Educación La Universidá retoma l’actividá colos güeyos puestos na renovación del claustru by asturnet 18 d'abril, 2004 La Universidá d’Uviéu repónse del trasiegu que supuso la elección de rector del pasáu 1 d’abril, na que Juan Vázquez renovó’l so cargu, colos güeyos puestos yá nes votaciones al claustru, el segundu gran procesu electoral internu llamáu a renovar los órganos decisorios de la institución académica asturiana. Casi 40.000 profesores, alumnos y emplegaos alministrativos y de servicios elixirán a los 300 claustrales. Cola actividá retomada depués de les vacaciones de Selmana Santa, el calendariu electoral sigue en marcha. Tres de la publicación del censu definitivu, los integrantes de les estremaes candidatures habrán formalizar la presentación de les sos llistes ente’l 19 y el 23 d’abril. La campaña desendolcaráse del 5 al 17 de mayu, y la votación tendrá llugar el 19 d’esi mesmu mes, miércoles. El claustru que salga d’estos comicios completará’l camín de la renovación de los órganos decisorios de la Universidá d’Uviéu, que’l pasáu 1 d’abril s’abrió cola elección de rector y qu’habrá culminar antes d’avientu de 2005 col nomamientu de decanos y directores de centros, departamentos ya institutos universitarios. Les xuntes de facultá, escuela y departamentu elixiránse tamién el 19 de mayu. El claustru ye l’órganu cimeru de gobiernu de la Universidá asturiana. Presidíu pol rector, la mayoría de los sos 300 puestos tán reservaos a los profesores, que nos sos distintos graos ocupen 195 places. Xunta estos casi doscientos docentes, nel claustru que salga de les inminentes elecciones sentaránse amás 75 representantes de los alumnos y 30 miembros del personal d’alministración y servicios. Web oficial de la Universidá d’Uviéu 18 d'abril, 2004 0 FacebookTwitterPinterestEmail
Sociedá La Llei d’Usu del Asturianu cumple seis años ensin desarrollu by asturnet 18 d'abril, 2004 Seis años ensin un desarrollu reglamentariu que permita avances significativos. Esi ye’l balance de l’aplicación na práctica de la Llei d’Usu y Promoción del Bable/Asturianu, en vigor dende abril de 1998 pero somorguiada nun ostracismu políticu qu’impide meyorar la salú de la llingua asturiana con fechos concretos na enseñanza, nos medios de comunicación y na toponimia, les tres grandes estayes práctiques nes que pretende actuar el testu llegal. La falta de resultaos apalpables ye especialmente clara en puntos mui concretos como la creación d’un muérganu oficial de traducción asturianu-castellán, la garantía dafechu de la enseñanza de l’asignatura de Llingua nel sistema públicu o el propiu desarrollu reglamentariu de la Llei: Seis años depués de promulgáu el testu, l’órganu de torna nun esiste nin se prevé a curtiu plazu, queden escolinos que nun puen estudiar asturiano por falta de quórum nos sos centros y tovía nun se redactó’l desarrollu de la Llei por reglamentu. N’otros casos, los fechos contravienen abiertamente los preceptos de la Llei d’Usu: Pesie a que la norma llegal faculta a los Ayuntamientos pa “adoptar les midíes necesaries p’asegurar la efectividá del exerciciu de los drechos llingüísticos” de los asturianos, les altes instancies de la Xusticia vienen revocando ensin escepción la coficialidá de la llingua asturiana nos conceyos. Llueu que Casu, Morcín, Llaviana y Bimenes acataren en primer instancia la revocación impuesta pol Tribunal Superior de Xusticia d’Asturies, el Tribunal Supremu anuló en marzu pasáu la coficialidá en Llangréu, igual que fixera en Castrillón n’ochobre de 2002. Nel