Música Dixebra entaína los trabayos de composición col envís de grabar el so prósimu discu antes de fin d’añu by asturnet 22 de xunetu, 2004 Dixebra da un nuevu pasu alantre p’hacia la so mayoría d’edá. La banda avilesina de rock, que l’añu prósimu cumple 18 años d’esistencia, entaína’l llabor de composición pa grabar nos estudios Tutu de Corvera el so discu númberu ocho. El grupu prevé asoleyar antes qu’acabe 2004 un cd integráu por al rodiu d’una quincena de nuevos temes con incursiones nel ska, el reggae y el funky. Lloñe de concebir el veranu como época de descansu, los miembros de la veterana banda de rock n’asturianu plantéguense intensificar no que queda de xunetu y nel prósimu mes d’agostu el procesu d’esbilla de bases musicales, lletres ya igües de los temes que-y darán forma al so octavu discu. Nesti sen, el grupu cuenta yá con más de venti ‘debuxos’ de canciones de les qu’a partir d’agora habrá empezar a descartar dalgunes. Esi embrión del que va ser el nuevu trabayu d’estudiu de Dixebra, depués de la publicación de ‘Sube la marea’ na primavera de 2002 y del asoleyamientu del discu-llibru recopilatoriu ‘Cróniques d’un pueblu’ n’avientu pasáu, inclúi no musical una bayura de soníos xunificaos pola contundencia, con estructures y melodíes que van del puru rock and roll al ska, el reggae y el funky. Con eses blimes, el grupu quier teyer un discu ‘cocináu’ con calma nel estudiu que rexenta’l so habitual técnicu de soníu, Sergio Rodríguez, y estudia dalgún tipu de collaboración del productor vascu Kaki Arkarazo -en cuyu estudiu guipuzcoanu grabó Dixebra ‘Sube la marea’- que podría cincar al procesu final de mezcles. 22 de xunetu, 2004 0 FacebookTwitterPinterestEmail
Sociedá La Fundación ‘Príncipe’ recibe 1,8 millones d’euros pa convertir Asturies en “capital cultural del mundu” by asturnet 22 de xunetu, 2004 Un total de 1,8 millones d’euros nos prósimos tres años pa facer d’Asturies la “capital cultural del mundu”. El presidente’l Principáu, Vicente Álvarez Areces, comprometió güei la entrega d’esa cantidá a la Fundación ‘Príncipe de Asturias’, que concede los premios homónimos y qu’a partir d’ochobre de 2005 cellebrará’l so 25 aniversariu aconceyando n’Asturies a docenes de galardonaos nel últimu cuartu de sieglu. Sedrán doce meses d’actos culturales espardíos pol Principáu qu’hasta la seronda de 2006 pretenden proyectar la imaxen d’Asturies nel mundu mediante un programa “difícil d’emular”, según Areces, articuláu en tres grandes estayes: Grandes conciertos, esposiciones pictóriques de sonadía y conferencies y alderiques, too avalao pola participación de galardonaos nes anteriores ediciones de los premios. Magar que los actos concretos entá nun tán definíos, yá que la comisión que los prepara sólo manexa un “esquema d’idees”, el presidente de la Fundación ‘Príncipe’, José Ramón Álvarez Rendueles, avanzó esti mediudía n’Uviéu, depués de firmar l’alcuerdu económicu col Gobiernu autonómicu, que “docenes” de premiaos yá sondeaos pola entidá confirmaron la so disposición de participar nes cellebraciones ensin problemes d’axenda, tomando en cuenta que los actos cellebraránse a lo llargo d’un añu enteru. No puramente abstracto, tanto Rendueles como Areces sorrayaron el papel de los premios ‘Príncipe’ pa difundir la imaxe d’Asturies nel mundu, premios que’l presidente autonómicu reivindicó -citando al escritor Octavio Paz, galardonáu en 1993- como un “mapa moral ya intelectual de la nuesa cultura”. Vicente Álvarez Areces y José Ramón Álvarez Rendueles rubricaron güei na Presidencia’l Gobiernu el conveniu pol que’l Principáu financia con 1,8 millones d’euros los actos conmemorativos del aniversariu de la Fundación ‘Príncipe’, que llevarán por lema xeneral “Asturies, capital cultural del mundu: 25 aniversariu de los Premios ‘Príncipe de Asturias’. Ochobre 2005-Ochobre 2006.” Al actu formal de la firma l’alcuerdu asistieron amás el director xeneral de Promoción Cultural, Carlos Madera, y el director de la Fundación ‘Príncipe’, Graciano García. 22 de xunetu, 2004 0 FacebookTwitterPinterestEmail
