Música Víctor Manuel asoleya un nuevu discu, plenu d’actualidá by asturnet 6 de febreru, 2004 Víctor Manuel San José embárcase nel periodismu musical. Les catorce nueves canciones que-y dan forma a “El perro del garaje”, el nuevu discu’l cantautor, fuxen del intimismu y pónen-y ritmu y versu lo mesmo a la llaceria ecolóxica que vieno col afundimientu’l petroleru Prestige, qu’a la muerte n’Iraq del cámara José Couso o a quien falleció nel anonimatu -por nun tener ‘papeles’ en riegla- nes Torres Ximelgues de Nueva York. Les bambalines del nuevu trabayu’l músicu de Mieres tán poblaes de xente d’Asturies: Ramón Prada asumió los arreglos de ‘Neptuno’, el tema dedicáu a la catástrofe’l Prestige; el tamién asturianu Tino di Geraldo punxo la so batería; y el saxofonista enraigonáu en Xixón Andreas Prittwitz collaboró na grabación de los metales. La nómina de collaboraciones complétase col propiu fíu de Víctor Manuel, David San José, productor del discu y autor de los arreglos en trece de los catorce temes, y cola agrupación gallega ‘Faltriqueira’, que punxo les panderetes na canción n’alcordanza del regueru escuru que dexó’l petroleru Prestige. En “El perro del garaje”, a la venta dende’l 9 de febreru, Víctor Manuel cuenta amás la hestoria de Juan Diego, un ‘sinpapeles’ que por nun tener identidá llegal nun pudo morrer el 11 de setiembre de 2001 pesie a quedar soterráu nes ruines de les Torres Ximelgues. Comparte espaciu col presidente’l Brasil, Luis Inazio Lula da Silva, cuya renovación de la política n’América Llatina tamién merez una canción. La memoria de José Couso, cámara de Tele 5 asesináu n’Iraq pol Exércitu d’Estaos Xuníos, apaez tamién nun trabayu nel que’l cantautor de Mieres nun s’escaez de guardar un requexu pa la introversión: Nun hai discu ensin amor, y esi amor impregna tola grabación amás de llevar pa él una canción específica, “Cuando no pienso estoy pensando en ti” Nun falta la referencia al entornu remotu del autor, la cabecera de la cuenca minera’l ríu Caudal, que nesta ocasión Víctor Manuel evoca pa llamentar l’ausencia de soluciones de futuru énte’l solombriegu desmantelamientu de les fontes de riqueza tradicionales na comarca, el carbón la primera. 6 de febreru, 2004 0 FacebookTwitterPinterestEmail
Gastronomía Les Regueres rínden-yos homenaxe al pote y al pitu caleya by asturnet 4 de febreru, 2004 El conceyu de Les Regueres, pequeñu semidesconocíu de la zona central asturiana, cellebra nel primer fin de selmana de febreru les sos IV Xornaes gastronómiques del pote asturianu y el pitu caleya, qu’impliquen a los restaurantes reguerinos nuna convocatoria de dos menús a 18 euros cada ún, pa escoyer ente l’almuerzu y la cena. Asina, la suma de platos que s’ufre pal mediudía inclúi un pote asturianu col correspondiente compangu, una ración de pitu caleya, postres caseros, café y vino Marqués de Griñón. Pa la nueche la ufierta suavízase daqué: Sopa de pitu, croquetes de casa, pitu caleya guisáu, postres y vino. Los organizadores del certame esperen aumentar nesta edición el númberu de comensales del añu anterior, que yá foi enforma estimable. 4 de febreru, 2004 0 FacebookTwitterPinterestEmail
Cine Woody Allen rodará so prósima película n’Uviéu y Xixón by asturnet 4 de febreru, 2004 Según una información espublizada nel diariu xixonés El Comercio citando fontes de la distribuidora de les películes d’Allen n’España, Lauren Films, Allen desembarcará col so equipu n’Uviéu a lo menos durante la primer selmana de setiembre. Na capital asturiana empezará un rodaxe que se prollongará dos meses y qu’incluyirá amás llocalizaciones de Xixón. L’afamáu director neoyorquín, con una vida paralela de concertista de clarinete, conoció ‘in situ’ Asturies tres de ser