Gastronomía

Yá pue lleese’l númberu 122 de la revista La Sidra, dedicada a esta bébora d’Asturies con conteníos n’asturianu y castellán, ente los que destaquen nesta entrega la entrevista de la sección Muyeres del Llagar a Mari Carmen Lavandera del Llagar Casa Segundo o los reportaxes sobre les Sidreríes Sabiñago y Viejo.

Descarga en PDF del númberu 122 de La Sidra

Sara Vila Díez l’autora del llibru La huerta ecológica asturiana, va tar presente esti xueves día 30 a les 20.00h en La Semiente pa falanos él. Tamién de tol trabayu de campu que realizó pa consiguir la so información y de munchos otros pequenos detalles qu’atañen a la güerta tradiconal asturiana. Va Tar acomapañada de prologuista del llibru, Alberto Fernández Buznego, Rizos, espertu na materia agroalimentaria.

La güerta ecolóxica asturiana ye un manual básicu pa empecipiar nel llabor agrícola. Plantegáu d’una manera pedagóxico y senciello, métenos nes maneres tradicionales coles que se trabaya la tierra n’Asturies, los sos principales cultivos, los abonos y pesticides naturales, y los rudimentos pa consiguir una pequena producción autosuficiente.

Frutu d’un intensu trabayu de campu, el testu compleméntase amás con esplicaciones y tradiciones orales recoyíes ente los nuesos mayores, testimoniu vivu d’un pasáu qu’aspira a revitalizase nel nuesu presente. El centru Social La Semiente ta asitiáu na cai Eladio Garcia Jove de L’Entregu y l’entrada como simpre ye pública y gratuita. Amás el centru dispon d’una biblioteca pública propia del centru onde tamién puen atopase otres publicaciones realcionaes cola materia.

Un total de 18 establecimientos hosteleros de La Pola van sirvir demientres la fin de selmana de’l 17, 18 y 19 de xineru’l menú especial con motivu del 60 aniversariu de la estación iverniza Valgrande Payares. Los establecimientos que nun disponen de cocina van participar nesta iniciativa ufiertando un pinchu y consumición a un preciu zarráu.La conceyala de Desenvolvimientu Local, Industria, Comerciu y Festexos, Sandra Marineru, esplicó güei que mientres la fin de selmana los establecimientos participantes van ufiertar dos menúes, unu pa la comida y otru pa la cena. Dambos van tener un preciu de 15 euros. Asina, la comida va consistir en fabada asturiana, caldereta de corderu, arroz con lleche, pan y vinu. La cena componer de sopa de mariscu, carrillera, frixuelu, pan y vinu. Los establecimientos hosteleros participantes son los siguientes: Les sidreríes Los Collacios, Mino, Asturies, El Llerón, Les Arenas, La Sierra (namá menú comida), El Mercadiellu (Campumanes), y los restoranes El Carbayu (namá menú comida), San Feliz, El Yomar, Restorán La Carisa, La Boca’l Flaire, el restorán-chigre Tíos, El Filanguiru, Santa Cristina, El Reundu y la vinoteca La Cava (pinchu especial 60º Aniversariu). Les cafeteríes Cueto Negru y Telesilla, en Valgrande Payares, tamién se xunen a esta iniciativa. La conceyala, dempués de l’acoyida que tuvo esta xornada, pretende dar los pasos necesarios pa crear una asociación d’hosteleros nel conceyu, una y bones la propuesta foi valorada de forma positiva ente los asistentes a la xunta pa ellaborar el menú del 60 aniversariu de Valgrande Payares. Marineru esplicó que “la creación d’una asociación d’hosteleros ye una espinita que tengo clavada desque asumí’l cargu, y naide meyor qu’ellos saben les necesidaes que tienen, pudiendo asina, llevar a cabo jornada gastronómiques conxuntes ente otres actividaes interesantes pa la hostería y el conceyu”.

