Galerías 2008/2014

La Casa de Lleón n’Asturies cumple XXV años nel país y la so dirección organizó esti domingu pasáu delles actividaes pa celebralo. A les 11 la mañana l’Alcadesa de Xixón, Paz Fernández Felgueroso, recibió a la directiva de la Casa, encabezada pol so presidente, Santiago Álvarez Seara y a la presidenta de la Diputación de Lleón. Los actos teníen como actividá central un pasacais de los tradicionales “pendones” de los pueblos lleoneses.

Na Plaza Mayor de Xixón y frente a la Casa Conceyu del mesmu, les autoridaes y cientos de persones ensamaes nel llugar pudieron disfrutar a les doce de l’actuación del grupu de baille Los Xustos y de delles agrupaciones musicales lleoneses.

A la una, la comitiva treslladóse hasta la Ilesia de San Pedro, onde ofició una misa Raúl Berzosa, obispu auxiliar d’Asturies. Darréu, los pendones d’hasta doce metros d’altor percorrieron el Muro de Xixón, la cai Menéndez Pelayo y l’Avenida la Costa hasta l’altor de la sede de la Casa de Lleón. El pasacais organizólu l’asociación “Pendones del Reinu de Lleón”.

A les trés celebróse una xinta na mesma sede, onde se-y entregó a l’Alcadesa de Xixón la Insignia d’Oru de la Casa de Lleón.

Asturnews ufre les semeyes de los pendones lleoneses que percorrieron les cais de la Villa de Xovellanos.

Más información alrodiu de los Pendones de Lleón

A les seis menos cuartu la xente entamaba a aconceyar alredor de la Estación de la Renfe d’Uviéu y les pancartes diben abriéndose una tres otra, cola bandera d’Asturies, en primer llugar, portada pol gaiteru Llorián García. Na primer pancarta, una amuesa del mundiu cultural y social d’Asturies, colos presentadores de la TPA, Xosé Ambás y Milio’l del Nido, el gaiteru José Ángel Hevia, l’artista Astur Paredes, la cantante Anabel Santiago y Fernando Ornosa, coordinador del Conceyu Abiertu pola Oficialidá, organización convocante, ente otros.

En segundu llugar pudo vese la pancarta de los representantes políticos y sindicales, como, ente otros, Jesús Iglesias, d’IX, Faustino Zapico de la UNA, Rafael Palacios, del Bloque por Asturies, l’alcalde de Ponga, de la Unión Asturianista, Candido Vega y el presidente de la URAS, Javier López.

Fuera yá del baberu principal pudieron vese otres cares conocíes en política, como Noemí Martín, Laura González y Francisco Javier García Valledor, d’Izquierda Xunida.

Amás pudieron vese delles pancartes de la Xunta pola Defensa de la Llingua Asturiana, de Xunta Moza, Xeira, SUATEA, FETE-UGT, la nueva formación UNA, la formación política de mocedá FAI! y el PCPE coles sos mocedaes.

Yá na plaza la catedral y con un mui bon día, nel escenariu abrió les intervenciones Fernando Ornoso, dando les gracies a los asistentes y recordando la necesidá de la oficialidá na reforma del Estatutu. Darréu, Xosé Antón Ambás, etnográfu y presentador del programa “Camín de cantares”, na TPA, foi l’encargáu de lleer el manifiestu de la convocatoria, onde ente otres entrugues llanzó al aire la que sigue: “¿Qué mal fadríemos los asturianos pa tener nes cúpules de los grandes partíos a persones que tan pocu apreciu-y tienen a la cultura asturiana?”.

La voz d’Anabel Santiago, que cantó dos pieces, púnxo-y el pieslle a un actu onde participaron 3.000 persones según al organización.

Asturnews ufre un ampliu reportaxe fotográficu de la xornada reinvidicativa y dellos vidios de lo momentos más importantes.

La carpa del VI Salón del Llibru Asturianu, asitiada xunto a la Plaza’l Parchís de Xixón, acoyó ayeri la presentación del llibru “¡Pa echar unes rises!, antoloxía de monólogu modernu”. L’antologador, Inaciu Galán, y los autores Benxa Pérez, Chechu García y Azucena Álvarez participaron d’un actu nel que pudieron sentise dellos monólogos de la voz de los propios autores y tres del que firmaron exemplares ente los asistentes.

A finales de la selmana pasada apaecíen nel Campus del Milán, n’Uviéu, delles pintaes reclamando soluciones pa la situación creada pola enmienda presentada por Félix Fernández de Castro a la escontra del títulu de Filoloxía Asturiana nes nueves titulaciones europees.Estes son les imáxenes.