galardonáu en 2002 col premiu Príncipe de Asturias de les Artes. Amás de recoyer la distinción nel teatru Campoamor y d’hospedase na capital asturiana, Woody Allen cellebró entós un alcuentru con seguidores en Xixón. De dambes ciudaes fexo comentarios eloxosos. Como ye vezu na preparación de cada nuevu trabayu d’Allen, el cineasta norteamericanu y l’equipu que lu arrodia caltienen un rigurosu silenciu sobre l’argumentu, el títulu y el repartu de la película que se grabará en Xixón y Uviéu, ciudá esta última onde’l director ta inmortalizáu nuna estatua allugada nel cascu urbanu. 4 de febreru, 2004 0 FacebookTwitterPinterestEmail
Educación El Principáu alitará la edición de llibros de textu n’asturianu by asturnet 4 de febreru, 2004 El Gobiernu del Principáu d’Asturies, alitáu pola Oficina de Política Llingüística, prepara una convocatoria pública d’ayudes editoriales pa l’espublizamientu de llibros de textu n’asturianu que permitan iguar la falta de material bibliográficu afayadizu pa los escolinos que decidan cursar l’asignatura de Llingua Asturiana. La iniciativa canalizaránla de forma conxunta les Conseyeríes d’Educación y Ciencia y de Cultura, Comunicación Social y Turismu, dirixíes respectivamente polos socialistes José Luis Iglesias Riopedre y Ana Rosa Migoya, y tendrá un presupuestu inda por concretar. Sedrá toa una novedá na promoción editorial del asturiano que vien faciéndose nos últimos años, yá que les subvenciones a la industria editorial integrábense nun paquete únicu y nun s’espublizaben nel Boletín Oficial del Principáu de forma dixebrada y singular según el xéneru. La promoción de los llibros de textu apoyaráse amás según Ramón D’Andrés, director de la Oficina de Política Llingüística del Principáu, na recuperación de la denomación “llingua asturiana” pa designar tala materia nos currículos educativos, onde agora se designa “Lengua tradicional: bable/asturiano”. 4 de febreru, 2004 0 FacebookTwitterPinterestEmail
Cine Yhazmina Díaz presenta en sociedá “La posada de las almas” by asturnet 3 de febreru, 2004 Xuacu Carballido, Luisa Aguilar y Fernando Díaz. D’esi concisu repartu echa mano la realizadora Yhazmina Díaz pa retratar l’Asturies misteriosa y emborrinada de les fontes nes qu’habiten xanes. Una mirada a la veta de la mitoloxía que se materializa en curtiumetraxe y ñaz nuna posada vieya. “La posada de las almas”, rodada en 2003, amiesta les tipoloxíes de paisanu corrompináu de lleendes y mozu en trance iniciáticu cola presencia d’una xana pasada por agua. Una cuyarada de ficción, otra de suspense y un ámbitu borrinosu ponen el restu de la hestoria. Dientro’l programa de promoción del trabayu cinematográficu, la directora y los actores que protagonicen el curtiu asisten a una proyección comentada nel Fórum de la FNAC (Parque Principado, Sieru) a les 20 hores del vienres 6 de febreru. 3 de febreru, 2004 0 FacebookTwitterPinterestEmail
Sociedá D’Andrés ataya sos tensiones mediátiques cola Academia by asturnet 3 de febreru, 2004 Ramón D’Andrés, director de la Oficina de Política Llingüística del Principáu, quier poner llende a les sos declaraciones cruciaes cola Academia de la Llingua qu’alita la prensa escrita hai selmanes, y que tensaron enforma la relación ente los dos principales muérganos institucionales na defensa de la llingua. D’Andrés ufre otra vuelta collaboración a l’Academia y tien concertada una entrevista cola so presidenta, Ana Cano. Les agües baxen turbies dende’l propiu nomamientu del filólogu xixonés al frente de la Oficina de Política Llingüística, n’ochobre pasáu. Pero la toma de posesión del cargu, el 13 de xineru, asoleyó otra vuelta la yá vieya rocea de l’Academia respecto a D’Andrés, miembru ‘díscolu’ de la institución n’especial