Sociedá Cultura ultima una rede de normalización llingüística a partir de los servicios llocales by asturnet 20 de mayu, 2004 Axuntar fuercies qu’agora tán espardíes. La Oficina de Política Llingüística del Principáu, dependiente de la Conseyería de Cultura, Comunicación Social y Turismu, ultima con esi envís los pasos pa crear una rede de normalización sociollingüística d’ámbitu autonómicu a partir de los distintos servicios de promoción llocal del asturianu que yá funcionen en conceyos como Xixón, L.lena, Llangréu o la Mancomunidá de la Sidra. Representantes d’eses cuatro entidaes acudieron esti mediudía a una reunión convocada na sé de la Conseyería de Cultura, allugada na plaza’l Sol d’Uviéu, convocaos pol director de la Oficina de Política Llingüística, Ramón d’Andrés, col propósitu central d’afitar criterios comunes d’actuación. La titular de Cultura, Ana Rosa Migoya, yá anunció nel so discursu d’apertura de la XXV Selmana de les Lletres la próxima constitución de la denominada Rede de Normalización Sociollingüística nos Conceyos, que’l Principáu concibe como un puntu d’alcuentru de los estremaos servicios y oficines municipales de promoción de la llingua asturiana. L’ámbitu llocal ta revelándose como una estaya especialmente propicia pa la puesta en marcha de midíes de normalización del asturianu, darréu algamaron el plenu funcionamientu muérganos municipales encargaos d’afitar l’usu de la llingua nel entornu más próximu al ciudadanu. Foi nesti ámbitu llocal onde per primer vegada se declaró la coficialidá del asturianu, con Bimenes como conceyu pioneru. El Tribunal Superior de Xusticia d’Asturies primero y el Tribunal Supremu más tarde, declararon nula la oficialidá en Casu, Morcín, Llaviana, Bimenes, Llangréu y Castrillón. 20 de mayu, 2004 0 FacebookTwitterPinterestEmail
Patrimoniu El Gobiernu protexe Castropol cola declaración de Bien d’Interés Cultural by asturnet 20 de mayu, 2004 El cascu hestóricu de la villa de Castropol gocia dende güei d’un especial nivel de protección oficial frente a posibles intervenciones arquitectóniques, depués de que’l Conseyu de Gobiernu’l Principáu declarara’l conxuntu como Bien d’Interés Cultural (BIC), la máxima categoría de protección que prevé la Llei de Patrimoniu Cultural. Na única resolución que cinca a la Conseyería de Cultura, Comunicación Social y Turismu na xuntanza ordinaria que’l Conseyu de Gobiernu cellebró esti mediudía n’Uviéu, l’Executivu autonómicu alcordó da-y plena validez al decretu que protexe’l cascu vieyu de Castropol, dientro la calificación de Conxuntu Hestóricu. La villa del estremu occidental asturianu, allugada na oriella de la ría l’Eo, alberga destacaos exemplos de l’arquitectura asturiana nes sos distintes variantes dende’l sieglu XVI hasta anguaño, con edificaciones representatives del barrocu, el racionalismu y el denomináu rexonalismu montañés. Ente elles alcuéntrense los Palacios del Marqués de Santa Cruz de Marcenado, de Valledor y de les Cuatro Torres, amás de la ilesia de Santiago Apóstol, l’edificu ‘Villa Rosita’ o la mesma Casa Consistorial. 20 de mayu, 2004 0 FacebookTwitterPinterestEmail
Emigración Llanes tribúta-y l’adiós caberu a Manolo del Campo, referente de la emigración by asturnet 20 de mayu, 2004 Llanes despide a Manolo del Campo mediu sieglu depués de velu colar p’América Llatina. El presidente’l Principáu, Vicente Álvarez Areces, encabeza la llista d’autoridaes qu’esta tarde asisten al funeral en Pría pol etenru descansu del que fora referente de la defensa de la tradición asturiana nel esterior, fallecíu el vienres pasáu en Buenos Aires llueu d’una llarga enfermedá. L’actu relixosu de les 18 hores de güei sedrá l’epílogu d’un viaxe d’ida y vuelta que Del Campo entamó a finales de los años cuarenta y qu’ayer completóse cola llegada de los sos restos mortales al aeropuertu d’Asturies, onde foron recibíos por familiares y autoridaes ente les que se contaba el delegáu del Gobiernu y ex alcalde de Llanes, Antonio Trevín. Natural de Villanueva de Pría, Del Campo aportara a l’Arxentina en 1949. Nesi momentu entamó un llabor de más de mediu sieglu que, catalizáu pol Centru Asturianu de Buenos Aires, cristalizó na formación del Conxuntu de Dancies Pelayo, una institución de casi 70 persones que tien amás una escuela a la qu’asisten más de 30 rapaces y atesora un vestuariu con 800 traxes tradicionales. Somorguiada Arxentina nuna prollongada crisis económica con derivaciones sociales, Manolo del Campo mantuvo asinamesmo un papel activu na defensa de los intereses de los asturianos emigraos al país qu’anguaño gobierna Néstor Kirchner, hasta qu’una llarga enfermedá acabó cola so vida el vienres pasáu en Buenos Aires. El malográu defensor de la tradición asturiana nel esterior yera bien conocíu nel so conceyu natal y recibiere a lo llargo la so vida varios premios y distinciones, ente les que destaquen la concesión de la Medalla de Plata del Principáu y del títulu de Fíu Predilectu de Llanes. 20 de mayu, 2004 0 FacebookTwitterPinterestEmail
