Sociedá Les Xornaes Internacionales d’Estudiu de l’Academia de la Llingua ufren un completu programa de conferencies especializaes by asturnet 5 d'ochobre, 2004 David Heap, de la Universidá de de Western Ontario, nos Estaos Xuníos y Paquita Suárez Coalla, de la City University of New York, van ser como adelantara n’Agostu Asturnews los espertos cimeros de les XXIII Xornaes Internacionales d’Estudiu que va desendolcar nesti mes d’ochobre de 2004 l’Academia de la Llingua Asturiana. Les Xornaes d’estudiu van tener llugar n’Uviéu los díes 25, 26 y 27 d’ochobre y van cuntar cola participación de munchos otros espertos como Emilio Ridruejo, Carmen Muñiz, Roberto González-Quevedo y el direutor d’Asturnews, Próspero Morán, ente otros. El profesor de la Universidá de de Western Ontario David Heap va falar nes Xornaes sobro “Las encuestas del ALPI para Asturias” y Paquita Suárez Coalla de la City University of New York va disertar alrodiu de “La experiencia de la escritura dende dos llinguas marxinadas: l’asturianu y el castellanu”. Na programación de les xornaes, amás d’estes conferencies tan previstes otres del académicu de la llingua asturiana Roberto González-Quevedo sobre “Símbolos de Sangre”, otra de Carmen Muñiz Cachón, de la Universidá d’Uviéu, sobro “La entonación y el conxuntu de rasgos prosódicos na carauterización d’una llingua” y d’Emilio Ridruejo, de la Universidá de Valladolid, sobro “El aprovechamiento de los mecanismos analógicos en los procesos de estandarización de las lenguas. El ejemplo del asturiano”. Comunicaciones estremaes Amás de la participación del Profesor de Periodismu de la Universidá Carlos III de Madrid y académicu de la llingua asturiana, Próspero Morán, que falará sobro “El periodismu alternativu y les llingües minoritaries”, presentaránse nes Xornaes comunicaciones d’Ana Cano González (“L’álbum de Josefina Pérez d’Ayala”), Xosé Lluis Campal (“Sobre el bable (1902), una reflexón d’un interesante artículu periodísticu de fai más d’un sieglu apaecíu por entregues en El Carbayón”), Xosé Lluis García Arias (“Galicismos”), Miguel Ramos Corrada (“Dalgunos casos de yeísmu n’asturianu”) o Xulio Viejo Vázquez (“aloración, intercomunicación y dialectoloxía: la vivencia de la llingua nel Quirós tradicional). Xunta estos espertos presentarán comunicaciones otros como Liliana Díaz Gómez, María del Pilar Fernández González, Héctor García Gil, Esperanza Mariño Davila, María del Mar Martín Martín, Xuan Porta Allende, Rafael Rodríguez Valdés, Xuan Santori Vázaquez, Aníbal González Miyares, Hermenegildo Bardio Díaz y Javier Fernández Irigoyen. 5 d'ochobre, 2004 0 FacebookTwitterPinterestEmail
Patrimoniu Cangas va acoyer la celebración del congresu nacional d’Europarc España by asturnet 5 d'ochobre, 2004 El conceyu de Cangas, onde s’alluga la Reserva de la Biosfera de Muniellos, el principal espaciu protexíu d’Asturies, va acoyer en xuno del prósimu añu l’alcuentru nacional d’Europarc, la organización na que se xunten les instituciones implicaes na planificación y xestión de los espacios naturales protexíos del estáu español. La candidatura pa qu’Asturies fuera sé d’esti conceyu empobinárala la Conseyería asturiana de Mediu Ambiente y agora confírmase la so aceptación. Na organización Europarc España afáyense más de 500 espacios naturales protexíos con una superficie total que sobrepasa los 3,2 millones d’hectarees. Creóse en 1993 y ye miembru activu de la Federación de Parques Naturales y Nacionales d’Europa (EUROPARC), organización paneuropea que se creó en 1973 y axunta instituciones de 34 países dedicaes a la xestión d’arees protexíes y a la defensa de la naturaleza. Ente los oxetivos del congresu que va celebrase en Cangas tán los principales de la organización conservacionista: actuar como observatoriu de la evolución y l’estáu de los espacios protexíos, facilitar l’intercambiu y la difusión d’información ente los responsables de la xestión d’esos espacios y promover la profesionalización y cualificación del personal de los parques naturales. 5 d'ochobre, 2004 0 FacebookTwitterPinterestEmail