platu opuestu de la balanza, el Principáu reguló por decretu n’abril de 2001 la creación d’un Rexistru Xeneral de Capacitación en bable/asturianu y en gallego-asturianu pa docentes de Llingua, tal como prevía l’artículu 11 de la Llei d’Usu. Dotramiente, los servicios y oficines llocales de normalización, en francu procesu d’espardimientu, tán revelándose como organismos d’utilidá pa la defensa l’idioma nel ámbitu más cercanu al ciudadán, el municipiu. Y no esencial, el restu son futuribles: L’acabante nacer Oficina de Política Llingüística, dependiente de la Conseyería de Cultura, enfótase en recuperar la operatividá de la Xunta de Toponimia del Principáu d’Asturies, prevé actuar nos currículos educativos y mantién l’habitual llinia de subvenciones a instituciones, editoriales, medios de comunicación y empreses en xeneral pa la difusión del asturiano, cola novedá de les ayudes a la edición de llibros de testu en llingua asturiana. En total, el Principáu destina esti añu a la promoción llingüística 2,5 millones d’euros en subvenciones, de los que los medios de comunicación recibirán la mayor tayada (312.000 euros), frente a los 184.000 empobinaos a la producción editorial o a los 125.000 euros destinaos a los Ayuntamientos. Textu íntegru de la Llei d’Usu y Promoción del Bable / Asturianu, nuna web del PAS 18 d'abril, 2004 0 FacebookTwitterPinterestEmail
Música Pepín Robles y Manolo Morán ganen el premiu al meyor cantar n’asturianu por ‘Nunca máis’ by asturnet 15 d'abril, 2004 Pepín Robles, como autor, y Manolo Morán, en calidá d’intérprete, son los ganadores del primer galardón al meyor cantar n’asturianu de los Premios de la Música, que s’entregaron nuna gala cellebrada nel Palaciu Municipal de Congresos de Madrid. El gaiteru José Ángel Hevia y el percusionista Tino di Geraldo, los otros dos representantes asturianos qu’aspiraben a premiu n’otres categoríes, viéronse superaos en votos por otros candidatos. D’esti mou, Hevia vio cómo’l galardón al meyor álbum de música tradicional, al qu’optaba, diba parar a la veterana María Dolores Pradera, que recibió’l premiu pol so discu ‘Canciones del alma’. Pol so llau, Tino di Geraldo vio pasar de llargu la estatuina que premia’l meyor cd de nueves músiques, premiu del que se fixeron acreedores Chambao, pol trabayu ‘Endorfinas en la mente’. Al meyor cantar n’asturianu, que por primer vegada premia l’Academia de la Música de mou singular xunta los cancios n’otres tres llingües cooficiales nel Estáu -gallegu, catalán y euskera-, concurríen tamién los avilesinos hermanos Tejedor, con ‘Andolina’, tema escritu xunta’l productor Lisardo Lombardía, y el xixonés Nacho Vegas, como autor ya intérprete del tema ‘La canción de la duermevela’. Magar d’ello, el triunfu algamólu finalmente el candidatu más desconocíu, el llavianés Manolo Morán, por ‘Nunca máis’, tema incluyíu nel álbum ‘Sentimiento astur’. L’autor del cantar premiáu ye Pepín Robles, tamién orixinariu de Llaviana pero residente en Mallorca. Na octava edición de los Premios de la Música, que tresmitió la televisión pública en diferío, destacaron con lluz propia Alejandro Sanz y Las Niñas, qu’algamaron siete de los premios, ente ellos los de artista revelación, meyor canción, meyor álbum de pop y meyor videu. Bebo Valdés y El Cigala recibieron el galardón al meyor álbum. Llista de tolos ganadores na web de l’Academia de la Música 15 d'abril, 2004 0 FacebookTwitterPinterestEmail