Patrimoniu El Palaciu de Campusagráu y la ilesia de Llimanes algamen el másimu nivel de protección monumental by asturnet 22 de xunetu, 2004 El Palaciu’l Marqués de Camposagráu, llevantáu en Mieres nel sieglu XVII y propiedá orixinal de la familia Bernaldo de Quirós; la ilesia de Santa María de Llimanes, en Siero; l’aldega d’Argul, en Pesoz; la torre medieval de Silviella, n’Onís; el Palaciu Valdés Bazán, asitiáu en Candamu dende’l sieglu XVII por iniciativa d’Antonio Valdés Bazán; y el cancel de la ilesia de Santiso de Candamo algamaron güei la declaración de Bien d’Interés Cultural, el másimu nivel de protección monumental previstu na Llei de Patrimoniu Cultural. El Conseyu de Gobiernu aprobó la medida na so xuntanza d’esta mañana, reunión na que tamién s’autorizó la firma d’un conveniu ente l’Alministración autonómica y los 34 conceyos pelos que discurren los dos principales itinerarios del Camín de Santiago n’Asturies. Con esi alcuerdu a dos bandes, meyoraránse los albergues de los tramos xacobeos, señalizaránse y sallaránse les siendes y daráse-y puxu, en xeneral, a los servicios empobinaos a los pelegrinos qu’opten pola variante asturiana nel so caleyar pa Compostela. Na última de les midíes adoptaes güei pol Conseyu de Gobiernu na estaya de Cultura, l’Executivu dio lluz verde a una partida económica de 168.000 euros que va dir a parar, en conceptu de subvención, al Ayuntamientu de Xixón pa la organización del Festival Internacional de Cine, a Ediciones Nobel pa la convocatoria y asoleyamientu del Premiu d’Ensayu ‘Xovellanos’, al Gremiu d’editores d’Asturies pa la potenciación de la lliteratura’l país y a la Fundación Sánchez Albornoz. 22 de xunetu, 2004 0 FacebookTwitterPinterestEmail
Lliteratura Cultura prepara un intercambiu d’escritores con Uruguay by asturnet 21 de xunetu, 2004 Asturies y Uruguay ultimen un intercambiu d’escritores de dambos países. Responsables de la Conseyería de Cultura, Comunicación Social y Turismu del Principáu cellebrarán nes prósimes hores un alcuentru cola directora xeneral del Ministeriu de Cultura uruguayu nel qu’esperen concretar los términos del alcuerdu, que-y dará continuidá al vínculu lliterariu entamáu cola reciente creación d’una sala dedicada a Asturies na Biblioteca Nacional d’Uruguay. Según precisó esta mañana n’Uviéu el director d’esa entidá, Raúl Vallarino, la sala cuenta yá con más de 500 títulos d’autores asturianos y les previsiones del Ministeriu de Cultura -organismu del que depende la biblioteca- pasen por ampliar esi númberu darréu con otros milenta exemplares. L’espaciu monográficu de la Biblioteca Nacional d’Uruguay, denomináu ‘Sala del Llibru Asturianu’, ta yá en funcionamientu a la espera d’una prósima inaguración oficial y empobínase a los asturianos emigraos nesi país, a cuya disposición pon amás terminales informátiques con conesión a internet pa caltener “el contactu directu con Asturies”. Abierta yá esa llinia de cooperación, el Principáu y el Gobiernu uruguayu busquen agora el mou más afayadizu de da-y puxu al Centru de Formación del Escritor del país sudamericanu, en plenu procesu de llanzamientu y concebíu, según Vallarino, pa incentivar la creación lliteraria de calidá. “N’Asturies sedría importante una iniciativa asina”, afirmó’l director de la Biblioteca Nacional uruguaya. Raúl Vallarino, que tien traducida al asturianu por Adolfo Camilo Díaz la so obra de narrativa ‘Los suaños del delanteru centru’, compareció esta mañana n’Uviéu xunta’l director xeneral de Promoción Cultural y Política Llingüística, Carlos Madera, que llamentó’l retrasu del vuelu nel que la so homóloga nel ministeriu uruguayu viaxa p’hacia Asturies. La so llegada ta prevista pa esta tarde. 21 de xunetu, 2004 0 FacebookTwitterPinterestEmail
