Plástiques

El direutor del Salón Internacional del Cómic del Principáu d’Asturies, Faustino Rodríguez Arbesú, presentó esti xueves en la XXXI edifición del Salón del Cómic del Principáu d’Asturies, que va cuntar cola participación de dibuxantes como’l creador de la viñeta ‘Pepín de Celes’, Luis Olmo, o’l xaponés Stan Sakaio Michael Golden y el francés Maurice Horn, ún de los creadores del movimientu ‘Procómic’, en 1965.

El Salón Internacional del Cómic del Principáu d’Asturies va desendolcase nel Centru de Cultura Antiguu Institutu de Xixón del 9 al 13 d’esti mes d’ochobre y va cuntar en total con 24 creadores invitaos, ente ellos dos asturianos: Jesús Pérez Losa ‘Suso-Mortimer’ y Alfonso Zapico.

Dende estí arranquen en Xixón varies esposiciones pictóriques en delles galerías de la capital xixonesa. Dende’l vienres 3 hasta’l 20 d’ochobre, la galería Pincel (Cai San Bernardo, 20) agospia les obres del pintor Victor Álvarez. Tamien dende’l vienres pero na sala d’arte Tioda (Cai Institutu, 9)va poder contemplase l’amuse de pintures del artista Ismael González entitulaes “Entre la luz y la niebla”. Por último el pintor Manuel García Iglesias va esponer una amuese de la so obra na fundación Fundación Alvargonzález (Cai d’Óscar Olavarría, 11).

Del 3 al 6 d’ochobre Xixón agospia l’amuesa de semeyes perteneciente al cuartu certame internacional de fotografía sobre patrimoniu industrial organizáu pola Fundación Metal Asturias. La esposición ta enmarcada dientro de les IX Xornaes Internacionales de Patrimoniu Industrial que van arrancar nel Paraninfu de la Universidá Llaboral de Xixón con un actu a cellebrar el miercoles 3 d’ochobre a partir de les 17:00 hores.

Nel certame participaron fotógrafos profesionales y aficionaos de cualquier edá y nacionalidá cola única condición de ser residentes n’Asturies y de que la obra nun fuera presentada en nengún concursu anterior. El día 27 de septiembre asoleyose públicamente’l fallu del xuráu nuna rueda de prensa que tuvo llugar nel Centru Cultural Caxastur Palaciu Revillagigedo de Xixón.

El primer premiu del IV Certame Internacional de Fotografía sobre Patrimoniu Industrial fí pa la obra “Passat Industrial III”, del fotógrafu Francisco Jose Gómez Castrillo, de Terrassa. El primer acessit a la obra “Caballos de Acero I”, del madrileñu Ralf Pascual Izarra. Y el segundo acessit fui pa la obra “Hidráulico”, del albaceteñu Juan Paños Fresneda.

Entama esta tarde, a las siete y media, la XVIII Amuesa d’artes plástiques d’Aviles. La esibición d’artistes xóvenes, que lleva por títulu “Q(7X7)” va tar disponible al publicu na Casa de Cultura d’Aviles. Nesta nueva edición van participar Jorge Faes Ruiz; Úrsula Faya Alonso; Virginia López Fernández y Sandra Paula Fernández, na modalidá de pintura; Patricia Vázquez n’escultura, Alicia Jimenez en video-instalación y Jose Jorge Nava Montes en fotografía.

Na inauguracion va tar presente’l director del Institutu Asturianu de Xuventú, Guillermo Martínez Suárez la conceyala de Xuventú, Paula Bartolome, y el conceyal de Cultura, Román Antonio Álvarez. L’horariu d’esibición hasta’l día del peslle (22 d’ochobre) va ser de once de la mañana a una de la tarde, y de seis de la tarde a nueve de la nueche. Los domingos y festivos, de once de la mañana a dos de la tarde.

p>El concursu tituláu “No violencia contra las mujeres” ye una iniciativa del Ayuntamientu de Mieres, al travies de la Conceyalía d’Igualdá y ta abiertu a la participación de muyeres cola única condición de ser españoles o residentes n’España. Los cartelos puen ser orixinales o ineditos y de tecnica llibre pero la temática de los mesmos tien que tar empobinada a denunciar la violencia escontra les muyeres.

Los participantes tendrán qu’entregar los cartelos ensín firmar xunto colos datos personales (nome y apellidos, fotocopia’l DNI, telefonu y direción) nun sobre cerráu col llema que quieren qu’acompañe al cartelu. El plazu d’entrega fina’l día 19 d’ochobre.

