Cine

El ciclu de proyecciones del Teatru Filarmónica pal mes d’ochobre entama güei col pase de la película “Los Cuatro Cocos” (The Cocoanuts), dirixida en 1929por Joseph Stanley y Robert Florey y protagonixada por los Hermanos Marx. La proyección entama a les 20:30 hores y la entrada ye llibre hasta completar l’aforu.

“Los Cuatro Cocos” ye’l primer film nel que trabayaron los Hnos. Marx. Esta comedia narra les peripecies del director d’un hotel arruináu, interpretáu por Groucho Marx. El casu ye que l’hotel entra en quiebra y Groucho decide subastalu por parceles, y’entós cuando Chico y Harpo entren n’escena.

El Centru Municipal de La Arena agospia güei llunes a partir de les 19:30 y con entrada gratuita la proyección de la película “El Mago de Oz”. Del cineasta Victor Fleming, ta protagonizada por l’actriz Judy Garland y ye una de les obres clásiques del cine musical. Recibió dos Oscar de l’academia en 1939, un a la meyor música orixinal y otru a la meyor canción.

La película cunta’l viaxe d’una neña, Dorothy, al país d’Oz. Pel camín, faise amiga del espantapáxros, l’home de lata y del lleón medrosu. L’espantapáxaros quier un cerebro, l’hombre de lata nagua por alagamar un corazón y el lleón desea la valentía que-y falta.

‘El orfanato’, película dirixida por Juan Antonio Bayona y que cunta como guionista col asturianu Sergio G. Sánchez, va ser la representante española nos Oscar de Hollywood. L’Academia va ufrir el llistáu definitivu de candidatos el próximu 22 de xineru en Los Ángeles.

‘El orfanato’ ye una película recién estrenada, rodada en parte nel conceyu de Llanes, que cuntó cola aidanza económica del Gobiernu del Principáu.

La película de Bayona trata temes como la perda d’un ser queríu, la maternidá, la fe y la llocura, pero ye, enantes d’otra cosa, una cinta de terror. “El orfanato” nu ye namái que la ópera prima de Bayona, tamién ye’l primer llargu del guionista y direutor de cortometraxes asturianu Sergio G. Sánchez, del operador de cámara Óscar Faura y de la montadora Elena Ruiz.

Cola produción del direutor mexicanu Guillermo del Toro y el protagonismu de Belén Rueda y Geraldine Chaplin la la película narra una hestoria de terror y suspense ambientáda nun hospiciu asturianu.

Los organizadores del Festival Internacional de Cine de Xixón tán acabantes de facer públicos los premios pa la nueva edición del certame y quixeron destacar especialmente la medra na cuantía de los premios otorgaos. Amás, el Festival de Cine de Xixón va terminar esti añu en sábadu y va incluyir dos fines de selmana “n’atención a les peticiones de públicu y hosteleros”.

D’esta xuba de los premios va vese beneficiáu’l premiu a nuevos cineastes, que duplica la so cuantía hasta 40.000 euros, 26.000 euros pal primer premiu y 14.000 pal segundu. Esti premiu de ‘Nuevos realizadores del Principáu d’Asturies’ proyecta les obres ganadores nel propiu Festival y ta destináu n’esclusiva a realizadores asturianos anque la producción pue ser foriata, de menos de 35 años. La obra nun pudo recibir otros premios, ha durar hasta 25 minutos y pue presentase n’asturianu o en castellán.

N’otres ediciones ganaron realizadores como Sergio Gutiérrez Sánchez con ‘Temporada baja’ y Tomás Fernández con ‘El pozo’. La nueva edición del Festival va celebrase ente’l 22 de payares y l’1 d’avientu incluyendo otros premios como’l ‘Principáu d’Asturias al meyor llargometraxe’, dotáu con 20.000 euros o’l ‘Principáu d’Asturies al meyor curtiumetraxe’, con 6.000 euros, ‘Meyor director’; ‘Meyor actriz’; ‘Meyor actor’; ‘Meyor Guión’ y el ‘Premio Gil Parrondo a la meyor dirección artística’ ente otros.

Páxina web del Festival

Redacción.

