Tecnoloxía

El Proyectu Gadea d’investigación n’accesibilidá Web de la Universidá d’Uviéu recibió el premiu correspondiente a esa categoría de los cuatro que concedió esti añu la Fundación CTIC pa les páxines que meyor cumplen los requisitos de valir al usuariu en cuantes facilidá de navegación y utilidá.

Los premios TAW (Test d’Accesibilidá Web) otórgalos el Centru Tecnolóxicu de la Información y la Comunicación (CTIC), un organismu semipriváu que promueven el gobiernu del Principáu y el ministeriu d’Industria, col oxetivu d’estimular a entidaes públiques y privaes p’afayase a les normes básiques d’accesibilidá Web requeríes pola Llei 34/2002, de Servicios de la Sociedá de la Información y de Comerciu Electrónicu (LSSICE), qu’establez el 31 d’avientu de 2005 como fecha llende pa les Adminstraciones públiques y pa que les entidaes privaes entaínen a cumplir esos oxetivos.

Xunto al proyectu Gadea de la Universidá d’Uviéu, la Fundación CTIC distinguió como Web pública más accesible a la de la Seguridá Social: (www.seg-social.es); como Web empresarial más accesible a la Web corporativa de CINTRA (www.cintra.es); y a la Web asociativa más accesible a Redinfancia: (www.redinfancia.org).

Proyectu Gadea

El portal institucional del gobiernu asturianu ye’l que meyor valoración recibe nuna encuesta fecha ente usuarios con discapacidaes pola Fundación ONCE sobre portales autonómicos. La web del Principáu tien el presto del 58 por cientu de los internautes encuestaos.

Los datos pertenecen al tercer informe del Observatoriu d’Infoaccesibilidá de Discapnet, de la Fundación ONCE, nel que se pregunta a los usuarios polos recursos mínimos d’accesibilidá pa discapacitaos. Asturies con un 58% d’aprobaos supera a les demás comunidaes, la más cercana la de Murcia con un 50% de sofitu y otres como Valencia y Cataluña, namás algamen el 26% y el 33,8 % respectivamente.

El parlamentu francés vien d’aprebar un proyectu de llei sobre intercambiu dixital d’información que regulariza la circulación per Internet de ficheros P2P (“peer to peer”). La midida lexislativa supón de fechu una llegalización del intercambiu d’estos ficheros y la nueva situación creada alerta a la industria del discu de Francia y a sinfinidá de profesionales de la música pa los que la midida significa poco menos que llegalizar una forma de “piratería”.

Una gran escandalera percuerre Francia dende l’aprebación esti xueves 22 del proyectu de llei col añadíu de les enmiendes que posibiliten l’intercambiu llegal d’archivos P2P, sobremanera pol fechu de que saliere alantre pol absentismu de bona parte de los representantes de la cámara de la República. Trenta votos contra ventiocho y tamién contra los deseos del propiu gobiernu francés ficieron posible que s’aprebare esta serie de midides lexislatives que sienten un precedente desconocíu hasta agora sobre la llibre circulación d’información pela rede.

El dominiu .cat funciona dende va unes hores na rede como dominiu propiu y esclusivu empobináu a sitios web de la comunidá llingüística y cultural catalana. La estensión reconocióla’l pasáu 16 de setiembre l’ICANN y nuna primer fase va tar reservada a web institucionales d’entidaes públiques dedicaes a la promoción de la llingua y la cultura n’idioma catalanes.

El procesu d’espardimientu del dominiu va durar unos tres meses dende agora pa evitar colapsos y saturación del ciberespaciu propiu. Después de la primer fase empobinada al rexistru d’instituciones, una segunda fase va permitir que s’inscriban na estensión .cat a entidaes de toa mena (empreses, asociaciones…) con presencia del idioma catalán na rede y la última fase va tar abierta al rexistru de les más de 68.000 persones y colectivos qu’amosaron el so deséu d’inscribise nel nuevu dominiu.

La iniciativa de llevar la solicitú d’un dominiu propiu pa la comunidá cultural y llingüística catalana partió de l’asociación Domini punt.cat, agora la primer titular d’una web cola estensión aceptada pol ICANN, organismu internacional encargáu de los rexistros de dominios n’internet.

domini.cat

La páxina web de Casonas Asturianas, el proyectu informáticu veterinariu Asa@Sivet, el portal educativu Educastur xunto cola web del Institutu d’Educación Secundaria (IES) Cangas del Narcea, y un trabayu d’investigación desarrolláu dende’l Departamentu d’Informática de la Universidá d’Uviéu (“Estensión del Estándar CSS3 pa l’adaptación multidispositivu de conteníos web”) son los ganadores de los primeros Premios Sociedá de la Información n’ Asturies, promovíos pol Gobiernu’l Principáu.

