Hestoria

Esti vienres 20 de marzu, l’Achivu Hestóricu d’Asturies celebra la so Xornada de Puertes abiertes con horarios de visites empuestes a lo llargo de tola tarde. Un edificiu singular y un conteníu hestóricu amañosu faen d’estes xornaes una oportunidá única de conocer un pocu más sobre la hestoria d’Asturies. Los horarios de Puertes abiertes son de 15:00 a 20:00 y les visites tán programaes nesti vienres pa les 16:30, 17:30 y 18:30. El sábadu día 21 de marzu, l’horariu de puertes abiertes de 10:30 a 14:30 y les visites van celebrase a les 11:30 y 12:30.

Mañana vienres, 28 de payares, a les 18 hores, va empezar na see de la UNED en Xixón el cursu Arte y arqueoloxía del reinu d’Asturies: una nueva perspectiva, que va ser impartíu pol profesor-tutor de la UNED y arqueólogu Iván Muñiz López. Esta actividá formativa propón una revisión de la hestoria del reinu d’Asturies, dende los sos oríxenes hasta la so plenitú, al traviés d’una mirada que conxuga les últimes meyores na arqueoloxía y l’arte de dichu períodu.

El cursu va incluyir sesiones práctiques en Proaza y Santo Adriano (sábadu, 29 de payares) y nel xacimientu del castiellu de Gauzón, en Castrillón (xueves 4 d’avientu).

‘Una pregunta pa cada historia’ ye’l nome del taller pa xente adulto que se va desenvolver nel Conceyu de Corvera dende esti xueves y que va averase al Reinu d’Asturies o los oríxenes de la Xunta Xeneral del Principáu ente dellos otros temes que va desplicar Rafael Rodríguez Valdés, responsable de la Casa de la Llingua-Serviciu de Normalización Llingüística de Corvera, amás de Llicenciáu n’Historia pola Universidá d’Uviéu y Postgráu n’Archivística pola UNED.

N’esti taller van participar dellos otros historiadores especialistes na dómina medieval y moderna, como ye’l casu de Xuan F. Blas Costales, Jesús Fernández Fernández y Nicolás Alonso Rodríguez. Los talleres quieren introducir na Historia d’Asturies a les persones interesaes, siempres dende un planteamientu abiertu y rigorosu al empar col que s’acerca a cuestiones como’l Reinu d’Asturies, la cultura na Edá Media Asturiano-lleonesa, la conformación del territoriu asturianu, les condiciones de vida del campesináu, el papel de la Ilesia, los oríxenes del Principáu y la Xunta Xeneral. Les clases van dar comienzu esti día 6, n’horariu de 18 a 20 hores, nel Aula 2 del Centru Sociocultural de Les Vegues. El taller siempre va dase de xueves, con un llargor de 14 hores llectives. Les persones interesaes en matriculase pueden facelonel Centru Tomás y Valiente o nel Centru Sociocultural de Les Vegues.

La Casona del Bravial celebra esti mes de febreru’l so cuartu aniversariu como centru cultural, y va facelo contando la historia d’un edificiu que ta mui lligáu a la so propia esistencia. Ente los sieglos XI y XII la familia Fernández Miranda, procedente del conceyu de Quirós, asentábase na Casona del Bravial. Tiempu dempués, nel añu 1496, descendientes d’esa mesma familia treslladaríen la so residencia a la casona de La Cabezá, que munchos sieglos dempués va convertise nel conocíu como Castiellu de Blimea, al que-y dará forma en 1897 el Vizconde de Campogrande nun intentu de revivir les vieyes glories medievales.

La esposición, baxo’l títulu “El Castiellu de Blimea. Historia, lleendes, abandonu” fai un percorríu pela historia del edificiu y les families que lu habitaron basándose en datos bibliográficos, documentos antiguos y semeyes. Tola información apaez presentada en llingua asturiana gracies a la supervisión del serviciu de normalización llingüística del conceyu. De dalgún mou esta esposición pretende ser un homenaxe a un edificiu que tovía recuerden con munchu ciñu los vecinos de Blimea, y una manera de dexar constancia del so valor históricu. La esposición inaugúrase esti xueves 6 de febreru a les 7 de la tarde y va contar cola presencia de la conceyal de Cultura del conceyu de Samartín del Rei Aurelio, Gema Suárez Torre, que va tar acompañada pola historiadora que llevó a cabu’l trabayu de recoyida y escoyeta de los materiales, Belén González Collado. L’actu va tar abiertu a toes aquelles persones que quieran asistir. La esposición va poder visitase hasta’l 7 de marzu de llunes a vienres n’horariu de 9 a 13 h. Entamen asina les actividaes programaes pa celebrar esti cuartu aniversariu de la Casona del Bravial, que van siguir el próximu día 21 de febreru cola celebración del Día de la Llingua Materna, fecha na que se va llevar a cabu un taller esplicativu d’edición de la Wikipedia n’asturianu.

