Patrimoniu Cultura destina 24.000 euros p’asitiar el muséu etnográficu de Mieres na primer casona de Gallegos by asturnet 17 d'agostu, 2004 Mieres da un pasu decisivu nel caltenimientu’l so patrimoniu etnográficu. La Conseyería de Cultura, Comunicación Social y Turismu sufragará con 24.000 euros el remocicamientu integral de la casona llamada de Fernando y Jacoba, considerada la primer edificación de Gallegos, qu’albergará les instalaciones centrales del muséu etnográficu de la llocalidá y permitirá ampliar la colección del equipamientu. El preste de Cultura, que güei publica’l Boletín Oficial del Principáu d’Asturies (BOPA), inyectará dineru nel proyectu técnicu pa la recuperación de la casona, edificada nel sieglu XVII y anguaño enforma deteriorada, y condiciona l’ayuda a la ellaboración d’un proyectu museolóxicu y museográficu qu’habrá ser supervisáu pola Conseyería. La colección etnográfica de Gallegos abrióse al públicu en 1997 a partir de les pieces que l’asociación de vecinos de la llocalidá acumulara nes vieyes escueles, inmueble nel qu’hasta agora s’amosaba el patrimoniu’l muséu con importantes llimitaciones pa la organización y espoxigue de la colección del equipamientu. L’alcalde de Mieres, Luis María García, y la conceyala de Turismu, Isabel Sánchez, presentaron en marzu de 2003 los planes de meyora pal muséu etnográficu de Gallegos. L’ayuda del Principáu pa da-y puxu a esi equipamientu enmárcase na resolución de la convocatoria de subvenciones pa inversiones de los museos asturianos, que güei publica el BOPA y que beneficia amás a los equipamientos etnográficos de Grao, que recuperará un llagar; de Casu, que mercará una bandurria y meyorará la so fontanería y calefacción; de Quirós, qu’emplegará la subvención n’alquirir materiales; y del vinu, en Cangas de Narcea. En total, Cultura reparte 116.000 euros ente los museos y colecciones allugaos nel Principáu y sofita inversiones ente les que sobresalen la fechura d’un proyectu pa la pinacoteca de Llangréu (33.000 euros), la meyora de la Casa de l’Apicultura de Bual y la creación d’un circuitu peslláu de televisión na Casa Natal de Xovellanos, el Muséu Nicanor Piñole y el parque arqueolóxicu de la Campa Torres, en Xixón. Promulgación de la midida nel BOPA 17 d'agostu, 2004 0 FacebookTwitterPinterestEmail
Escéniques ‘Cultura pal Arango’ prepara una campaña de boicot a Corporación Dermoestética, interesada nel teatru by asturnet 16 d'agostu, 2004 Xiru nos métodos. La plataforma ciudadana ‘Cultura pal Arango’, que defende la recuperación d’esi teatru xixonés pa usos culturales, ultima una campaña de boicot a Corporación Dermoestética, firma que ta prósima a materializar un alcuerdu colos propietarios del Arango pa reconvertilu nuna clínica d’estética. Según afirmen los miembros del collectivu, “Corporación Dermoestética nun va necesitar campaña de propaganda n’Asturies, porque vamos face-yla gratis”. Asina lo asegura Boni Ortiz, voceru de la plataforma, qu’agora plantégase “forzar la máquina de les aliances” y buscar con urxencia un aval públicu del Ayuntamientu de Xixón que permita reabrir el teatru porque, considera Ortiz, “l’Arango yá ye un símbolu del deterioru absolutu d’esta ciudá y d’esta comunidá”. Pa Ortiz, “l’asuntu ta igual que taba hai tres meses”. Magar que la plataforma inda nun da por perdida la batalla y mantién la convocatoria d’asamblees abiertes pa los prósimos xueves énte la fachada principal del teatru, la reapertura del Arango como sala cultural paez alloñase de mou definitivu si se tomen en cuenta les declaraciones del presidente de Corporación Dermoestética que publica na so edición de güei el diariu ‘La Voz de Asturias’. Nelles, l’empresariu sostién que l’Ayuntamientu apoyó dende’l principiu la operación y prevé que les obres empezarán en dos meses. El tercer teniente d’alcalde de la Corporación xixonesa, Jesús Montes Estrada (IX-BA) mantuvo esta mañana un alcuentru con miembros de ‘Cultura pal Arango’ nel que-yos pidió un plazu de 48 hores pa buscar otra vuelta l’apoyu del so sociu nel Gobiernu municipal, el PSOE, qu’ostenta l’Alcaldía. 16 d'agostu, 2004 0 FacebookTwitterPinterestEmail
