Plástiques

p>

L’Ayuntamientu de Llangréu celebra esta edición trenta y seis de la Selmana de les Lletres Asturianes con una esposición y talleres de cómic en llingua asturiana. La esposición “Celebrando una Llingua”, un percorríu peles ediciones de la Selmana de les Lletres Asturianes, inaugurábase esti vienres coincidiendo col Día de les Lletres Asturianes y va poder visitase demientres esti mes de mayu nel Centru de Referencia de la Cultura y la Llingua asturiana Casa de los Alberti de Ciañu. Los talleres de cómic que van desenvolvese en llingua asturiana van tener llugar tamién na Casa los Alberti.

Estos talleres teórico-prácticos tán abiertos a tolos centros escolares del conceyu y va ponelos el dibuxante Ruma Barbero, llicenciáu en Belles Artes que recibiere montonera premios como l’Alfonso Iglesias (2009) pola novela gráfica Manzajú, Comarca La Sidra (2003) col cómic-book Marcianaes o’l de la Tertulia Mallory al Meyor llibru n’asturianu por La Chelita. El Salvador1992 nel añu 2012.

La iniciativa del CENTRU D’ALCUENTROS Y CREATIVIDÁ que xestiona la empresa CASVALI SERVICIOS INTEGRALES anuncia l’ampliación pa visitantes de la esposición “Los Clicks Reconquisten Asturies” hasta’l 5 de Xunu en L’Entregu. D’esta manera, los universales “clicks” van siguir trabayando en cada unu de los dioramas construyíos namá pa esta esposición con un marcáu homenaxe a Asturies, y na que puede contemplase pieces úniques y orixinales creaes con estructures y figures Playmobil. Dende’l Pozu Mineru, l’aeropuertu d’Asturies, el Castiellu de Gauzón, una fiesta de Prau,… y miles de figures Playmobil van siguir “conquistando” a les persones qu’asistan a la localidá asturiana de L’Entregu.

Tamién s’amplía’l plazu pa les votaciones del Concursu Nacional de Custom, que les sos pieces presentaes a concursu tán na esposición y el públicu asistente puede “exercer el so derechu al votu” escoyendo la figura creada con imaxinación, creatividá y distintes técniques.

Asina mesmu sifguen desendolcándose, tres cinco semanes, les Xornaes Culturales nes que tuvieron yá personaxes a los cualos dedícase-yos cada unu de los dioramas creaos y que d’esta manera tan especial rinden homenaxe a persones asturianes pola so conocencia, trabayu o dedicación.

Laboral presentaba esti dia “Acción Poética”, una esposición que reivindica la vida y trayectoria artística de Nel Amaro, unu de los artistes asturianos más prolíficos, heterodoxos y radicales de la so xeneración. Enmarcada nes Xornaes de Diseñu Motiva, na so edición 2015,” Acción Poética” va poder trate nel Centru d’Arte y Creación Industrial de Xixón hasta’l 15 de payares. La esposición presenta obra y documentación del trabayu desenvueltu por Nel Amaro na so polifacética carrera.

Con esti motivu celebrase a un alcuentru cola viluda del artista, Marta Baquero Velasco, que va tener llugar mañana miércoles, a los cinco de la tarde, nel antepar del Centru d’Arte y Creación Industrial de Xixón.

Nesti alcuentru va participar tamién Alfredo Aracil comisariu de la esposición.

Nel Amaro, yera miembru de l’Academia de la Llingua y ún de los poetes más combativos y modernos del Surdimientu. Nacíu en Quentuserrón (Mieres) en 1946, foi ún de los animadores culturales del Valle del Caudal de les dos últimes décades coles sos esposiciones y montaxes.

Información sobre la esposición

Demientres los próximos díes 23 al 27 de marzu, Cangas del Narcea va celebrar la so XIV Selmana Cultural, con un perinteresante programa d’actividaes que va entamar el llunes día 23, cola inauguración de la esposición colectiva d’artistes cangueses que se presenta sol lema “Arte con denominación d’orixe” y un cartelu de Neto. La cita va tener llugar na Casa de Cultura “Palacio Omaña”, a partir de les 19 hores y la esposición, va poder visitase mientres tola selmana nel horariu d’apertura de la Casa de Cultura.

El martes 24 va acoyer la proyeición del documental “La Descarga: documental de Cangas”, curtiumetraxe protagonizáu pola canguesa Foína del Pocu y Juan Ramón Lucas “Quédate equí”. El miércoles 25 la protagonista va ser lamúsica de la mano del tenor d’orixe cangués Moisés Molín, quien va cuntar col acompañamientu al pianu d’Olga Semosine. El conciertu va tener llugar nel Teatru Toreno, a partir de les 20,30 hores.

