2004

Más de 15.000 visitantes pasaron ya nuna semana pola Catedral d’Avila, onde se pue ver la continuación de la esposición “Las Edades del Hombre” que se montare primero en Segovia y que va recorriendo les Catedrales de Castiella y Lleón.

La esposición, allugada na Catedral abulense y que tien por nome “Testigos”, arrecueye delles obres asturianes como’l sarcófagu d’Itacio, un trabayu anónimu del sieglu quintu, fechu en mármol y que s’alcontraba nel Panteón de los reyes d’Asturies de la Capiella de Santa María de la Catedral d’Uviéu.

Amás d’esti importante sarcófagu tamién hai abondes imáxenes que tienen de ver con Asturies o cola so iconografía, como ye’l casu d’un pie d’altar visigóticu del sieglu VII, fechu de marmol blanco y recoyíu del Muséu de Burgos, nel que se ve una cruz visigótica asemeyada al símbolu d’Asturies. La esposición tamién sirve pa revisar les munches obres d’arte de la Catedral d’Avila como’l Retablu de los Reis de Juan Rodríguez y Lucas Giraldo, que s’alluga nel trescoru de la Catedral y que ye’l primer retablu nel que Baltasar apaez como un rei de collor prietu.

“Testigos” ye la continuación de la esposición fecha en Segovia col nome de “El Árbol de la Vida” y encadármase en dellos capítulos. El primeru lleva por nome “El fuego del Espíritu” y fai la conesión cola esposición de Segovia, ufiertando abondos vestixos de la evanxelización en Castilla y Lleón.

El segundu capítulu de la esposición entitúlase “La intrepidez de la Palabra” y xuntu a los dos que vienen darréu desendolca la reflesión que la esposición fai sobre la Ilesia. El tercer capítulu, entituláu “El gozo de la celebración”, y el cuartu, “La osadía del amor”, son los más llamativos y arrecueyen una bona amuesa d’obres importantes de los meyores pintores y escultores del barrocu español, con cuadros como “Virgen con el niño y Santa Ana” de Bartolomé Esteban Murillo o “Virgen Dolorosa”, atribuida a Alonso Cano. Nel tercer capítulu puen vese retablos y cruces procesionales del XVI, amás de xoyes como’l cáliz del varón apostólicu San Segundo, de un artesanu plateru de Siena, Andrea Petrucci. Tamién poemos atopar nestos capítulos, l’aportar de la imprenta de Guttemberg, cola biblia sacra polyglotta, qu’asoleyare en Londres nel 1657, l’editor Brian Walton, col trabyu impresor de Thomas Roycroft.

El sestu capítulu llámase “El contrapunto de la acción: Solo Dios basta” y los protagonistes del mesmu son Santa Teresa de Ávila, Juan de la Cruz y Pedro de Alcántara, amuesándose la so iconografía, los sos recuerdos y los sos escritos.

El capítulu final de la esposición de la Catedral d’Avila ye “Y siempre Jesucristo” nel que s’amuesa la iconografía propia del fíu de Dios.

Páxina web de “Las Edades del Hombre”

Hasta 17 asociaciones y organizaciones favoratibles a la recuperación de la memoria hestórica d’España, ente les que s’alcuentra l’Asociación pala creación del Archivu de la Guerra Civil y les Brigaes Internacionales, tan acabantes de firmar un documentu pa reivindicar al Gobiernu la fonda necesidá de recordar y asoleyar “la represión franquista y los hechos en los que se materializó la misma, principalmente las represalias y el exterminio contra la población civil”.

Pa ser a llograr esto, tienen ellaboráu un plan d’acción con 18 propuestes, ente les que destaquen: l’afitamientu de la “Convención sobre la imprescriptibilidad de los crímenes de guerra y de los crímenes de lesa humanidad”; declarar por llei el desaniciu de toles aiciones llegales del réximen franquista; ellaborar una llei d’exhumaciones ya identificación de víctimes; ellaboración d’un manual d’Antropoloxía forense adaptáu a les normes internacionales de drechos humanos; normalización llexislativa de los bancos de datos d’ADN pala identificación de víctimes; una llei de reconocimientu de los campos de concentración y de los trabayos forzosos y reconstrucción de les llistes de les víctimes españoles en terceros países como consecuencia del réximen franquista, incluyendo a los nomaos como “neños de la guerra”.