Música El Festival de pianu ‘New Millenium’ arranca con un conciertu del virtuosu rusu Boris Slutsky by asturnet 16 d'agostu, 2004 La música de pianu espárdese per Xixón. La quinta edición del Festival ‘New Millenium’, qu’aconceyará na ciudá a relevantes pianistes hasta’l 28 d’agostu, echa a andar güei con un recital del virtuosu rusu Boris Slutsky, formáu en Moscú y Nueva York y caderalgu nel Conservatoriu de Música Peabody. Los intérpretes Jenny Lin, Monica Yuki Ohuchi y Sarah Rhee participarán tamién nel festival. El conciertu col que Slutsky -solista d’éxitu en Noruega, Sudáfrica, Rusia, Colombia y Brasil, ente otros países- inagurará el ‘New Millenium’, concebíu pa pianu y orquesta, cellebraráse a partir de les 20,30 hores de güei nel Teatru Xovellanos, y sedrá’l primeru d’una llista d’ocho recitales públicos nel marcu’l festival. El vienres 20, los alumnos que participen nes clases maxistrales del certame ufrirán un conciertu nel Centru de Cultura Antiguu Institutu, mientres que’l sábadu 21 d’agostu sedrá la solista Jenny Lin quien actuará na Colexata San Xuan Bautista. El ‘New Millenium’ retomará l’actividá el martes 24 con un nuevu recital d’alumnos, y la recta final del certame tará encadarmada por sucesives actuaciones de Jenny Lin -esta vegada acompañada d’orquesta-, Monica Yuki Ohuchi, Sarah Rhee y el conxuntu Kaleidos, que pesllará’l festival con un conciertu’l sábadu 28 d’agostu nel Xardín Botánicu de Xixón. 16 d'agostu, 2004 0 FacebookTwitterPinterestEmail
Sociedá La Universidá programa por primer vegada dos cursos especializaos de llingua asturiana pa periodistes by asturnet 16 d'agostu, 2004 Capacitar a los profesionales de los medios de comunicación nel usu de la llingua asturiana. Con esi oxetivu convoca la Universidá d’Uviéu, dientro de la so ufierta d’Estensión Universitaria, dos cursos especializaos que se cellebrarán na seronda n’Uviéu y Xixón y que suponen la primer incursión de la institución académica na formación de periodistes n’asturianu. L’últimu monográficu con validez oficial de llingua asturiana pa trabayadores de los medios desendolcóse hai agora 17 años. N’aquella ocasión, la Oficina de Política Llingüística’l Principáu, L’Academia de la Llingua y les asociaciones profesionales de la prensa entamaron un cursu de llingua asturiana pa comunicadores centráu en conteníos sociollingüísticos, gramaticales, de torna de testos y de práctica periodística, con un preciu de matrícula de mil pesetes y una duración de 24 sesiones. Agora, la Universidá estrénase na convocatoria na formación de periodistes n’asturianu y plantega dos cursos estremaos. El primeru d’ellos cellebraráse del 1 d’ochobre al 13 de payares baxo la denominación ‘Cursu de llingua asturiana nel ámbitu de la información y comunicación’, con un preciu de matrícula de 81 euros -pero reducíu nun 40 por cientu acordies con una subvención de la Dirección Xeneral de Política Llingüística’l Principáu- y un plazu d’inscripción del 9 al 23 de setiembre. Dirixíu por los profesores universitarios Xulio Viejo y Ramón D’Andrés, el cursu empobínase preferentemente a periodistes titulaos o profesionales de los medios de comunicación con esperiencia, ya incorpora conteníos de gramática, rexistros comunicativos y asturianu faláu y escritu, con Pablo Texón, Xosé Nel Comba y Fernando Álvarez Balbuena como profesores. El segundu de los monográficos denomínase ‘Cursu especializáu de comunicación audiovisual nes situaciones de minorización llingüística’ ya impartiráse del del 26 de payares al 22 de xineru, con una matrícula de 81 euros que podrá formalizase del 29 d’ochobre al 11 de payares. Ente los docentes qu’exercerán de profesores nel cursu -que quier formar a periodistes nel usu d’asturianu en radio y televisión- figura Próspero Morán, director d’Asturnews, que participa nel monográficu en calidá de profesor de la Universidá Carlos III de Madrid. Les 30 hores llectives de caún de los cursos impartiránse na tarde de los vienres na Facultá de Filoloxía d’Uviéu y los sábados pola mañana nel Antiguu Institutu de Xixón. Pesie a que los dos cursos plantegaos n’Estensión Universitaria nun xenererarán créitos homologables de llibre configuración, los alumnos qu’acrediten una asistencia d’a lo menos el 80 por cientu de les sesiones programaes recibirán un certificáu oficial. Programa de los cursos na web de la Universidá d’Uviéu 16 d'agostu, 2004 0 FacebookTwitterPinterestEmail