Educación El Gobiernu abre’l plazu pa que los colexos puean optar ente xornada continua o partida by asturnet 15 d'abril, 2004 Los colexos públicos y concertaos d’Enseñanza Infantil y Primaria podrán decidir los sos propios horarios de docencia hasta’l prósimu 14 de mayu. Esi ye’l plazu que fixa’l Gobiernu asturianu pa que los pas y mas de los alumnos espresen nes urnes si quieren que los sos fíos asistan a clase en xornada continua, partida o mixta, a propuesta’l conseyu escolar de cada centru y siempre que voten polo menos el 60 por cientu de les families. Tres de la publicación de la midida nel Boletín Oficial del Principáu d’Asturies (BOPA), les comunidaes educatives de los colexos tán llamaes a escoyer ente una xornada estructurada nun únicu segmentu de 9 a 14 hores, o notra partida en dos con una parada pa xintar, de 9 a 12 y de 15 a 17 hores. Los pas podrán optar tamién por un amiestu d’esos dos modelos, combinaos según los distintos díes de la selmana. La resolución de la Conseyería d’Educación del Principáu, basada nos cambios que demanda nel sistema educativu les nueves condiciones llaborales de pas y mas, requier el vistu bonu previu de dos tercios del conseyu escolar de cada colexu, y rebaxa al 60 por cientu el porcentaxe mínimu de pas qu’han votar pa que’l cambiu se produza. Antes, la llexislación estatal pidía a lo menos un 80 por cientu. Col envís de facilitar la participación de les families nes respectives votaciones, Educación contempla la posibilidá’l votu por corréu dientro de los cinco díes previos a la xornada electoral. Promulgación de la midida nel BOPA 15 d'abril, 2004 0 FacebookTwitterPinterestEmail
Sociedá La cultura ye un 0,6% más barata n’Asturies qu’hai un añu, según l’Institutu d’Estadística by asturnet 15 d'abril, 2004 Los productos y servicios d’ociu y cultura son agora seis puntos más baratos n’Asturies qu’hai un añu, nuna situación más ventaxosa pal consumidor asturianu que pal d’otres comunidaes autónomes: Nel conxuntu l’Estáu, los precios de la cultura xubieron una décima nos últimos doce meses. Son cifres del Institutu Nacional d’Estadística (INE), qu’acaba asoleyar los datos del Índice de Precios de Consumu (IPC) referíos al mes de marzu. Anque consumir cultura n’Asturies ye más barato qu’en marzu de 2003, la midición del INE amuesa que los precios de bienes y servicios d’ociu y cultura xubieron dos puntos respectu al mes anterior, febreru. Pol so llau, la tasa acumulada d’inflación -indicador de la evolución del poder adquisitivu por variación de los precios no que va d’añu- ye na estaya cultural del -1,3 por cientu, o lo que ye lo mesmo, ente xineru y marzu los precios del ociu y la cultura baxaron n’Asturies un puntu y tres décimes. No que cinca al conxuntu d’España, les tarifes pa consumir servicios culturales son una décima más cares qu’en marzu de 2003, mientres que la tasa d’inclación acumulada indica que los precios baxaron un 0,8 por cientu no que va d’esti añu. Datos completos na web del INE 15 d'abril, 2004 0 FacebookTwitterPinterestEmail
Lliteratura Antón Saavedra prueba suerte na lliteratura con una crítica feroz al ‘felipismu’ by asturnet 14 d'abril, 2004 Cuatrocientes páxines y 39 capítulos pa facer una crónica de los presuntos escándalos del ‘felipismu’, de Cajastur a la minería’l carbón. Antón Saavedra, que fora cabezaleru sindical nes mines, socialista, diputáu na Xunta Xeneral del Principáu por Izquierda Xunida y tránsfuga depués n’apoyu del PP, presenta n’Uviéu ‘Secuestro del socialismo’, una denuncia feroz de les males práctiques del PSOE na dómina del ex presidente Felipe González. A partir d’apuntes almacenaos con