Plástiques

“Nun digo que me copiaren la idea, porque la regalé; pero sí qu’esto demuestra que la idea ye bona”. El pintor xixonés Manuel Grande, qu’almacena nel so taller más de 400 metros cuadraos d’obra plástica y desarrolla dende 1976 la metáfora pictórica del bosque como espaciu común, resume nesos términos la sensación que-y produxo contemplar cómo l’Ayuntamientu de Madrid honraba a les víctimes del 11-M con un ‘Bosque de los ausentes’ poco depués qu’él mesmu ufiera por carta al alcalde de la capital un proyectu mui asemeyáu.

El pasáu 15 d’abril, tres díes depués de los atentaos islamistes que provocaron la muerte a 192 viaxeros de trenes de cercaníes na capital d’España, Grande empobinó-y una carta certificada al alcalde Alberto Ruiz Gallardón na que-y amosaba la so disposición a ceder una de les sos instalaciones, una pieza de grandes dimensiones (cuatro metros d’altor por 24 d’anchura) n’alcordanza de les víctimes de los ataques.

Pesie a que la obra pue constituyir un mural, la idea na que Grande vien afondando dende hai más de dos décades ye la distribución de les pieces que formen esi mural en triedros de gran verticalidá, axuntaos toos ellos nun “bosque” concebíu pa que la participación d’otros pintores y ciudadanos puea dir sustituyendo les pieces orixinales por otres nueves. La metáfora central ye contundente: La pintura como una biesca de convivencia na que toos cabemos y na que la collectividá va medrando, gracies al esfuerciu común, combatiendo con lluz a la intolerancia.

D’ehí que Manuel Grande, que yá ufriera la so obra a la ciudá de Nueva York con ocasión de los atentaos del 11 de setiembre de 2001, decidiere comunica-y al alcalde de Madrid la so voluntá de regalar la so instalación pa honrar la memoria de les víctimes del 11-M.

Tres selmanes depués d’unviar la carta, l’artista xixonés lleó na prensa que Ruiz Gallardón instalaría una biesca integrada por 192 olivos y cipreses na glorieta d’Atocha como homenaxe a los fallecíos nos ataques terroristes de la capital, lo que-y suxirió una posible relación de causalidá ente’l so unvíu y la decisión del alcalde.

Pintor de dedicación esclusiva dende finales de los años setenta, la obra abstracta, simbolista y lluminosa de Manuel Grande suscitó nos últimos años l’interés d’empreses, galeristes, coleccionistes y Corporaciones municipales. Nel so taller del barriu xixonés de Contrueces, Grande almacena, ente otros munchos trabayos, cuatro grandes murales llistos pa ser cedíos a otres tantes ciudaes.

Web profesional de Manuel Grande

Reivindicar el sentíu del olfatu pa sacalu del escaezu. Con esi oxetivu central, la Casa Duró de Mieres acueye dende güei y hasta’l prósimu 13 de xunu una atípica esposición de fragancies na que’l visitante pue alendar hasta 60 arumes naturales convenientemente aisllaos y purificaos por especialistes pa que la ñapla humana puea apreciar la fragancia correspondiente del mou más óptimu posible.

Na amuesa ‘Por narices’, de calter itinerante y entamada pola Fundación La Caixa, nun falten los testos en llinguaxe braille -sistema d’escritura táctil emplegáu polos invidentes-, como apoyu de lo que los organizadores conciben como una “lliberación de la servidume de la escritura” convencional.

La esposición aporta a Asturies depués de visitar la llocalidá alcarreña d’Azuqueca d’Henares y la población catalana de Falset, y darréu pieslle les sos puertes en Mieres saldrá otra vuelta al camín pa colar rumbu a Alcalá la Real, n’Andalucía.

La esposición que podrá visitase na Casa Duró, allugada na plaza’l Carme de la Villa, incorpora namás cuatro arumes xeneraos artificialmente: la fragancia a escuela (un amiestu de mandarina, viruta de llapiceru, urea, povisa y humedá), a ilesia (una mecigaya de povisa, inciensu, cera y humedá), a chicle y a biesca quemada.

Parte de la obra d’Aurelio Suárez, el pintor surrealista xixonés que vivió los sos últimos años roceanu a protagonizar esposiciones, rescamplará en Xixón. El Muséu Casa Natal de Xovellanos acueye a partir del prósimu vienres y a lo llargo de tola temporada de veranu la amuesa ‘Mundo onírico’, integrada por una serie completa de lo que’l desapaecíu artista xixonés denominaba bocetos.

Magar d’esa designación, les obres qu’agora van tar a la vista’l públicu na ciudá natal del pintor nun respuenden al conceptu tradicional de bocetu como trabayu ensin acabar como proyectu pa una obra futura, sinón que son obres autónomes feches ente 1983 y 1985, con gran despliegue plásticu ya iconográficu, nunes dimensiones habituales nel artista: 23 x 17 centímetros.