Comunicación El centru territorial de TVE tendrá un nuevu director favoratible al usu del asturianu by asturnet 19 de mayu, 2004 El cambiu de signu políticu del Gobiernu central cuaya nun relevu nel centru territorial de Televisión Española n’Asturies. L’hasta agora director de Radio Nacional d’España nel Principáu, el periodista llangreanu Pedro Alberto Marcos, sedrá’l nuevu director de TVE-Asturies, cargu del que quedará desaloxáu José Antonio Ovies, censuráu polos trabayadores del centru al acusalu de manipulación y falta de profesionalidá. A lo llargo de la so trayectoria llaboral, Marcos -cuyu nomamientu foi confirmáu esta mañana según fontes de la redacción de TVE n’Asturies- caracterizóse por postures favoratibles al usu de la llingua asturiana na comunicación periodística. Integrante de la Plataforma Periodistes pol Asturianu, el futurible director del centru territorial de Televisión Española n’Asturies, allugáu en San Esteban de les Cruces, desendolcó la so carrera profesional lligáu al mediu radiofónicu, primero en ‘Radio Juventud’ de Llangréu y más tarde en Radio Cadena na mesma llocalidá, hasta la integración d’esa entidá en Radio Nacional d’España. Yá na cadena pública, Pedro Alberto Marcos foi xefe d’informativos y algamó la dirección de RNE n’Asturies n’avientu de 2000, en sustitución de Sara Fernández-Nespral. Nel asientu qu’agora va ocupar el periodista llangreanu dexará de sentase el so actual inquilín, José Antonio Ovies, protagonista d’un reciente informe ellaboráu por gran parte de los trabayadores del centru territorial de TVE-Asturies nel que lu acusen de continues práctiques de manipulación en favor de los intereses polítiques del PP, de falta de procuru col productu informativu y d’una fonda desconocencia de la realidá asturiana. 19 de mayu, 2004 0 FacebookTwitterPinterestEmail
Música Xixón espera una venta masiva d’entraes a última hora pa evitar un fiascu nel conciertu de McCartney by asturnet 19 de mayu, 2004 Una venta masiva d’entraes qu’evite a última hora un indeseyáu fracasu económicu. Esa ye la esperanza cola que l’Ayuntamientu de Xixón y la productora Doctor Music van pasar el fin de selmana, con alpenes un cuartu del aforu vendíu a cinco díes del recital col que’l músicu británicu abrirá la so xira europea nel estadiu d’El Molinón. Con alredor de 10.000 entraes despachaes de les casi 40.000 que tán a la venta, los gastos de caché del ex Beatle, de loxística y de promoción del conciertu amenacien con dexar un balance negativu nes arques municipales que’l conceyal de Festexos, Iván Álvarez Raja, quier esconxurar con una fola de venta de llocalidaes ‘in extremis’. Unes 300 persones trabayen dende’l llunes pasáu nel montaxe de la estructura enriba de la qu’actuará McCartney en Xixón, nun espectáculu que s’apoyará en 75.000 vatios de potencia nel soníu y que tomará forma a partir de les pieces tresportaes en 28 camiones de gran tonelaxe. Un dj animará los momentos previos al recital d’El Molinón con remezcles, antes de que l’ex vocalista y baxista de Los Beatles xuba al escenariu pa protagonizar un conciertu de tres hores de duración nel que tien previsto interpretar unos venti temes de la so llarga y exitosa dómina na hestórica banda británica. 19 de mayu, 2004 0 FacebookTwitterPinterestEmail