meticulosidá y procedentes de conversaciones o revelaciones, Saavedra rentabilizó la so nueva condición de prexubiláu pa ordenar sobro’l papel la so visión crítica de les élites ‘felipistes’. A elles -yos atribúi l’ex diputáu asturianu l’apoyu a los poderes fácticos internacionales, l’arriquecimientu esaxeráu de los sos afines ya incluso la lliquidación del Partíu Comunista d’España por intereses foriatos. No que cinca a Asturies, la pluma de Saavedra pósase enriba de dos presuntos grandes escándalos: Les supuestes práctiques irregulares de directivos de Caxastur, con mención expresa a la venta de les participaciones que la Caxa tenía n’Airtel, y mui n’especial la corrupción na minería, con mediaciones d’homes del ‘felipismu’ a favor de ciertos empresarios particulares. L’escenariu de presentación de ‘Secuestro del socialismo’, editáu por Libros Libres – Spiritu Media, sedrá la Sala de Cámara del Auditoriu Príncipe Felipe d’Uviéu, a partir de les 20 hores de güei, xueves 15 d’abril. Nel actu intervendrán el caderalgu d’Hestoria Francisco Palacios, l’escritor Ignacio Gracia Noriega y el director de la editora’l llibru, Álex Rosal. 14 d'abril, 2004 0 FacebookTwitterPinterestEmail
Música Saratoga pospón el so conciertu en Xixón por enfermedá del baxista by asturnet 14 d'abril, 2004 El conciertu heavy que’l grupu Saratoga pensaba ufrir mañana, vienres 16 d’abril, na sala xixonesa Parque’l Piles, nun se cellebrará finalmente al sufrir el baxista’l grupu, Niko del Hierro, una enfermedá que nun-y permite salir al escenariu. Según informó la promotora de Saratoga n’Asturies, el recital queda aplazáu pal vienres 4 de xunu, tamién nel Parque’l Piles, y les entraes que yá se vendieron pa la actuación qu’agora se suspende valdrán pal conciertu de xunu. Magar d’ello, quienes quieran más recuperar les perres del billete d’accesu al recital suspendíu podrán facelo nos puntos onde mercaron les entraes, les tiendes Tipo d’Uviéu, Xixón y Avilés. 14 d'abril, 2004 0 FacebookTwitterPinterestEmail
Comunicación La prensa en papel d’Asturies ganó 56.000 llectores nun añu, según l’Estudiu de Medios by asturnet 13 d'abril, 2004 Los tres principales diarios d’información xeneral en papel asentaos n’Asturies ganaron en conxuntu un total de 56.000 llectores nos últimos doce meses, según los datos acabante espublizar na última edición del Estudiu Xeneral de Medios (EXM). Les falcatrúes de la estadística amuesen, por embargu, que los tres grandes periódicos asturianos lleguen agora a unos 15.000 llectores menos que na anterior midición del Estudiu, correspondiente al periodu de febreru a payares de 2003. Acordies colos datos recopilaos pola Asociación para la Investigación de Medios de Comunicación, editora del EXM, ‘La Nueva España’ sigue siendo’l periódicu con más difusión n’Asturies, con 364.000 llectores diarios. ‘El Comercio’ asítiase nos 192.000 llectores al día, mientres qu’a ‘La Voz de Asturias’ atribúinse 106.000 llectores. Si se comparen eses cifres coles del mesmu periodu anterior -abril de 2002 a marzu de 2003-, l’ascensu na difusión de la prensa en papel ye apalpable, y d’él tiren más los más pequeños: ‘La Voz de Asturias’, propiedá’l Grupu Zeta, ganó 21.000 llectores; ‘El Comercio’, del Grupu Vocento, xubió en 19.000; y ‘La Nueva España’, del Grupu Moll, allugóse a la cola’l crecimientu, con 16.000 llectores más. Magar de too ello, l’anterior midición publicada del Estudiu de Medios, la de febreru a payares de 2003, asoleya una prensa asturiana en papel más vital que la d’anguaño. Según