Música David Byrne, de Talking Heads, abre en Xixón so xira española by asturnet 27 de marzu, 2004 L’ex cabezaleru de la banda Talking Heads, l’escocés David Byrne, abrirá en Xixón una minixira española que va llevalu tamién a Málaga, Lorca y Madrid. El conciertu asturianu de Byrne, nel teatru Xovellanos, cellebraráse’l domingu 28 de marzu a les 20,30 hores y les entraes p’acceder dirán de los 15 euros en xeneral a los 25 euros por una llocalidá nel patiu de butaques. David Byrne nun tará solu enriba les tables: Acompañaránlu los sos habituales Paul Frazier, al baxu, y Mauro Refosco na percusión, que xunta la guitarra’l propiu Byrne darán-y la base rítmica necesaria a tolos temes. Amás, un sextetu de cuerda procedente de Texas (Estaos Xuníos) envolverá la interpretación del repertoriu’l conciertu, que tará basáu nel últimu discu de Byrne -‘Lead us not into temptation’- pero que fará tamién repás de l’álbum anterior a esti -‘Look into the Eyeball’- y de la etapa l’escocés al frente de los Talking Heads. 27 de marzu, 2004 0 FacebookTwitterPinterestEmail
Música Felpeyu abre la temporada con una xira por Galicia by asturnet 22 de marzu, 2004 Felpeyu daráse una escapada gallega. El veteranu grupu xixonés de folk abrirá la temporada de conciertos con una minixira pol país vecín qu’incluyirá cuatro conciertos, en sales de Vigo, Ourense y Lugo y nos estudios centrales de la radio autonómica gallega, allugaos nos andurriales de Santiago de Compostela. El viaxe sedrá la carta de presentación pal públicu gallegu del últimu discu de la banda, “Yá!”. El trabayu, el terceru que los de Xixón graben n’estudiu, salió de los obradorios de “Sinergia Digital” (Madrid) a mediaos de 2003, integráu por doce temes que, como davezu nel grupu, amiesten sones tradicionales con composiciones nueves. Eses van ser, n’esencia, les pieces que van sonar nos recitales gallegos, programaos ente’l 23 y el 26 de marzu. El martes 23, Felpeyu actuará na sala Miudiño, d’Ourense, d’onde colará pa tocar al otru día na Clavicémbalo de Lugo. El xueves 25, los xixoneses intervendrán nel principal programa musical de Radio Galega, ‘Estudio 3’, en San Marcos (Santiago), y la minixira finará’l vienres 26 na sala Sete Mares, de Vigo. Amás del ‘tour’ gallegu, Felpeyu tien yá programaes feches na nueche de San Xuan de Llugones y nel Festival Celta de Dowspuda (Polonia). web oficial de Felpeyu 22 de marzu, 2004 0 FacebookTwitterPinterestEmail
Sociedá El PP llama “terroristes” al restu de partíos de L.lena por defender l’usu del asturianu by asturnet 25 de febreru, 2004 Defensa de la llingua asturiana, igual a terrorismu. Esa ye la ecuación que plantegó’l PP nel Plenu’l Conceyu de L.lena que sacó alantre un reglamentu d’usu del asturianu apoyáu pol restu de fuerces polítiques con presencia municipal, PSOE, IX-BA y URAS. Victorino Fernández, voceru llocal del PP, llamó-yos a toos ellos “terroristes” y dixo que la nueva ordenanza llingüística “paez inspirada por ETA”. Les pallabres de Fernández, al que’l reglamentu pa propiciar el billingüismu se-y abulta propiu de “nacionalismos estremos”, foron darréu amatagaes pol alcalde de L.lena, el socialista Hugo Morán, que lu llamó al orde nel propiu Plenu ya esixó-y, ensin ésitu, que reculare no dicho. El nuevu reglamentu municipal del usu l’asturiano en L.lena, qu’empezó ellaborase en febreru de 2003, foi consensuáu un mes depués na Comisión de Cultura per tolos partíos políticos con representación municipal, llueu d’incorporar les igües propuestes pol PP. La ordenanza llocal abre la puerta pa que toles comunicaciones oficiales del Ayuntamientu puean ser n’asturiano amás d’en castellán, y prevé la formación de los conceyales y técnicos del Conceyu pa que los ciudadanos que quieran espresase n’asturiano alcuentren una interlocución correcta nesa mesma llingua. 25 de febreru, 2004 0 FacebookTwitterPinterestEmail
