Mundu

El Serviciu de Normalización Llingüística de la Comarca de la Sidra, en collaboración cola conceyalía de Cultura del Conceyu de Nava, tien abiertu’l plazu pa la inscripción, gratuíta, nun cursu d’asturianu de 30 hores, que s’impartirá en La Llaguna (Nava) del 15 d’abril al 24 de xunu, los llunes y miércoles de 17:30 a 19:00, y fadrá un repás a la hestoria y socioloxía, les normes ortográfiques, léxicu, sintaxis y morfoloxía, música, lliteratura y cine en llingua asturiana.

Los interesaos pueden informase y inscribise, hasta’l 14 d’abril, poniéndose en contactu col Serviciu de Normalización Llingüística de la Comarca de la Sidra (615798551) o bien cola Conceyalía de Cultura del Conceyu de Nava (985718412)

Mª Esther García López, Miguel Rojo y X. Anxelu Gutiérrez Morán

La Sociedá Asturgalaica d’Amigos del País acutó esti Vienres Santu pa una cita bien especial colos cuatro llingües que se dan cita a veres del Eo -l’asturianu, el castellán, el gallegu y el gallego-asturianu o fala-, cola celebración de los II Alcuentros de poesía “La Bendición de Babel”.

Estos alcuentros van tener llugar esti 29 de marzu na Casa Cultura de Castropol, a les 18,30 h., y van cuntar cola participación de destacaes voces representatives de la creación poética nestes llingües: María do Cebreiro Rábade, Vanessa Gutiérrez, Aurora García Rivas, Héctor Acebo y Luis Muñiz.

Xuntu col recital poéticu, nel actu daráse llectura tamién a la obra ganadora del I Concursu de Poesía Nueva Babel” y va celebrase una mesa redonda abierta a la participación del públicu asistente, que va tener la suerte d’esfrutar del alcuentru, la sonoridá y los matices d’esi Babel de llingües.

Antón Reixa, de la SGAE, púnxose en contactu col músicu asturianu Xabel Vegas, tres la carta abierta qu’ésti publicó nel so blogue de Público, p’anuncia-y que diera instrucciones de suspender la demanda y empecipiar un diálogu con Radio Kras “pa conocer el porcentaxe real del repertoriu SGAE qu’utilizamos y valorar que decisión tomen como autores”.

Amás, Reixa reconoz “el llabor fechu pola nuesa radio a favor de la música independiente y va comunicar a la AGEDI-AIE el cambéu d’actitú de la SGAE, en ficies de qu’estes entidaes reconsideren la so postura”, espliquen dende Radio Kras, que comenten que “pela nuesa parte, esperamos la comunicación oficial de la retirada de la demanda per parte de la SGAE y que les entidaes AGEDI-AIE tomen la mesma decisión”.Amás agradecen “toles amueses de solidaridá recibíes estos díes y el llabor d’espardimientu”, faciendo un especial reconocimientu a Xabel Vegas “pola so aportación a la busca d’una solución satisfactoria a esta situación inxusta”.

Les sociedaes de xestión de drechos d’autor ataquen a Radio Kras

La Universidá Popular de Xixón cunta con una ufierta de 150 cursos en tolos barrios de la ciudá. Ufiértense 2.218 places y los cursos van entamar a partir del 13 de febreru. La matrícula podrá facese dende’l 23 de xineru. Ente les novedaes destaquen los cursos de cocina que respuenden a distintos intereses, dende Cocina de fiambrera pa quien comen fuera de casa, a cómo cocinar verdures de múltiples maneres. Repostería fría pa les persones llambiones y p’aquelles que yá tienen conocencies y seyan amigues de la cocina de nueva espresión, cocina avanzada en miniatura y asina una montonera más.

Dientro de la importante ufierta nel campu de la fotografía destaca la programación d’un cursu de composición fotográfica, otru de la lluz en fotografía y el de fotografía urbana.

Tamién recuperen el cursu de Baille tradicional asturianu que se va desenvolver nel taller de danza del Centru de Cultura Antiguu Institutu, amás de la ufierta de dos cursos d’asturianu, unu básicu y otru mediu, nel Vieyu Institutu y nel Centru Municipal de L’Arena.

Información completa de los cursos

Iniciativa pol Asturianu refugó dafechu los planes de la conseyera d’Educación y Cultura, Ana González, que dicen “van suponer un ataque al texíu asociativu y empresarial que s’espresa en llingua asturiana”. Cuéntase con desaniciar les llinies de sovenciones en concurrencia competitiva p’asociaciones, empreses y p’actividaes cinematográfiques, “dalgo que se fizo d’espaldes a tol coleutivu asturfalante y ensin posibilidá nenguna de negociación”, denuncien.