El premio pa la ganadora va ser de 490 euros y’l so trabayu va ser utilizáu como cartelu anunciador del día 25 de payares del año 2007, nel que la Conceyalía de la Muyer va organizar delles xeres pa cellebrar el Día Internacional de la Non Violencia Escontra les Muyeres.

Consulta equí les Bases

Hasta’l prósimu día 20 d’ochobre va tar disponibe la esposición benefica titulada “Camboya, una mirada hacia la esperanza” na sala Ámbitu Cultural del centru comercial Costa Verde de Xixón. L’amuesa ta organizada pola asociación Sauce cola intención de recaudar dineru pal Centru Kalapati de Camboya que dirixe’l xesuita xixones Kike Figaredo.

L’amuesa recueye semeyes sobre la realidá d’esti país del sudeste asiáticu azotáu pol rexime del dictador Pol Pot. Toles semeyes van tar a la venta y lo que se recaude va tar empobináu a comprar coses necesaries pal Centru Kalapati de Camboya

La ilesia parroquial del barriu avilesín de Llaranes va agospiar dende güei llunes una amuesa fotográfica compuesta por semeyes que muestren la evolución del barriu con motivu de los sos cincuenta años d’esistencia. La esposición ta organizada pola Escuela de Restauración del Ayuntamientu d’Aviles y pue visitase toles tardes hasta finales d’añu. Hasta güei l’amuesa tuvo instalada nel Colexu Públicu Ríu Gozón.

Tolos asturianos que nun superen los 35 años d’edá esti añu van poder presentar hasta 3 trabayos inéditos tanto en guiones como en personaxes y con tema y técnica de llibre elección pal ‘Certame Xuvenil de Cómics del Principáu d’Asturies’ hasta’l próximu 30 de setiembre y al travíes del Rexistru de la Conseyería de Cultura, Comunicación Social y Turismu, Institutu Asturianu de la Mocedá o en cualquiera de les Oficines d’Información Xuvenil.

El concursu, convocáu pol Institutu Asturianu de la Mocedá, busca premiar a autores asturianos que presenten un cómic robláu pol dibuxante y desendolcáu en trés páxines como máximu. El primer premiu ta dotáu con 2.500 €, 1000 pal segundu y 500 euros pal tercer clasificáu.

Bases completes

Redacción.

El vienres pasáu Xaviel Vilareyo presentó’l so primer llibru de rellatos ‘La causa más probable’, un llibru que según l’autor “costóme que los mios amigos amigos del círculu poeticu se metieren conmigo por supuestamente vendeme a un xeneru más comercial”. Y ye qu’esti ye’l primer llibru de narrativa de Vilareyo.

Pero’l vienres, esti escritor (que tamien ye músicu y artista plásticu), presentó una esposición de cuadros titulada ‘La fueya en blanco. Los actos de presentación del llibru y de l’amuesa tuvieron llugar nel Aula Abierta de la Llibrería Asturiana Trabe, allugada na cai Padre Buenaventura de Paredes 4 d’Uvieu, onde quedó abierta la esposición de pintura hasta’l 17 de setiembre.

A la presentación, que corrió a cargu del escritor ayerán Ánxel Álvarez Llano y d’Esther Prieto d’Ediciones Trabe, acudieron escritores como Helena Trexo, Bertu Ordiales, Josep María Mas, la pintora Marta Madera, y l’artista Ánxel Nava, l’abogada Nieves Pontón, les doctores Raquel Suárez y María Antonia Madera y el director de Radio Sele Xuanxo Mariño, Mely Fernández, asina como dellos medios de comunicación, ente otros.

Redacción.

;L’Ayuntamientu d’Ayer convoca un concursu de semeyes col títulu ‘Paisaxes d’Ayer, güei y siempres’ y nel que tienen d’ensalzase los valores naturales, patrimoniales o les costumes del conceyu. Los autores pueden presentar hasta seis semeyes inedites. El plazu pa presentar semeyes a esti concursu va finar el 15 d’ochobre y tien un premiu de 300 euros y otru de 100 euros.

Los trabayos han presentase na Oficina de Turismu d’Ayer, asitiada nel Complexu Cívicu Deportivu de Caborana, códigu postal 33684 y pue facese en persona o al travies de correu ordinariu. Pa recabar más información sobre’l concursu van poder dirixise al telefonu 985 481 439 o al travies de correu lletrónicu turismo@aller.es