Asturies y Xapón despidiéronse hasta 2010 na Universidá d’Uviéu

El xueves pasáu terminaba n’Uviéu la primer edición del Congresu de Cultura Xaponesa “Asturies y Xapón, fusión de cultures”, que tuvo llugar a lo llargo de tola selmana nel Edificiu Hestóricu de la Universidá d’Uviéu.

Na xornada última participaron, ente otros, el filósofu asturianista Lluis Xabel Álvarez “Texuca”, que cuntó les sos esperiencies sobre’l Xapón; y del escritor Antón García, que presentó un trabayu sobre la torna de haikus xaponeses al castellán fecha pol escritor de Cadavéu, Padre Galo, va más d’ochenta años.

La tarde foi’l momentu pa comparar la cocina asturiana cola xaponesa, conocer les actividaes del Club de Bonsai de Xixón y celebrar una preba de productos xaponeses a la qu’asistieron varios cientos de persones nel patiu de la Universidá.

Asturnews ufre les semeyes de la última xornada d’esti Congresu del que yá s’anunció, “habrá segunda edición en 2010”.

Semeyes de la xornada cabera del I Congresu de Cultura Xaponesa