Hestoria Xuan Bello amiesta lo llocal y lo universal na presentación en San Antolín del anuariu ‘Bedoniana’ by asturnet 15 d'agostu, 2004 ¿Ye posible quun pequeñu llugar llegue a simbolizar duna manera claral mundu? ¿Ye posible fixándose nun pequeñu granu darena ver la esencia de la playa? Con esa entruga retórica presentabal poeta asturianu Xuan Bellol sestu anuariu ‘Bedoniana’, quespubliza tolos años la comisión de fiestes del Bandu de San Antolín de Naves de Llanes y que se presentaba esta fin de selmana nel Monasteriu San Antolín. El sestu anuariu del Bandu de San Antolín de Naves presentóse na nueche desti domingu 15 dagostu col meyor allugamientu posible, la praera del Monasteriu de San Antolín de Beón, y con un ésitu de participación y públicu que siguió con procuru les pallabres del editor Juan Carlos Villaverde Amieva y del poeta Xuan Bello, encargáu de la presentación del actu. Juan Carlos Villaverde dio llectura a la presentación del volume faciendo alcordanza del volume primerizu y dexando nidio questi sestu númberu de Bedoniana apaez con la mesma frescura y novedad de aquel primer volumen de 1997. Naves, sus tierras y sus gentes, la fiesta patronal de San Antolín, con sus ritos, mitos y símbolos, y Bedón con su historia, su paisaje y su leyenda, constituyen una tríada privilegiada para el estudio sosegado, la investigación pormenorizada, la evocación literaria y la inspiración artística que la presenta entrega reúne de y difunde de manera exuberante. Darréu, y tamién en castellán, Villaverde fizo un recordatoriu de los contenidos desti caberu anuariu dexando afitao que salgamare reunir un repertorio de imágenes que constituyen el testimonio fechaciente que nos permite seguir los modos y las modas matrimoniales a lo largo del pasado siglo XX nuna nidia referencia a una les estayes más destacaes del anuariu, la entitulada Un siglo de bodas navizas (1901-2000) quamuesa munches fotos de boda de les families que viven o vivieren en Naves. Depués de les pallabres de Juan Carlos Villaverde intervino Xuan Bello quentamó diciendo-y al numberosu público que saxuntara nel prau del Monasteriu quentendía que Nueva York, París o Madrid seyan motores de la gran cultura universal al mesmu tiempu que xuraba nun tar faciendo alabanza denguna del localismu, tolo contrario: solo toi afirmando lo que los matemáticos persaben dende Pitágoras, quentel cero y lún ta linfinitu. Y darréu desta alcordanza entamó a entrugase retóricamente si ¿Ye posible quun pequeñu llugar llegue a simbolizar duna manera claral mundu? ¿Ye posible fixándose nun pequeñu granu darena ver la esencia de la playa? Un pequeñu versu dEnderson y una referencia a Fernando Pessoa que descubriera quel mundu yera más profundu quextenso foron la base dende la que Bello encadarmó un discursu que lu llevó a afirmar questi anuariu cultu vien a aportar una visión universalista de lo local. Amás de la mentada collecha de fotos de boda de les families navices a lo llargo del sieglu XX tamién salcuentren nesti anuariu trabayos de Carmen Meneses sobre Una maqueta de San Antolín de Bedón (h.1866), de Ramón Alvargonzález sobre San Antolín y las costas de Llanes en el siglo XVII, Luis Carrera Buergo acerca de Orquídeas silvestres de la cuenca y costa bedonianas, Francisco Cabriffose Cuesrta sobrel fotógrafu Cándido García, Michael Wilkinson quufierta la Perspectiva romántica del viajero inglés Edgar Wigram, Luis Pérez Ortin, Bernardo García, Pablo Ardisana, Carmen Acebo, Federico Sopeña, María Concepción Vega Obeso, Antonio Cantero y Yolanda Cerra Bada. Lanuariu, como tradicional portfoliu de fiestes que perye, ufierta una bona riestra danunciantes que sufragen la edición como asocede tradicionalmente con esti tipu de trabayos festivos. 15 d'agostu, 2004 0 FacebookTwitterPinterestEmail