Esti vienres 7 de febreru, el CLub de Prensa del diariu La Nueva España va a acoyer la presentación n’Uviéu de la monografía del caderalgu d’Hestoria contemporánea de la Universidá d’Úviéu José Girón sobre la hestoria del socialismu n’Asturies y más concretamente la influencia que l’agrupación de Llangréu desenvolviera nesa hestoria ente 1897 y 1921. El llibru vieno asoleyáu pola Editorial Septem Ediciones.

José Girón Garrote, nacíu n’Uviéu’l 3 d’Ochobre de 1946 ye l’estudiosu de la hestoria contemporánea d’Asturies más importante n’exerciciu y el más veteranu de los caderalgos d’esta área de la universidá asturiana. Llicenciáu na especialidá d’Hestoria pola Universidá d’Uviéu en 1968, recibió ente otros el Premiu Estraordinariu de Llicenciatura en 1970. Foi profesor d’Hestoria nel Institutu d’Enseñanza Media de Mieres de 1968 a 71, y darréu ayudante del Departamentu d’Hestoria Contemporanea de la Universidá uvieina. Doctoráu n’Hestoria pola mesma Universidá en 1981, recibiócoles mesmes el Premiu Estraordinariu de Doctoráu en 1983. En 1985 consiguió plaza de titular na Facultá d’Hestoria, onde foi vicedecanu (1990-1998) y decanu (1998-2004). Recibió numberosos premios de la so especialidá, como’l Premiu Juan Uría del Principáu d’Asturies (1985).

Anguaño, collaborador habitual de la prensa local, espublizó en periódicos y revistes como Asturies Selmanal, La Nueva España, La Voz d’Asturies y El Comerciu, formando parte amás del elencu d’autores qu’iguaron la Gran Enciclopedia Asturiana. Impartió conferencies en numberoses universidaes d’Europa y América y ye miembru de la Real Academia de la Hestoria dende 2002.

Esti miércoles 6 de payares, a les 20:00 hores, nel Club de Prensa de La Nueva España, va presentase’l llibru de Ramón d’Andrés “Franco nos diccionarios y otres impertinencies alredor de la llingüística y les llingües”. El llibru vieno asoleyáu pola EDitorial Trabe.

Ramón d?andrés ye profesor titular de Filoloxía Española y Asturiana na Universidá d’Uviéu au entamó a impartir la primer asignatura de Llingua Asturiana (1985) y au lleó la so tesis de doctoráu, la primer realizada sobro sociollingüística asturiana y redactada nesa llingua (1988). Les sos investigaciones tan centraes n’aspectos gramaticales y sociollingüísticos del asturianu. Tamién realiza un intensu llabor de divulgación en llibros, ensayos y artículos de prensa.

D’Andrés ye tamién miembru numerariu de l’Academia de la Llingua Asturiana, na que trabayó intensamente nes Normes Ortográfiques y Conxugación de Verbos, na Gramática de la Llingua Asturiana y nel Diccionariu. Pertenez a la Fundación “Caveda y Nava”, de la que foi secretariu, y ente 2003 y 2007 exerció’l cargo de Xefe de la Oficina de Política Llingüística del Principáu d’Asturies. Ye miembru de la Xunta Asesora de Toponimia del Principáu d’Asturies.

Los díes 19 y 20 d’ochobre, un mes enantes de la convocatoria que se facía davezu, la Fundación Belenos entama en La Puela d’Allande una nueva edición, la XIV, del so Seminariu d’Estudios Asturianos, que nesta ocasión va tar dedicáu al “Güelga celta n’Asturies: un averamientu interdisciplinar”. Como asocede añu tres añu, el programa ye intensivu sábadu y domingu ya inclúi una visita al Castro de Chao Samartín amás de cuntar con especialistes del nivel de Xosé Lluis García Arias, Jesús Francisco Torres y miembros del coleutivu como Ignaciu Llope, Alberto Álvarez Peña o Xosé Nel Riesgo Fernández.