La Foz de Morcín ceebra esti domingu 19 de xineru el XXXIV Certame del Quesu d’Afuega’l Pitu, una celebración gastronómica bian afitada na zona central asturiana y qu’inclúi un concursu del qu’esi día a les 14 horas fai una puya colos exemplares premiaos en cada variedá d’afuega’l pitu. La fiesta ya entama’l sábado con una verbena pela nueche y desendolcase a lo largo de yola cornada del domingo con degustaciones y actividades pa tilos públicos. Como adelantu, esti día dábase a conocer que’lchef de Les Arriondes José Antonio Campoviejo, propietariu del restaurán El Corral del Indianu, ye’l galardonáu col Afuega’l Pitu d’Oru.

Nesti certame puen concursar ellaboradores residentes nos conceyos integraos na Denominación d’Orixe Protexida Afuega’l Pitu: Morcín, Riosa, Santu Adrianu, Gráu, Salas, Pravia, Tinéu, Balmonte, Cuideiru, Candamu, Les Regueres, Muros y Sotu’l Barcu.

La Hermandá de La Probe, de Morcín, tien abiertu’l plazu de presentación de pieces pa participar nel XXX Certame del Quesu d’Afuega’l Pitu. Los quesos han entregase a la Hermandá de La Probe antes del 18 de xineru de 2014, en persona o llamando al teléfonu 985 795 461. El xuráu va xuntase pa prebar y xulgar les pieces el mesmu día 19 a partir de es 18 hores.

El Serviciu de Normalización L.lingüística de Cangas presentóu estos días el sou calandariu de la güerta d’Asturias, material que forma parte d’una campaña más amplia destinada al sector ganadeiru ya agrícola de la zona ya que se feixo ente medias col Serviciu de Normalización L.lingüística de L.lena ya’l de Llaviana.

El calandariu vei chegar por corréu postal a cadaguna de las casas de la zona rural canguesa, acompañáu d’una carta firmada pol Alcalde ya la Conceyala de Cultura del Conceyu felicitando las fiestas ya recalcando’l sou apoyu a los sectores arriba mencionaos.

Los vecinos de la zona urbana podrán pasar a recoyelu a partir del día 23 pola Casa la Cultura Palaciu d’Oumaña. Amás, a partir de xineiru repartiráse’l material en centros docentes.

Con esta campaña los SNLs pretenden homenaxear ya afianzar el sou compromisu cono entornu rural, memoria encesa de la tradición ya garante d’un futuru sostenible.

Por iniciativa del Serviciu de Política Llingüística, la páxina web de turismu gastronómicu «Saboreando Asturias» ufierta a la xente interesao un vocabulariu rellacionáu cola comida con unos 400 términos en castellanu y la correspondencia n’asturianu y en gallego-asturianu. D’esta manera facilítase la consulta y puen comprobase correspondencies, amás de comparar vocablos ente unes llingües y otres.

Los platos y productos tradicionales recibieron nomes nestes dos llingües que llegaron hasta güei y que suponen una seña cultural más qu’amestar a la bayura gastronómica d’Asturies. El glosariu trillingüe, que ye’l primeru d’estes característiques -n’asturianu y gallego-asturianu- que se fai n’Asturies, busca recuperar y dar a conocer toes eses palabres de la cocina y l’alimentación.

El vocabulariu, agrupáu por orde alfabéticu, pue atopase na web «Saboreando Asturias», na sección «Comer en Asturias» y, dientro d’ella, n’apartáu «En asturiano». Nuna primer columna ta’l términu en castellanu, na segunda ta la palabra o palabres correspondientes n’asturianu y na tercera, la forma o formes en gallego-asturianu.

«Saboreando Asturias» ye una web del Plan de Competitividá Turística del Turismu Gastronómicu d’Asturies, firmáu pol Ministeriu d’Industria, Turismu y Comerciu, el Gobiernu d’Asturies, la Federación Asturiana de Conceyos, la Federación Asturiana d’Empresarios y les Cámares de Comerciu d’Asturies.

