo Ángel González, voceru d’IX na Xunta Xeneral.

El grupu d’IX va apellar de forma urxente al Conseyu de Gobiernu sobre l’Axenda contra la Esclusión social al considerar la “aparente” importancia estratéxica del anunciu realizáu pol Gobiernu de Javier Fernández que, “según dizse” va sirvir pa “blindar” l’Estáu de Bienestar frente a les agresiones” que sufrió cola política de retayos del Executivu Central y les importantes repercusiones presupuestaries y d’otra naturaleza qu’implica asemeyada propuesta.

De la mesma, IX propunxo un borrador de declaración institucional, que cunta col sofitu de tolos voceros, nel que s’amuesa la solidaridá y sofitu escontra los/el trabayadores de Tenneco Xixón y les sos families y detalla el “absolutu refugo” ante’l posible zarru de la factoría de Xixón, cuando nun paez esistir nenguna causa oxetiva que la xustifique.

L’Ayuntamientu de Gijón/Xixón, al traviés del Departamentu de la Universidá Popular de la FMCEUP, ufierta cursos d’asturianu qu’entamarán en febreru, ente los que s’alcuentren los d¡’aniciu y de torna. El plazu de matrícula será del 19 de setiembre al 4 d’ochobre de 2013

Los dos cursos ufiertaos son los que vienen darréu:

LLINGUA ASTURIANA: BÁSICU (códigu 162) LLINGUA ASTURIANA: TORNA (códigu 163)

Dambos van dase dafechu n’asturianu y pa matriculase nel de “Llingua Asturiana: Torna” faen falta conocimientos previos.

Si queréis tener más información, podéis descargar el folletu completu con tolos cursos qu’ufierta’l Departamentu d’UP pa febreru