Música

La Fundación Municipal de Cultura va poner a la vienta a partir d’esti llunes 18 les localidaes sueltes pa los Conciertos del Auditoriu y les Xornaes de Pianu Luis G. Iberni, hasta avientu. Una vegada rematada la vienta d’abonos pa dambos ciclos, ponense a la vienta estes localidaes con precios que bazcuyen ente los 10 y los 28 euros, pelos medios habituales y yá ensin restricciones de nengún tipu tres la escayencia de les midíes sanitaries autonómiques.

La conceyalía de Festexos celebra’l 24º Concursu de Rock Ciudá d’Uviéu Alejandro Blancu ”Escayu” pa impulsar la promoción y espardimientu de grupos y solistes asturianos de música pop-rock y “La Frontera”, “Obús” o Ariel Rot van ser dellos de los artistes convidaos.

El ciclu Interdisciplinar de Música de cámara d’Uviéu (CIMCO), presentáu esta selmana pol conceyal de Cultura uvieín, José Luis Costillas y la so directora, Cristina Gestido, entama esti próximu 26 d’ochobre. “Van Ser un total de diez conciertos, hasta’l 23 de xunu, con un percorríu pola música de cámara señaladamente variáu y conxugáu con otres disciplines”, indicó’l conceyal de Cultura.

El rock duru setenteru de los uvieinos Amon Ra va ser el protagonista d’una nueva sesión del ciclu de concierto Factoría Sound esti vienres 1 d’ochobre, a partir de les 21 hores,  cuando l’Auditoriu de la Casa de Cultura va enllenase del soníu d’una banda reconocía como referente n’España del heavy sicodélicu o proto metal.

Amás de ser un guitarrista polivalente, JOSEBA IRAZOKI (Bera, Navarra, 1974) demostró que se siente cómodu tantu cola composición como cola improvisación y va amosalo esti dia nel Teatru Xovellanos de Xixón.

Cola seronda, llega unu de los ciclos que convirtió a Avilés en referencia de los aficionaos a la bona música nel norte, Factoría Sound. Y fízolo con una banda qu’esquiza nuevos caminos nel folk, Moura, que xubió al escenariu de la Sala Escénica de la Factoría Cultural esti sábadu 25 de setiembre, a les 21.00 hores.

Dempués del ésitu n’agostu al campu con ocho conciertos per tolo alto, Factoría Sound torna al so formatu tradicional, so techu, y pieslla’l 2021 cola programación de cuatro recitales dende setiembre a Avientu. En dos escenarios, el del Auditoriu de la Casa de Cultura y la Sala Escénica de la Factoría Cultural.