Gastronomía La sidra estrena denominación d’orixen con léxicu castellanu by asturnet 21 de febreru, 2004 La denominación d’orixe de la sidra ye una realidá depués de varios años de trámites y conxetures. Cola marca “Sidra de Asturias” llegarán esti añu a los chigres un millón y mediu de llitros de los 45 millones que van producir los llagares, un estrenu polémicu nel ámbitu llingüísticu por incluyir terminoloxía castellana propia del mundu’l vinu y ayena dafechu al léxicu tradicional asturianu qu’arrodia la producción de zumu de mazana. “Caldos”, “bodegas”, “catas” y otres pallabres castellanes asemeyaes ‘furen’ na documentación que-y da validez llegal a la denomación d’orixen y arrequexen a una estaya llingüística na que la presencia regular del asturiano yera hasta agora enforma rica nel ámbitu oral, con una bayura d’expresiones tamién nel ámbitu escritu. La marca “Sidra de Asturias” aplícase a tres variedaes, la sidra escanciada, la que nun s’escancia y sírvese na mesa y la gasificada. Pa producir zumu que s’acueya a la denominación d’orixe, los llagares habrán emplegar a lo menos el 51 por cientu de mazana autóctona esbillada, hasta que dientro de siete años esi porcentaxe llegue al cien por cien. Esi plazu establezse pa facilita-yos a los llagares la integración nel Conseyu Regulador, que polo d’agora tien 38 plantes productores inscrites. Esi númberu fai prever que de los 45 millones de llitros de sidra que saldrán de los llagares esti añu, sólo alredor de un millón y mediu podrán llucir la etiqueta de la denominación. Magar que la marca de calidá de la sidra asturiana yá ye un fechu dende’l 9 de xineru, les primeres botelles etiquetaes nun tarán nos chigres hasta dientro d’unos meses, cuando salga a la cai la primer sidra de temporada de 2004. 21 de febreru, 2004 0 FacebookTwitterPinterestEmail
Educación La demanda d’asturianu en Xixón esbarrúmbase na Secundaria by asturnet 18 de febreru, 2004 Medio enllenu o medio vacíu. El vasu de la demanda de l’asignatura de Llingua Asturiana en Xixón, el conceyu con más habitantes d’Asturies, pue vese de dambes formes: Más de la mitá de los escolinos de Primaria deprenden asturianu nos colexos, pero esi porcentaxe esbarrúmbase hasta alpenes el 4 por cientu nos institutos, onde ruempe de mou traumáticu la cadena de deprendizaxe académicu del idioma autóctonu. Asina, frente a los 3.500 alumnos d’asturianu que tán matriculaos nos colexos xixoneses namás hai 450 estudiantes de Llingua Asturiana nos institutos del conceyu, una disparidá de cifres que afecta tamién al collectivu de profesores: 23 na Primaria y namás cuatro na Secundaria. Tala situación de falta de continuidá quier iguala l’acabante constituyir Oficina municipal de la Llingua de Xixón, que se plantega como xeres más urxentes la recuperación de la toponimia tradicional del conceyu, l’aprobación d’una ordenanza municipal pa regular l’usu l’asturianu y la formación de los conceyales, llabor esti últimu pal que va entamase un cursu monográficu. 18 de febreru, 2004 0 FacebookTwitterPinterestEmail