Hestoria L’aniversariu d’0chobre del 34 recupera la memoria hestórica de los represaliaos del franquismu by asturnet 5 d'ochobre, 2004 La Fundación Juan Muñiz Zapico de CCOO súmase a los actos en remembranza da la revolución d’Ochobre del 34 cola esposición ‘Sueño de libertad’, una amuesa que fai un percorríu hestóricu dende la guerra civil hasta la transición al través de la esperiencia vital de los presos y represaliaos pol réxime franquista. Con esta esposición tenta recuperase la memoria de les víctimes de la dictadura y difundila ente les xeneraciones nueves. L’amuesa entamada pola Asociación d’ex Presos y Represalios Políticos Antifranquistes traza una recordanza de la llucha pola llibertá de cientos d’homes y muyeres persiguíos polos vencedores de la guerra civil hasta’l fin mesmu del réxime de Franco. Los empiezos de la represión, la vida cotidiana nes cárceles, el trabayu clandestín de los represaliaos o los apoyos de solidaridá recibíos dende l’esterior son los exes pelos que s’encadarma la esposición El fin de l’amuesa, en palabres del director de la Fundación Juan Muñiz Zapico, Benjamín Gutiérrez “quier presentar per un llau la llucha y el sufrimientu d’aquellos homes y muyeres, al empar de recordar la solidaridá que foi quien a despertar en tol mundu”. Na opinión del coordinador de l’amuesa n’Asturies la recuperación de la memoria hestórica d’esi tiempu “sigue siendo insuficiente al pesar de tolo que se fizo hasta agora y va selo siempre porque’l drama d’esos lluchadores nunca va poder ser lo bastante pagu con nengún reconocimientu”. Inda asina Gutiérrez considera necesario contribuir con iniciatives como esta a devolve-yos la dignidá a les víctimes del franquismu y reconocer el so papel fundamental na llucha pol remanecer de les llibertaes. La esposición recueye fotografíes, documentos, prensa, poemes y cartes de los propios presos, asina como oxetos cotidianos de la vida carcelaria, un material qu’apurrieron los propios protagonistes de la represión al través de l’Asociación d’Ex Presos y Represaliaos Políticos Antifranquistes. Pal director de la Fundación Juan Muñiz Zapico los actos del aniversariu de la revolución son un marcu afayadizu pa presentar esta amuesa, dao que “munchos de los represaliaos tres la guerra civil participaron nel movimientu revolucionariu y n’entrambes ocasiones la so llucha foi pola llibertá y pola defensa de la clas trabayadora”. Los mesmos actos y la esposición xúnense, a xuiciu de Benjamín Gutiérrez, “pol filu común de que son entamos de rescatar la dignidá de tolos que llucharon poles llibertaes nesti país, munchos d’ellos tovía vivos pa recordanos a toos la delda que tenemos col so llabor”. ‘Sueño de libertad’ va poder visitase hasta’l 15 d’ochobre na Casa Cultura de Riañu, Llangréu y del 18 al 29 d’ochobre na Casa Duró de Mieres. 5 d'ochobre, 2004 0 FacebookTwitterPinterestEmail
Emigración Chile conviértese na puerta d’entrada a América pa los emprendedores del nuestru país by asturnet 5 d'ochobre, 2004 La delegación institucional del Gobiernu del Principáu, encabezada pol so presidente, llogró na so visita a Chile la firma d’un alcuerdu con empresarios d’orixe asturianu, como primer pasu pa la creación d’una rede d’asociaciones asemeyaes n’otros países que facilite’l camín a los mercaos de los emprendores vinculaos a la tierra de los sos antepasaos. Nel viaxe al país andín consiguióse despertar l’interés del ministeriu d’Economía chilenu pa empobinar un preacuerdu con empreses nacionales que puedan usar los puertos de Xixón y Avilés pa desmbarcar los sos productos n’Europa. La iniciativa de crear una rede internacional d’empresarios d’orixe asturianu ye considerada una manera eficaz de sondear nuevos mercaos tanto pol gobiernu autonómicu como polos representantes de la iniciativa privada na nuestra comunidá, agrupaos na FADE. El pasu siguiente va ser la constitución n’Uruguay d’un nuevu conceyu