Música Doctor Explosion entama una xira n’Italia a puntu de llanciar nuevu discu by asturnet 13 d'abril, 2004 Doctor Explosion asoleya nuevu discu y entama una xira per Italia que llevará a los miembros del tríu xixonés tamién a tierres de Francia y que confirma la so amplia proyección internacional. Con Montpelier como primer escala, la banda abrió la xira italiana el vienres 16 d’abril en Piacenza, pa siguir depués per Viterbo, Teramo, Barletta, Lecce, Roma, Reggio Emilia, Pisa y Verona nun tour que se prollongará hasta’l sábadu 24, al ritmu d’un conciertu por día. Pal viaxe de regresu, los Doctor Explosion tienen prevista una fecha en Niza, pero la promotora de la banda enfótase en confirmar dalguna actuación más en Francia. NAsturies, el grupu namás tien programada una actuación, en Candamul 5 xunu, que formará parte de la xira española que va llevalos per Madrid, A Coruña, Córdoba y Castellón, anque podría ampliase’l númberu de conciertos. L’aniciu italianu de la temporada de conciertos coincide col llanzamientu inminente del nuevu discu de Doctor Explosion, ‘Totus tuus’, un doble recopilatoriu grabáu con Subterfuge Records nel que los xixoneses repasen los 15 años que lleven yá nel mundu de la música. Poro, el material sonoru y audiovisual que s’atopa nesti discu ye al que tán avezaos los sos fans, un mecigayu d’estilos musicales que van dendel punk más salvaxe hastal pop más melódicu, con un soníu percontundente y coles pallabres folixa y xaréu por llema. El grupu apaez con una nueva formación anque cola filosofía de siempre: Juan Martínez al baxu y Pibli a la batería acompañen agora a Jorge, que sigue al frente de la guitarra y les voces. 13 d'abril, 2004 0 FacebookTwitterPinterestEmail
Música Bunbury abrirá n’Uviéu la xira de presentación del so nuevu discu by asturnet 13 d'abril, 2004 Enrique Bunbury empezará n’Uviéu un llargu camín con más de 80 etapes por España y América Llatina pa presentar el discu qu’ababa sacar del obradoriu, ‘El viaje a ninguna parte’, quintu trabayu discográficu qu’edita en solitario l’artista zaragozanu depués de la disolución de la banda na que se diera a conocer, Héroes del Silencio. El conciertu na capital asturiana sedrá’l 27 de mayu. Bunbury va realcontrase col públicu uvieín con venti temes nuevos llistos pa rodar nel escenariu, dalgunos d’ellos con títulos talos como ‘Voces de tango’, ‘La señorita hermafrodita’ y ‘Que tengas suertecita’, corte que va ser el primer sencillu en sonar nos circuitos habituales. En toles canciones recién grabaes, l’artista mañu reedita y desendolca’l so singular soníu, evolución de la so etapa al frente d’Héroes. Según informó la casa discográfica qu’asoleya el quintu discu de Bunbury, EMI, el trabayu pondráse a la venta el llunes 17 de mayu, y depués del estrenu en directu n’Uviéu la xira de presentación siguirá per tierres de Castiella, Galicia, Euskadi y Aragón. La grabación de ‘El viaje a ninguna parte’ finó esti mesmu mes de marzu nos estudios Music Lan de Figueres, en Girona, mientres que la mezcla final féxose en Nueva York. Pa presentar el discu en directu, Enrique Bunbury -compositor, intérprete y productor- saldrá a escena arrodiáu de La Banda del Huracán Ambulante, el so grupu habitual de músicos, que tamién participó na grabación. 13 d'abril, 2004 0 FacebookTwitterPinterestEmail
Música The Forty Fives lleva a Xixón el so rock de cuñu americanu by asturnet 13 d'abril, 2004 The Forty-Fives trai d’Atlanta a Xixón el so rock and roll ensin contemplaciones. La Sala Albéniz acueye esta nueche un conciertu nel que la banda norteamericana ufrirá una esbilla de los sos temes, a mediu camín ente la premonitoria guitarra de Chuk Berry, el soníu británicu y l’esplosivu direutu de bandes como The Who o MC5. El preciu p’acceder al recital ye de 10 euros con drechu a una cerveza, cantidá que baxa a 6 euros si se presenta’l bonu que se reparte gratis nos llocales xixoneses Savoy, Paradiso, Toma 3 y Louie Louie Café, y en Turly Records d’Uviéu. Desembolsando esa cifra, los asistentes podrán contemplar la execución en directu de temes de los dos trabayos que tien grabaos la banda, ‘Get It Together’ y ‘Fight Dirty’. The Forty Fives lleven namás dos años enriba les tables como formación, pero yá saben lo que ye trabayar nos célebres estudios Sun de Memphis y conocen lo que supón compartir escenariu con bandes de la talla de Jon Spencer Blues Explosion o Steve Earle. El conciertu de Forty Fives en Xixón forma parte de la xira española que’l grupu entamó el 8 d’abril en Madrid y que lleva al grupu a llocales de Valencia, Santander, Xerez de la Frontera, Ourense y Tomelloso. The Forty Fives son Bryan Malone (guitarra y voz), Adam Renshaw (batería), Mark McMurtry (baxu)y Trey Tidwell (muérganu hammond). Web oficial de la banda 13 d'abril, 2004 0 FacebookTwitterPinterestEmail
