Festival de Lorient

Dixebra va participar esti vienres día 8 nun espectáculu denomináu Fest Rock na 44 edición del Festival Interceltique de Lorient (Bretaña); el mesmu va desenvolvese nel escenariu central d’esti alcuentru músico-cultural, concretamente nel Espace Marine. La banda asturiana va abrir la sesión, pa la que prepararon un repertoriu especial pa la ocasión, con preferencia polos temes más folkis o con mayor presencia de la gaita, pero ensin escaecer el so socníu característicu onde s’entemecen tamién el rock o’l ska. A los componentes actuales va súmase la presencia nel escenariu del teclista Mario Fueyo (Dark la eMe) pa reforzar el soníu d’esti conciertu especial, amás va collaborar con ellos el músicu bretón Gäel Lefevere, del grupu Hiks, quien va aportar el son de la bombarda en delles pieces.

Otra manera, la televisión pública galesa S4C va grabar a Dixebra nesta actuación y tamién n’otros llugares de la ciudá bretona pa un programa especial sobre’l festival. Esta va ser la sesta vez que los asturianos toquen nos escenarios de Lorient, polo que yá son bien conocíos pol públicu avezáu qu’asiste a esti eventu tan importante pa les naciones celtes.

La segunda parte del espectáculu va tar protagonizáu pola banda bretona de rock Red Cardell, una de les más veteranes y con mayor sonadía y prestixu d’aquel país, que va tar acompañada pol Bagad Kemper, agrupación de gaita, bombarda y percusión, que ganó en ventiún ocasiones el Campeonatu Nacional de Bagadoù. La organización del festival presenta Fest Rock como un conciertu que va prestar abondo a los amantes de la cultura celta con un estilu etno-rock.

El Festival de Lorient de 2015 tendrá como países invitaos a Cornualles y la Islla de Man y desenvolverase del 7 al 16 d’agostu, axuntando los díes ente los dos primeros fines de selmana como fai davezu. Cornualles y la Islla de Man son dos de los países celtes con menos recursos ya posibilidaes polo que ya s’aconceyaren notres ocasiones pa protagonizar les programaciones del Festival. El Festival tien como nación invitada esti añu a Irlanda y l’añu pasáu foi l’añu d’Asturies nel Festival.

La Banda Gaites Camín de Fierro, agrupación de los conceyos asturianos de Proaza, Santo Adriano y Teberga, protagonizó la tarde del miércoles nel Festival de Lorient con un conciertu nel Espace Marine, el principal escenariu del festival bretón, nel qu’amosó una calidá interpretativa alloñada de lo que s’alcuentra davezu en bande con namái qu’unos años nel llombu. Embaxo la direición de Balbino Menéndez y Arsenio Ruiz, la perbona disposición de la Banda nel escenariu ufrió un soníu llimpiu y al tiempu forte que gustó abondo al públicu lorientés.

Una bona riestra de pieces tradicionales arreglaes con solos que salpicaben la interpretación fizo que la so actuación se ficiere curtia a pesar de desenvolvese nel caberu llugar de la programación de la tarde d’esti miércoles.

La Banda Gaites Camín de Fierro, agrupación de los conceyos asturianos de Proaza, Santo Adriano y Teberga, crease nel añu 2002. Primeramente integrada por 12 miembros entama la so trayectoria, non ensin dificultaes, coles mires de dar a conocer la cultura y música tradicional asturiana.

Progresivamente van incorporándose nuevos componentes cola ilusión d’algamar la meta propuesta hasta aportar a la cifra actual de 20 integrantes, que foron los qu’esta selmana vienen participando nes Nueches Máxiques de Lorient y ufriendo conciertos como’l del miércoles nel Espace Marin.