Pa Iniciativa “la convocatoria taba bien lloñe de ser ideal y anque dende Iniciativa pol Asturianu s’acepta que yeren necesarios cambeos nun ye d’esta manera como han facese”. Pa la organización “ha de tenese en cuenta a los afectaos y escuchase toles voces, non acabar coles ayudes de forma unillateral y ensin alternatives”. D’esta miente, epsliquen “va tocase la llinia de flotación de munches empreses del sector cultural n’asturianu, como les editoriales, que yá taben pasando la so propia crisis y van ver amenorgaes les sos posibilidaes de visibilización de la so producción”.

Sicasí, consideren positiva “la medría del presupuestu n’otres partíes, principalmente l’apoyu a la música n’asturianu qu’ensin dulda sofitará la medría y promoción d’esta estaya de la cultura asturiana”.

Per otru llau, talanten que ye indispensable iguar la problemática del etiquetaxe n’asturianu, al qu’afecten estos recortes yá que les empreses qu’etiquetaben de forma billingüe dexen de recibir sovenciones pa sufragar el coste qu’ello suponía. Pa Iniciativa pol Asturiana ye necesaria “una protección llegal, en forma de Llei d’etiquetaxe asemeyada a la que tienen otros territorios, pa que les empreses que lo deseen puedan etiquetar esclusivamente n’asturianu y asina reconocer los derechos llingüísticos de les y los falantes del nuestru idioma, asina como apoyar l’etiquetaxe billingüe y l’usu del asturianu nel sector priváu con midíes que pueden salir a costu cero y dar importantes frutos na normalización del idioma”.

Esti sábadu, 8 d’avientu, l’Asociación Xuvenil Mezá, va celebrar en Bual la cuarta edición del Outono Cultural, mini-festival de música, arte y lliteratura que tien como fin “motivar y dar un poco de vida al occidente asturianu”. Na inauguraicón van participar Andrés Rodríguez Monteavaro, miembru organizador de l’Asociación Xuvenil Mezá; José Antonio Barrientos, alcalde de Bual y Xosé Antón Fernández «Ambás», personaxe bien relevante nel ámbitu de la cultura tradicional asturiana. Dempués d’esti actu protocolariu van entamar los actos cola ponencia de Llorián García Flórez titulada «Gaiteiras y pandereteiros. Xénero, tresxénero y poder na música tradicional asturiana», que tien que ver col so trabayu de tesis dientro de Musicoloxía de la Universidá d’Uviéu.

Pela tarde van concertrase la mayor parte de los actos. A les seis va celebrase la charra titulada «A morte del mundu rural n’Asturias» de Gerardo Fernández, activista y teóricu de la zona rural asturiana. Dempuéss de la conferencia vien la música: prmeiro va tocar l’acurdionista ñacíu na Ronda (Bual) Alejandro Martínez Llabres, reputáu artista dientro del panorama de la música del Conservatoriu n’Asturies y ganador del primer premiu nel 53u Certame Nacional d’Acurdión na categoría Senior Clásica celebráu n’Ourense en xunetu de 2010.

El segundu de los conciertos va ser el del tríu de jazz asturianu formáu por Mapi Quintana, Michael Llee Wolfe y Jacobo de Miguel. Esti grupu renovador de la música n’asturianu ta na so xira de presentación del discu “Xota pa tres”, trabayu que recibió esti añu una gran aceptación per parte de la crítica y del públicu en xeneral.

Dempués, pela nueche, na Discoteca Benymar, tocará’l grupu de «mecigaya-ska» La Tarrancha , qu’aportará a Bual pa presentar el so discu nuevu “Mecigayuska”. Al remate del alcuentru va cuntase con una escoyeta de música reggae, ska y otres sorpreses cola participación del pinchadiscos Rafa R. Valdés, más conocíu pol alcuñu d’El Corrector, nome del programa de radio que dirixe en Radio Kras.

Tolos actos van facese na Casa Cultura de Bual, sacantes los nocherniegos, que van facese na Discoteca Benymar.

Na financiación del actu collaboren el Conceyu de Bual (con parte d’aportación económica propia y con una ayuda del Gobiernu d’Asturies), la Caxa Rural, l’Asociación d’Hosteleiros de Bual y dalgún de los chigres y establecimentos de la zona.

Programa completu del V Outono Cultural

12:00. Entamu de les xornaes con Xosé Antón Fernández «Ambás» y representación del Conceyu

12:30. Llorián García Flórez: «Gaiteiras y pandereteiros. Xénero y tresxénero na música tradicional asturiana»

18:00. Gerardo Fernández: «A morte del mundo rural n’Asturias»

19:30. Alcuerdo: Alejandro Martínez Llabres

20:15. Alcuerdo: Mapi Quintana, Jacobo de Miguel y Michael Llee Wolfe.