El xueves 26 volverá ser xornada musical, col conciertu la violinista canguesa Belinda Álvare nel Teatru Toreno, a partir de les 20:30 hores. Y pa finar, el vienres 27, la cantante Tania Pereira y la so banda van pesllar la XIV Selmana Cultural nel Teatru Toreno, a les 20,30 hores.

La entrega de Premios y naguración de la esposición del VIII Concursu de Semeyes LA SIDRA va tener llugar mañana vienres 6 de febreru na Sidrería La Galana de Xixón a les 20 hores, nun actu nel que va recibir el premiu LA SIDRA, dotáu con 800 euros (700 € en metálicu y 100 € en llibros)Óscar Chamorro de Xixón pola so obra, “Pecado Original”.

La Sidrería La Galana de Xixón sedrá de nueu’l llugar escoyíu pa la entrega premios del VIII Concursu Semeyes LA SIDRA, cellebráu nel 2014 y tamién pala naguración de la esposición coles 21 meyores semeyes esbillaes d’ente toles presentaes. L’actu entamará a les 20 hores, y los premiaos que van recoyer los sos premios van ser los que vienen darréu:

PREMIU LA SIDRA. Dotáu con 800 € (700 € en metálicu y 100 € en llibros) “Pecado Original”. Óscar Chamorro. Xixón.

PRIMER ÁCCESIT (50 € en llibros y un llote productos sidreros) “Begiratzen”. Carlos de Cos Azcona. Gipuzkoa.

SEGUNDO ÁCCESIT (50 € en llibros y un llote productos sidreros) “Cualquier momento es bueno”. José Manuel Parapar. L’Entregu.

PREMIU ESPECIAL SIDRA JR. con dos caxes de sidre JR Etiqueta Negra. “Kortxoa”. Carlos de Cos Azcona. Gipuzkoa.

El Concursu Semeyes LA SIDRA vien siendo convocáu pola revista LA SIDRA dende va dellos años y cunta col sofitu del Llagar JR. Al concursu presentáronse esta vegada un total de 362 semeyes, d’un total de 138 autores,de 12 naciones distintes.

Esti vienres 19 d’avientu, a les 19:00 hores, va tener llugar la inauguración de la esposición El quiosco de la música de Javier Antuña Zamarro na Pinacoteca Municipal Eduardo Úrculo.

El Quiosco de la música ye’l títulu d’una serie obres realizaes principalmente nos dos últimos años por esti artista llangreanu y que nos presenten un acercamientu a una visión personal y particular d’un universu propiu onde personaxes y llugares surden dende la so resonancia emocional más íntima. Un universu nel qu’edificios, fiestes o personaxes entrañables apaecen al traviés d’un usu armónicu del color y especialmente de les lluces.

Trátase d’una poesía visual ya interiorizante onde vibra la lluminosidá y la vida y que se nos presenta con materiales y aproximaciones nueves que Javier Antuña recoyó nes sos últimes esperiencies internacionales con esposiciones en Bélxica y nos Países Baxos.

La esposición El quiosco de la música del artista llangreanu Javier Antuña Zamarro va poder visitase del 19 d’avientu al 31 de xineru na Pinacoteca’l Conceyu Llangréu Eduardo Úrculo.

Mañana xueves, día 20 de payares, a les 20 hres nel local social del Atenéu Obreru de Xixón (Cl Cuadonga, 7 – 1o Izda.), va tener llugar una nueva sesión de Asemeyar. Nesta ocasión cunten cola presencia de la fotógrafa Sofía Santaclara.

El ciclu Asemeyar, de calter periódicu, consiste en qu’un fotógrafu de reconocíu prestíu proxecte’l so trabayu a los asistentes al empar que va esplicando los rellabicos del mesmu. Nes anteriores sesiones cuntamos cola presencia de García de Marina, Julio Herrera, Alex Zapico, Manu Brabo, Juan José Pulgar, Xurde Margaride, Matías Mariña, José Ferrero y Mercés Menéndez.

Asemeyar ye una actividá entamada pol Atenéu Obreru de Xixón en collaboración con Fotohof – Imaxe.

Esti vienres a les 6 de la tarde na Casa de la Mocedá de Sotrondio celebrábase la segunda sesión de los talleres de llectura sobre cómic n’asturianu cola participación de 9 neños y neñes d’ente 4 y 6 años. Los participantes nesti taller llevaben a cabu un xuegu rellacionáu colos autores y personaxes de cómic n’asturianu y ficieron distintes actividaes con viñetes del dibuxante Enrique Carballeira, too ello acompañaos por monitores de l’asociación cultural Bocina Nalón. Esta actividá inxértase dientro de les XIII Xornaes de Lliteratura Infantil y Xuvenil que se tán celebrando en Samartín del Rei Aurelio durante esti mes.