Un total de 117 candidatures de profesionales y entidades públiques y privaes d’Asturies o que operen na comunidá presentáronse al concursu na so primer edición, una iniciativa que s’enmarca nel Plan Estratéxicu pal Desarrollu de la Sociedad de la Información (SI) e-Asturias 2007.

Nes votaciones d’un xuráu formáu por espertos y aconceyáu en Xixón el pasáu 1 d’avientu impúnxose la web de los Hoteles Club de Calidá Casonas Asturianas como Meyor Web Empresarial. El segundo y tercer puestu nesa categoría fueron pa la páxina de l’Autoridá Portuaria de Xixón (www.puertogijon.es) y pa www.hcenergia.com, del grupu Hidrocantábrico, respectivamente.

Nel apartáu de Meyor Iniciativa en Formación y Educación en relación cola Sociedá de la Información, el xuráu decidió conceder un único premiu ex aequo al portal d’ Educación del Principado de Asturias, Educastur, y a la web del IES de Cangas del Nancea.

La Meyor Iniciativa Empresarial TIC 2005 fue pa la Sociedá Asturiana de Servicios Agropecuarios (ASA). La so plataforma Asa@Sivet, que permite la dispensación electrónica de recetes veterinaries, llevó’l primer premiu y en segundu puestu, asitióse la Iniciativa pa la Formación y l’Empléu nel Entornu Tecnolóxicu del Principáu d’Asturies, del cluster TIC Asturias, y en terceru, el Centru de Servicios Avanzaos de TIC de Computer Sciencies SA España n’Asturies.

Asturies supera la media estatal d’accesu a Internet, con un 34,1 d’usuarios nel primer trimestre d’esti añu. Ye un datu conteníu nel últimu informe de la SGAE nel capítulu dedicáu a nueves tecnoloxíes. La llista encabécenla la comunidá madrilana con un 44,4, País Vascu con un 39,9 y comunidá navarra con un 39,1. Nos últimos puestos de la llista d’usuarios d’Internet tán Estremadura con un 20,1 y Castiella-La Mancha con un 21,3 por cientu.

A un día de la celebración del Día Internacional de la Rede, la nuestra comunidá apaez hacia la mitá del ranking del estáu ente les que rexistraron un nùmberu más altu de conectaos nos primeros meses del añu 2005, sobre los que se basa l’informe de la SGAE. La media estatal ta anguañu, según los datos conteníos nel anuariu, nun 33,6 por cientu, colo qu’Asturies supera en dalgo más d’un puntu a la media, un datu asemeyáu al d’Aragón que s’asitia dalgo penriba de la nuestra comunidá con un 34,2 de conexones a Internet.

Pa celebrar el prósimu día d’Internet, que tien llugar el 25 d’Ochobre, dende la Rede de Telecentros ta acabante de ponese en marcha la una convocatoria que tien por títulu “Internet y yo, esta ye la mió hestoria”. El certame de calter lliterariu ufierta’l sortéu de dellos ipod d’Apple ente les presones qu’unvíen un rellatu sobro’l so contautu con Internet y como camudare la so vida por mor d’ello.

La hestoria pue cuntase hasta’l mesmu día 25 d’ochobre emplegando pa esto la páxina web entamada pola Fundación Ctic na direcición www.fundacionctic.org/historia.

Direición de la Convocatoria

El festival Visionica ’05 amuesa en Xixón hasta’l prósimu 27 de payares les últimes propuestes de les tendencies del arte actual. L’atopada multimedia ufierta un completu recorríu pel panorama internacional de los nuevos creadores. Trss l’ésitu de la primer edición, esti proyectu de difusión y socialización sigue apostando por componer un cuadru representativo del presente de la cultura más contemporánea.

Visiónica ’05 ofrez una propuesta variada y multidisciplinar, treslladando esti puxu a caúna de lee sos secciones principales: esposiciones, conferencies, proyecciones y directos audiovisuales. La programación d’ esti añu cuenta na sección de conferencies cola participación de teóricos y activistes de la sociedá-rede como Javier Candeira, nome destacáu nel desarrollu d’ Internet y la cultura dixital, o Iñigo Medina, miembru de la Sociedad de las Indias Electrónicas y de l’ asociación Ciberpunk.net; amás va entamase la presentación de l’asociación AsturLab HackLab, que promueve la investigación popular y entusiasta de las posibilidades de les nueves tecnoloxíes como formes d’espresión artística. El ciclu de conferencies va completase con una charla del colectivu Mildiez.net sobre la utilidá y eficacia comunicativa de los weblogs.