Música El Principáu destina 90.000 euros p’apoyar la música tradicional by asturnet 13 d'abril, 2004 Un importe máximu de 90.152 euros pa subvencionar la enseñanza de la música y la dancia tradicionales d’Asturies. Esi ye’l presupuestu col que la Conseyería d’Educación y Ciencia del Principáu d’Asturies quier alitar la continuidá del baille y los sones propios del país, nuna convocatoria qu’esclúi espresamente a les entidaes con ánimu de lucru y qu’almitirá solicitúes hasta’l 7 de mayu. Les bases de la convocatoria precisen que les ayudes económiques nun se-yos concederán en nengún casu a entidaes cuyu fin principal seya’l meru funcionamientu d’una banda de gaites, un grupu de baille o un coru, anque faigan amás investigación folclórica. Los destinatarios precisos de la subvención son les entidaes o collectivos de calter sociucultural y ensin ánimu de lucru, llegalmente constituyíos, que seyan titulares d’Escueles de Música y Dancia Tradicional Asturiana. Ente los requisitos fundamentales pa recibir una de les ayudes, la Conseyería d’Educación y Ciencia esíxe-yos a los solicitantes que cuenten polo menos con tres profesores, qu’ufierten llinguaxe musical y qu’impartan les sos enseñances en llocales afayadizos. Les solicitúes, acompañaes de la pertinente documentación alministrativa, habrán presentase en tiempu y forma nel Rexistru Xeneral de la Conseyería d’Educación y Ciencia, allugáu na cai Coronel Aranda, 2, Edificiu Alministrativu de Servicios Múltiples, 33005-Uviéu. Bases de la convocatoria nel BOPA 13 d'abril, 2004 0 FacebookTwitterPinterestEmail
Música El concursu folk ‘Cuarto de los valles’ algama la so quinta edición by asturnet 13 d'abril, 2004 El concursu de música folk Cuarto de los Valles algama los cinco años de vida. Lasociación cultural El Arbedeiro, organizadora leventu, mantién abiertul plazu de la quinta edición del certame pa que los grupos interesaos puean unviar les sos maquetes hastal prósimu 31 de mayu, optando asina a ún de los premios en metálico que va repartir el xuráu: 1.500 euros pal ganador, 600 euros pal segundu clasificáu y 300 euros pa caún de los otros tres finalistes. La final del concursu, cuya primer edición cellebróse en 2000, tendrá llugar el prósimu 24 de xunetu nel so escenariu habitual de Navelgas (Tinéu). A ella llegarán les cinco bandes que más méritos aconceyen a xuiciu de los miembros del xuráu, presidíu pol direutor del programa Trébede de Radio 3, Iñaki Peña. Los grupos concursantes habrán tener un mínimu de tres componentes y tendrán quunviar una maqueta en cd con a lo menos cuatro temes, dientro de plazu, a la Casa Cultura de Navelgas (Tineo), códigu postal 33873. El certame tien dos oxetivos: Ser un puntu de referencia pa tolos grupos nuevos que quieren dase a conocer, seyan de dientro o de fuera dAsturies, y tratar de difundir la música tradicional de tola península Ibérica. Nesi sen, los ganadores grabarán un cd conmemorativu desta quinta edición del concursu y presentarán la so música notros festivales dEspaña y Portugal colos que los organizadores mantienen alcuerdos de collaboración. La llista de los cinco seleccionaos pa la final daráse a conocer antes del 20 de xunu nos medios de comunicación y comunicaráse-yos personalmente a los grupos, quhabrán confirmar la so asitencia antes del 5 de xunetu. 13 d'abril, 2004 0 FacebookTwitterPinterestEmail