La xornada del sábadu 19 ábrese bien ceo, a les 10, cola presentación del seminariu y darréu a les 10:30 entamen les conferencies con Álvarez, que falará sobre “La Edá del Fierro n’Asturies” y, a les 12,Xosé Lluis García Arias que fadrá “Una reflexón sol celtismu llingüísticu: el casu asturianu”.

El preciu de la matrícula ye de 35 € y l’agospiu opcional en “La Nueva Allandesa” (dende la xinta del sábadu a la xinta del domingu) de 60 €. Los contautos y comunicaciones puen facese al traviés del corréu seminariubelenos@gmail.com.

El programa completu que pue consultase nel Facebook de la Fundación, ye’l que reproducimos darréu:

19 Y 20 D’OCHOBRE – PROGRAMA: SÁBADU 19 D’OCHOBRE 10:00 PRESENTACIÓN YA INAUGURACIÓN 10:30 JESÚS FRANCISCO TORRES MARTÍNEZ (Dr. en Prehistoria y Arqueoloxía) La Edá del Fierro n’Asturies: paleoambiente, esplotación del mediu y aspeutos culturales. 12:00 XOSÉ LLUIS GARCÍA ARIAS (Caderalgu de Dialeutoloxía, Universidá d’Uviéu) Una reflexón sol celtismu llingüísticu: el casu asturianu. 12:15 IGNACIU LLOPE (Psiquiatra y escritor. Fundación Belenos) Del Padre Carvallo a la Lliga Celta: historiografía del celtismu n’Asturies. 15:00 XINTA 17:30 ALBERTO ÁLVAREZ PEÑA (Etnógrafu. Fundación Belenos) El mundu de les mentalidaes na Céltica atlántica: un ensayu de mitoloxía comparada. 18:45 XOSÉ NEL RIESGO FERNÁNDEZ (Xeógrafu. Especialista n’Ordenación del Territoriu) Una propuesta pa la recuperación del llugar d’Asturies nel espaciu atlánticu européu. 23:30 FILANDÓN. FIESTA ASTURIANA DE NUEITE nel “Café Centro” con música del País. DOMINGU 20 D’OCHOBRE 11:00 CONCEYU ABIERTU 14:30 XINTA Y PIESLLU DEL XIV SEMINARIU

Programa completu nel Facebook de la Fundación Belenos.

La editorial LA SIDRA vieno acabante d’asoleyar una nueva publicación.”Noreña y la Sidra. Apuntes sobre la hestoria sidrera d’un conceyu asturianu”, del hestoriador noreñés Antonio Martínez Fernándezm que va presentase’l prósimu miércoles 18 de setiembre a les 19:30 na Casa de Cultura “Severo Ochoa” de Noreña. L’Actu de presentación ta dientru de la programación oficial de les Fiestes del Ecce Homo de Noreña gracies a la collaboración de la Sociedad Noreñense de Festejos (SONOFE) y l’Asociación Cultural InfoNoreña.

L’actu de presentación va finar con una amuesa gastronómica a cargu de la cheff llocal Estefanía Ferreras y na que se podrán degustar distintos tipos de pinchos cola sidra y/o la mazana como protagonista.

Noreña y la sidra foi la obra ganadora de la tercer edición del Premiu d’Ensayu Emilio Trabanco Trabanco. Un estudiu d’hestoria llocal que toma’l sector sidreru, en xeneral, y la industria sidrera, en particular, como exa principal y que tien en cuenta les connotaciones socioculturales de la sidra n’Asturies y la importancia del chigre y el llagar como espacios d’ociu y sociabilidá. La obra asoleya la hestoria sidrera de Noreña dende mediaos del s.XVIII, centrándose nel últimu terciu del s.XIX y la primera mitá del s.XX, finando col procesu de decadencia de la industria sidrera a finales de sieglu.

Noreña y la sidra ye una aportación novedosa a la hestoriografía sidrera asturiana, y a la llocal. Una primer hestoria sidrera de Noreña, que quier contribuyir a los estudios socioculturales asturianos y ser preséu pa investigaciones asemeyaes. Surde d’una investigación afitada nel trabayu archivísticu, hemerográficu y bibliográficu, a la que se-y amiesta material fotográficu, publicitariu y d’ellaboración propia. Con esti ensayu, l’autor quier “emponderar una industria escaecida nel conceyu, la de la sidra, que tuvo un pesu relevante na historia de Noreña”.