Educación La falta d’interés na participación desdibuxa les elecciones al claustru by asturnet 19 de mayu, 2004 Dos mil d’ente 30.000. Los estudiantes de la Universidá d’Uviéu amosaron ayeri col so absentismu electoral una evidente falta d’interés pola elección del claustru, el másimu órganu de la institución académica asturiana, que depués de la entrada en vigor de la Llei Orgánica d’Universidaes vio amenorgaes les sos competencies al dexar de poder designar al rector. Sólo un 12,7 por cientu de los llamaos a votar participaron nos comicios. El refalfiu foi especialmente sensible nel collectivu de los alumnos, nel que namás acudieron a votar 2017 estudiantes de los 29.688 con drechu a sufraxu, lo que supón una participación del 6 por cientu nunes elecciones que, con calter xeneral, quedaron dafechu desdibuxaes poles cifres globales: Votaron 4.293 docentes, alumnos y trabayadores d’alministración y servicios, cuando taben convocaos a les urnes un total de 33.785 electores. En porcentaxes, los profesores doctores foron el collectivu con mayor índiz de participación (88 por cientu), siguíos del personal non docente (71 por cientu) y de los profesores funcionarios non doctores (55 por cientu). Los estudiantes de doctoráu foron los menos interesaos en participar nos comicios, con una tasa d’emisión del votu de namás el 2 por cientu. A les elecciones d’ayeri concurríen 520 candidatos. El claustru ye l’órganu cimeru de gobiernu de la Universidá asturiana. Presidíu pol rector, la mayoría de los sos 300 puestos tán reservaos a los profesores, que nos sos distintos graos ocupen 195 places. Xunta estos casi doscientos docentes, nel claustru que salga de les inminentes elecciones sentaránse amás 75 representantes de los alumnos y 30 miembros del personal d’alministración y servicios. Resultaos completos na web de la Universidá 19 de mayu, 2004 0 FacebookTwitterPinterestEmail
ConvocatoriesFiestes Segundu concursu de gaita de Xixón by asturnet 19 de mayu, 2004 19 de mayu, 2004 0 FacebookTwitterPinterestEmail
ConvocatoriesFiestes Troféu de gaita Memorial Remís Ovalle by asturnet 19 de mayu, 2004 19 de mayu, 2004 0 FacebookTwitterPinterestEmail
Lliteratura L’arxentín Guillermo Orsi gana’l premiu Umbriel de novela negra by asturnet 18 de mayu, 2004 L’arxentín Guillermo Orsi ye’l ganador del II Premiu Umbriel-Selmana Negra de novela policiaca, depués de que’l xuráu del certame reconociera el so “manexu maxistral del llinguaxe” pa edificar una visión despiadada de l’Arxentina d’anguaño na obra vencedora, ‘Sueños de perro’. L’autor sevillanu Juan Ramón Biedma resultó finalista cola novela ‘Luz poniente’ y quedó a les puertes del premiu, dotáu con 15.000 euros. Según l’acta redactada polos miembros del xuráu, Orsi algama construyir un manual de perdedores qu’habiten un país nel qu’en apariencia nun sufren grandes carencies pero que conduz a los sos ciudadanos a la frustración ensin remediu. El veredictu de la segunda edición del premiu Umbriel-Selmana Negra, que pretende da-y puxu a la lliteratura’l xéneru policiacu, foi asoleyáu pol director de la Selmana Negra, Paco Ignacio Taibo II, que na so comparecencia pública tuvo flanqueáu por varios integrantes del xuráu, ente ellos l’escritor cubanu José Latour y la reaponsable de la casa editora Umbriel, Aránzazu Sumalla. 18 de mayu, 2004 0 FacebookTwitterPinterestEmail
Música El festival de rock Crossroad pon a la venta les primeres entraes a preciu promocional by asturnet 18 de mayu, 2004 Un preciu global de 53 euros por ver en Xixón a Stray Cats, Buddy Guy, Nervous Eaters, Kings of Leon, Ray Gelato y siete bandes más. La organización del Crossroad Festival, que va cellebrase el 23 y el 24 de xunetu con un cartel punteru de grupos de rock and roll, pon güei a la venta abonos que podrán alquirise con esa tarifa hasta fin de mes. El públicu qu’espere hasta xunu habrá pagar 59 euros por cada abonu, preciu que xubirá a 65 euros en xunetu, mes de cellebración del festival. Les entraes sueltes pa cada una de les dos xornaes de conciertos qu’acoyerá la plaza de toros d’El Bibio, en Xixón, tendrán en cambiu un preciu fixu: 40 euros pa la sesión nocherniega del vienres y 45 pa la del sábadu nueche, que rematarán Stray Cats. N’Asturies, la compra de llocalidaes podrá facese na taquilla’l teatru Xovellanos, en Xixón; nel Louie Louie Café, la Llibrería Paradiso y el Savoy Club, nesa mesma ciudá; na tienda Turly Discos d’Uviéu y n’El Dorado, de Pravia. Tamién podrán mercase entraes pal festival xixonés nes tiendes Tipo y al traviés de les páxines web ticktackticket y crossroadfestival.com. La segunda edición del Crossroad Festival desendolcaráse en dos conciertos conxuntos: ún inaugural, el vienres 23 de xunetu, nel qu’actuarán The Meows, Hi-Risers, Hayseed Dixie, Ray Gelato, Kings of Leon y Buddy Guy; y un segundu recital al día siguiente, sábadu, del que tomarán parte Trash Tornados, The Come Ons, Laika and the cosmonauts, The Dempseys, Nervous Eaters y los veteranos Stray Cats. Web oficial del festival 18 de mayu, 2004 0 FacebookTwitterPinterestEmail