00:30. Alcuerdo: La Tarrancha + pinchada de vinilos con El Corrector.

El Nuevu Teatru de La Felguera, nel conceyu de Llangréu, acueye esti vienres 7 d’avientu un conciertu de la xira 2012 “De lo fondero l’alma” de Marisa Valle Roso. Con Xaime Arias al pianu, Rodrigo Sturm cola guitarra y el gaiteru Pablo Carrera.

Dende Conceyu Abiertu por Samartín del Rei Aurelio ficieron pública va pocos díes una petición pa que l’Ayuntamientu del Conceyu en cuestión se punxera a trabayar nuna versión n’asturianu de la páxina web municipal, “p’asina responder a una realidá social del nuesu conceyu que nun taba atendida”, espliquen.

En respuesta, dende’l Conceyu de Samartín la Conceyala de Cultura, la señora Gema Suárez, respondió que nun diben a “tolerar crítiques infundaes”, afirmando que’l gobiernu del conceyu “tien un compromisu cola llingua asturiana y que si nun se fizo la versión n’asturianu ye por falta de medios económicos”. Amás, según la formación política que fizo la petición, la conceyala “insinuó que dende CA por Samartín actuamos de mena ofensiva contra’l Serviciu de Normalización Llingüística del conceyu”.

Énte ello, dende esta formación quieren esclariar y afitar dellos puntos:

1) Supónse que vivimos nuna democracia, fechu pol que dende Conceyu Abiertu por SMRA criticamos y criticaremos tolo que podamos lo que baxo’l nuesu puntu vista seya criticable nesti conceyu. Atalantamos precisamente como pocu tolerante y pocu democrática l’actitú de la conceyala y el gobiernu llocal, quienes declaren abiertamente “que nun van tolerar crítiques”, nesti casu al rodiu’l respaldu institucional al idioma d’Asturies.

2) En nengún momentu quiximos llanzar “ofienses”, como diz la conceyala, a los trabayadores de la Oficina de Normalización Llingüística Municipal, de fechu ye falsu qu’empobinaremos ofienses a la xente que trabaya nesi serviciu.

3) Nun teníemos información hasta agora, a lo menos los vecinos, de que l’Ayuntamientu demandara ayuda económica al Principáu pa dar a los ciudadanos esti serviciu. Esto espeya de nuevu la poca tresparencia y comunicación qu’hai nesti Ayuntamientu.

4) Pesie a que dende la conceyalía de cultura s’enllenen la boca col so compromisu pa col asturianu, hai que denunciar aspeutos como que decenes de cartelos tan escritos con toponimia allegal –La Rebollada/La Rebollá, El Entrego/L’Entregu, Cabañas Nuevas/Cabañes Nueves- y ello ye bien demostrable con pruebes gráfiques. Esti fechu ye una crítica pa los dirixentes políticos, non pa los y les trabayadores de la normalización.

5) Siguimos pidiendo una versión billingue de la páxina web del Conceyu de SMRA entendiendo qu’una bona parte de los vecinos d’esti conceyu son asturfalantes y que polo tanto la realidá llingüística del conceyu nun s’espeya na páxina web municipal. Atalantamos qu’esta midía y la so execución nun supondríen un gran coste económicu, razón económica na qu’escúdase la conceyal Gema Suárez. Güei día, cola esistencia de plataformes venceyaes al software llibre, hai medios pa facer posible la versión n’asturianu ensin grandes costos, pero falta enfotu.

En definitiva, remanten dende CA “queremos afitar que la nuesa postura nesti tema tien un afán constructivu y dende Conceyu Abiertu por SMRA siguiremos lluchando por aportar y construyir dende la base un conceyu meyor”. Per otru llau, afirmen, “en nengún momentu ficimos nenguna crítica xabaz al trabayu en materia de normalización llingüística desendolcáu dende’l conceyu de SMRA pero entendemos qu’hai evidentes deficiencies nesti sen como podemos ver col asuntu de la páxina web, igual qu’hai y hebo aciertos”.

Reclamen que la páxina web de Samartín del Rei Aurelio tea tamién n’asturianu

El próximu xueves 27 de setiembre, a les 19 hores preséntase na Casa de Cultura de Nava’l llibru tituláu “Llenteyes verdes na parede”. Va contase cola presencia de la escritora Aida Falcón Montes, la Conceyala d’Educación, Cultura y Emplegu María José Rey Canteli, y va introducir l’actu la periodista y presentadora na TPA Sonia Fidalgo. Pola editorial Pintar-Pintar asistirá Ángela Sánchez Vallina.