Lorient 2007

El conceyu de Xixón ta preparándose pa organiza en 2010, el Campeonatu d’España y el Campeonatu del Mundu de duatlón. La organización afirma que nun quier “que dambos campeonatos pasen a espaldes de la ciudá y de la comunidá autónoma que los va acoyer” y por ello, ente otres midíes, la páxina oficial (www.duatlongijon.org) va tener la so versión n’asturianu, amás d’en castellán, siendo tamién n’inglés pal Mundial.

Amás, y como ta afitao nes disposiciones llegales d’anguaño, los llogotipos van llevar la toponimia oficial del conceyu, convirtiéndose na primer competición mundial que va llevar nel so llogotipu un topónimu tradicional d’Asturies.

El duatlón consiste nuna prueba onde se compite en carrera a pie y en bicicleta. Davezu practícase n’ivernu (10 km de carrera a pie, 40 en bicicleta y 5 de carrera a pié), esistiendo una modalidá d’esprín, con distancies de 5-20-2,5 quilómetros y Llarga distancia (10-60-10).

L’Aconceyamientu de Xuristes pol Asturianu, pente medies de la denuncia d’un casu concretu fecha por un ciudadanu xixonés, vien de desixi-y a l’alcaldesa de Xixón que “corte pela freba cola discriminación llingüística que vienen careciendo los ciudadanos asturfalantes nos sos trámites burocráticos na casa-conceyu”. L’escritu de denuncia, rexistráu’l once del mes qu’andamos esplica’l casu nel qu’un xixonés sufrió discriminación llingüística, el pasáu 28 d’avientu de 2009 y al presentase nes oficines municipales pa notificar un cambiu de domiciliu dientro’l conceyu.

El ciudadanun en cuestión solicitó l’impresu normalizáu n’asturianu a la Oficina Municipal de la Llingua de Xixón ensin recibir respuesta y como nun había impresu más qu’en castellán hubo conformase con ello y cumplimentalu, non ensin cayer na cuenta de que’l topónimu llegal de la ciudá Gijón/Xixón, nun yera l’emplegáu nel impresu sinón el derogáu de “Gijón”.

Presentáu’l documentu a la funcionaria que lu “atendió” plasmó’l ciudadanu cuando ella entamó a rir tres lleer que nel impresu cumplimentáu figuraben les pallabres “fíu” ya “Inaciu”, pasando de la risa a aneciar en correxir Inaciu per Ignacio, magar que nel DNI que se-y amuesó figuraba’l nome d’Inaciu como propiu del so fíu.

Según el comunicáu de Xuristes pol Asturianu “hebo d’intervenir la superior xerárquica de la funcionaria pa finar colos malos modales y les burlles y permitir que’l ciudadán pudiere presentar la comunicación de cambiu de domiciliu”.

Por estos fechos y según AXA l’Ayuntamientu vulnera trés drechos del “maltratáu” ciudadanu xixonés:

“1u El drechu a empobinase n’asturianu a l’Alministración municipal, reconocíu nel artículu 4 de la Llei 1/1998 y nos artículos 3 y 4 de la Ordenanza Municipal d’Usu del Asturianu”, porque difícilmente un ciudadanu va poder exercer el so derechu a “rellacionase col Ayuntamientu y l’Alministración Municipal, mesmu n’asturianu qu’en castellán, oralmente o per escritu” ensin ser oxetu de “discriminación en forma dala por razón del so idioma”, si los impresos d’usu obligatoriu tan escritos en castellán.

2u El so drechu a que l’Alministración Municipal cumpla les normes llegales na so actuación, nesti casu el Decretu 105/2006, pel que se determinen los topónimos oficiales del conceyu, siendo’l de la capital el de Gijón/Xixón, que non “Gijón”.

3u. El so derechu a recibir un tratu dignu nel intre de facer un trámite dientro d’una oficina municipal que ye pal funcionariu un deber (artículu 54.1, de la Llei 7/2007, Estatutu Básicu del Emplegáu Públicu) qu’apareya falta grave’l so incumplimientu (artículu 92.b de la Llei d’Ordenación de la Función Pública del Principáu d’Asturies, al qu’espresamente empobina l’artículu 74 del Alcuerdu sobre Condiciones de Trabayu, 2008-2011, d’esi Ayuntamientu).

Xuristes pol Asturianu esixe a l’alcaldesa de Xixón que “dea les instrucciones afayadices pa cortar pela freba colos despropósitos burocráticos denunciaos” pete medies de: “ordenar la impresión billigüe de los impresos normalizaos, controlar qu’en toles dependencies alministratives s’empleguen los topónimos llegalmente establecíos y abrir espediente informativu pa comprobar el tratu desconsideráu pa col ciudadanu comunicante al que tien de siguir l’adopción de les midíes oportunes pa que fechos d’esta triba nun se repitan”.