pol so criteriu col gallego-asturiano. Agora, acabante denunciar qu’un diariu asturianu manipuló unes declaraciones de so col envís d’alitar so engarradiella cola Academia, D’Andrés fai un nuevu llamáu pa la collaboración ensin paliativos ente la Oficina qu’él dirixe y la institución que preside Ana Cano. Con esi oxetivu, y la consideración de l’Academia como institución capital na normalización del asturiano, el director de la Oficina de Política Llingüístca tien concertada yá una entrevista con Cano na que dambos van estudiar midíes pa garantizar una presencia digna de l’asturiano en toles estayes de la sociedá. 3 de febreru, 2004 0 FacebookTwitterPinterestEmail
Música Xixón ultima un festival con Motörhead y Alice Cooper by asturnet 30 de xineru, 2004 Les afitaes bandes de heavy metal Motörhead y Alice Cooper, representantes de los meyores y más granibles tiempos del so estilu, actuarán con toa probabilidá en Xixón nel empiezu’l prósimu veranu, dientro d’un festival heavy que cuntará amás con un tercer grupu de sonadía inda por concretar y que baraxa l’escenariu del Palaciu los Deportes de La Guía como’l más probable. Asina lo aconseyen les obres del metrotrén, qu’impiden cellebrar recitales con normalidá nel habitual allugamientu al aire llibre del hipódromu de Las Mestas, mientres que l’aforu de la plaza de toros xixonesa -unes 8.000 persones- abúltase-y enforma curtiu a los organizadores del conciertu. Tanto Motörhead como Alice Cooper lleven tres décades enriba les tables y acumulen por ello una bayurosa trayectoria nos caminos del heavy metal. Polo d’agora, la conceyalía de Festeyos del Conceyu de Xixón piensa nel últimu fin de selmana de xunu o nos dos primeros de xunetu pa cellebrar el festival. 30 de xineru, 2004 0 FacebookTwitterPinterestEmail
Comunicación Asturies podrá tener hasta 32 cadenes de tv dixital by asturnet 29 de xineru, 2004 El Ministeriu paez tener yá toles cartes entiba la mesa. Ensin que mediara un consensu col Gobiernu autonómicu, y dientro d’un procesu a nivel estatal, la decisión de Madrid ye habilitar una canal con capacidá pa cuatro programes en cada una de les ocho demarcaciones territoriales en que se dixebró’l territoriu asturianu pa organizar el repartu de llicencies. Ocho por cuatro, 32. Esi sedrá’l númberu másimu de televisiones dixitales qu’emitirán n’Asturies. Les demarcaciones incluyen a 47 conceyos, daqué más de la mitá de los 78 municipios qu’hai nel Principáu. D’oeste a este, la zona de Valdés intégrenla, amás d’esi conceyu, los de Navia, A Veiga d’Eo, Tapia, Castripol, El Franco, Cuaña, Bual y Villayón. Un segundu grupu ta formáu por Cangas de Narcea, Tinéu y Allande, mientres que con Avilés apíñense Castriyón, Corvera, Pravia, Cuideiru, Sotu’l Barcu y Muros de Nalón. Xixón ye la cabecera de Gozón, Cerreñu, Villaviciosa y Colunga, en tantu qu’alredor d’Uviéu agrúpense Sieru, Llanera, Grao, Noreña, Morcín y Ribera d’Arriba. Nes cuenques mineres, constitúin una demarcación los conceyos de Mieres, Llangréu, Samartín del Rei Aureliu, Ayer, Llaviana y Llena. Nel oriente afítense les dos demarcaciones restantes: Piloña, con Cangues d’Onís y Parres; y Llanes, con Ribesella, Cabrales, Ribadedeva, Peñamellera Alta, Peñamellera Baxa y Caravia La televisión dixital ufre una imaxe de gran calidá al permitir que la señal que-y llega al receptor seya esacta a la que se xenera nel centru emisor correspondiente. Magar d’ello, el so principal potencial anguañu ye la capacidá pa incluyir nos televisores servicios inéditos na tv convencional que permiten al espectador elixir ente diversos conteníos ya interactuar colos emisores. 29 de xineru, 2004 0 FacebookTwitterPinterestEmail