d’emprendedores enraigonaos con Asturies aprovechando la visita de la delegación del Principáu y l’enfotu ye que nos prósimos meses vayan iguándose otres asociaciones en diferentes países de Latinoamérica. La embaxada del gobiernu presidíu por Vicente Álvarez Areces aportó gúei a Arxentina, onde participó en diversos actos coles autoridaes del país y la colonia asturiana residente na ciudá de Rosario. Pela tarde tenía previsto treslladase n’avión hasta Montevideo pa siguir desenvolviendo los propósitos del viaxe, ente ellos la firma del mencionáu alcuerdu colos emprendedores d’orixe asturianu. 5 d'ochobre, 2004 0 FacebookTwitterPinterestEmail
Escéniques Esgótense les entraes pa la reapertura del teatru Vital Aza de La Pola L.lena by asturnet 4 d'ochobre, 2004 Les invitaciones de baldre repartíes pol Ayuntamientu de L.lena p’asistir a los dos primeros actos del anováu teatru Vital Aza de La Pola esgotáronse alpenes dos díes de ser puestes a circular. La espectación énte la reapertura de la hestórica sala ye grande en tol conceyu y espérase que contine nos prósimos actos programaos: una representación de la compañia asturiana Margen y un conciertu de jazz del Mapi Quintana Quintet. La inauguración del teatru coincide cola celebración de La Feria de la Miel de L.lena y va ser el pregón d’esta fiesta el primer actu nel escenariu rehabilitáu. La cita ye’l xueves 7 d’ochobre a les 19.30 hores y el pregon va tar a cargu d’Alberto Aza Arias, xefe de la Casa Real. Nel mesmu actu van entregase los premios del XI Concursu ‘Lena’ de dibuxu y pintura al aire llibre. Ente les actividaes programaes na reapertura del teatru el vestíbulu del ediciu acueye estos díes una esposición homenaxe al escritor l.leniegu José Manuel Castañón. 4 d'ochobre, 2004 0 FacebookTwitterPinterestEmail
Cine El Festival de Cine de Xixón afita la so sección ‘Enfants terribles’ como sitiu d’alcuentru col públicu más mozu by asturnet 4 d'ochobre, 2004 La organización del Festival de Xixón ta enfotada en consolidar la so sección ‘Enfants terribles’ como espaciu d’alcuentru col públicu más mozu y contribuir destamiente a que’l cine entame a ser teníu en cuenta como parte de la formación educativa de los rapaces. Por primer vez les proyecciones van tar complementaes con actividaes didáctiques y la edición d’una guía pedagóxica. Otra novedá na edición qu’empieza’l 26 de payares va ser la incorporación del asturianu nes publicaciones oficiales del festival y na so páxina web. La sección ‘Enfants terribles’, dirixada a escolinos y estudiantes d’ente los 7 a los 18 años, va proyectar diez películes de conteníos bien diversos, ente les que s’incluin dos filmes d’animación de creadores españoles:’Supertramps’de la factoría vasca Dibulitoon y la coproducción hispanu-británicu-xermana ‘Back to Gaya’.Na sección van poder vese tamién les producciones alemanes ‘Balls’, una comedia alrodiu de la homosexualidá nel mundu del fútbol y ‘Rythm is it!’, documental sobro un taller d’iniciación a la música del director d’orquesta Simon Rattle; ‘Quality of life’, producción norteamericana alrodiu de la cultura’l graffiti; la sueca ‘Hip-hop hurra-L’efectu ketchup’, una comedia realista d’adolescentes; ‘Moi, Cesar, 10 ans et démi, 1,39m’, producción francesa alrodiu de los conflictos del mundu infantil, la finlandesa ‘Pearls and pigs’, ‘The wooden camera’, película sudafricana y la británica ‘Tooth’, completen el ciclu. Pal director del certame xixonés José Luis Cienfuegos n’España “hai una cierta carencia nos programes educativos del cine como instrumentu didácticu y forma d’espresión cultural, a diferencia de lo qu’ocurre n’otros países como Francia, por exemplu”. La sección ‘Enfants terribles’ y les actividaes complementaries que se van entamar alrodiu d’él tenta, de dalgunamiente, solventar esa carencia allegando el cine a estudiantes de tolos ciclos educativos. Con esti fin el festival va editar una guía pedagóxica y detrás de cada proyección van entamase talleres didácticos coordinaos