Esti mes de payares desenvuelvense les XIII Xornaes de Lliteratura Infantil y Xuvenil de Samartín del Rei Aurelio, que presenten esti añu la novedá d’unos talleres infantiles de llectura de cómic n’asturianu

Los talleres tán empobinaos a neños y neñes de 4 a 11 años y cuntarán cola presencia de dibuxantes de sonadía, como Enrique Carballeira, David Fernán o Ruma Barbero, o la traductora de los cómics d’Astérix, María Xosé Rodríguez.

Les Xornaes lleva tiempu organicennles la Oficina de Normalización Llingüística de Samartín del Rei Aurelio en collaboración cola Oficina d’Información Xuvenil del conceyu y Bocina Nalón qu’entama estos talleres, que van dividise en dos turnos. El primeru ta destináu a neños y neñes de 4 a 6 años y va desendolcase, en dos sesiones, los díes 14 y 28 de payares (18 hores) na Casa de la Xuventú de Sotrondiu. Mentantu, los neños y neñes con ente 7 y 11 años, tienen trés sesiones: los díes 7 y 21, na Casona del Bravial de Blimea, y el 28 en Sotrondiu.

La Casa de la Mocedá de Sotrondio acueye a partir de güei miércoles 12 de payares una esposición con dalgunos de los comics del dibuxante entreguín David Fernán. Na muestra recuéyense los títulos “El Inmortal”, “Industrial” y “La piedra de Samartín”, con guiones de los escritores Pablo Rodríguez Medina y Chechu García. L’horariu de visita ye de llunes a vienres, pela mañana de 10 a 13 h. y pela tarde de 17 a 21 h.

David Fernán algamó dos áccesit nel concursu de comics de la Comarca la Sidra poles obres Ragnarok, nel añu 2004, y La Llave, una historia d’Hugo Domlebun, nel añu 2006. Amás tien espublizaes les histories Xustiniano, L’home Marín o Azincourt.

Nel so estilu apuesta pol xuegu de lluces y solombres, con una composición de viñeta mui moderna onde los primeros planos xueguen un papel clave. El dibuxu, con un trazu a vegaes sombríu y puercu algama una gran espresividá que-y da al conxuntu la so obra un sellu mui definíu y personal.

Esta esposición ta dientro de les actividaes entamaes con motivu de les XIII Xornaes de Lliteratura Infantil y Xuvenil de Samartín del Rei Aurelio, que tamién incluyen teatru infantil y talleres de llectura.

A partir del próximu llunes 5 de mayu, y cuando tán a puntu de cumplise 10 años dende que la editorial asturiana Asturtoons, especializada en cómic y lliteratura infantil, viera la lluz, una esposición na Casona del Bravial de Blimea entamada con motivu de la XXXV Selmana de les Lletres Asturianes fai un repasu pel so llabor. Na muestra puen vese’l casi mediu centenar de publicaciones impreses llevaes a cabu a lo llargo d’esti tiempu por esta empresa dedicada a la lliteratura infantil .

Los sos primeros llibros tuvieron centraos nos personaxes de les tires d’humor gráficu qu’Enrique Carballeira, creador de la editorial, espublizaba na prensa, y a partir d’ehí siguieron cola creación de varies coleiciones de lliteratura ilustrada, onde destaca especialmente “Llingua de trasgu”, que ye la que presenta un mayor númberu de títulos, anque tamién hai otres en marcha como la coleición “El xigante que suaña” o “El gatu pirata”, con unos llibros que destaquen pola calidá de les sos ilustraciones, les ediciones cuidaes y les histories entreteníes pa les xeneraciones más moces.

Amás del llabor d’esta editorial na edición impresa, hai que destacar tamién tolos títulos que tien espublizaos en formatu dixital, y los llibros qu’escribieron pa ella escritores como Miguel Rojo, Xavier Frías Conde, Helena Trexu o Jorge Fernández, ente otros munchos.

Esta esposición va tar abierta al públicu na Casona del Bravial de Blimea de llunes a vienres de 9 a 13 h. hasta’l próximu 23 de mayu. El próximu martes 6 y el miércoles 7 de mayu dos grupos d’escolinos,-es del conceyu van visitar la muestra de la mano del responsable de la editorial Asturtoons, el periodista, dibuxante y escritor Enrique Carballeira.