Sabino Fernández Campo, ex-xefe de la Casa Real y miembru del gobiernu franquista d’Arias Navarro, morrió esta madrugada a los 91 años dempués de pasar dellos díes ingresáu nun hospital priváu de Madrid por una oclusión intestinal. El so cuerpu va tar esti llunes nel tanatoriu de Tres Cantos, en Madrid, y el martes entiérrase n’Uviéu.

Fernández Campo foi nomáu pol Rei Xuan Carlos, Conde de Llatores, anque la so relación col mesmu nun pasaba pel meyor momento nos últimos años.

Magar de ser asturianu, Sabino Fernández Campo, aprovechó en numeroses ocasiones la so presencia nos medios pa criticar l’usu del asturianmu, asina, nel marcu d’una conferencia sobre Xovellanos, en 2006, comentó que la oficialidá yera pa él “esaxerada” y defendió’l castellanu como llingua universal “Deberíamos estudiar inglés en vez de bable”. Sobre la presencia del asturianu nel estatutu d’autonomía afaló entós a llendar la situación poniendo dalguna pallabra n’asturianu como “Gijón con equis”.

La so intervención cabera sobre la cuestión llingüística, tuvo llugar en xunetu de 2008, cuando comentó que “l’asturianu convién caltenelu como una cosa íntima, como’l que tien dalgo en casa”, comentando amás que “tratar de sustituyir el castellán por otra llingua, como se fai en Cataluña ye una esaxeración peligrosa y desagradable que va a la escontra de la unidá que tanto trabayu costó consiguir”.

Les declaraciones nun sentaron bien n’ámbitos asturianistes, recibiendo respuesta del Aconceyamientu de Xuristes pol Asturianu.

El Centru del Profesoráu y de Recursos de Xixón (CPR-Xixón) entama un cursu de trenta hores embaxo’l títulu “Estratexes pal deprendimientu de la llingua asturiana y de la lliteratura”. La idea del cursu ye actualizar los métodos de los maestros y va entamar el cuatro de payares, y terminar el 4 d’avientu, con ente 20 y 30 places, otorgando a los maestros que superen el cursu, trés créitos. Les clases van ser de 5 a ocho.

El cursu va dase con metodoloxía abierta y flexible: esposición de materiales y de recursos, trabayu en grupu, difusión d’esperiencies, teniendo les sesiones un enfoque prácticu dafechu.

El plazu p’apuntase termina’l 30 d’ochobre. Los interesaos han pasar pela cai Camín del Cortijo, 17, en Xixón, llamar al 985342100 o escribir a carlolom@educastur.princast.es

Al cargu del cursu van tar los profesores Marián García Rodríguez y Xurde Fernández Fernández.

Información complementaria del cursu

L’Arribada entra na so selmana última d’actividaes cola presentación, esti llunes 28, de magar les 17:30 hores, del llibru “Ensayos na rede” de David M. Rivas, onde l’autor axunta artículos espublizaos primero en dellos medios dixitales. A les 18:30 Milio’l del Nido, presentador del programa “Recetes con cuentu” na TPA, presenta’l llibru col mesmu nome, espublizáu pola editorial Trabe.

A les 18,30, Pablo Antón Marín Estrada va presentar la novela ganadora del Premiu de Narraciones Trabe 2008, “La boca puerca”. Media hora más tarde, va dase llectura a la ponencia “La percusión en la música tradicional asturiana” de Julio Sánchez, rematando la xornada “Confluen-Jazz”.

Mañana marte, a les seis, va proyectase L’acorazáu Potemkin, con rótulos n’asturianu, será nel Salón d’actos del CCAI. A les 19,30, va presentase’l llibru últimu de Rafael Rodríguez Valdés, “Discursos llingüísticos y movimientu obreru na Asturies decimonónica”, ganador de la primer edición del Premiu Fierro Botas d’ensayu.

La xornada va pesllase col obra de teatru “La igua”, de Xaviel Vilareyo, colos actores María Xesús Rodríguez y Jesus Menéndez, estrenu que va tener llugar nel Salón d’actos del mesmu edificiu xixonés.

Programa completu de l’Arribada

La octava edición de la Selmana de teatru n’asturianu de Carbayín va entamar güei, cuntando con ocho actuaciones, que van sirvir pa celebrar trenta años de l’asociación organizadora.