pola artista plástica Maite Centol. Na pasada edición del certame asistieron a les proyecciones del ciclu mozu alrodiu de 9.000 rapazos de toa Asturies y esti añu espera superase la cifra.José Luis Cienfuegos destaca como importante el fechu de que se trata d’un sección “programada colos mesmos criterios de selección que’l restu de les secciones p’adultos, a diferencia d’otros festivales onde se aveza destinar pal públicu infantil o xuvenil estrenos de Disney o producciones asemeyaes”. Como novedá la 42 edición del Festival de Cine de Xixón va incorporar la presencia de la llingua asturiana nes sos publicaciones oficiales, asina el catálogu va editase n’inglés, castellanu y asturianu; el periódicu del festival tamién va incluir parte de los sos conteníos n’asturianu y de la mesmamiente la páxina web del certame. Cienfuegos resalta la importancia de la edición trillingüe del catálogu “teniendo en cuenta que se reparte per tol mundu y va haber xente que por primera vez s’entere de la esistencia de la llingua asturiana”. Ente los enfotos de la organización del festival ta el dir incorporando a pasu la presencia del asturianu xunta a les hasta agora únicos idiomes oficiales, el castellanu y l’inglés. La incorporación del asturianu esti añu produzse depués del alcuentru calteníu ente José Luis Cienfuegos y el responsable de la Oficina de Política Llingüística Ramón d’Andrés. 4 d'ochobre, 2004 0 FacebookTwitterPinterestEmail
ConvocatoriesFiestes Tercer concursu de relatos n’asturianu ‘Ayuntamientu de Cangas del Narcea’ by asturnet 4 d'ochobre, 2004 La conceyalía de Cultura del Ayuntamientu de Cangas del Narcea convoca’l tercer concursu de relatos curtios en llingua asturiana. Al certame van poder presentase tolos mayores de 16 años con un trabayu namás por autor. La estensión de los relatos tien ser ente cinco y diez páxines y el tema ye llibre. El premiu ta dotáu de 600 euros pal ganador, 300 pal finalista y 200 pal tercer clasificáu, hai tamién una cantidá de 600 euros empobinada a al meyor trabayu en dialectu occidental que nun fuera premiáu nel certame xeneral. El plazu presentación d’orixinales acaba’l 28 d’ochobre y tienen d’empobinase a la Oficina d’Información Xuvenil de Cangas del Narcea. Los trabayos habrán presentase per triplicao y unviase por corréu certificáu nun sobre ensin remite nel que s’axunte otru sobre cerráu colos datos del autor. El xuráu va tar presidíu pola conceyala de Cultura y van formalu maestros y profesores d’asturianu, más un miembru de l’Academia la Llingua. 4 d'ochobre, 2004 0 FacebookTwitterPinterestEmail
Emigración El Gobiernu del Principáu reparte les ayudes concedíes a les comunidaes asturianes nel estranxeru by asturnet 4 d'ochobre, 2004 El Boletín Oficial del Principáu d’Asturies publica na so edición de güei les resoluciones poles que se conceden ayudes econóniques a les comunidaes asturianes nel estranxeru, destinaes a fomentar la cultura del país ente les colonies d’emigrantes y a financiar obres y equipamientos pa los centros sociales qu’abelluguen les actividaes d’estes agrupaciones. La cuantía más importante de les subvenciones ye la dedicada a la reforma del Centru Asturianu de Caracas, apocayá inauguráu pol conseyeru d’Esteriores, Francisco Javier García Valledor. En total repártense 200.000 euros nel programa de fomentu de la cultura asturiana y 153.890 euros más una partida estraordinaria de 60.000 euros destinada a la referida obra de reforma del centru asturianu de Caracas. Les ayudes tan concedíes a comunidaes d’emigrantes repartíes per tol mundu, sobremanera a les esistentes nel continente americanu qu’agospien el mayor númberu d’asturianos y fíos d’asturianos nel estranxeru. Coles ayudes a les comunidaes asturianes el gobiernu del Principáu, al través de la so conseyería de Xusticia y Esteriores, quier contribuir a afitar los llazos de xuntura ente los emigrantes y la so tierra d’orixe, col fin de que nun pierdan el so vínculu col país y la so identidá propia. 4 d'ochobre, 2004 0 FacebookTwitterPinterestEmail