Escéniques Els Joglars demuestren l’atemporalidá de Cervantes con una sátira de la sociedá d’anguaño by asturnet 21 de xunetu, 2004 Un Cervantes atemporal qu’amuesa cómo’l númberu de fatos va espoxigando y acaba por poblar les estayes más altes de la sociedá. La compañía catalana Els Joglars, que güei ufre en Xixón la segunda representación de ‘El retablo de las maravillas’, presentó nel teatru Xovellanos les sos credenciales como una de les principales factoríes de teatru d’anguaño. L’argumentu central de la cretinización al traviés de los medios de comunicación, sofitada nuna puesta n’escena mui dinámica con una gran pantalla de plasma incluyida, guió ayeri a los 900 espectadores qu’acudieron a la primera de les dos representaciones previstes por Els Joglars en Xixón, col resultáu final d’una interacción ente el sieglu XVI -cuando Miguel de Cervantes asoleyó l’entremés que-y da nome a la obra- y el XXI. Los roles cervantinos amiéstense con papeles y personaxes públicos d’anguaño y lleven al públicu de sorpresa en sorpresa a lo llargo de dos hores de montaxe, de la mano de 50 personaxes que son productu de la camaleónica capacidá dramática de namás ocho actores. L’humor satíricu con resonancies d’apellíos como Aznar, Arzak y Rouco Varela conduz una narración intensa na persona d’un pícaru xuglar que caltién la esencia cervantina del testu y que va esplorando con quirúxica ironía la relixón, l’arte contemporáneu, la gastronomía y la política. Toes eses estayes son exemplos, demuestren Els Joglars, de que “cada día qu’alborez, el númberu de fatos crez”. La compañía catalana representa a partir de les 20,30 de güei el so últimu pase en Xixón de ‘El retablo de las maravillas’, con precios que van de los 12 a los 18 euros. 21 de xunetu, 2004 0 FacebookTwitterPinterestEmail
Sociedá Visitantes al Fórum de Barcelona denuncien l’ausencia del asturianu en grandes eventos by asturnet 21 de xunetu, 2004 La llingua asturiana nun participa nel Fórum de les Cultures Barcelona 2004, o a lo menos permanez bien escondida. Visitantes al macroespaciu allugáu na Ciudá Condal denuncien l’ausencia del asturianu n’eventos significativos del Fórum, empezando pola esposición ‘Voces’, que reivindica la diversidá llingüística’l planeta al traviés d’un recorríu por dellos de los 5.000 idiomes que se falen nel mundu. De fechu, la llingua asturiana nun apaez nin nel catálogu de l’amuesa, nin nel so cd de presentación, qu’inclúi 62 ficheros d’audio d’otres tantos idiomes, ente ellos l’araucanu, l’armeniu, el cingalés, el guaraní, el malayu, el swahili, el vietnamí y les cuatro llingües oficiales del Estáu español (castellán, catalán, gallegu y euskera). Los organizadores del Fórum presentaron en febreru pasáu la esposición ‘Voces’ -abierta del 9 de mayu al 26 de setiembre nel recintu’l festival multicultural- como “una apuesta a favor de la conocencia llingüística del mundu” asitiada nun gran espaciu con capacidá p’acoyer a milenta persones al mesmu tiempu. La falta de presencia de la llingua asturiana nel macroeventu de Barcelona vien a confirmar el barruntu asoleyáu 24 hores antes de l’apertura del Fórum pol director de la Oficina de Política Llingüística del Principáu, Ramón D’Andrés, quien aseguró que, a lo menos dende’l Gobiernu autonómicu, nun se xestionara la presencia de la llingua asturiana nel eventu catalán por problemes de plazos y de planificación. Magar de too ello, el director xeneral de Turismu de Barcelona, Pere Durán, que visitó Uviéu na viéspora de l’apertura del Fórum al públicu, garantizó entós la inclusión del asturianu na bayura d’idiomes que l’eventu reivindica al entender cada perda d’una llingua como la desapaición dafechu d’una forma singular d’interpretar la vida y, poro, d’un ricu elementu de diversidá. Ficha de la esposición ‘Voces’ na web del Fórum 21 de xunetu, 2004 0 FacebookTwitterPinterestEmail