Criterios llingüísticos manexaos

Pa ellaborar el glosariu partióse de la información qu’apurren los léxicos publicaos sobre les dos llingües, amás de datos inéditos qu’hubo que buscar pa completar les llistes. Nun ye un vocabulariu eshaustivu y, por cuenta de la vocación divulgativa de la web, nun se recoyeron toles variantes dialectales fóniques, sinón namás les más estendíes.

Los sustantivos van ensin l’artículu, anque, cuando interesa destacar que tienen un xéneru diferente al castellanu, va puestu depués ente paréntesis: sartén (el). Ufiértense dacuando ún o dos sinónimos, los más comunes.

Nel casu del asturianu, siguiendo los criterios del Diccionariu de l’Academia de la Llingua Asturiana, basaos nos usos escritos y nel pesu demográficu de la variedá central, nun se recueyen les formes con diptongos decrecientes (ei, ou, oi) nin la metafonía vocálica por -u, amás d’escoyer f-, -ll-, -y-, -ñ- y -ch- en cuenta de h.-, -l.l-, -ch-, -n- y -it-. Polo tanto, nun se van atopar formes como queisu, coladoiru, chourizu, mortiru, h.ariña, garfiel.la, navacha, faneca o truita, sinón quesu, coladoriu, chorizu, morteru, fariña, garfiella, fañeca, navaya y trucha, anque dacuando pue ofrecese tanto formes con n- como con ñ- (nabu y ñabu).

Nel casu del gallego-asturianu, aplicóse un criteriu asemeyáu y escoyéronse les formes con -y-, con mantenimientu de -l- y pérdiga de -n-, en cuenta de les correspondientes con -ll-, ensin -l- y con -ñ-, menos espardíes xeográficamente o con menos pesu demográficu. Polo tanto, recuéyese cuyar, xardía, fereixolo o avía en cuenta de formes como cullar, xardiña, fereixó y avea. Nel casu de les palabres con -ll- (olla, cebolla, llimón) incluyóse tamién ente paréntesis la forma con -l- (ola, cebola, limón) por ser asemeyáu’l pesu demográficu de la zona del Navia-Eo onde se da esi resultáu.

Les sidreríes xixoneses Avenida, La Pámpana, Uría y Ríu Ástur celebren mañana’l so segundu aniversariu al llau de la marca de calidá “Sidreríes de Bandera” ufiertando a la so clientela la sidra a metá de preciu.

Sidreríes de Bandera nació en noviembre de 2011 col enfotu de identificar les sidreríes que s’esforcien por ufiertar una sidra calidable y que cumplen el decálogu que garantiza’l cambéu de vasu, variedá de “palos”, ritmu fayadizu, etc. Pa celebrar esti segundu aniversariu les sidreríes Avenida, La Pámpana, Ríu Ástur y Uría, allugaes na Avenida del Llanu y paraleles (Ríu d’Oru y Poeta Alfonso Camín), van ufiertar mañana demientres tol día sidra a metá de preciu, esto ye, al costu.

Los locales de Sidreríes de Bandera pretenden estimar a los clientes la so fidelidá por aciu un descuentu del 50% sobre’l preciu habitual. El descuentu va ser válidu demientres tol día y nun precisa de nenguna tarxeta de fidelización nin sorteos estraños. Tan solo con enfusase en cualesquier de los cuatro sidreríes y pidir una botellina de sidra va aplicáse-y automáticamente el preciu amenorgáu a tolos veceros.

Dende hai yá dos años, Sidreríes de Bandera fai mensualmente eventos gastronómicos ente los que destacaron l’Homenaxe al Cachopu, 10×12 y apocayá más d’un mes el Casinu Gastronómicu, que foi tou un ésitu y que partió más de 200 regalos.

Sidreríes de Bandera ye una marca calidable creada nel barriu del Llanu y que podría estendese a otres zones de la ciudá, yá que esisten otros establecimientos comenenciudos en ser analizaos y entrar nel colectivu.

