Alredor d’un millón d’euros va llegar esti añu a los centros asturianos de tol planeta

El Boletín Oficial del Principáu d’Asturies (BOPA) espubliza güei la resolución d’axudicación de les subvenciones que’l Gobiernu del Principáu d’Asturies concede añalmente a los Centros Asturianos repartíos per tol mundu pa que puean facer inversiones nes sos instalaciones y, sobre too, puean desendolcar actividaes de calter llúdico-cultural que contribuyan a caltener los llazos cola so tierra d’orixe.

La Conseyería de Presidencia, Xusticia ya Igualdá, al través de l’Axencia Asturiana d’Emigración, empobina a esta fin 939.450 euros, de los que un total de 603.700 euros tán destinaos a los Centros que s’alcuentren nel esterior d’España y otros 335.700 a los qu’están allugaos nel territoriu nacional.

Los beneficiarios d’estes ayudes son los Centros Asturianos que cuenten con Reconocencia d’Asturianía, que nestos momentos son 32 centros d’América, 31 d’España, 6 d’Europa, 2 d’Asia y 1 n’Oceanía.