Hestoria Una esposición amuesa a pie de playa la cultura ibera p’atrayer a quien nun entra nos museos by asturnet 21 de xunetu, 2004 Averar la cultura al ciudadanu-tipo que nunca nun entraría nun muséu. Con esi envís declaráu quedó abierta esti mediudía en Xixón la esposición ‘Íberos: príncipes, guerreros y artesanos”, que permanecerá nuna carpa allugada n’El Náuticu hasta’l 3 de setiembre y qu’amuesa la despensa, la casa, el sistema económicu y el llabor d’una civilización que pervivió nel levante de la Península Ibérica dende’l sieglu VI antes de Cristu hasta la dominación romana. La Fundación La Caixa, qu’entama l’amuesa baxo’l comisariáu del arqueólogu Lluís Batista, tien el llistón altu respecto a años anteriores: Na que ye la so sétima visita veraniega a El Náuticu xixonés, la entidá plantégase superar la cifra de 125.000 persones que pasaron en 2003 pol mesmu llugar pa visitar l’anterior esposición entamada na ciudá pola fundación catalana, centrada entós na evolución biolóxica del monu a la persona humana. Nesta ocasión, según precisó’l secretariu xeneral de la Fundación La Caixa, Luis Reverter, quienes entren a la carpa onde se recrea la cultura ibera van atopase con una esposición eminentemente didáctica -hai cartafueyos específicos pal públicu más neñu- qu’evoca la vida d’un pueblu de príncipes guerreros -n’ocasiones mercenarios d’otros pueblos- que nunca nun se constituyó n’Estáu pero que demostró durante siete sieglos la so “cultura elevada”. Como pieces que la reconstrúin, l’amuesa incorpora reproducciones d’un domiciliu, una despensa y una tumba de la época, amás de maquetes de tres tipos de poblaos documentaos en Barcelona, Xaén y Huelva, y recreaciones de preseos agrícoles decisivos na península ibérica, como l’aráu con punta de fierro. Tanto Reverter como’l comisariu de la esposición, qu’esta mañana ficieron de guíes nuna visita pa los medios de comunicación previa a l’apertura de la carpa al públicu, llamentaron la imposibilidá d’atalantar l’idioma qu’emplegaben los iberos, del que se conoz el so alfabetu pero entá nun se descifró’l so significáu. La esposición ‘Íberos: príncipes, guerreros y artesanos’ permanecerá abierta de martes a vienres de 10 a 14 hores y de 17 a 21, mientres que los sábados, domingos y festivos l’horariu sedrá de 11 a 15 y de 17 a 21. 21 de xunetu, 2004 0 FacebookTwitterPinterestEmail
Escéniques Els Joglars lleven a Xixón una visión del “cretinismu” de los que nun quieren pasar por cretinos by asturnet 20 de xunetu, 2004 “Cada día qu’alborez, el númberu de fatos crez”. La compañía teatral catalana Els Joglars plantega a partir d’esi aforismu l’espectáculu ‘El retablo de las maravillas’, basáu nel entremés homónimu de Miguel de Cervantes y qu’a partir de güei ponse n’escena nel teatru Xovellanos de Xixón. Miembros del grupu defendieron ayeri’l montaxe como una sátira’l cretinismu de quienes nun quieren pasar por cretinos. Asina, los integrantes d’Els Joglars presentaron la obra que representarán esta nueche y mañana, xueves, en Xixón como una síntesis de la “paradoxa clásica de cómo los cretinos puen vendenos la nada a costa’l temor de los sos semeyantes a pasar por cretinos”, un argumentu que pue paecer llonxanu nel tiempu pero que resulta nun lo ser tanto. De la mano de personaxes d’anguaño como una top-model, una galerista d’arte, un guarda de seguridá, un repartidor de pizza y varios relixosos de les estremaes xerarquíes de la Ilesia católica, Els Joglars recuperen un clásicu con plena vixencia pa valtiar el sistema de valores de la sociedá de güei. Pa ello, la compañía catalana esparde enriba l’escenariu ocho actores que se ‘multipliquen’ a sigo mesmos hasta representar a casi mediu cientu de personaxes en cuatro estayes estremaes nel montaxe: política, relixón, gastronomía y arte contemporáneu. Les dos representaciones previstes nel teatru Xovellanos empezarán a les 20,30 hores. Les entraes tán a la venta a precios que van de los 12 euros pa les llocalidaes de xeneral a los 18 euros n’entresuelu y patiu de butaques. 20 de xunetu, 2004 0 FacebookTwitterPinterestEmail