L’Asociación Micolóxica La Pardina desenvolvió como cada añu les Xornaes Micolóxiques de Mieres que lleguaron esta fin de selmana a la so XXII edición.

La cita, que cunta col sofitu del Conceyu de Mieres al traviés de la conceyalía de Sostenibilidá Ambiental, foi presentada hai una selmana nun actu que cuntó cola presencia del alcalde, Aníbal Vázquez, y de representantes del restu de grupos municipales. Toos ellos acompañaron a Antonio Celis, presidente de La Pardina, qu’informó de la programación prevista pa estes xornaes qu’entamaron el vienres 15 de noviembre, con una salida y recueya y desenvolvieron delles actividaes a lo llargo del fin de semana.

Estes XXII Xornaes Micolóxiques de Mieres vienen acompañaes por unes Xornaes Gastronómiques nes que participen 14 establecimientos hosteleros y comerciales del conceyu y que se van allongar hasta’l 8 d’avientu.

Los Amigos de los Nabos, col enfotu d’averar la Confrería a la xente de La Foz y siguir promoviendo ya impulsando actividaes que contribuyan al caltenimientu de les nueses tradiciones y cultura popular, decidieron va cinco años crear los Alcuentros na Seronda, cola celebración del Amagüestu; los Alcuentros nel Iviernu, con La Matanza del Gochu y los Alcuentros na Primavera, cola Xira al Picu Castiellu y agora llama a celebrar esti sábadu 16 de Payares el que va ser III Amagüestu de la Confrería.

La Confrería Amigos de los Nabos de La Foz de Morcín, celebra’l sábadu 16 de noviembre l’III Amagüestu de la Confrería, rindiendo asina homenaxe a tolos Amagüestos que se celebraben antaño.

La fiesta va empezar a les 14 hores, nel Salón d’Actividaes Múltiples. A midida que lleguen los cofrades, familiares, anunciantes, vecinos, amigos y simpatizantes, toos van ser convidaos a: Un vinu de la Tierra de Cangas, Xamón Monte Neváu, cortáu magistralmente por Fidel, Quesu Montelarreina de Reny Picot. Embutíos del Angliru. Agua de Borines.

A les 14,30 hores celebrará la comida nel salón d’Actividaes Múltiples con un menú que va consistir en: Pote asturianu. Castañes asaes. Sidra duce del Llagar Herminio. Y de postre nun van poder faltar les natielles de Reny Picot.

Dende esti xueves y hasta el próximu 20 d’ochobre, la villa de Xovellanos celebra “Xixón de Sidra”, un completu programa cola bébora del país acompañada d’ensundioses propuestes gastronómiques, que van ufiertar les 37 sidreríes que participen anguaño nel festival al pie de los más de 34 llagares que se sumaron al cartelu. La fiesta sidrera escuerre superar les 62.000 botelles que fueron vendíes l’añu pasáu.

“Xixón de Sidra” foi presentáu’l miércoles nel Muséu del Pueblu d’Asturies y ta entamáu por Fenicia Marketing Gourmet, ye concebíu yá polos llagareros asturianos como un puntu de referencia dientro de la cultura rexonal. Esti festival convierte a les sidreríes asturianes en centros d’actividá social y gastronómica, demostrando, asina, qu’estos establecimientos son más que meros llugares d’alcuentru, onde la cultura del escanciáu ye bien importante.

Los llagareros piensen qu’esti eventu’l públicu puede conocer toles sidres qu’anguaño se producen n’Asturies. L’ésitu de la quinta convocatoria d’esti porograma reparar en qu’ente que en 2012 fueron 34 establecimientos los participantes, anguaño yá se algamar la cifra de 37. Cada restorán va acoyer el palu» de sidra del llagar que-y foi asignáu, ufiertando una botella y una cazuela o cazuelona de comida tradicional asturiana de creación propia al preciu únicu de 3 y 4 euros, en función del tamañu de la especialidá culinaria.