Plástiques Asturies despídise d’Arco con un regueru de ventes by asturnet 17 de febreru, 2004 L’arte contempráneu d’Asturies afonda so güelga n’Arco. La prestixosa feria internacional madrilana, ún de los principales motores de les artes plástiques d’anguaño, peslló sos puertes tres de recibir nesta edición a 200.000 visitantes y propiciar la venta de mediu cientu d’obres d’artistes asturianos que colgaben sos trabayos nos espositores del certame. Namás la galería uvieína Vértice facturó unes cuarenta obres de los artistes qu’amosaben so producción nesi ‘stand’. Particulares, pero sobre too galeristes, mercaron trabayos d’Isidro Tascón, Matarranz, Soledad Córdoba, Herminio, Kely y Lisardo, ente otros. A esi éxitu de ventes, que yá por sigo mesmu engrasa la maquinaria de la industria pictórica contemporánea d’Asturies, hai que-y amestar la proyección algamada por dalgunos autores asturianos na feria: un galerista italianu estudia montar una esposición con obres d’Agustín Bayón, y del mesmu mou la producción de Carlos Suárez podría viaxar a Xerez de la Frontera pa fin d’añu. Pelayo Ortega foi ún de los principales nomes propios na Feria Internacional d’Arte Contemporáneu de Madrid. La galería Malborough vendió toles obres d’él qu’esponía nel certame, que constató que’l 60 por cientu de les compres fixéronles coleccionistes particulares. 17 de febreru, 2004 0 FacebookTwitterPinterestEmail
Patrimoniu El Principáu secunda’l Xacobéu con cuatro nuevos albergues by asturnet 13 de febreru, 2004 Cuatro nuevos albergues -ún en Ribadedeva, dos ente Villaviciosa y Avilés y otru en Payares- reforzarán la rede d’atención a los pelegrinos que faen el Camín de Santiago nes sos variantes asturianes. Los que caleyen per elles nesti Añu Santu Compostalán tendrán señalizaos y reconocíos dos nuevos tramos, d’Uviéu a Avilés y ente Tinéu y Allande por siendes de montaña. Énte’l previsible regueru de pelegrinos que’l Xacobéu va atrayer a Asturies a partir de la primavera, el Principáu quier evitar enguedeyos y oportunismos: Namás van reconocese y señalizase como tales los tramos del Camín de Santiago que tean documentaos hestóricamente con rellatos d’época, infraestructures orixinales al serviciu’l pelegrín y poblaciones xeneraes pol propiu Camín. Una comisión acabante constituyir, formada por representantes de la Conseyería de Cultura, asociaciones del Camín de Santiago y espertos académicos, sedrá la encargada de definir los itinerarios de la vía europea de pelegrinación a Compostela, penriba d’engarradielles llocales, y mirará pol bon desendolcu l’Añu Santu n’Asturies. El Gobiernu’l Principáu secundará amás el Xacobéu 2004 col espublizamientu de los estudios sobre’l Camín a so pasu por Asturies y la cellebración d’un congresu monográficu na seronda, ente otres actividaes. 13 de febreru, 2004 0 FacebookTwitterPinterestEmail
Sociedá Llena formará a sos funcionarios pa espardir l’asturianu oral by asturnet 13 de febreru, 2004 L’Ayuntamientu de Llena oficializa’l billingüismu. Un reglamentu d’usu del asturianu garantiza la presencia d’esi idioma nes comunicaciones escrites de l’Alministración llocal con persones ya instituciones, na imaxe corporativa’l Conceyu y nel ámbitu oral, llueu de que l’Ayuntamientu forme a los sos trabayadores pa que falen asturiano con normalidá nel desendolcu de sos funciones. Na práctica, el nuevu reglamentu va permitir qu’impresos, instancies, revistes institucionales ya intervenciones públiques tengan la llingua asturiana como idioma vehicular, en convivencia col castellán. Amás, los vecinos podrán ser atendíos n’asturianu cuando faigan dalguna consulta o trámite énte’l Conceyu. La inciativa qu’agora cuaya, entamada en febreru de 2003 pol Serviciu de Normalización Llingüística de Llena, recibió’l sofitu formal de la Oficina de Política Llingüística’l Principáu, que precisamente s’enfota na promoción llocal del asturianu como vía sustancial p’hacia la normalización. El PSOE gobierna’l conceyu llenense con 7 conceyales; IX-Bloque por Asturies tien 5; el PP, 4, y URAS ta presente con un conceyal. 13 de febreru, 2004 0 FacebookTwitterPinterestEmail