Música L’Intercélticu d’Avilés afronta’l so últimu tramu con ésitu de públicu y un aumentu nel ritmu d’actividaes by asturnet 20 de xunetu, 2004 L’Intercélticu d’Avilés calca l’acelerador. La VIII edición del festival aporta güei al so ecuador y afronta’l so últimu tramu colos güeyos puestos nel gran desfile de delegaciones previstu pal vienres y les nueches céltiques que protagonizarán, tamién el fin de selmana, Llan de Cubel, N’Arba y Lúnasa. Nes sos primeres cinco xornaes, l’Intercélticu desendolcóse con notable ésitu de públicu. El programa’l festival pa güei, miércoles, debuxa un día que pesllará’l grupu Triba na plaza de Carlos Lobo, depués d’una amuesa de xuegos populares a les 17 hores y un taller de baille bretón a les 19,30. Pa mañana, xueves, fíxase una nueche de música de gaita de los estremaos países que participen nel certame, pero l’españíu final llegará a partir del vienres. A les 18,30 hores d’esa xornada -a lo llargo de la cual allugaráse un mercáu d’artesanía astur na plaza’l Parche- arrancará’l gran desfile de les delegaciones céltiques, con salida de la cai José Cueto y recorríu pola plaza La Mercé, cai Pedro Menéndez, plaza Pedro Menéndez, cai La Muralla y cai La Cámara, hasta aportar a la plaza l’Ayuntamientu. Ellí, a partir de les 19,15, sonarán les gaites de los países participantes, amosaránse les dances de les estremaes naciones y entamará un conciertu del grupu pixuetu Llan de Cubel. El sábadu, l’actuación de Lúnasa y N’Arba pesllará les nueches celtes del VIII Festival Intercélticu, cuyu final pondrálu na tarde’l llunes l’espectáculu de baille ‘Spirit of the dance’. Web de l’Asociación d’Amigos del Intercélticu 20 de xunetu, 2004 0 FacebookTwitterPinterestEmail
Patrimoniu La ministra de Cultura visita por primer vez Asturies pa inagurar una esposición del Camín de Santiago by asturnet 20 de xunetu, 2004 La ministra de Cultura, Carmen Calvo, fixa la so primer visita a Asturies dende que tomó posesión del cargu, n’abril pasáu. El llunes 26 de xunetu, Calvo inagurará n’Uviéu una gran esposición sobro’l Camín de Santiago que permanecerá abierta hasta mediaos de setiembre. El Principáu presentó esta mañana un conveniu que meyora tramos, albergues y señalización del itinerariu a Compostela nos 34 conceyos asturianos qu’atraviesa. Cola so presencia na capital d’Asturies, que según fontes de la Conseyería de Cultura, Comunicación Social y Turismu, prollongaráse alpenes unes hores, la ministra quier avalar la importancia de la esposición ‘Luces de peregrinación’, considerada l’estandarte del Añu Santu Xacobéu depués de la so primer inaguración n’avientu pasáu nel Muséu Arqueolóxicu Nacional y la so amuesa posterior en Santiago de Compostela. A partir de más de setenta pieces asoleyaes na sala d’esposiciones del Bancu Herrero n’Uviéu, na cai Suárez de la Riva, los visitantes podrán evocar un itinerariu xacobéu que’l director xeneral de Promoción Cultural del Principáu, Carlos Madera, volvió reivindicar esta mañana como alternativa “seria y potente” al llamáu ‘Camín Francés’, que discurre por Castiella y Lleón. Los 34 municipios asturianos polos que pasen les siendes tradicionales a Compostela cuenten dende güei con un conveniu marcu col que’l Gobiernu autonómicu asume la meyora integral del Camín y que ye una prórroga ampliada del conveniu qu’hai seis años se firmara colos conceyos pa da-y puxu a les rutes xacobees n’Asturies. Nesta ocasión, l’alcuerdu estiéndese a los ayuntamientos d’El Franco, Tinéu, Valdés y Les Regueres. En términos xenerales, les actuaciones del Executivu autonómicu pa meyorar y promocionar los caminos asturianos a Santiago tienen tres d’elles una inversión global de casi 700.000 euros, escluyendo d’esa cifra los gastos d’organización y montaxe de la esposición que’l llunes inagurará n’Uviéu la ministra de Cultura. 20 de xunetu, 2004 0 FacebookTwitterPinterestEmail