Cola denominación “Camín de Fierro” inténtase afigurar unu de los tantos puntos de mancomún de los trés conceyos. Ye equí onde apaez tola hestoria mineru-siderúrxica de la zona: nel valle había esplotaciones mineres d’onde salía’l mineral que yera unviáu por ferrocarril escontra la cuenca del Nalón, salida natural de la contorna, en Trubia. Esti tren mineru abrió’l camín ente los montes de los conceyos. Na actualidá, tresformóse nuna vía cicloturista, conocida a tolos niveles col nome de “Sienda del Osu”. Este ye l’orixe del nuesu nome, el camín de fierro que comunicaba los nuesos pueblos.

El Grupu de Baille Tradicional de Fitoria amosó una prestosa actuación nel Festival intercélticu de Lorient, na qu’estrenó l’espectáuculu que preparara a lo llargo d’esti añu y col que quier homenaxear l’aniversariu la so fundación, ha 25 años. Una bien filvanada escoyeta de dances y bailles tradicionales dexaron satisfechu al desixente públicu de la villa bretona, con Pericotes bien desenvueltos y pieces más populares como’l tradicional boleru.

Anguañu, el grupu ta formáu por más de 20 persones ente gaiteros, tamboriteros, pandereteres y pareyes de baille. Penriba de cualquier otros, los intrumentos más utilizaos nes actuaciones del GBTF son la gaita, el tambor, la pandereta, el panderu, castañueles y pitos. Sicasí, en dalgunes actuaciones úsase tamién l’acordión diatónica, el bombu, el vigulín, la flauta o la payel.la, como ficieron en Lorient.

El Grupu de Baille Tradicional de Fitoria (GBTF) fundóse en 1989 col nome d’Asociación Folclórico-Cultural San Antonio de Fitoria, baxo la direición de Joaquín Ruiz Prado. Nel so entamu, el grupu foi creáu pa participar nes fiestes patronales del pueblu, n’honor a San Antonio. Y nos primeros años de vida del grupu la influencia de Coros y Danzas de la Sección Femenina tanto nos bailles como na indumentaria foi patente nel GBTF. Pasín a pasu, esa distorsión de la tradición asturiana, alitada pol afán d’uniformidá de les décades anteriores foi quedando atrás gracies al interés creciente del grupu na investigación del folclore asturianu.

Esto foi dando llugar a la recopilación de pieces y bailles tradicionales recoyíos per tola xeografía d’Asturies y que pasaron a formar parte del repertoriu del grupu.

El Grupu de Baille Tradicional de Fitoria pon especial procuru na tresmisión de los bien de cantares, bailles y dances de les diferentes fasteres d’Asturies, cuidando de ser fiel al so orixe y dando amuesa de la gran bayura cultural asturiana.

La indumentaria utilizada nel GBTF correspuende al traxe tradicional asturianu utilizáu dende finales del sieglu XVIII hasta la metá del sieglu XIX. Si bien anguañu esta indumentaria tal cual nun ye usada davezu n’Asturies nos llabores diarios, sí representa la última forma autóctona de vestimenta del pueblu asturianu enantes del espoxigue de les nueves modes que llegaron a Asturies cola meyora de les comunicaciones a partir de 1850.

Les delegaciones de los países celtes presentaron los sos respetos a les autoridaes nun actu pletóricu de musicalidá intercultural nel que los grupos qu’animen el festival ufrieron una amuesa del folklor célticu acompangada de gastronomía y perdones de cada país.

Asturies presentó la so delgación a les autoridaes con una pareya de gaita y una pareya de baille, demientres los gallegos ufrieron un grupu de pandereteres y escoceses y los que vienieren de la Islla de Man ufrieron también bailles na presentación.

La recepción nel Ayuntamientu de Lorient ye cola recepción na suprefactura del Gobiernu de la República l’actu oficial cimeru del festival. El público aplaudió enforma les actuaciones.