Fiestes La Pola vive la xornada central de los Güevos Pintos by asturnet 13 d'abril, 2004 La Pola Sieru abandona’l blancu y negru. El collor vivu de los güevos pintos envuelve güei la villa polesa nun ambiente folixeru centráu na amuesa y nel comerciu’l productu que-y da nome a la fiesta, pero abiertu tamién a la música y la gastronomía. La principal novedá d’esta edición, na que ta acompañando’l tiempu, ye la recuperación de la puya’l ramu por iniciativa’l sector hosteleru llocal. Depués de la bendición n’asturiano de los güevos pintos, a cargu’l párrocu de La Pola, Juan Bautista Álvarez, que se fexo a mediudía, espichóse una pipa de sidra pa consumu’l públicu asistente, con actuaciones folclóriques de los grupos ‘El Ventolín’ y ‘Los Campones’. Una réplica en vivo del mercáu de La Pola a fines del sieglu XIX anima amás la xornada, cuyu actu central pa pola tarde ye, a partir de les cincu y media, el desfile folclóricu peles cais Celleruelo y Florencio Rodríguez. 13 d'abril, 2004 0 FacebookTwitterPinterestEmail
Educación Los docentes d’Universidá cobrarán hasta 7.000 euros más by asturnet 12 d'abril, 2004 Principáu y sindicatos de la estaya de la educación ultimen la negociación pa que la nómina de la mayoría de los profesores de la Universidá d’Uviéu medre ente 3.000 y 4.000 euros al añu, en virtú d’un conxuntu d’incentivos salariales que pretenden reconocer o estimular la calidá de la docencia, la investigación y la xestión El pactu ente los docentes y la Conseyería d’Educación, que se pesllará previsiblemente enantes qu’acabe abril, beneficiará a unos 1.500 de los 2.000 profesores qu’imparten clases na Universidá, yá que l’alcuerdu esclúi a quienes tienen ingresos adicionales amás de so actividá docente. No concreto del universu numéricu, les cantidaes adicionales que van empezar a cobrar los profesores encuádrense n’hasta siete grupos, tres d’ellos lligaos a la docencia, otros tres a la investigación y el restante vinculáu a la xestión. No que cinca a la docencia, l’antigüedá premiaráse con 1.200 euros añales pol primer quinqueniu y otros mil euros más al cumplir tres y cinco quinquenios como profesor. Cantidaes asemeyaes a lo que va aplicase na investigación, onde los primeros seis años merecerán un plus añal de 1.200 euros, más otros mil al aportar al segundu y al cuartu sexeniu. El complementu de xestión ye d’un 10 por cientu de les perres recibíes llueu de cuatru años nun cargu, polo que ciertos profesores podríen llegar a cobrar, xuniendo tolo anterior, hasta 7.400 euros más cada añu. Magar d’ello, la mayoría de los docentes percibirá ente 3.000 y 4.000 euros adicionales. 12 d'abril, 2004 0 FacebookTwitterPinterestEmail
Lletres s.c. Tolo que nun vi al quita-y el capiruchu ( I ) by asturnet 12 d'abril, 2004 Señalaba pal anunciu d’una bebida alcohólica. -¡Esi! -esclamaba, espurriendo la mandrecha (una manona esaxerada, como inflada a hormones) mientres cola manzorga se garraba’l gañote como si acabara beber un llitru de tequila-. ¡Yera esi! -¿Quién? El mio compañeru nun ta avezáu a entrugar, asina que, cuando lo fai, suena como si-y saliera del estómadu, la entruga: un soníu bestial que siempre (nun falla) sosprende al interllocutor. -¿Qué? -El paisanu miraba agora pal mio compañeru con estrañeza, la manona tovía espurrida, la manzorga escaeciendo de sópitu’l previsible resquemor nel gargüelu. -Tamos perdiendo’l tiempu -dixi yo, ensin falar con naide en concreto, nin siquiera comigo mesmu. El paisanu volvía mirar pal anunciu y arremellaba los güeyos. Visax d’espantu. -¡Yera esi! -repitió. “Esi” nun yera otru que George Clooney, o a lo menos yera’l rostru de George Clooney el qu’asomaba nel anunciu, un rostru en blanco y negro, con esi biecu cachondu que-yos sal a los actores cuando quieren asonsañar una pose informal y doméstica. El fondu del anunciu yera coloráu, un mar coloráu qu’alpenes yera pa caltenese ente los bordes de la valla publicitaria: amenazaba con arramase per fuera’l rectángulu y pingar enriba’l verde del parque y espardese del parque pa fuera, cruciando la cai, enllagando l’asfaltu y emporcándonos los zapatos. El paisanu nun paecía esmolecese por eso, nin tampoco’l mio compañeru, pero a min, dalguna manera, dábame un aquel de repilu. -A ver si lo entiendo, paisanu -dixi-. Ta acusando usté formalmente al actor norteamericanu George Clooney… -¿A quién? -reviróse’l paisanu. -Señala usté claramente a George Clooney, actor y productor de cine, protagonista de la serie “Urxencies” y habitual de les películes de los hermanos Coen y de Steven Soderbergh, un de los homes más envidiaos polos varones del primer mundu, un de los más deseaos poles muyeres