Fiestes La Feria del Campu de Posada cumple con nota la so tercer convocatoria nun domingu soleyeru by asturnet 15 d'agostu, 2004 Lexitu de públicu y de participantes nos concursos agrícolas que se inxerten na Feria del Campu de Posada algamaron esti domingu de metanes dagostu les cifres del añu pasáu y axuntaron na localidá llanisca a munchos veraneantes que pudieron disfrutar dexposiciones de qusos artesanos, productos agrícolas, animales de granxa y otros munchos alicientes festivos. La tercera edición de la Feria del Campu de Posada algamó un éxitu tanto de participación como de públicu enllenando la plaza de Parres Sobrino y dando-y un aire de cellebración a una xornada que competía cola programación de Sa Roque na Villa de Llanes. Y too ello por mor de les exposiciones y concursos de productos del campu asturianu que podíen contemplase y que diben dende calabaces xigantes que facíen sospirar a los más guah.es, pasando por pareyes de kikos, gochos vietnamites, faisanes, pites, cisnes y un garapiellu de palombes de tolos tipos y clases que prestaben enforma a los neños y a los veraneantes. La Feria del Campu de Posada entamó hai dos años como continuación duna xornada tradicional de mercáu na zona nestos domingos dagostu y ta siendo enforma granible tanto dende un puntu de vista turísticu como dendel puntu de vista cultural. 15 d'agostu, 2004 0 FacebookTwitterPinterestEmail
Fiestes Más d’una tonelada de pólvora pon-y lluz y soníu al fin de selmana grande de les fiestes de Xixón by asturnet 13 d'agostu, 2004 Casi 1.300 quilogramos de pólvora pa enllenar el cielu de Xixón de lluz y soníu. La ciudá más populosa d’Asturies prepárase pa vivir el fin de selmana grande de les sos fiestes patronales, que tendrá’l so episodiu central na quema de fueos artificiales, na madrugada’l domingu, y que güei abre na playa de Poniente el guitarrista Raimundo Amador. El veteranu músicu andaluz sedrá’l segundu focu d’atención de la nueche, depués que la Banda de Gaites Noega ponga n’escena a partir de les 21 hores na Plaza Mayor l’espectáculu ‘Camín a Xixón’, un repasu al repertoriu musical tradicional d’una xornada de fiesta cola gaita como protagonista. El puntu culminante de la folixa aportará na medianueche del sábadu al domingu, momentu nel que la empresa catalana Pirotecnia Igual activará una secuencia de fueos d’artificiu que va prollongase media hora y que tendrá dos puntos de llanzamientu, ún nel cerru de Santa Catalina y otru nel Camín de La Fontica. Magar que les previsiones meteorolóxiques falen de nubes altes ensin lluvia pa la nueche’l sábadu, los responsables de la empresa pirotécnica ultimen el montaxe del espectáculu col envís cimeru de contrarrestar posibles corrientes d’aire como les que n’años anteriores cubrieron la playa de San Llorienzu col fumu de los primeros disparos ya impidieron acusbiar la mayoría de los fueos dende’l sable. La Orquesta de la Televisión Autonómica Gallega amenizará la xornada grande de les fiestes, que si se cumplen los badagüeyos aconceyarán en Xixón a unes 300.000 persones. Pa facilitar la movilidá de toes elles, l’Ayuntamientu fai un llamáu a evitar los desplazamientos en coche, y Renfe habilitará 17 trenes especiales pa los asturianos que s’empobinen a Xixón dende Uviéu y Mieres. L’intérprete David Civera sedrá l’encargáu de pesllar les cellebraciones, con un recital a partir de les 23 hores del domingu na playa de Poniente. Antes, a les 14 hores, la playa de San Llorienzu acoyerá’l baille de la dancia prima y el restallón que pon fin a les fiestes. 13 d'agostu, 2004 0 FacebookTwitterPinterestEmail
Cine L’asturianu permanez ausente de les películes de gran difusión, tres años depués de ‘Carne de gallina’ by asturnet 12 d'agostu, 2004 L’asturianu nun vende nel cine. Tres años depués del estrenu de ‘Carne de gallina’, llargumetraxe dirixíu por Javier Maqua con notable presencia de la llingua asturiana nos diálogos, la industria audiovisual nun xeneró nenguna otra obra cinematográfica de gran difusión asemeyada a la realizada por Maqua, que foi siguida nes sales por más de 67.000 espectadores. Asina lo asoleyen les estadístiques del Ministeriu de Cultura, que cifren en 67.235 el númberu total de persones que fueron al cine a ver ‘Carne de gallina’ nel añu 2002, mientres el llargumetraxe permaneció en cartelera. Esi datu, que se traduxo nuna recaudación en taquilla de casi 300.000 euros, allugó la película rodada na cuenca’l Caudal na mitá de la llista de los llargumetraxes