Antonio Martínez Fernández (1980) vecín de Noreña ye Llicenciáu n’Hestoria y Máster n’Analís Sociocultural pola Universidá d’Uviéu. Con Noreña y la Sidra, avérase a los estudios socioculturales – cola sidra como referencia – y a la hestoria llocal del so conceyu. Ye’l segundu llibru qu’espubliza, enantes, en 2009, asoleyara Exiliu Asturianu (1937-1939), obra de referencia na so temática. Tamién tien collaborao n’otres publicaciones como N’Ast. Cartafueyos d’Ensayu o Erada. Revista d’Hestoria Contemporanea d’Asturies, ente otres.

El senador d’IX, Jesús Iglesias, presentó una moción pa modificar la Llei 9/1968, de 5 de febreru, de Secretos Oficiales, afaciendo los sos conteníos a los preceptos constitucionales y a les esixencies de tresparencia propies d’una sociedá democrática, esaniciando la facultá de calificación reconocida a la Xunta de Xefes d’Estáu Mayor, estableciendo, amás, que dicha calificación ha ser motivada y tener la vixencia de la mesma una duración razonable, compatible amás col interés d’investigadores ya historiadores.

El pidimientu, robláu xuntu al senador per Andalucía José Manuel Mariscal, produzse dempués de que’l Gobiernu, escudándose nesa norma, refugara’l pidimientu d’información de dellos historiadores sobre documentos clasificaos del franquismu, referíos, ente otros, a “Organización y esplegue d’unidaes demientres la Guerra Civil”, la Repatriación y llicenciamientu de les unidaes espedicionaries en Ifni y Sáhara (1939-1955)”, les Actividaes clandestines y emisiones de Radio España Independiente (1946-1968)”, los Planes de continxencia pa faer frente a posibles amenaces pa la defensa nacional”, les Entregues de material aéreo per Estaos Xuníos (1955)”, a les Dotaciones de los buques de guerra italianos y alemanes en puertos españoles”.

Pa Jesús Iglesias, esa llei, previa a la Constitución de 1978, escarez de llexitimidá pal so caltenimientu, de la que, nes materies aludíes, resulta incomprensible la so aplicación cuidando que, en dellos casos, la información relativa a terceros países foi desclasificada nesos estaos.

El parllamentariu recuerda na moción que se trata una regulación preconstitucional que topeta con principios de tresparencia propios d’una sociedá democrática na que non cabo’l secretu eternu y que confier la facultá de calificación a la Xunta de Xefes d’Estáu Mayor.

La conseyera d’Educación, Cultura y Deporte, Ana González Rodríguez, aseguró esti martes 10 de setiembre que les monedes y sellu descubiertos apocayá nes escavaciones del castiellu de Gauzón, en Castrillón, van sirvir pa “ufrir lluz sobre un periodu bien desconocíu de la Hestoria d’Asturies”. La reconocencia de que desconocemos el nuesu pasúa enxamás enantes foi fecha por dengún cargu gubernamental asturianu de forma tan nidia.

La conseyera, que defendió “una política sostenía y coherente” nel campu de les escavaciones arqueolóxiques, referíase asina al períodu de la que trescurre dende los tiempos de la romanización hasta la nacencia de la Monarquía Asturiana. Rodríguez presentó xuntu al director xeneral de Patrimoniu Cultural, Adolfo Rodríguez Asensio, los últimos afayos arqueolóxicos llograos nes escavaciones del Castiellu de Gauzón. Nesti casu tratase d’un triente de Recaredo acuñáu en Zaragoza ente los años 586 y 601, un novén d’Alfonso IX y un sellu de lacre d’acebache.

El triente de Recaredo yera una moneda d’oru con un pesu 1,5 gramos y que pertenez al tipu numismáticu III de los acuñamientos de Leovigildo. Presenta la cara del rei nel anversu onde tamién apaez la lleenda Recaredus Rex, ente que nel aviesu consta’l llugar d’acuñamientu.

El novén d’Alfonso IX, pela so parte, ye una moneda de plata que presenta un castiellu nel so anversu y un lleón nel so aviesu.

El castiellu de Gauzón, asitiáu en Castrillón, ye la fortaleza más emblemática de los reis d’Asturies, circunstancia que destacaben les cróniques medievales, y convirtióse demientres los últimos años nun referente de los estudios sobre l’Alta Edá Media nel norte peninsular, lo mesmo que de los trabayos que tienen como oxetivu l’analís de los oríxenes del Reinu d’Asturies.