Comunicación El Gobiernu abre la busca de director xeneral pa la tv autonómica by asturnet 27 de xineru, 2004 El Gobiernu del Principáu empezará darréu a esbillar nomes pa decidir quién va ser el director xeneral de la futura televisión autonómica asturiana, cuyu conseyu d’alministración elixiráse a la fin nel mes de febreru, llueu qu’un cambiu llegal incluyíu na llei d’acompañamientu de los presupuestos permitiera valtiar el bloquéu del Partíu Popular (PP) a la puesta en marcha del nuevu ente públicu de comunicación. La busca de candidatos pa exercer la dirección de la radiotelevisión asturiana abriráse col conseyu yá nomáu y con tres criterios básicos: El PSOE quier a una persona con amplia esperiencia profesional nel ámbetu de la comunicación audiovisual y que conoza a fondu les nueves tecnoloxíes, mientres qu’Izquierda Xunida pon enriba la mesa la necesidá de que’l director de la TV seya asturianu pa evitar qu’un equipu foriatu ensin conocencia del país marque les llinies mayestres del nuevu ente. N’otres pallabres, los socios de los socialistes nel Gobiernu del Principáu entienden qu’hai qu’elixir a un profesional col abondu conocimientu de la realidá social, económica y cultural d’Asturies, en gran midida pa facer posible una radiotelevisión distinta, de calidá y enraigonada nel so entornu. El Boletín Oficial del Principáu d’Asturies (BOPA) espublizó l’últimu día de 2003 la modificación de la Llei 2/2003, de Medios de Comunicación Social, pa salvar el bloquéu que’l PP exerce sobre’l proyectu de la TV desque’l PSOE perdió la mayoría absoluta nes pasaes ellecciones autonómiques. El cambiu llegal permite precisamente el nomamientu d’ocho de los quince miembros del conseyu d’alministración por a lo menos dos grupos parlamentarios El Gobiernu prevé que la radiotelevisión asturiana empiece emitir na seronda dende unes instalaciones provisionales na Universidá Llaboral de Xixón, pa llueu treslladase al Parque Tecnolóxicu, en Llanera. El PP caltién so oposición al proyectu por entender que nun ye una actuación preferente y que resulta enforma caru. 27 de xineru, 2004 0 FacebookTwitterPinterestEmail
Gastronomía El Principáu tramita la reconocencia de la Pita Pinta como raza autóctona by asturnet 26 de xineru, 2004 El Gobiernu asturianu quier que se reconozan la singularidá de la pita pinta y les bondaes de los güevos d’esta ave pa la alimentación cotidiana. Con esi envís declaráu, y alitáu pola acabante surdir Asociación de criadores de la pita pinta asturiana, entamada en 2003, la Dirección Xeneral de Ganadería acaba empobina-y al Ministeriu d’Agricultura, Pesca y Alimentación la documentación pertinente pa que la pita pinta seya formalmente reconocida como raza autóctona asturiana. P’algamar esi estatus, del que yá gocien les vaques asturiana de los valles y de la montaña, la oveya xalda, la cabra bermeya y el poni asturcón, la pita pinta habrá demostrar la so especificidá. Los 38 criadores d’esta ave qu’anguañu hai n’Asturies ceben a mediu millar d’exemplares y tán enfotaos n’ameyorar la productividá de la pita ensin desenraigonala del so hábitat rural, una de les característiques definitories de la raza. Amás d’ella, la pita pinta asturiana tien la cresta arrecha, presenta un picu mariellu con pintes negres, camina enriba d’unes zanques musculoses y, anque so carne ye de gran calidá, apréciense más los güevos que pon. Un estudiu biolóxicu ellaboráu pol veterinariu Rafael Eguiño dende los años ochenta amuesa la singularidá de la pita pinta, cuyu orixe esactu desconózse y de la qu’alpenes se sabe que sobrevivió abondu tiempu en piteros de llugares alloñaos, ensin amestase con otres races. So figura atopóse tallada en madera n’horros vieyos d’estremaes zones d’Asturies. 26 de xineru, 2004 0 FacebookTwitterPinterestEmail