Autor d’una bayurosa obra qu’empezó a amosar n’esposiciones al final de los años venti, Aurelio Suárez retiróse de la fama pública na segunda mitá del sieglu y refugó asoleyar la so obra con una única escepción reseñable yá nel añu 1979, fecha na qu’accedió a esponer parte de los sos trabayos.

Suárez consumió los sos últimos años na estricta intimidá del so domiciliu de Xixón, onde siguió creando hasta el so fallecimientu, hai agora un añu. La esposición qu’agora asoleya el Muséu Xovellanos ye un avance de la catalogación de la obra’l pintor que ta faciendo l’estudiosu Saturnino Noval.

La obra del autor más reproducíu na hestoria de la fotografía aporta a Asturies. A partir de güei, la esposición ‘La mirada del corazón’ amuesa na Fnac de Parque Principado parte de los orixinales d’Alberto Korda, quien a primeros de marzu de 1960 captó en La Habana la imaxen d’Ernesto Guevara de la Serna, el Che, que tovía anguaño apaez en millones d’imáxenes propagandístiques espardíes per tol mundu.

El cubanu Alberto Díaz Gutiérrez, que garrara’l nomatu ‘Korda’ nos años cincuenta pol so paecíu fonéticu cola marca Kodak, tomó la hestórica fotografía del guerrilleru arxentinu nel trescursu d’un mitin de Fidel Castro cellebráu en La Habana, nel que tamién participaron Simone de Beauvoir y Jean Paul Sartre.

La obra de Korda llega agora a Asturies en formatu orixinal y failo con calter de cierta primicia, yá que la esposición que s’amosará na tienda de la Fnac allugada en Sieru volverá al so propietariu darréu acabe’l recorríu por otros tres establecimientos de la multinacional cultural, los de Barcelona, Valencia y Zaragoza.

Les fotos d’Alberto Korda, que falleció en París nel añu 2001, permanecerán colgaes de los espositores de la Fnac en Parque Principado dende’l mediudía del llunes que vien y hasta’l 15 de xunu. El públicu podrá visitar l’amuesa, con entrada llibre y gratuita, n’horariu de 10 a 22 hores, de llunes a sábadu.

L’arte contempráneu d’Asturies afonda so güelga n’Arco. La prestixosa feria internacional madrilana, ún de los principales motores de les artes plástiques d’anguaño, peslló sos puertes tres de recibir nesta edición a 200.000 visitantes y propiciar la venta de mediu cientu d’obres d’artistes asturianos que colgaben sos trabayos nos espositores del certame.

Namás la galería uvieína Vértice facturó unes cuarenta obres de los artistes qu’amosaben so producción nesi ‘stand’. Particulares, pero sobre too galeristes, mercaron trabayos d’Isidro Tascón, Matarranz, Soledad Córdoba, Herminio, Kely y Lisardo, ente otros.

A esi éxitu de ventes, que yá por sigo mesmu engrasa la maquinaria de la industria pictórica contemporánea d’Asturies, hai que-y amestar la proyección algamada por dalgunos autores asturianos na feria: un galerista italianu estudia montar una esposición con obres d’Agustín Bayón, y del mesmu mou la producción de Carlos Suárez podría viaxar a Xerez de la Frontera pa fin d’añu.

Pelayo Ortega foi ún de los principales nomes propios na Feria Internacional d’Arte Contemporáneu de Madrid. La galería Malborough vendió toles obres d’él qu’esponía nel certame, que constató que’l 60 por cientu de les compres fixéronles coleccionistes particulares.

Eduardo Úrculo, Pelayo Ortega, Luis Fernández y otros trece más que caminen pola so mesma sienda. Una quincena d’artistes formen la delegación asturiana na Feria Internacional d’Arte Contemporáneu de Madrid (Arco) en so edición de 2004, cuya apertura alitó yá los primeros movimientos de caxa nes galeríes d’Asturies que participen nel certame.

Particulares y empreses -ente elles, importantes corporaciones financieres con estimable poder adquisitivu- interesáronse dende la primer xornada de la feria na ufierta artística de les galeríes allugaes nel Principáu con representación nel eventu, qu’esperen ameyorar los resultaos económicos collechaos na edición de 2003.

La nómina d’autores del país con presencia n’Arco ta integrada, ente otros, por Pelayo Varela, compañeru de so propia obra nel puestu de la galería xixonesa Espacio Líquido; Carlos Suárez, cuyes obres cuelguen na delegación de la sala uvieína Altamira; Herminio, Matarranz y el fotógrafu Tomás Miñambres, presente nel ‘stand’ del diariu ABC.

Un total de 277 galeríes procedentes de 32 países -más de la mitá d’elles de fuera d’España- dan-y vida a Arco 2004, que nesta edición destaca a Grecia en calidá de país invitáu.