españoles más ‘taquilleros’ nel exerciciu d’hai dos años, per delantre de ‘Lucía y el sexo’, de Julio Medem, y xusto perbaxo de ‘En Construcción’, obra de José Luis Guerín. Estrenada na clausura oficial del Festival Internacional de Cine de Xixón, en payares de 2001, ‘Carne de Gallina’ tuvo como protagonistes a los actores Karra Elejalde, Anabel Alonso, Nathalie Seseña y Maxi Rodríguez, sobro un guión d’esti dramaturgu asturianu. Productores, actores y otros profesionales vinculaos a la industria audiovisual enfótense na puesta en marcha de la futura radiotelevisión autonómica asturiana, cuyes primeres emisiones regulares tán previstes pa mediaos de 2005, como motor de dinamización del sector. 12 d'agostu, 2004 0 FacebookTwitterPinterestEmail
Sociedá Los cursos de veranu de L’Academia piesllen con un interés creciente d’universitarios ayenos a la filoloxía by asturnet 12 d'agostu, 2004 “Nun tenemos más alumnos porque nun los podemos atender”. La presidenta de L’Academia de la Llingua, Ana Cano, resumió nestos términos l’ésitu de participación de los cursos de veranu de la institución académica, que güei se piesllen en Santantolín d’Ibias y que tuvieron marcaos nesta edición pol altu númberu d’alumnos procedentes de carreres técniques ayenes al ámbitu de la filoloxía. Cano ve nello un síntoma del “interés de la mocedá” pola llingua y la cultura asturianes y sorraya l’alta participación nos cursos de veranu que güei rematen d’estudiantes universitarios de Telecomunicaciones, Química o Forestales, frutu de la collaboración que L’Academia mantién cola Universidá d’Uviéu na ufierta y execución de tres de los monográficos que s’impartieron dende’l pasáu 2 d’agostu n’Ibias. En total, más de 160 alumnos secundaron los cursos, una cifra que supuso cubrir toles places ufiertaes y que L’Academia nun se plantega aumentar n’años posteriores porque les instalaciones de la Escuela-Hogar de Santantolín, sé de la escuela veraniega de la institución académica, nun permiten acoyer a un númberu mayor d’estudiantes. Pesie a ello, aseguró Cano, L’Academia de la Llingua siguirá cellebrando n’Ibias los sos cursos de veranu, tanto polo afayadizo de les instalaciones de la escuela, como pola bona acoyida que los habitantes y l’ayuntamientu del conceyu’l suroccidente -yos dan a alumnos y profesores. Los cursos veraniegos de L’Academia, nos que participaron amás tres estudiantes catalanes, tendrán un actu formal de pieslle el prósimu 10 de setiembre nel Aula Magna de la Universidá d’Uviéu. Profesores y estudiantes participen güei nun actu informal de despidida en Santantolín d’Ibias. 12 d'agostu, 2004 0 FacebookTwitterPinterestEmail
Escéniques L’arquitectu Díaz-Negrete estudia la seguridá del Teatru Arango pa presupuestar la so reapertura by asturnet 11 d'agostu, 2004 Escaleres d’incendios, salides d’emerxencia. El veteranu arquitectu Miguel Díaz-Negrete, técnicu siguidor de la obra de construcción del Teatru Arango na década de los cincuenta, estudia cola llei na mano la seguridá de la sala xixonesa énte la so posible reapertura, col envís d’ayudar a los miembros de la plataforma ‘Cultura pal Arango’ a concretar qué inversión sedría necesaria pa recuperar l’edificiu con fines culturales. De fechu, la intención de los integrantes del collectivu ye que’l propiu Díaz-Negrete figure nel grupu de persones qu’accedan al interior del inmueble pa comprobar l’estáu de les instalaciones y empobina-y depués un informe al Ayuntamientu con cifres clares sobro cuánto costaría reflotar el teatru. Si les previsiones de la plataforma se cumplen, la entrada a la sala sedrá posible a lo llargo de la selmana qu’entra, de sutaque los estremaos propietarios del inmueble alcuerden entrega-yos les llaves a los miembros del collectivu, que lleven recoyíes unes 4.000 firmes a favor de la reapertura’l teatru pa usos culturales. ‘Cultura pal Arango’ cellebró ayeri una nueva concentración énte’l teatru xixonés na qu’intervinieron La Bandina Tradicional Asturiana y los autores lliterarios José Luis Rendueles, David González y Vanessa Gutiérrez, que protagonizaron una llectura pública de testos. Web de la plataforma ‘Cultura pal Arango’ 11 d'agostu, 2004 0 FacebookTwitterPinterestEmail