El Pabellón d’Asturies en Lorient entamó na fin de selmana a revivir l’animación d’otros años cola participación de grupos musicales nuna programación qu’axunta l’ociu cola cultura y la gastronomía. Tres de delles actuaciones de Degañans y Viendren, ya pasaren tamién a tocar y baillar la delegación asturiana al completu cola Banda de Gaites Camín de Fierro ufriendo esti día un pequenu conciertu nocherniegu.

El Pabellón asturianu ye ún de los llugares históricos de preferencia pol públicu de Lorient pa pesllar les nueches de Festival.

Como tolos años nos que’l sol nun s’escuende nesti primer domingu d’agostu en An Oriant, les cais de la ciudá bretona arrodiáronse del calterísticu entusiasmu popular polo que significa Lorient y el desfile, en concretu, pa tolos que s’averen por esta villa esti día. L’ensame, ente la siella plegable o taburete sol brazu, axuntábase sobremanera na llarga recta na que France 3 (la televisión rexonal que retresmitía en diferíu’l desfile a partir de les 15,30 hores) asitiara toles sos cámares y estraordinariu esplegue enantes d’aportar al Port de Peche, onde dende l’añu pasáu fina’l desfile en llugar del Estadiu de Moustoir, onde agora entamen a desfilar les bandes enantes d’andar los dos kilómetros que separen los dos puntos de la villa.

Y ende, y en realidá en tol recorríu, esfrutose otru añu más d’un maraviyosu espectáculu de cuatro hores ensin interrupción, que combina dende les gaites del país homenaxáu anguaño, Irlanda, a los primos escoceses, los encaxes tallaos de los perguapos vistíos tradicionales bretones y l’exotismu d’asturianos y gallegos, los vecinos del sur.

Parte de la delegación asturiana salió nos primeros puestos de les 75 agrupaciones que componíen esti añu’l desfile. Abrió’l mesmu cola bandera ástur, el ganador del McCrimmon del añu pasáu, Jesús Fernández, y nel puestu 11 salía la Banda de Gaites Camín de Fierro que con una harmonía inusitada combinó pasacais en columnes magníficamente remanaes en pasos angostos y curves pronunciaes del percorríu ente l’Estadiu y el puertu pesqueru.

El Grupu de Baille Fitoria salió na metá del Desfile y tuvo que caminar pente’l sol del meudía, pero recibió los acaloraos aplausos d’un públicu, el bretón, qu’aprecia fondamente a la delegación asturiana, entá más nomada dende que Lisardo Lombardía entamar hai años a dirixir el Festival intercélticu más importante del mundu.

Galería de Fotos de La Grande Parade de Lorient 2014

Jesús Fernández quier ganar otra vuelta esti sábadu’l Troféu McCrimmon de gaita solista nel Festival de Lorient, dedicáu a les gaites asturianes y gallegues, como ficiera l’añu pasáu, pero va tener otros duros competidores ente los gaiteros asturianos que conformen la delegación d’esti 2014, toos ellos con muncha más esperiencia que la delegación gallega y por mor d’ello favoritos pa traer pa contra Asturies el Troféu. Pero en Lorient enxamás nun se pue dar un res por definitivo.

Esta competición gaitera desendolcase tolos años nel marcu del Festival de Lorient -l’eventu intercélticu más importante del mundu-, dedicáu esti añu a Irlanda, y cuntará esti sábadu cola participación de gaiteros bien nomaos nesta disciplina. El ganador de 2013 foi, como dicíemos, l’asturianu Jesús Fernández, per delantre del gallegu Zeús Rodrígues y los asturianos Álvaro Álvarez y Jorge Suárez.

Un total d’ocho participantes representen cada añu a les gaites asturianes y gallegues, que tendrán xunta Jesús Fernández a otru favoritu nel aniciu pa poer algamar el troféu: l’asturianu Álvaro Álvarez.

Los gaiteros tienen de pasar la dura preba del xuráu, compuestu por dos persones en cáuna de les trés variedaes interpretaes: música gallega, asturiana, y bretona.