esa estimación, los tres grandes diarios perdieron d’entós pacá unos 15.000 llectores, nun declive llideráu por ‘La Nueva España’, con una perda de 12.000 llectores. L’últimu cálculu del Estudiu Xeneral de Medios ta ellaboráu a partir d’una amuesa de pocu más de 46.500 entrevistes personales a otros tantos individuos, escoyíos aleatoriamente. El marxe d’error posible ente la estimación y los datos reales a los qu’esta se refier ronda’l 3 por cientu. Datos íntegros del últimu Estudiu Xeneral de Medios 13 d'abril, 2004 0 FacebookTwitterPinterestEmail
Comunicación ‘Les otres cares del planeta’ aborda la manipulación informativa by asturnet 13 d'abril, 2004 L’alcuentru ‘Les otres cares del planeta’, qu’entama en Xixón l’Asociación de Cooperación col Sur Acsur-Las Segovias, echará una güeyada especial a la manipulación informativa nos medios de titularidá pública. L’Asociación para la Investigación y Desarrollo de la Cultura Audiovisual (Aideka) amosará al traviés d’un estudiu propiu cómo trataron los servicios informativos de Televisión Española la fuelga xeneral del 20 de xunu de 2002 y la guerra d’Iraq. Aideka presentará’l documentu nun taller abiertu a la participación del públicu que se cellebrará nel Antiguu Institutu de Xixón el sábadu 24 d’abril, cola conclusión central de que los estremaos Gobiernos centrales nun quixeron considerar a RTVE un mediu públicu al servicio de la ciudadanía, sinón que la esplotaron como arma de desinformación masiva. El taller d’Aideka ye parte d’una xornada d’actividaes nes qu’habrá llugar tamién pa la ecoloxía, la educación y la inmigración nel cine español. D’eses tres estayes ocuparánse otros tantos talleres, conducíos respetivamente por Ecoloxistes n’Aición, Miguel Argibay y el Grupu Eleuterio Quintanilla. Pa poder participar nuna de les actividaes ye preciso apuntase previamente nel llocal d’Acsur-Las Segovias, allugáu na cai Instituto, 13-1º, 33201-Xixón. La inscripción pue formalizase tamién nel númberu de teléfonu y fax 985351350, o nes direcciones de corréu ellectrónicu educacion.asturies@nodo50.org y ecoloxistes.asturies@nodo50.org Páxina web de l’asociación Aideka 13 d'abril, 2004 0 FacebookTwitterPinterestEmail
Gastronomía La hostelería de luxu de Madrid promociona la faba asturiana by asturnet 13 d'abril, 2004 La hostelería de luxu de Madrid reconoz la bayura culinaria de la faba d’Asturies. A un preciu de 53 euros más IVA y dientro de les primeres xornaes gastronómiques qu’entama, l’Hotel Ritz madrilanu ufre hasta’l domingu que vien un menú de cinco platos basáu nel ingrediente esencial de la fabada, baxo la supervisión del xefe l’equipu de cocina del restaurante uvieín La Gruta, Adolfo León. Les recetes, previstes pa ser servíes na comida o na cena, entemecen les fabes con estremaes carnes y pescaos y cambien cada día. El miércoles ye la xornada de les fabes con pitu golfu, mientres que’l fin de selmana, l’hotel madrilanu sirve nes sos meses fabes con xabalín y potarros del Cantábricu. Los recursos de los responsables de les xornaes prevén tamién l’amiestu de fabes y pexe espada, llangosta y rau de güe, nuna iniciativa gastronómica inédita nel Hotel Ritz, inspiráu por Alfonso XIII, inauguráu en 1910 nel céntricu paséu’l Prado y frecuentáu pola realeza europea. El preciu d’una habitación nel luxosu Ritz, homónimu d’otros dos hoteles en Londres y París, va de los 480 euros diarios d’una de les habitaciones más cencielles a los 4.500 euros que cuesta pasar una nueche na suite real. 13 d'abril, 2004 0 FacebookTwitterPinterestEmail