Plástiques Arco echa a andar con quince artistes asturianos by asturnet 12 de febreru, 2004 Eduardo Úrculo, Pelayo Ortega, Luis Fernández y otros trece más que caminen pola so mesma sienda. Una quincena d’artistes formen la delegación asturiana na Feria Internacional d’Arte Contemporáneu de Madrid (Arco) en so edición de 2004, cuya apertura alitó yá los primeros movimientos de caxa nes galeríes d’Asturies que participen nel certame. Particulares y empreses -ente elles, importantes corporaciones financieres con estimable poder adquisitivu- interesáronse dende la primer xornada de la feria na ufierta artística de les galeríes allugaes nel Principáu con representación nel eventu, qu’esperen ameyorar los resultaos económicos collechaos na edición de 2003. La nómina d’autores del país con presencia n’Arco ta integrada, ente otros, por Pelayo Varela, compañeru de so propia obra nel puestu de la galería xixonesa Espacio Líquido; Carlos Suárez, cuyes obres cuelguen na delegación de la sala uvieína Altamira; Herminio, Matarranz y el fotógrafu Tomás Miñambres, presente nel ‘stand’ del diariu ABC. Un total de 277 galeríes procedentes de 32 países -más de la mitá d’elles de fuera d’España- dan-y vida a Arco 2004, que nesta edición destaca a Grecia en calidá de país invitáu. 12 de febreru, 2004 0 FacebookTwitterPinterestEmail
Comunicación Madrid recurre énte’l Constitucional la llei de la tv autonómica by asturnet 6 de febreru, 2004 La futura radiotelevisión autonómica enfréntase a una nueva torga. El Gobiernu central va recurrir énte’l Tribunal Constitucional el reciente cambiu de la Llei de Medios de Comunicación Social, que PSOE y IX sacaron alantre n’avientu pasáu pa poder constituyir el conseyu d’alministración del Ente de Comunicación al marxe del bloquéu impuestu pol PP. L’Executivu d’Aznar entiende que’l Principáu va más allá de les competencies que-y correspuenden pa regular y crear sos propios medios de comunicación. Ye un pasu más nel llargu viacrucis que vien siendo el procesu preconstitutivu de la tv asturiana, proyectu que’l Gobiernu de coalición PSOE-IX que salió de les elecciones autonómiques de 2003 sacó del caxón dafechu y pretende echar a andar a la fin esti mesmu añu. El Partíu Popular n’Asturies yá anunciara la posibilidá de que se diera el recursu d’inconstitucionalidá qu’agora fai efectivu el Gobiernu de Madrid, al entender que’l cambiu llegal ‘coláu’ na llei d’acompañamientu de los presupuestos asturianos pa 2004 nun ye llexítimu. Nesi cambiu dábase vía llibre a la constitución del conseyu d’alministración del Ente con a lo menos ocho de los sos quince miembros, nomaos por a lo menos dos grupos parlamentarios. N’otres pallabres, la llei ye un textu escritu ‘ad hoc’ pa que PSOE y IX pudieren echar a andar la televisión ensin la participación del PP, que cola so negativa a apoyar un ente de comunicación que-y paez caru y superfluu vien torgando’l ñacimientu de la tv asturiana dende hai años. L’Ente de Comunicación del Principáu, somorguiáu nel escaezu nel pasáu mandatu de Vicente Álvarez Areces por mor d’engarradielles internes ente los socialistes, diba tener conseyu d’alministración, en principiu, nel mes de febreru. Les previsiones del Gobiernu yeren facer les primeres emisiones n’ochobre dende un allugamientu provisional na Universidá Llaboral de Xixón, a la espera d’una sé definitiva nel Parque Tecnolóxicu, en Llanera. 6 de febreru, 2004 0 FacebookTwitterPinterestEmail