Lliteratura Xosé María Rodríguez publica la primer novela n’asturianu occidental sobro la guerra civil by asturnet 3 d'ochobre, 2004 L’escritor cangués Xosé María Rodriguez ta acabante publicar la so novela ‘Tiempos de nublina’, una hestoria ambientada nel mundu rural del suroccidente asturianu que tenta recuperar la memoria escaecía de les xeneraciones que vivieron la guerra civil y la represión posterior de los vencedores. Ye la primer novela d’esti autor, conocíu hasta agora polos sos llibros de relatos, y la primera que s’escribe na variante occidental de la nuestra llingua alrodiu d’esi periodu de la hestoria d’Asturies. Remembrar “por xusticia y homenaxe a unos homes y muyeres que tuvieron vivir un momentu hestóricu mui difícil” ye la intención principal cola que l’escritor Xosé María Rodríguez (Bimeda,1956) encaró la so primer novela ‘Tiempos de nublina’ (Trabe, 2004). Escrita en clave realista, con retayos costumistes, el relatu de Rodríguez somórguiase nel tiempu de la guerra civil y la postguerra nun llugar aparentemente allonxáu de los frentes más activos de la confrontación armada n’Asturies, como son los montes del suroccidente. Según afirma’l propiu autor, la so novela “básase en fechos reales que me refierieron alcuando los sos propios protagonistes o testigos directos de lo asocedío, dellos tán ficcionalizaos, siempre respetando’l fondu de verdá y la memoria d’esos fechos”. Pal escritor cangués “hai una delda con esa xeneración que vivió la guerra y esi momentu hestóricu del que cada vez queden menos testigos vivos”. La novela empieza con un allegamientu a la vida cotidiana nos montes y vais d’ente Cangas y el puertu L.leitariegos, un marcu tranquilu y cuasi idílicu que de sópitu vese bastiáu pola llegada de les tropes de Franco y con elles la guerra, la violencia, el silenciu. Na edición fecha pola editorial Trabe incúise un Cd cola traducción de la novela al español. Entrugáu l’autor si el fin ye facilitar un posible interés d’editores enfotaos en publicala traducida, Rodríguez declara que la intención “ye bien diferente, si alcuando se publica en castellano va ser cola mesma editorial, vivo en Madrid de cuantayá y equí tengo munchos amigos a los que-yos prestaba lleer el llibru y quería poné-yoslo más fácil” Xosé María Rodríguez foi ún de los fundadores del Conceyu d’Asturies en Madrid y tien publicaos los llibros de relatos: ‘Nueite de filandón’ y ‘Xuan Canas’. 3 d'ochobre, 2004 0 FacebookTwitterPinterestEmail
Escéniques Xixón conviértese dende’l domingu na capital de la danza contemporánea by asturnet 3 d'ochobre, 2004 Xixón ye de dende’l domingu la capital asturiana de la danza contemporánea. L’estrenu nel teatru Xovellanosdel espectáculu ‘Orden de aparición’ pola compañía Dani Pannullo Dance Theatre, inauguró l’amuesa ‘Danza Gijón’04’,una ventana abierta a les últimes tendencies d’esti arte contemporáneu que va traer a lo llargo del mes d’ochobre alrodiu d’una docena de produciones d’otres tantes compañíes nacionales y internacionales. ‘Danza Gijón ’04’ va dedicar nesta edición un capítulu especial a les creaciones en videodanza con dos programas de proyecciones nel que se van amosar trabayos d’artistes de diverses nacionalidaes. Una serie de talleres empobinaos a escolinos de segundu y tercer ciclu d’Educación Primaria y otra de seminarios dirixíos a profesionaes, van completar el programa d’esti certame dedicáu a la danza contemporánea. Hasta’l prósimu 23 d’ochobre van poder vese nos escenarios xixoneses espectáculos como ‘Abierto 24 horas. I never close my eyes’ de la Compañía Fernando Hurtado, ‘Si yo fuera gato’ de la Compañía Mulambo, ‘El barón de Munchausen’ de la Compañía Cienfuegog UG-DT, o ‘El amor brujo. Nana y Lila’ del Ballet de Blanca Li. El certame pesllarás’l xueves 23 nel teatru Xovellanos cola producción ‘Homenaje a Alwin Nikolais’de la Nikolais Dance Theatre y la Ririe-Woodbury Dance Company. 3 d'ochobre, 2004 0 FacebookTwitterPinterestEmail