El 2u Festival de Cine Gai y Lesbicu de Xixón, qu’entamó ayeri xueves a les cinco la tarde con una ‘Gala d’Apertura’, onde se presentaron les películes de Sección Oficial de nominaos al Premiu al Meyor Curtiumetraxe, va siguir a lo llargo de güei y de mañana sábadu, cuando va celebrase la ‘Gala de pieslle’ del Festival.

Güei vienres a partir de les cuatro la tarde van presentase les películues nominaes a ‘Meyor Película’: Electroxoc, Una palabra de cuatro lletres, Loggerheads – Necios y a les 21 hores la sección ‘en-pareyo’ va presentar ‘La nueva familia’.

Y yá’l sabadu, a les cinco y media la tarde, va celebrase una ‘Gala de Pieslle’ presentada pol showman Di Carlo, perconocíu na vida cultural xixonesa. Na Gala van entregase los ‘Floreros de Cristal Rotu’, Premios del Festival CinegailesAST 2007 y van emitise los trailers del Festival, amás de celebrase l’homenaxe al Premiu d’Honor del Festival cola proyección del curtiumetraxe y documental ganadores.

Redacción.

El director americanu ta estos díes grabando n’Asturies pa la so próxima película xunto a los actores Javier Bardem, Penelope Cruz, Scarlett Johansson y Rebecca Hall. Güei pela mañana l’actor volvió a rodar n’Uvieu y esta tarde va acercase hasta Aviles col equipu d’actores y tecnicos, onde rodará nueves tomes.

Woody Allen, de nome real Allan Stewart Konigsberg ñació en1935 en Nueva Yory y ye director, guionista, actor y músicu. Provien d’una familia acomodada xudía y de guah.e deprendió a tocar el vigulín, colo qu’entamó la so faceta musical, conocida pol so trabayu na banda sonora de les sos películes. Gran aficionáu al jazz, ye interprete de clarinete y fizo delles xires cola so banda The New Orleans Jazz Band. Ta galardonáu col premiu Principe d’Asturies de les Artes.

Redacción.

El Centru d’Interpretación del Cine d’Asturies, creáu al mesmu tiempu que’l Casinu de Xixón y asitiáu na planta cuarta del mesmu, tien abierta una esposición na que pue vese un percorríu pel cine melodramáticu a lo llargo de la hestoria. El comisariu de la esposición ye Juan Jose Plans y el títulu ‘Grandes Melodrames Cinematográficos’. La esposición va tar abierta hasta’l 14 de xunetu.

La esposición inclúi cartelos y otros elementos de les películes que s’enxerten dientro d’esti xeneru que ñació nel ámbitu operísticu pero pasó a tolos artes pa denomar a les obres nes que l’aspeutu que más destaca ye’l rellacionáu colos sentimientos y el calter de la xente.

Cartelos de películes tan conocíes como ‘Lo que’l vientu llevó’, ‘Rebeca’, ‘Al este del Eden’, ‘Les uves de la ira’, ‘Margarita Gautier’, ‘Que verde yera mio valle’ y ‘Cumes borrinoses’ pueden vese na esposición organizada pol Centru d’Interpretación del Cine d’Asturies nel so horariu d’apertura.

Redacción.

Güei a les 12 hores van presentase na sala de prensa del Teatru Xovellanos de Xixón los proyectos ganadores de la 4ª Edición del Concursu de Productores Cinematográfiques Moces ‘Nun mos cuentes películes, ¡failes!. Nesti cursu 90 xóvenes asturianos esperimentaron la sensación de crear una productora cinematográfica. De los proyectos presentaos, dos grupos van dar el saltu a la realización de la so primer película.

Les películes van estrenase na próxima edición del Festival Internacional de Cine de Xixón. Telecable patrocina’l proyectu, que ye una apuesta del Festival Internacional de Cine, el Conseyu de la Mocedá del Principáu d’Asturies y la Ciudá Tecnolóxica Valnalón. Na presentación de los proyectos ganadores van participar Roberto Paraja, presidente de Telecable, Paulino Feito, presidente del Conseyu, Jose Manuel Perez Díaz, xerente de Valnalón y Jose Luis Cienfuegos, director del Festival de Cine de Xixón.