de mediu planeta, la mía ente elles, y pretende que fue él el que lu agredió… -¿A quién? -repitió’l paisanu. Polo visto, de la mio boca nun llegara a brotar una sola pallabra d’aquel discursu tan brillantemente improvisáu. -A él -dixi entós, señalando pal rostru del anunciu. -Sí, él -confirmó’l paisanu-. Yera él. -Ta bien, paisanu -gufó’l mio compañeru-. Va tener que venir con nosotros. -Yo nun fixi nada -protestó’l paisanu-. Fue él. Yera él. Siguía señalando pal anunciu y la manona temblába-y a más nun poder. Y a min siguía acoruxándome la posibilidá de qu’aquella xelatina colorao se saliera de los bordes del anunciu y nos punxera los zapatos perdíos. Sigue la selmana que vien: Naciu Varillas 12 d'abril, 2004 0 FacebookTwitterPinterestEmail
Comunicación El nuevu Gobiernu central podrá desbloquear la tv autonómica by asturnet 11 d'abril, 2004 El nuevu Gobiernu central encabezáu por José Luis Rodríguez Zapatero -que sedrá proclamáu presidente ente’l xueves y el vienres d’esta selmana- tendrá nes sos manes la posibilidá de destorga-y dafechu el camín a la futura radiotelevisión autonómica asturiana. L’Executivu socialista podrá retirar el recursu que’l Gobiernu d’Aznar interpuso a primeros de febreru énte’l Tribunal Constitucional y que tien en suspensu la puesta en marcha del nuevu ente de comunicación, cuyes primeres emisiones tán previstes pa la seronda prósima. Dos meses y mediu depués que’l PP nacional secundara les consignes de sos dirixentes n’Asturies ya impugnara xurídicamente la creación de la autonómica, el nuevu Executivu socialista que se constituya formalmente a fines d’esta selmana, de sutaque Rodríguez Zapatero seya proclamáu presidente’l Gobiernu, podrá pidir que se retire la denuncia al traviés d’una declaración formal de desistimientu. Nel Gobiernu d’Asturies dase por fecho que Zapatero actuará d’esi mou y destorgará a la fin l’espinosu camín que la televisión asturiana vien triando antes d’echar a andar. Nesi bloquéu xugó hasta agora un papel clave el PP rexonal, que s’opón a la creación de l’autonómica al creyela un proyectu caru y secundariu. Los conservadores entienden que’l cambiu llegal ‘coláu’ na llei d’acompañamientu de los presupuestos asturianos pa 2004 nun s’axusta a la llei. Nesi cambiu dábase vía llibre a la constitución del conseyu d’alministración del Ente con a lo menos ocho de los sos quince miembros, nomaos por a lo menos dos grupos parlamentarios. La radiotelevisión pública asturiana, somorguiada nel escaezu nel pasáu mandatu de Vicente Álvarez Areces por mor d’engarradielles internes ente los socialistes, diba tener conseyu d’alministración, en principiu, nel mes de febreru. Les previsiones del Gobiernu yeren facer les primeres emisiones n’ochobre dende un allugamientu provisional na Universidá Llaboral de Xixón, a la espera d’una sé definitiva nel Parque Tecnolóxicu, en Llanera. 11 d'abril, 2004 0 FacebookTwitterPinterestEmail
Gastronomía Avilés vuélcase na cai cola fiesta’l Bollu by asturnet 11 d'abril, 2004 L’alta afluencia a la popular comida de les Fiestes del Bollu d’Avilés, qu’esti añu algamó axuntar a unes 10.500 persones nes meses asitiaes al aire llibre nel centru de la villa, espardió’l xaréu festivu a la cai de La Fruta pa poder agospiar a tolos comensales. La xinta, cola tortiella y la empanada como ingredientes principales, desendolcóse nun ambiente folixeru y abrió una tarde d’actos festivos n’estremaos escenarios. La comida na cai, que se cellebra tradicionalmente el llunes de Pascua y tresforma por unes hores la fisonomía’l cascu vieyu d’Avilés, espardióse pel entornu peatonal de los viales qu’arrodien la Plaza d’España -conocida popularmente como la Plaza’l Parche- y propició l’habitual confraternización d’amigos y convecinos cola gastronomía como elementu central. Tres de los postres, que foron consumíos, mesmo que’l restu de la comida, embaxo d’un cielu anubríu pero con una temperatura asequible, abrióse’l programa d’actos previstos pa la tarde. Ente ellos destaquen un desfile de carroces a les 18 hores ente la cai Jardines y la avenida Cervantes y dos cites musicales: Un alcuentru coral d’habaneres na Casa la Cultura a les 20 hores y un conciertu de Tejedor, una hora más tarde, na Plaza d’España. 11 d'abril, 2004 0 FacebookTwitterPinterestEmail