Nel apartáu d’esposiciones, los artistes Carlos Cuenllas y dEmo van amosar los sos ensamblaxes escultóricos y enseñarasé tamién la obra gráfica d’Evru (enantes conocíu como Zush). La más internacional de les exposiciones va tar dedicada al tema de la Arquitectura Avanzada futurista y hi-tech, cola participación d’arquitectos procedentes de Los Ángeles, Nueva York y Frankfurt: M. Espina (Patterns), H. Díaz Alonso (Xefirotarch), A. Rahim y H. Jamelle (CAP), O. Tessman y M. Becker (F-U-R). Por último, la xoven pintora avilesina Cristina Cuesta va esponer les sos obres d’ inspiración abstracta y paisaxes dixitales.

El portavoz nacional d’Izquierda Asturiana (IAS) Inaciu Llope pide al gobiernu del Principáu qu’ésti tome la iniciativa pa rexistrar un dominiu propiu p’Asturies, como acaba de facer la Xunta de Galicia, siguiendo los pasos daos enantes pola Generalitat de Cataluña a instancies d’entidaes en defensa de la cultura y la llingua propies d’esi país.

Tres l’anunciu por parte del organismu intermacional ICANN, que regula los dominios d’Internet, de l’autorización de la puesta en marcha del nuevu ‘dominiu cat’, que va abellugar a los sitios de la rede dedicaos a la llingua y a la cultura catalanas, Izquierda Asturiana (IAS) solicita al Gobiernu asturianu qu’escomience les xestiones y busque apoyos d’empreses y otres instituciones pa solicitar el dominiu propiu .ast, al igual que fizo’l Gobiernu gallegu col dominio .gal.

Según Llope “nos últimos años amosóse qu’esiste una demanda d’un dominio asturiano ya que cientos d’empreses y d’ instituciones asturianes tan rexistraes nel dominiu .as, que nun ye un dominiu propiu asturianu -sinón que pertenez a les isles Samoa Americanes- pero que los internautes ya adoptaron provisionalmente énte la falta de dominiu propiu como’l dominiu qu’identifica a Asturies nel ciberespaciu”.

Pal portavoz de IAS, “lo que nun principiu nun yera más qu’ una ocurrencia, pasó adquirir carta de naturaleza dende’l momentu en que grandes empreses como Telecable, o instituciones como l’Ayuntamientu d’Uviéu, utilicen, ente munchos otos, el dominio .as, colo que se demuestra qu’esiste una necesidá d’ identificación de lo asturiano nel ciberespacio”.

Por ello pa Llope, “aprovechando la puerta abierta que dexa al dominiu la aprobación del dominiu .cat el Gobiernu asturianu había potenciar la nuestra cultura, la nuestra llingua y los nuestros productos promoviendo la concesión d’un dominiu propiu qu’asitie Asturies nel mundu con identidá propia, lo que sin dulda va reportar múltiples beneficios”, afirma’l voceru de la organización nacionalista.

ICANN (Internet Corporation for Assigned Names and Numbers), l’organismu internacional que concede’l resxistru de dominios na Rede, acepta la propuesta formulada por varies entidaes de Cataluña, ente elles el Gobiernu de la Generalitat, de que la identificación .cat pueda utilizase pa nomar sitios web de la comunidá llingüística y cultural catalana.

La decisión de ICANN sienta un precedente pa que d’agora n’adelantre cualaquier comunidá idiomática, non necesariamente con estáu propiu, pueda disponer d’una identificación de los dominios perteneciente a ella. Hasta agora los identificadores nacionales limitábense a países independientes y col so corrspondiente organismu de rexistros de sitios web.

La propuesta agora aprebada ye una iniciativa de PuntCat, una entidá ensin ánimu de lucru que de cuantayá fai campaña pa consiquir que la comunidá de llingua catalana tenga un nome de dominiu propiu. ICANN acepta esta posibilidá con una fórmula alternativa a les hasta agora más corrientes: l’identificador .cat va ser un dominiu patrocináu por un esponsor, que se fai responsable de tolos nomes rexistraos. El Gobiernu de la Generalitat va ser l’esponsor del nuevu dominiu llingüísticu, al través d’una fundación creada pa tal fin y na que van participar entidaes públiques y privaes.

puntCat