El concursu quier afalar la capacidá d’iniciativa, la creatividá, el trabayu n’equipu y l’espíritu emprendedor ente la mocedá asturiana. Esti añu presentáronse quince proyectos y los temes trataos polos xovenes destacaron pola cercanía, no que pasa día a día alredor d’ellos: trabayu, motor, anorexa, racismu, consumu, sexualidá, arte y deporte. Los proyectos presentaos proceden de Xixón, Llangreu, Uvieu, Aviles, Llaviana, Mieres, Carreño y Llanera.

Redacción.

El segundu Festival Internacional de Cine Gai y Lesbicu d’Asturies CinegailesAST 2007 acaba facer públiques les sos nominaciones a los premios d’esti añu. El festival tendrá llugar en Xixón, ente los díes 9 y 11 d’agostu, nel auditoriu del Centru de Cultura Antigu Institutu Asturianu y va conceder los premios al travies de votación popular.

La película con más nominaciones ye ‘Loggerheads-Necios’ del director norteamericanu Tim Kirkman (Meyor Película, Actores y Actriz) siguida de cerca pola película tamien norteamericana ‘Una pallabra de cuatro’, ‘Lletres’ de Casper Andreas y pola producción española titulada ‘Electroxoc’, de Juan Carlos Claver. Siguen en nominaciones la película bosnia ‘Marcha pal oeste’, d’Ahmed Imamovic y l’arxentina ‘Puto-Maricu’, de Pablo Oliveiro.

Tamien destaquen en nominaciones los curtiumetraxes ‘Flores nel parque’ y ‘Náufragos’, xunto col restu de finalistes: ‘Ester’, ‘Amar’, ‘Pausa’, ‘El procesu d’aceptación’, ‘Rixu pol fútbol’ y ‘Enguedeyaos’. Na estaya de documentales opten al premiu los trabayos ‘Rosario Miranda’, ‘La puerta verde’, ‘El sexu los ánxeles’ y el documental peruano-canadiense tituláu ‘Maricones’. Los nominaos al Meyor Actor son Jesse Archer y Cory Grant por ‘Una pallabra de cuatro lletres’ y Tess Harper y Michael Kelly por ‘Loggerheads-Necios’. Les nominaes a Meyor Actriz son: Carmen Elías y
Julieta Serrano por ‘Electroxoc’, Miriyana Karanovic por ‘Marcha pal oeste’, María Garralón por ‘Náufragos’ y Bonnie Hunt por ‘Loggerheads-Necios’.

Los países participantes nesta edición del CinegailesAST, que nun cunta con producción asturiana, son L’Arxentina, Bosnia-Hercegóvina, Canadá, Estaos Xuníos, Francia, España Israel, Noruega, El Perú. El Premiu d’Honor del Festival va concedese-y al director ingles Stephen Frears (Leicester, 1941) por ser un pioneru del cine gai nos difíciles años 80 algamando gran esitu comercial a nivel mundial con títulos como ‘La mio guapa llavandería’ (1985), ‘Abre les oreyes’ (1987), y cola serie ‘Yo tengo mieu de Virginia Woolf’ (1978).

Redacción.

El Festivalcineastur convoca’l Segundu Festival Internacional de Cine Gai y Lesbicu d’Asturies, que va celebrase en Xixón del 9 al 11 d’agostu del 2007, nel Salón d’Actos del Centru de Cultura Antigu Institutu Xovellanos y que ta empobináu a promocionar n’Asturies el cine de temática homosexual, gai, lesbica o transexual de tol mundiu. Pa ello, el Festival CinegailesAST aceuta tou tipu de copies y trabayos cinematográficos con esta temática y ensin nengún tipu de condiciones previes.

El Festival va premiar trabayos en tres modalidaes: Meyor Llargu, Meyor Curtiu, Meyor Documental, asina como Meyor Actor, Meyor Actriz, escoyíos pol públicu asistente a les sesiones oficiales competitives, con una cuantía económica por modalidá. El palmares y los ganadores van recibir tamien homenaxes posteriores y tributos en sales cinematográfiques y promociones en prensa. El Festival va conceder tamien un Premiu d’Honor.

Van poder participar trabayos preseleicionaos pol Festival CinegailesAST en
cualesquier formatu, preferiblemente en DVD, y con cualesquier duración
o añu de realización, amestando una ficha d’inscripción con información
teunico-artística detallada de la obra. Les obres han mandase enantes del 28 de xunu. Pa más información festivalcineastur@wanadoo.es