A les ocho y media la tarde «El Hórreo», de Barcia va interpretar nel centru polivalente de Carbayín Altu, la obra «Nel cielu hai una estrella». Tamién participarán «Penedo Abayón», de Bual; «De Romandela», de Sariegu; «Los Sidros» y «La Comedia», de Valdesotu; «Rosario Trabanco», de Xixón; la «Compañía Asturiana de Comedies», y «Contraste», de Villaviciosa.

Nel centru hai tamién instalada una esposición del grupu dirixíu por José Ramón Oliva, a lo llargo de tol mes d’ochobre.

Va meses que se conoz que Alfredo González, ganador de la última edición del Premiu al Meyor Cantar en Llingua Asturiana cola pieza «La nada y tu», va representar esti añu a Asturies nel festival Liet International. Agora, la organización da la llista definitiva de participantes, que van actuar el 31 d’ochobre.

Los participantes son SomBy, de Finlandia; It Langstame en de dea, de Frisia; Fiach d’Irlanda; Sunrise non Secular, d’Escocia, De föfftig penns d’Alemaña; Sovvalniks, de Letonia y Sattuma, de Rusia, amás del cantante francés Zine.

L’eventu podría viaxar a Asturies na próxima edición, dempués de que l’añu pasáu, el grupu Dixebra consiguiere un mui bon puestu na que foi la primer participación d’Asturies nesti festival.

Dixebra fizo un mui bon papel na primer participación d’Asturies nel Liet-Lavlut

Artícu completu de Xuan Xosé Sánchez Vicente

Dientro de les Fiestes d’El Carmín de La Pola, en Siero, el vienres 17 va entamase’l VII Alcuentru Internacional de Bandes de Gaites, na Casa la Cultura y a partir de les 21:30 hores. Nél van participar Nova Fronteira d’Ourense, Beato Fray Pedro Soler de Murcia, Galandum Galundina de Miranda del Douru (Portugal), el prestixosu solista irlandés Jarlath Henderson y les formaciones asturianes Conceyu de Siero y Xiranda de Cualloto.

El sábadu, nel mesmu llugar va celebrase’l XIII Festival Internacional de Folclor María Campos cola participación del conxuntu rusu Kavkaz, los venezolanos Danzas Zazaribacoa y el so grupu Maisante, Agrupación Folklórica de Tetir (Canaries), Grupo Aldaba (Castiella) y el Grupo Municipal de Coros y Danzas de Frigiliana (Aragón), amás de los asturianos Agrupación Folclórica Cuélebre y Conceyu Cultural El Carbayu.

Nes fiestes va haber tamién concursu d’echadores de sidra, otru de baille a lo suelto, sesiones pa neños y neñes, espicha, verbenes, conciertos y la romería, terminando’l martes.

El próximu númberu de la revista “L’Asturianista”, publicación oficial del Partíu Asturianista, editada pola Fundación Nueva Asturies, va ser presentada’l VIENRES, 15 de MAYU a les 19.30 hores na sede del Conseyu de la Mocedá de Xixón ( Avenida Manuel Llaneza, 68). La presentación cuntará cola presencia de Xesús Cañedo, Secretariu Xeneral del Partíu Asturianista y Xuan Pandiella (Conseyu de Redacción) y será utilizáu con un cañón pa la so presentación.

La revista ta fecha ensin nengún tipu d’apoyu económicu esterior y ensin nengún ánimu de llucru por militantes del PAS y l’ayuda que recibe ye únicamente la del partíu.

Esti nuevu númberu cuenta con varios reportaxes sobre actualidá entre los que destaquen el de la crisis nel urbanismu de Xixón, el Muru de Cabueñes, el cierre del Fornu B de Arcelor, el desaniciu d’horros na parroquia de San Andrés de los Tacones o l’apoyu del Ayuntamientu de Ponga a la cultura asturiana.

Esti tercer númberu incluye una serie de comentarios al rodiu de los conflictos na educación, política municipal, etc…

El númberu recueye, tamién, una crónica acerca de la presentación de los llibros “Mundu, saber y decir nel refraneru” de Xesús Cañedo Valle y Xuan Xosé Sánchez Vicente y “Ría del Eo (España y Asturies: futuru y coyuntura)”. Y por últimu contién trés artículos de miembros del PAS col siguiente títulu: “Adanismu Asturianista” de José Antonio Fernández Alonso, “AVE: También menos de los gallegos” del presidente del PAS, Xuan Xosé Sánchez Vicente y “Un añu de Patria” de Xuan Pandiella Sánchez.

La Revista pordrá descargase de baldre en www.union.asturianista.as.

Páxina Web dende onde se pue descargar la revista